Lăm dôm kơ jơhnơr dang ei, bơngai Viêt Nam lu bơ̆n đei oei tơ jơ̆p kơ dêh char. Arih lăm tơdrong pha ra gah tơdrong juăt păng khôi juăt đơ̆ng rim dêh char jơ̆ mĭnh tơdrong pơlong tih. Tơdrong hlôh hơđăl lu tơdrong chih hơmet tơdrong juăt, păng tơdrong hơgăt kơ khôi juăt…ưh kơ trŏ layơ kŭm hmă đĕch păng ‘bônh hăm đĭ đăng bơngai, mă lei pơm kiơ̆ trŏ lu khôi juăt gô bơwei păng kăl kơ pơm đơ̆ng rim kon pơlei lăm dêh char ‘noh. Păng adrol hloh, lu bơ̆n jơ̆ bơngai gah Kră Yang, rim Bơngai Lui đei krao wă arih thoi kơ dôm kon pơlei đơ̆ng dêh char ‘Bok Kei-Dei.

Năr ‘nâu, ‘năr 04/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai ‘BOK KEI-DEI ‘LƠ̆NG TƠPĂT

“Ơ kon bơngai: Tơdrong mă Kră Yang wă kơ ih pơm ‘lơ̆ng tơpăt, wă kơ đei tơdrong ‘mêm mơnat păng yak năm hăm jơhngơ̆m iơ̆m dim, pơyom kơ ‘Bok Kei-Dei ưh?” (Mika 6:8)

Lăm kơplah oei năm hrĕnh kiơ̆ kơ trong gre lơ, lăm ti wơ̆r kơjăp đơ̆ng klo inh, điên thoai lăm tơpang ti inh đei pơpơ̆. Inh đŏk hrĕnh nơ̆r roi tơbăt đei gơih truh đơ̆ng Nguyên Trang, bơngai oh lăm khŭl hŏk pơhrăm Nơ̆r ‘Bok Kei-Dei, “Mŏ ơi, krao khan kơ oh, đĭ hnam dơnŏ oh oei tơ’bơ̆p luât sư.”

Inh tơ oei gơning kơ iĕng ‘bơ̆t giơng hơ oei, mơn đei sơng iŏk tơdrong hiôk chơt tŏ sĕt lăm jơhngơ̆m hơdai hăm đon tơchĕng hiơ̆k bơngơ̆t. Inh pơ’lơ̆ng kơtit tơjur kơmĭl ‘măng gre tơ hơla, kial dơhlu tơdar mơ̆t dơhlu hrĕng đĭ đak hŭl hang oei bơ uh. Đĭ lăm loi kơ ‘bar sơnăm, inh hăm oh kơdâu đơ̆ng anih hnam jên, năm tơ luât sư.. Chă pĭnh tôm tơdrong trŏ hăm khôi juăt wă tơgŭm ŏh iŏk yua dơ̆ng hnam oei. Tĕp măt, jơhngơ̆m inh lăng tơ Kră Yang, apinh ‘Bă pơgơ̆r păng dŏng tơgŭm ŏh.

Kial dơhlu rơngơp ba đon tơchĕng inh năm tơ Tơ’ngla mă đĭ jơhngơ̆m lui yom păng kơkuh, kŭm jơ̆ ‘Bok Kei-Dei mă lu kon drŏkăn Sêlôpêhat dan đĭ jơhngơ̆m lui gơnang, đơ̆ng hơ’mon lăm Sơ̆p Hla Bơar ‘Bok Kei-Dei đei chih lăm Jô̆ Bơngai 27:1-7.

