Buăl tam đei layơ jet kơdih akâu: Tơdah năr ‘nâu năr tuch luch inh arih tơ kơpal teh đak ‘nâu, na tơdrong kiơ lăm tơdrong arih ‘nâu mă kăl tơpă? Tơdrong arih buăl pơm lăm rim năr, dôm kơ tơdrong buăl drơ̆ng pơm- lei buăl hăm hmach ưh? Na kơplah weh đơ̆ng teh đak ‘nâu, buăl gô năm tơyơ? Tŏk bŏk đei lơ nơ̆r pơma hrơ̆ng hreng lăm tơdrong arih, na oei đei tơ yơ noh nơ̆r pơma rơngơp – krao lu bơ̆n rơih iŏk tơdrong arih, rơih iŏk tơdrong hiôk chơt kơjăp khŏm khŏm.

Năr ‘nâu, ‘năr 05/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Eddie Jones kơ̆l ‘bai TƠDRONG KĂL KƠ PƠM HLOI

“Kră Yang khan: Tơpă, Inh ưh kơ hiôk ôh kơ tơdrong lôch mă lu iĕm wă lôch, athei tơbral bĕ wă kơ đei tơdrong arih.” (Êsêkiên 18:32)

Ưh kơ đei bu lăm lu bơ̆n wă weh wer đơ̆ng tơdrong lôch. Dôm kơ lu trong yak năm gô tôch phara băl: đei bơngai lôch lăm tơdrong rơnŭk rơnoa, đei bơngai lôch lăm tơdrong chhŭr nuih, đei bơngai lôch ưh kơ đei bu băt.

Kơplah jơ ‘nâu, inh oei tơ oei lăm gre păr, păr kơjung tơ kơpal plĕnh. Gre păr păr hrĕnh dêh, na lăm gre păr hrĕp hreh hlĭch tơpă. Tơ kơpal kơ̆l inh noh dôm kơ chhom dan tơmam, jum dăr kơ inh ưh kơ đei juăt kơ bu- rim ‘nu đei tơdrong phara băl, dôm kơ tơdrong hiơ̆k bơngơ̆t păng trong yak năm kơdih kơdih.

Lăm kơplah gô kơmăi jang hla bơar oei wă pơih, inh đei chĕp hla bơar bơtho tơ’bôh hao gre păr kăl kơ đŏk. Na đơ̆ng noh, tŏk bŏk lăm anih hrăt hrot noh, inh đei mơn băt kơ minh tơdrong đêl juăt kơ đei: Tơdrong arih ‘nâu nhen thoi hao gre păr, đei dôm tơdrong truh hloi ưh kơ đei bu khan roi adrol. Na kơplah thoi noh, jơ ayơ đei bơngai wă krao iung pơm kơmil ăn, păng tơgŭm bơngai nai chă trong hiôk hơđơ̆ng. Tơ lăm hla bơar iĕ đei chih:

“Tơdah buăl tơ oei ‘bơ̆t tang dŏ đei trong lĕch, rŏ lăng buăl athei pơih ‘măng lĕch na gô tơgŭm bơngai nai lĕch đơ̆ng gre păr.”

Đŏk truh ‘bơ̆t doh, inh hiĕk. Jơ̆ Bơngai lui kơ ‘Bok Kei-Dei, inh kư̆m đei krao iŏk jing bơngai pơchrang hơdah chông ba trong, jing tơpang ti tưk tơ iung bơngai nai kơplah tơ’bơ̆p tơdrong truh lĕi liơ?

“Wă pơm tơdrong ‘nâu, buăl athei hlôi pơm keh dôm kơ lu tơdrong thoi âu.”

Ŏ ah, inh hlôh. Yua kơ đơ̆ng đei khei năr đei tơdrong pơlong lăng, đei lơ tơdrong truh, inh đei pơhrăm iŏk chơ̆n jơhngơ̆m kơplah đei tơdrong truh.

Dôm kơ lu tơdrong pơtrơp dơ̆ng pơm kơ inh tơchĕng pơwao jrŭ hloh:

“Kơnhăm kơ anih wă lĕch.”

‘Măng lĕch đơ̆ng gre păr jơ̆ jê̆ ‘bơ̆t inh âu. Na lăm tơdrong arih, inh lui ngeh thoi âu Tơnang ‘Măng tơdrong arih – noh jơ̆ tơm đơ̆ng Yang Yêsu oei jê̆ păng Sư pơkă Sư ưh kơ đei layơ achăng lê̆ inh.

