Lu bơ̆n ngăl đei tơchĕng khan tơdrong kê̆ đei chĕp tơ’bôh rup kơnê̆ krưp, hli tơrơ. Mă lei mưh lăp kơplah tơdrong kơnê̆ ưh kơ kăl kơ ‘bôh hrơ̆ng hreng dah jrông jrang, mă lei đei ôn lăm trŏ kơdôm lu nơ̆r lu bơ̆n pơma tơlĕch rim năr. Buăl hăm băt khan rim năr lu bơ̆n gô pơma hmă juăt dang 16.000 nơ̆r ưh? Tơpă jơ̆ mĭnh kơ sô̆ tih krưp! Mă lei lăm kơ sô̆ ‘noh, dôm yơ nơ̆r pơma tơpă ba ăn tơdrong đei yua? Lu bơ̆n đei khan nơ̆r pơma lăp trŏ jơ̆ kial dơhlu hơmơ̆l păr, pơma tơlĕch bơih jê̆ lê̆. Mă lei tơpă, dôm nơ̆r đei chĕp ba mĭnh tơdrong trăp ưh kơ kĕ jô̆. Athei hơdai thĕng hreh wă lăng hơlen hơmet lăng: lei tơdrong kơnê̆ hăm oei ôn lăm dôm kơ nơ̆r pơma mă lu bơ̆n ngeh kơ huei kơ đei pơrăm?

Năr ‘nâu, ‘năr 06/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Shadia Hrichi kơ̆l ‘bai TƠDRONG KƠNÊ̆ CHĔP TƠ‘BÔH THOI YƠ?

“Mă-lei ‘bơ̆r kon bơngai bơ̆n ưh kơ đei bu gơh pơgơ̆r, yua kơ kơnê̆ dêh, pă đei layơ wă gơh oei sa tơnăp kăp iâu, dang lĕ kơ đe sa ‘bơm tơmam bơnhŭl đĕch boih.” (Yakơ 3:8)

Đei dôm kơ tơdrong nhen thoi thar râu tơiung lăm lu bơ̆n mơn lăm jơhngơ̆m hli tơrơ, krưp dêh păng krăng kơchăng. ‘Bih jơ̆ mĭnh tơdrong pơtih gia hơđăl hăm lơ bơngai. Lăp kăl kơ tơ’blŏk truh kơ ‘bih đĕch jơ̆ đei ‘bôh tơngiĕt lăm akâu. Kơdih kâu inh kŭm ưh kơ iă kơ ‘bih tŏ sĕt. Lu sư pơm kơ inh hơdrôt. Đơ̆ng ‘bar pah măt iĕ hơ ‘nher, tơdrong sư nơnăm thĕng hreh nhen thoi ưh kơ đei ‘bôh băt, hơkar rơbơ̆r tơsĕr…na lăng hơkâu sư layơ kŭm thoi oei răp gô, wă bruh kăp hloi kon sembrem ưh kơ krăng kơchăng.

Mă lei tơchĕng hơđăl dơ̆ng lei kŭm hlĭch. Dah lăp yua kơ lăng trŏ kơ hli păng kơnê̆ krưp na đei lăng jơ̆ kơnê̆ dêh, lei yua kơ liơ lu bơ̆n đei ưh hơdrôt akâu dah pơma truh kơ Ka mâp, Dăm brang, dah…kŏ so? Nơ̆r tơl tơwih ba lu bơ̆n wơ̆t dơ̆ng truh Pơgar Êđen. Đơ̆ng rŏng kơ ưh kơ chu blah plơ̆ ‘Bok Kei-Dei păng đei klơ̆m hlôi đơ̆ng plei ‘lơ̆ng, Satan đei rơih ‘bih pơm akâu ôn akâu sư. Păng đơ̆ng noh, hlôi kơ rơbâu sơnăm, rup ‘bih nhen thoi đei hơdai hăm tơdrong khan gah tơdrong kơnê̆ lăm đon tơchĕng kon bơngai.