Dôm kơ tơdrong ‘Bok Kei-Dei đei dŏng tơgŭm bơih kon pơlei lăm đĭ 40 sơnăm anih char glă rŏ lăng đei răk jrŭ lăm jơhngơ̆m dôm kơ adruh ‘lơ̆p ‘nâu jơhngơ̆m lui gơnang kơjăp anih Kră Yang Yêhôwa. Pơ̆n nuih yak hlôi kơ dôm tơdrong khă găn đơ̆ng tơdrong juăt chăl sơ̆, lu kon drŏkăn Sêlôpêhat, đei Sơ̆p Hla Bơar Nơ̆r ‘Bok Kei-Dei chih hơđăl anăn đơ̆ng rim bơngai, jơ̆ Mahla, Nôa, Hogla, Milka păng Tirsa.Lu sư năm dơ̆ng ‘bơ̆t anăp Môis păng Êlêasar ‘bok soi, ‘bơ̆t anăp lu kră pơgơ̆r păng ‘bơ̆t ‘măng Bơsŭn Anih Akŭm. (Jô̆ Bơngai 27:1b-2)

Đĭ jơhngơ̆m lui gơnang kơ ‘Bok Kei-Dei tơpăt đơ̆ng lu kon drŏkăn Sêlôpêhat trŏ jơ̆ tơdrong đei pơlung tơiung inh păng Nguyên Trang sơ tơ̆p kŭl tăng ‘bơ̆t anăp Kră Yang lơ khei năr, roi tơbăt tơdrong đơ̆ng hnam dơnŏ oh, păng chơ chă tơdrong bơtho tơ’bôh đơ̆ng Sư.

Lu kon drŏkăn Sêlôpêhat pơma khan:

“Bă lu nhôn lôch boih tơ lăm char glă; sư ưh kơ kiơ̆ ôh lu tơpôl akŭm wă blah Kră Yang, wă khan lu khŭl Kôrê, mă-lei sư lôch yua kơ tơdrong yoch sư kơdih; păng sư ưh kơ đei kon drŏ-nglo ôh. Yua kơ kiơ anăn ‘bă lu nhôn sŭt lê̆ ưh kơ đei chih tơmơ̆t lăm lu adrĕch adrung sư yua kơ sư ưh kơ đei kon drŏ-nglo ôh?” (Jô̆ Bơngai 27:3-4a)

Tơdrong hlôh băt hơđăl khôi juăt đơ̆ng ‘Bok Kei-Dei, đei pơm kơ lu kon drŏkăn Sêlôpêhat nuih pran iŏk tơdrong juăt gah mŭk tơmam đơ̆ng ‘Bok Kei-Dei lăm tơdrong pơma dơnuh kơjăp, păng ‘bĕnh jơhngơ̆m lui tơpă lăm tơdrong ‘lơ̆ng tơpăt đơ̆ng ‘Bok Kei-Dei.

Đĭ rok trong mŏ ŏh nhi yak năm, nơ̆r Kră Yang tơpă jing ŭnh kơđeng kơ jơ̆ng măr nhi. Dôm kơ tơdrong tơm đei hơgăt lăm klo akăn mă ‘Bok Kei-Dei đei pơjing đơ̆ng blŭng a đei pơih măt oh. Nguyên Trang rai ‘bôh băt, sư đei đĭ jơhngơ̆m bơwei păng pơjing hnam dơnŏ kơdih kiơ̆ kơ dôm tơdrong kiơ sư khan ‘lơ̆ng tôm kiơ̆ kơ tơdrong juăt ‘lơ̆ng rŏ đơ̆ng mĭnh hnam dơnŏ Viêt Nam. Na jing lơ wơ̆t lĕch đak măt, Nguyên Trang kơplah đei mơmơnh, kơplah nhơ̆m ơh lăm jơhngơ̆m, “sư ngeh kơ, iŏk đĭ ‘nhŏng ŏh hơrih hơdai lăm mĭnh pôm hnam wă kơ hơdai bơwei lăng băl lăm bơyan tơngiĕt đơ̆ng dêh char ‘ngoaih, jơ̆ hiôk chơt, mă lei ưh kơ trŏ thoi noh mŏ ơi.”