“Mơn băt kơ tơdrong kăl dêh bơih”

Tơ kơpal gre păr, đei tơdrong kăl dêh noh rŏ lăng hơ yuh kial lăm gre păr rai pă đei bơih, anih dan ming tơmam pơih kơdih, dah ưh pă gơh bơwei hloi bơih. Lăm tơdrong arih, Yang Yêsu kư̆m đei roi tơbăt adrol: gô đei tơdrong hiong răm ưh kơ đei hơmet lê̆ adrol, gô đei tơdrong hiơ̆k bơngơ̆t păng hli tơrơ.

“Hlôh păng pơm kiơ̆ kơ khŭl bơngai wơ̆r gre păr.”

Inh drơ̆ng, kơplah lăm hao gre păr ‘nâu, inh đei apinh bơngai bơwei lăm gre wă kơ hơđăl: “Hăm trŏ kơ inh đei minh hơnŭng ‘bum ngô iĕ hăm tŏ sĕt đak ‘nâu đĕch hă?”

Trong yak năm lăm đon lui inh kư̆m thoi noh. Lơ wơ̆t inh đei apinh Kră Yang jơ̆ Tơ’ngla kơ Nơ̆r Arih, wă kơ apinh Sư pơsĭt ming ‘maih wă đơ̆ng Sư ăn kơ inh.

“Tơdrong jang ‘măng lĕch”

Truh tơ ‘bơ̆t dâu tơnat kơ hlôh. Inh tam wă hơmet lĕch đơ̆ng ‘măng ‘nâu ôh, mă loi oei păr kơ jung 10.000met. Mă lei dah đei bơngai bu noh kăl kơ wă lĕch adrol wă pơih trong, na hơmĕng kơ inh đei jơhngơ̆m pơ̆n nuih.

“Pơm kiơ̆ kơ tơdrong tơ’bôh”

Tơdrong ‘nâu pơm kơ inh kŭp kơ̆l tơchĕng. Inh oei ưh kơ pơm kiơ̆ tơdrong dơhlâu bơtho, mă khan tơ kơpal gre păr, lăm tơdrong arih, dah yak năm lăm hăm ‘Bok Kei-Dei. Mă lei tơdah inh đei krao iŏk pơm kơmil ăn kơ bơngai nai, na inh kăl kơ pơhrăm dơ̆ng ‘bai pơhrăm chu yom.

“Yak năm hlôi đơ̆ng trong noh mă tĕnh”

Huay bơih … Kră Yang ơi, kon pơih ‘măng âu.

“Yak kiơ̆ tơdrong ‘lơ̆ng năm tơ ataih…”

Lĕch hlôi đơ̆ng gre păr ‘nâu. Lĕch đơ̆ng akâu ‘nâu. Lĕch hlôi đơ̆ng teh đak ‘nâu. Na yak lĕch tơ’ngoaih.

‘Bok Kei-Dei ưh kơ đei hiôk kơ tơdrong lôch. Na tơdrong lôch oei đei hơdai rim ‘nu lu bơ̆n. Lu bơ̆n hiơ̆k bơngơ̆t, hli tơrơ, chơchă wă kơ hiơ̆ ‘biơ̆ kơ truh tơdrong năr lôch. Na tuch luch lu bơ̆n oei lôch.

Năr ‘nâu, inh đei ‘bôh kơthơ đơ̆ng buăl. Sư oei tơ oei ‘bơ̆t giơng bơngai jĭ noh jơ̆ ‘bă sư. Sư chih:

“ ‘Bă inh oei đei pơma mơ̆n hăm inh, mă lei pă đei gơh sŏng sa nhă đak bơih. Yua kơ thoi noh jơ̆ gô jơ năr đĕch bơih, ‘NGOAIH KƠ ‘Bok Kei-Dei pơklaih. Hnam dơnŏ oei pơih jơhngơ̆m răp gô tơdrong noh! Inh pơma hăm ‘Bă inh thoi âu tơdah ‘Bă ưh kơ đei hlôi bơih “ ‘bai pơlong lăng sa ate”, rŏ lăng ‘Bă sơng iŏk bơyan Nôel hăm Mĕ – Mĕ lôch drâu sơnăm bơih. ‘Bă tơl tơwih hloi: ‘Sơnăm ‘nâu tam mă!”
Ưh. Ưh kơ đei bu lăm lu bơ̆n wă kơ lôch. Mă lei lu bơ̆n gô lôch.

Đơ̆ng anih inh tơ oei, inh lăng ‘bôh gah tor gre păr, mă lei ưh kơ ‘bôh anih wơ̆r gre. Rŏ lăng tơ anăp oei đei hơ yuh kial, mă inh ưh kơ băt. Rŏ lăng kư̆m đei “sơlŭng kơnê̆” oei răp gô. Inh kư̆m ưh kơ băt.

