Peb pheej xav tias qhov phem mas nws yuav muaj tus yamntxwv phem, txaus ntshai. Tiamsis ntau zaug qhov phem nws tsis tshwm nroo ntws nrho nrooj, tiamsis ua twjywm nkaum hauv peb tej lus uas peb hais tawm txhua hnub. Koj puas paub tias txhua hnub peb yuav hais tawm kwv yees li yog 16.000 lo lus? Nws yog ib qhov uas ntau heev! Tiamsis tsis paub nyob hauv tej lus ntawd, muaj pes tsawg lo lus thiaj muaj nqis? Peb pheej xav tias tej lus hais nws tsuas zoo li cua ntsawj xwb, hais tas ces tas. Tiamsis tseeb tiag, txhua lo lus puav leej muaj ib lub nra nyhav heev. Koom ua tib zoo tshuaj saib: tsis paub qhov phem puas nkaum hauv tej lus uas peb xav tias tsis muaj qab hau dabtsi ntawd?

Hnub no, yog hnub 06/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Shadia Hrichi dhau ntawm Zaj kawm PHOV PHEM TUS TSWJPWM ZOO LI CAS?

“Tiamsis tsis muaj leejtwg cob tau tus nplaig. Tus nplaig phem thiab tswj tsis tau li, nws muaj taug lorn neeg tuag” (Yakaunpaus 3:8)

Muaj tej yam cuag li cia ua rau peb ntshai thiab ceev faj. Nab yog ib qhov piv txwv rau coob tug. Tsuas hais txog nab xwb coob tug twb hnov ib ce xob tas. Kuv tus kheej yeej tsis nyiam nab li. Tej ntawd ua rau kuv ntshai. Ntawm lub qhov muag me me, txoj kev uas nws mus cuag li peb tsis paub tau, nws daim tawv ci nploos… tas tus yamntxwv thaum twg twb nyas nrhw, yuav muab tus yeebncuab tom thaum uas lawv tsis ceev faj.

Tiamsis ua tib zoo xav nws kuj txawv. Yog tias tsuas saib txaus ntshai thiab phomsij es muab suav tias yog phem, vim li cas peb ho tsis ntshai thaum hais txog ntses loj hauv hiav txwv, tsov ntxhuav, lossis… mab qus?

Lo lus teb coj peb rov qab mus rau hauv vaj E-dees. Tomqab tawm tsam Vajtswv thiab raug ntiab tawm ntuj ceebtsheej, Xatas xaiv tus nab los ua nws qhov chaw nkaum. Thaum ntawd, dhau ntau txhiab xyoo los, daim duab uas yog tus nab phem yeej tseem cim ntsoov rau hauv tib neeg lub hlwb.

Tsis ntev no thaum nyeem phau ntawv Yakaunpaus, kuv cia li ntsia pom tus nab ntawd ib qhov txawv. Thiab yuav tau hais tias, daim duab ntawd tshwm hauv kuv lub hlwb tseem txaus ntshai dua ntau. Nyob hauv tshooj 3, Yakaunpaus xav hais txog qhov tseem ceeb ntawm txoj kev tswj peb lo lus hais. Yawg hais txog tib neeg tus nplaig zoo li no:

“Tiamsis tsis muaj leejtwg cob tau tus nplaig. Tus nplaig phem thiab tswj tsis tau li, nws muaj taug lorn neeg tuag” (Yakaunpaus 3:8).

Tas yawg hais txog ib qhov teeb meem dias taub hau heev:

“Peb siv peb tus nplaig ua Vajtswv tus uas yog peb Leej Txiv tsaug, thiab peb siv peb tus nplaig ce tej neeg zejzog. Tej neeg ntawd Vajtswv tsim muaj tus yam ntxwv zoo li Vajtswv” (Yakaunpaus 3:9).

Koj puas tau muaj zaum twg zoo li no lawm tau? Kuv ces muaj lawm!

“Lo Ius ua Vajtswv tsaug thiab lo lus cern neeg puavleej yog tus nplaig hais. Cov kwvtij, tsis tsimnyog yuav muaj li ntawd” (Yakaunpaus 3:10).

Thaum uas nyeem txog qhov no, hauv kuv lub taub hau tshwm kiag daim duab tus nab tus nplaig phua rhe ob sab. Vajluskub qhia paub peb tej lus hais yuam kev muaj ntau txoj kev: taug xaiv, txo lwm tus, khav theeb, tswj, cob qhia yuam kev, hais tsis tseeb, nroo, lam qhuas thiab dag ntxias. Hais tiag mas, muaj ntau zaug peb hais tej lus ntawd peb yeej tsis paub tej kev puas tshuaj uas nyob tomqab tej lus ntawd – tej yam uas tsis zoo nyob hauv peb lub siab.