Dơ̆ng ‘bơ̆t tơdrong gô hiong đĭ hnam oei yua kơ dôm tơdrong ưh kơ hơđăl đơ̆ng khôi juăt pơm kơ klo akăn nhi đei huŏng lăm dôm tơdrong hre đom iĕ truh hre đom tih đơ̆ng mĭnh ‘nu ‘nhŏng ŏh hơdai dơ̆ng hơnăn lăm hla ar anăn hnam.

Nguyên Trang pơ̆n nuih hŏk iŏk đon lui đơ̆ng lu kon drŏkăn Sêlôpêhat, pơdrơ̆ng jơhngơ̆m lui pran kơtang lăm ‘Bok Kei-Dei, lui gơnang lăm trong yak trŏ đơ̆ng Sư.
Tơpă thoi noh, jơhngơ̆m lui gơnang anih tơdrong ‘lơ̆ng tơpăt đơ̆ng ‘Bok Kei-Dei ‘mêm mơnat đơ̆ng lu kon drŏkăn Sêlôpêhat đei kơdih Sư pơkăm. Đơ̆ng lăm rim tơdrong, rim hlak Sơ̆p Hla Bơar Nơ̆r ‘Bok Kei-Dei, mŏ ŏh nhi đei mơn lăm jơhngơ̆m, đŏk păng mơ̆ng Nơ̆r ‘Bok Kei-Dei, Sư khan hăm Môis “Lu kon drŏ-kăn Sêlôpêhat pơma noh trŏ; ih athei asong lu sư teh jang sa minh đơ̆ng lăm lu ‘nhŏng oh ‘bă lu sư, wă khan ăn kơ lu sư teh jang sa đơ̆ng ‘bă lu sư.” (Jô̆ Bơngai 27:6-7)

Ơ Kră Yang ơi, Ih ‘mêm mơnat kơ lu mŏ ŏh kon Sêlôpêhat tơpă. “’Bok Kei-Dei Sư gah tơdrong ‘mêm mơnat” (I Yôhan 4:16), păng ‘noh tơdrong ‘mêm gĭt kơ dôm lu bơngai kon drŏkăn mă kơdih Kră Yang pơjing mă khan tơdrong juăt păng đơ̆ng kră sơ̆ kon bơngai wă pơrơ̆ng pơm ưh kơ trŏ kơ tơdrong kơnhăm ‘lơ̆ng rŏ đơ̆ng tơdrong pơjing.

Tơdrong ‘mêm mơnat gĭt kăl ‘noh đei bơtho mŏ ŏh nhi pơhrăm mơ̆ng kơtơ̆ng păng lui gơnang lăm tơdrong tơdă pơklaih đơ̆ng Kră Yang kơ klo akăn păng hnam dơnŏ oh. Rim kơ năr na rim kơ khei, Kră Yang ba truh đơ̆ng bơngai jang gah hnam oei teh choh, anih hnam jên na bơngai jang gah khôi juăt pơrơ̆ng tơgŭm mŏ ŏh nhi. Dôm kơ hơdah ŭnh pơchrang lăm trong ala trôm teh măng mu đơ̆ng hnam dơnŏ iĕ ŏh, iĕ ioch rơdu na jing rai tih, rai tih, dĭng truh dang ei.

Kơtơ̆ng re pơpơ̆ đơ̆ng điên thoăi pơm kơ inh lar măt păng kŭp tơ anăp wă đŏk hơđăl nơ̆r chih đei truh “Mŏ ơi! Halêluya! Ư-ang kơ Kră Yang, hla bơar đei pơm keh, klo akăn ŏh dang ei đei gơh yua đĭ hnam oei, hăm tơdrong hre kŭm đei lăm tơdrong kĕ pơdrâu đơ̆ng tơdrong jang đơ̆ng măr nhi.”