Minh tơdrong đĕch inh băt sĭt inh dan đon lui ngeh kơ bơngai wơ̆r gre păr, lui ngeh kơ bơngai pơm pơjing gre păr hăm lu bơngai đei wŏng hơdai pơm pơjing gre păr ‘nâu.

Na hăm tơdrong arih inh, inh đei dan đon lui inh tơ Kră Yang – Sư jơ̆ Bơngai wơ̆r gre păr, Bơngai pơjing păng Bơngai Man akâu jăn lăm teh đak ‘nâu kơ inh.

Inh tam mă ‘maih yak năm. Kư̆m nhen thoi hao gre păr ‘nâu, tơdrong arih lu bơ̆n kư̆m gô truh tơ tôch. Na kơplah năr noh truh, inh ưh kơ ‘maih lĕch đơ̆ng anih ‘nâu, mă lei inh rơhing yak năm tơ anăp đei tơdrong ‘lơ̆ng hloh.

“Athei tơbral wă kơ đei tơdrong arih” dah ưh. Tơdrong rơih iŏk lăm tơpang ti buăl.

“Tơdah kon pơlei pơla Inh, đe krao lu sư kon Inh, drap bon kơkuh, krao khan, chơchă Inh păng tơbral achăng lê̆ trong kơnê̆ lei Inh oei kơpal plĕnh ti gô mơ̆ng, mơnat ăn huay pă jô̆ yoch lu sư păng ăn teh lu sư thoi đêl.” (II Hơ’mon 7:14)

Apĭnh đĭ đăng krao khan hơdai: Kơkuh kơ Kră Yang, tŏk bŏk tơdrong arih đei lơ tơdrong, lơ wơ̆t kon nŏng kơ arih wă hlôi kơ năr đĕch mă hiơt kơ kon arih yua kơ tơdrong kiơ. Kư̆m đei kon achăng lê̆, kon pơm ưh kơ băt kơ nơ̆r Ih đei krao. Apinh Ih huay kơ jô̆ yo kơ kon păng ăn kơ kon jơhngơ̆m rơmoăn, wă kơ kon wih wơ̆t tơ trong tơdrong arih mă Ih dan bơih ‘bơ̆t anăp kon. Năr ‘nâu, kon rơih iŏk tơdrong tơbral wă kơ đei tơdrong arih hăm Ih khŏm khŏm. Apinh Ih chông anhăk kon yak năm keh đang lăm trong yak năm mă Ih đei hơmet ăn bơih! Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đei nơ̆r pơma thoi âu “tơdrong arih noh jơ̆ nhen thoi tơdrong tŭk lê̆”, rim năr đei hloh hlôi, đĭ đăng lu bơ̆n oei yak năm minh yak truh tơ tôch kơ chăl arih bơ̆n, na tơdrong noh ưh kơ đei bu wă weh wer. Mă lei đei minh tơdrong buăl hăm inh oei chĕp: noh jơ̆ lu bơ̆n oei yak năm lăm năr ‘nâu, Tơ’ngla mă lu bơ̆n hnhoi lăng. Tơdrong lôch đơ̆ng blŭng a ưh kơ đei pơjing wă kơ lu bơ̆n hli tơrơ dah ơh sơ’ngon ôh. Tơdrong lôch wă kơ tơ’blŏk ăn kơ lu bơ̆n arih lơ̆ng hloh – arih mă trŏ lăp. ‘Bok Kei-Dei oei krao lu bơ̆n hăm tơdrong ‘mêm, nơ̆r krao iŏk brŏk tơ tơdrong arih đei ư ang hăm Sư. Lei lu bơ̆n hăm wă drơ̆ng iŏk nơ̆r krao iŏk noh na yak năm hơdai Sư, đơ̆ng dang ei truh tơ trong yak năm tôch ưh?

Na …tơdah ‘bai krao khan ‘nâu pơm kơ lu bơ̆n ‘blŏk kơ buăl juăt, bơngai jang hơdai, dôm lu bơngai tam mă lui sơng iŏk Kră Yang, na tơdrong tơdă Amăn Jơ Krao khan Rim athei bơngai mơ̆ng gưih ‘bai krao khan ‘nâu ăn kơ bôl buăl noh, athei krao wân bơngai noh drơ̆ng iŏk lui sơng iŏk Kră Yang wă kơ đei tơdrong dŏng pơklaih đơ̆ng Kră Yang, đei tơdrong arih khŏm khŏm.

“ ‘Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang.” (Yôhan 3:16)

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.