Nyob rau tiam uas nyias puav leej sib tw khiav rau tom ntej kom tsis muaj leej twg raug muab tso rau tom qab li tamsim no, siv lub sijhawm tsis muaj nqis yog ib yam uas tsis tsimnyog li. Cov niam tsev ntau zaug tseem maj tshaj: ke khwv ua haujlwm, ke yuav tau npaj rau tsev neeg thiab tu tej menyuam. Peb siv txhua feeb los ua haujlwm, loj hlob tus kheej, siv zog ua ib lub neej kom muaj nqis. Tiamsis, tsis paub lub ntsiab ntawm lub neej puas nyob rau hauv peb lub sijhawm uas ua haujlwm tsis so, thaum uas peb siv zog khiav hnov qab tsis paub yus tab tom mus rau qhov twg? Tsis paub peb puas nres thiab cim civ nug tias: Vajtswv puas hu yus ua haujlwm, nyob rau lub sijhawm no – lub sijhawm uas Vajtswv tso peb rau ntawm no?

Hnub no, yog hnub 08/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm Zaj kawm TWB VIM YOG LUB SIJHAWM ZOO LI NO

“Tej zaum qhov uas koj tau los ua niam vajntxwv rau tej lub sijhawm zoo li no, twb yog los pab cawm peb haivneeg kom dim kev puastsuaj los kuj tsis paub!” (Exathaws 4:14)

Puas muaj zaum twg koj cim civ nug: vim li cas qhov uas peb txuag sijhawm ho tseem ceeb npaum ntawd? Muaj ib hnub thaum tab tom so, kuv zaum twj ywm ntawm lub chaw ua haujlwm thiab xav: tsis paub kuv tau tseg pes tsawg sijhawm dhau mus tsis muaj nqis lawm?

Tseeb tiag, kuv tsis yog ib tug neeg xav zaum dawb. Kuv ua haujlwm 40 teev ib thiv, ntau zaug tseem ntau tshaj. Kuv mus pehawm tsis tseg, tu tsev neeg, tseg sijhawm rau tej txheeb ze tej phooj ywg. Lub neej saib cuag li tsis muaj sijhawm khoom li.

Tas kuv rov qab nco txog lub sijhawm tsis muaj dabtsi, tej lub sijhawm uas tsuas nres mentsis xwb, kuv twb pab tau ib tug twg ntawd, lossis ua ib yam dabtsi twg muaj nqis dua rau lub neej no. tas kuv pom muaj ib yam xav tsis thoob: yam ua rau kuv ua neej muaj nqis dua tsuas ho muaj tsib teev rau ib thiv xwb.

Nyob hauv Pawg Ntseeg kuv muaj ib tsev neeg ntxim hlub. Kuv pheej pab zov lawv tej menyuam ntxhais nyob hauv lub chav zov menyuam, nws muaj mob nyhav. Tsuas ob hmo rau ib hlis xwb, tiamsis thaum twg tawm mus tsev kuv lub siab puv npo kev hlub, ib yam li kuv txais tau ntau yam dua tej uas kuv muab mus.
Thaum uas hais txog kev ua Vajtswv haujlwm tiag, kuv tsis xav txog tej yam loj. Kuv tsuas xav txog lub sijhawm uas tus menyuam ntawd luag ntxhi thaum wb muab lub pob pov mus pov los. Kuv xav txog thaum tus menyuam zaum twj ywm, ob txhais tes tuav ruaj ruaj daim ncuav ntawm tes. Nws ntxim hlub. Vim nws raug tus mob tsis muaj zog thiab nrog rau ntau yam, nws yuav tau coj phuam npog qhov ncauj kom zam kab mob. Thiab txhua zaug uas nws cev tes los, kuv xav muab nws puag, kuv lub siab rov qab kaj nrig.