Dang ei, dah đŏk hla ar Yakơ, inh thar lăng ‘bih hăm mĭnh tơdrong lăng phara. Păng đei pơma tơpă, rup đei ‘bôh lăm kơ̆l inh kŭm trŏ kơ hli lơ hloh. Lăm chăl 3, Yakơ kơnhăm tơdrong gĭt kăl đơ̆ng tơdrong pơgơ̆r nơ̆r pơma. Sư pơtih ‘bơ̆r kon bơngai bơ̆n thoi ‘nâu:

“Mă-lei ‘bơ̆r kon bơngai bơ̆n ưh kơ đei bu gơh pơgơ̆r, yua kơ kơnê̆ dêh, pă đei layơ wă gơh oei sa tơnăp kăp iâu, dang lĕ kơ đe sa ‘bơm tơmam bơnhŭl đĕch boih.” (Yakơ 3:8)

Na Sư đei tơ’bôh hơđăl mĭnh tơdrong oei ưh kơ ‘lơ̆ng:

“Bơ̆n băt kơ ư-ang Sư, mă kư̆m băt kơ blei hiap bôl buăl tơduă kon bơngai. ‘Noh kư̆m dang bơ̆n blei hiap ‘Bok Kei-Dei yua kơ bơ̆n đơ̆ng ‘Bok Kei-Dei pơjing.” (Yakơ 3:9)

Buăl hăm đơ̆ng đei thoi noh ưh? Inh lei đei bơih!

“Lăp pôm ‘bơ̆r đĕch băt kơ ư-ang ‘Bok Kei-Dei, băt kơ blei hiap bôl buăl.” (Yakơ 3:10)

Lăm kơplah đŏk truh ‘bơ̆t dou, lăm kơ̆l inh đei ‘bôh hloi rup hơpiĕt ‘bih đei blah ‘bar pah. Sơ̆p Hla Bơar Nơ̆r ‘Bok Kei-Dei tơbăt nơ̆r pơma ưh kơ trŏ đei lơ tơdrong: pơma dơnuh, pơjăm bơngai nai, pơ ang, wă kơ kiơ̆ bơ̆n, bơtho ưh kơ trŏ, pơma pơjăm, jô̆ jŏk, pơma lung păng hơlĕnh. Păng tơpă, đei lơwơ̆t lu bơ̆n pơma tơlĕch dôm lu nơ̆r noh na ưh kơ đei ‘bôh băt dôm tơdrong kơnhăm oei ôn gah rŏng- dôm kơ tơdrong ưh kơ đei ‘lơ̆ng rŏ lăm jơhngơ̆m bơ̆n.

Lu bơ̆n ngăl pơwao tơdrong kơnê̆ thoi mĭnh tơmam kiơ noh đei hơđăl: ‘bôh rup akâu kơnê̆ krưp, hơnĕnh grĕng suĕng han, ‘bĕnh kơ bih pơlôch bơngai. Mă lei, kơplah Satan tơ’bơ̆p ‘bok Ađam păng yă Ewa lăm rup hơkâu jăn ‘bih, măr sư ưh kơ đei hli tơrơ. Ưh kơ đei kiơ lăng kơnê̆ hloi. Lăp jơ̆ mĭnh tơdrong pơma dơnuh hmă nhen thoi huei kơ đei tơdrong pơrăm. Thoi noh na trŏ kơ jơ ‘noh đei pơih ăn tơdrong truh krưp hloh lăm chăl chăl sơ̆ kon bơngai. Păng kŭm trŏ đơ̆ng noh, ‘Bok Kei-Dei đei tơ‘bôh tơdrong proh hơmet dŏng pơklaih ư-ang đơ̆ng Sư.

Satan đei pơm tơdrong ‘noh hăm trong ayơ?

Ưh kơ trŏ hăm tơmam tơblah, kŭm ưh kơ trŏ hăm tơdrong pơm mơsêh dah jơhngơ̆m pran. Ưh kơ đei kơtơ̆ng re hli tơrơ, kŭm ưh kơ đei tơdrong pơm tơwir măt ayơ. Đĭ đăng dôm kơ tơdrong kiơ sư kăl lăp jơ̆ mĭnh tơmam iĕ đĕch, mă lei ngăl đei lu bơ̆n lăng ưh kơ gĭt: ‘bơ̆r. Păng lăp hăm mĭnh nơ̆r jet hmă đĕch, sư đei rei tơdrong ngĭl ngŭl tih dêh:

“Kră Yang ‘Bok Kei-Dei đei khan tơtă ưh ….?” (Blŭng a 3:1)

Bơngai lui lu bơ̆n pơ‘lơ̆ng dêh weh ataih dôm kơ tơdrong yoch hơđăl: pơlôch bơngai, pơm pơyô kư̆ kă, tơtông klĕ….Mă lei lơ wơ̆t, lu bơ̆n đei ưh kơ ‘bôh băt khan trŏ kơ dôm nơ̆r bơ̆n pơma tơlĕch kŭm gơh pơm ơh sơ’ngon jrŭ, păng phŏ kŭm ba truh tơdrong lôch.