Peb xam txog qhov phem zoo ib yam li ib qhov dabtsi twg nws pom meej: tus yamntxwv phem, kaus ntse heev, puv npo taug ua rau neeg tuag. Tiamsis, thaum Xatas los ntsib A-das thiab E-vas nkawd hauv nab lub cev, nkawd tsis ntshai. Yeej tsis muaj dabtsi yuav ua kev phomsij rau nkawd. Tsuas yog ib qhov kev sib tham cuag li tsis muaj qab hau. Tiamsis lub sijhawm ntawd tau qhib ib txoj kev puas tshuaj loj heev nyob rau hauv keeb kwm tib neeg. Thiab kuj yog los ntawm qhov no, Vajtswv nthuav tawm Vajtswv lub homphiaj cawmdim uas zoo.

Xatas ua tej no los ntawm txoj kev twg? Tsis yog siv cuab yeej, kuj tsis yog siv khawv koob lossis siv nrig. Yeej tsis muaj tej suab nrov txaus ntshai, kuj tsis muaj ib txoj kev ua khawv koob dag twg. Tag nrho tej uas nws cheem tsum ua tsuas yog ib qhov cuab yeej me me xwb, tiamsis peb muab ntaus nqi tsis siab: tus nplaig. Los ntawm ib lo lus nug yooj yim, nws tau ua rau muaj kev ua xyem xyav loj:

“Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los?” (Chivkeeb 3:1).

Peb cov ntseeg peb yeej nco ntsoov ceev faj zam tej kev txhaum uas xws li: tua neeg, ua nkauj nraug, ua tub sab… tiamsis ntau zaug, peb ho tsis paub tias twb yog los ntawm tej lus uas peb hais kuj ua rau muaj kev tu siab loj, thiab ntau zaug tseem ua rau muaj kev tuag.

“Cov niag nab! Nej yog neeg siab phem nej yuav ua li cas hais tau lus zoo! Rau qhov lub siab xav li cas, lub ncauj yeej hais li ntawd … Rau qhov yam uas tawm hauv neeg lub siab los, ua rau neeg ua phem, tua neeg, deev luag pojniam luag txiv, ua kev nkauj kev nraug, ua tubsab, hais lus dag thiab rhuav lwm tus ntsejmuag.” (Mathais 12:34; 15:19).

Yog li yuav ua li cas kom peb thiaj tiv thaiv tau tus kheej tsis hais tej lus yuam kev ntawd? Vajluskub ntuas peb ib txojcai yooj yim:

“Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav.” (Pajlug 4:23).

Thiab peb zov peb lub siab los ntawm txoj kev twg? Los ntawm nco ntsoov Vajtswv tej lus tau qhia rau peb, thiab muab Vajtswv tej lus zais cia rau hauv siab, npaj txhij tawm tsam xatas thiab nws tej tswv yim tawmtsam.

“Kuv khaws koj tej lus rau hauv kuv lub siab, kuv thiaj tsis ua txhaum rau koj” (Ntawv Nkauj 119:11).

Thov caw nrog kuv peb thov Vajtswv ua ke: Tus Tswv uas muaj kev hlub, thov zam txim rau kuv tej lub sijhawm uas kuv lub qhov ncauj tsis hais tej lus zoo haum koj siab. Muaj tej lus hais maj nroos, tsis muaj lub siab zoo, ua rau lwm tus tu siab thaum uas kuv yeej tsis paub. Thov Vajtswv tiv thaiv kuv lub siab, kom dhau ntawd ntws lug tej lus ciaj sia, nthuav tawm kev hlub thiab kev kho zoo. Thov ntuas kom kuv paub maj mam ua ntej yuav hais tawm, paub xav ua ntej yuav hais. Thov qhia kuv paub vam khom koj, kom koj tej lus coj kuv rau txhua lo lus yuav hais tawm. Thov kom kuv lub qhov ncauj tsis dhau los ua cuab yeej rau qhov phem, tiamsis dhau los ua ib qhov cuab yeej ntuav tawm kev hlub thiab qhov tseeb hauv kuv lub neej. Kuv thov hauv Tswv Yexus Khetos lub npe, Amees.

Cov kwv tij txhua tus, txhua hnub koj hais tawm pes tsawg lo lus txhawb zog, kho zoo, nthuav tawm Vajtswv lub siab? Thiab muaj pes tsawg lo lus koj tsis ceev faj tau hais tawm ua rau ua qhov txhab rau lwm tus? Tej zaug yam uas peb cheem tsum ua tsis yog hais tsawg dua, tiamsis hais tiag los ntawm paub tswj. Ua ntej yuav hais tawm ib lo lus twg, muab peb lub siab cia Vajtswv ua tus coj. Vim thaum peb lub siab tau tiv thaiv, ces peb tej lus hais thiaj yuav tau hloov pauv dua tshiab, puv npo kev hlub. Thov kom txhua hnub dhau mus, peb tus nplaig yuav tsis yog qhov chaw tseb txoj kev tu siab, tiamsis dhau los ua qhov cuab yeej coj txojsia, kev kho zoo thiab kev hlub rau lwm tus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.