Lu nhôn đei adrin “pơm tơdrong ‘lơ̆ng tơpăt” rim kơ yak, rim tơdrong iĕ, rim kơ yak iĕ lăm hla ar kiơ̆ trŏ lu khôi juăt, wă kơ năr ‘nâu Kră Yang ăn kơ tơdrong đei yua ‘bĕnh tơdrong chơt hiôk ‘nâu. ‘Năr tŏ pơchrang pơm kơ inh đei hơ ‘nhiĕo kơ măt, mă lei ưh kơ gơh đei pĕng tơdrong chơt hiôk lăm jơhngơ̆m, muh măt inh hiĕk ‘bôh lăm kơ mĭl, pơchrang đơ̆ng kơmĭl gre pah cheng.

Apĭnh đĭ đăng krao khan hơdai: Kơkuh kơ ‘Bok Kei-Dei jơ̆ Tơ‘ngla ‘lơ̆ng tơpăt! Halêluya! Kon bơnê kơ Kră Yang đei ‘mêm mơnat kơ lu nhôn, thoi Ih đei ‘mêm mơnat păng dŏng tơgŭm lu kon drŏkăn Sêlôpêhat. Bơnê kơ Yang Yêsu yua kơ Ih đei truh wă “ roi tơbăt tơlĕch lu bơngai đe phak, păng pơklaih lu bơngai măt tol, pơklaih lu bơngai mă đe pơjuă pơđep; păng wă ră roi tơdrong ‘nao ‘lơ̆ng đơ̆ng Kră Yang”. Bơnê kơ Yang Bơhngol ‘Lơ̆ng, Tơ‘ngla Mơsêh mơyang đei chông anhăk lu nhôn, pơchrang hơdah kơ lu nhôn lăm tơdrong gơh hơgei ‘bôh băt tơdrong tơpăt đơ̆ng Ih. Apinh Kră Yang kŭm pơchrang hơdah kơ lu nhôn lăm tơdrong gơh hơgei lăm rơbâu rơngan khôi juăt đơ̆ng kon bơngai, jing thoi dôm kơ kon pơlei pơyom kơ tơdrong pơgơ̆r, păng hơdrol hloh jơ̆ đĭ jơhngơ̆m chu kiơ̆ khôi juăt đơ̆ng Kră Yang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, jơ̆ Bơngai Lui, rim ‘nu lu bơ̆n kŭm jơ̆ kon pơlei kơ mĭnh dêh char ayơ noh, lu bơ̆n đei pơlung wă kơ jing dôm lu kon pơlei pơyom kơ khôi juăt, păng adrol hloh jơ̆ khôi juăt đơ̆ng ‘Bok Kei-Dei. Nơ̆r Kră Yang tơ’blŏk kơ lu bơ̆n khan tơdrong mă Kră Yang Yêhôwa athei, ‘noh jơ̆ pơm tơdrong ‘lơ̆ng tơpăt, wă kơ đei tơdrong ‘mêm mơnat păng yak năm hăm jơhngơ̆m iơ̆m dim hăm ‘Bok kei-Dei. Mă khan lu bơ̆n oei lăm tơdrong tơwŏk tơsŭl ayơ, yua kơ đơ̆ng kơdih kâu dah yua kơ đơ̆ng bơngai nai pơm, dah đei tơ’bơ̆p hăm pơmat tat, tơwŏk ayơ hăm lu khôi juăt, athei lui gơnang kơ ‘Bok Kei-Dei ‘lơ̆ng tơpăt păng ‘mêm mơnat. Athei roi tơbăt tơdrong kơdih ‘bơ̆t anăp ‘Bok Kei-Dei đơ̆ng lăm Nơ̆r arih păng đei tơpă đơ̆ng kơdih Sư. Mơ̆ng kơtơ̆ng, roi tơbăt păng lui gơnang lăm dôm kơ nơ̆r pơkă ‘bĕnh tơdrong mơsêh mơyang đơ̆ng Sư ‘măn ăn kơdih chăl arih buăl, păng yak năm kiơ̆ trong ‘lơ̆ng tơpăt. Na buăl gô chơt hiôk hlôi mơn đei Kră Yang, Tơ’ngla bơwei buăl hăm tơdrong ‘lơ̆ng tơpăt tôm mah đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.