“Lăm to iĕm tơchĕng thoi yơ, ‘bơ̆r iĕm pơma kiơ̆ thoi noh mơ̆n…..Yua kơ đơ̆ng jơhngơ̆m đon kon bơngai tơchĕng kơnê̆ na jing yoch: Sư pơlôch đe, kơtrŏ hăm akăn đe, sư pơm pơyô kư̆ kă, sư tơtông, sư oei pơma hơlĕnh, sư pơjăm pơjuă đe.” (Mathiơ 12:34; Mathiơ 15:19)

Lei pơm thoi yơ wă kơ lu bơ̆n bơwei kơdih đơ̆ng dôm nơ̆r pơma ưh kơ trŏ noh? Nơ̆r ‘Bok Kei-Dei tơ ‘blŏk kơ lu bơ̆n mĭnh tơdrong tơm hơđăl:

“Kơchăng bĕ ling-lang wă kơ wei-lăng jơhngơ̆m ih, Yua kơ tơdrong arih tơm lĕch đơ̆ng noh.” (Tơdrong Pơđơ̆k 4:23)

Păng lu bơ̆n bơwei jơhngơ̆m bơ̆n hăm trong ayơ? Hăm trong ling lang ‘blŏk răk dôm nơ̆r ‘Bok kei-Dei đei pơtho khan kơ lu bơ̆n, păng răk Nơ̆r Sư lăm jơhngơ̆m, wă gô blah Satan hloi hăm dôm tơdrong chă đon đơ̆ng sư:

“Inh răk boih nơ̆r Ih lăm jơhngơ̆m inh Wă kơ inh huay kơ pơm yoch hăm Ih.” (Hơriso 119:11)

Apĭnh đĭ đăng krao khan hơdai: Kơkuh kơ Kră Yang ‘mêm, apinh Kră Yang huay kơ jô̆ yo kơ kon lăm kơplah ‘bơ̆r kon ưh kơ đei pơchrang tơdrong ‘lơ̆ng đơ̆ng Ih wă. Đei dôm kơ nơ̆r pơma hăt hot, ưh kơ ‘lơ̆ng, pơm kơ bơngai nai ơh sơ’ngon mă mưh lăp kon ưh kơ ‘bôh băt. Apinh Kră Yang bơwei jơhngơ̆m kon, wă kơ đơ̆ng noh tơ lĕch dôm kơ nơ̆r chĕp tơdrong arih, pơchrang tơdrong mơnat ăn đĕch păng tơdrong dŏng pơklaih. Apinh tơ‘blŏk kơ kon băt hiơ̆ ‘biơ̆ adrol kơ pơma, băt kơ tơchĕng adrol kơ pơm tơ’bôh. Apinh bơtho kon băt gơnang anih Kră Yang, ăn Nơ̆r Ih chông anhăk dôm nơ̆r kon pơma tơlĕch. Hơpơi kơ ‘bơ̆r kon ưh kơ jing tơmam kơ tơdrong kơnê̆, mă lei jing tơmam tơ’bôh tơdrong ‘mêm mơnat păng ‘lơ̆ng tơpăt Kră Yang lăm chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rim năr buăl pơma tơlĕch dôm kơ nơ̆r tơiung, pơklaih, pơchrang jơhngơ̆m đơ̆ng ‘Bok Kei-Dei? Păng đei dôm kơ nơ̆r buăl đei pơrơ̆ng tơlĕch dôm kơ nơ̆r đei pơm kơ bơngai nai ơh sơ’ngon? Rŏ lăng tơdrong lu bơ̆n kăl kơ pơm ưh kơ trŏ jơ̆ pơma tŏ sĕt ‘biơ̆, mă jơ̆ pơma hăm tơdrong kơnhăm ‘biơ̆. Adrol kơ tơlĕch pơma nơ̆r ayơ noh, athei pơyơ̆r jơhngơ̆m bơ̆n ăn kơ Nơ̆r Kră Yang chông anhăk adrol. Yua kơ dah jơhngơ̆m đei bơwei, lei nơ̆r pơma đơ̆ng lu bơ̆n gô ‘net gơh tơplih, ‘bĕnh ‘mêm mơnat kiơ̆ đơ̆ng rŏng. Hơpơi rim năr hlôi, ‘bơ̆r lu bơ̆n ưh pă jơ̆ anih rei tơdrong ơh sơ’ngon, mă lei jing tơmam ba ăn tơdrong arih, tơdrong pơklaih păng tơdrong mơnat ăn đĕch.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.