Nyob hauv zaj xwm txheej hais txog pog Exathaws, muaj ib lo lus ua rau kuv nco ntsoov. Yawm Maudekhais yog tus uas tau tu nws thiab pab kom nws tau ua niam vajntxwv, tau hais rau pog tias: “Leejtwg thiaj paub? Tej zaum qhov uas koj tau los ua niam vajntxwv rau tej lub sijhawm zoo li no, twb yog los pab cawm peb haivneeg kom dim kev puastsuaj los kuj tsis paub!” (Exathaws 4:14). Yawg lub siab yog “Koj tau yug los tseg rau lub sijhawm no.” Lo lus ntawd nrov hauv kuv lub hlwb. Kuv pom tias: yus kuj tab tom nyob rau “lub sijhawm zoo li ntawd” – ib lub sijhawm, tsim kom muaj tej kev hloov pauv rau ntawm thaj chaw uas Vajtswv tso peb nyob hauv.

Kuv kuj nyuam qhuav ua tiav zaj lus sib twv txog Vaj Ntsujplig tej koob hmoov. Kuv twb ua zaj no ntau xyoo los, tiamsis zaum no, kuv pom muaj tej kev hloov pauv. Tej zaug ntawd yog lub cim loj hlob ntawm sab ntsujplig? Kuv cia siab tias yuav zoo li ntawd.

Txoj koob hmoov cob qhia Vajtswv tej lus hauv kuv nthuav tawm meej meej. Kuv nyiam txhua hnub so tau pab cob qhia hauv lub rooj kawm Vajluskub. Thiab yam uas ua rau kuv sov siab, yog thaum uas tus menyuam no lub siab maj mam tau nthuav tawm, dhau ntawm tej haujlwm uas kuv ua pub rau tej menyuam tshwj xeeb li no. kuv tsuas hais tau rau Vajtswv tias: “Tus Tswv, kuv ua Koj tsaug vim koj tau hu kuv rau lub sijhawm zoo li no.”

“Yog hais tias koj pheej nyob twjywm tsis quavntsej li no, mas yuav muaj txojkev pab los saum ntuj los thiab yuav cawm cov Yudais kom dim. Tiamsis koj thiab koj txiv tsevneeg yuav tuag tu noob nrho. Leejtwg thiaj paub? Tej zaum qhov uas koj tau los ua niam vajntxwv rau tej lub sijhawm zoo li no, twb yog los pab cawm peb haivneeg kom dim kev puastsuaj los kuj tsis paub!” (Exathaws 4:14).

Txawm yog qhov haujlwm kuv ua tsuas yog tu ib tug menyuam mos, tsis loj zoo li niam vajntxwv Exathaws, tiamsis nws yeej yog ib lub sijhawm rau kuv koom tes rau Vajtswv tes haujlwm. Thiab qhov no kuj yog yam uas Vajtswv tau hu kom Vajtswv haiv neeg ua. Peb txhua tus ib leeg yeej muaj ib txoj koob hmoov yuav muab pub: tej zaug tsuas yog ib lub suab luag, muab puag rau xub ntiag, ib zaj nkauj qhuas Vajtswv lossis ib qhov lus tim khawv tseeb.

Kuv pom tias, ntau zaug dhau los ua ib tug neeg txhawb zog xwb twb yog ib qhov koob hmoov loj, rau cov uas ua leej niam muaj tej menyuam mos raug mob nyhav. Tej zaug yog muab ib qhov nyiaj pab rau qee tus txomnyem, lossis zoo siab hlo tseg sijhawm mus rau hauv lub chav cob qhia tej menyuam yaus tham lus rau lawv mloog, koj kuj muaj cuab kav tsim tau qhov kev hloov pauv nyob hauv Vajtswv lub tsev. Cia li thov Vajtswv taw rau koj paub tej kev cheem tsum tab tom nyob qhov twg, thiab taw kev rau koj siv yus tej koob hmoov ntawd. Koj lub siab tab tom tshua txog yam dabtsi?

Peb sawv daws puav leej yog tej daim txuas nyob hauv Yexus Khetos lub cev. Thaum sawv daws koom tes, peb yuav tsim tau ib daim duab zoo. Thiab yog tsis muaj koj feem, daim duab ntawd yuav zoo tsis txaus. Kuj nyob hauv txoj kev ua haujlwm ntawd, peb tau txaus siab, tau txuas ua ke, thiab ua lub neej yog raws li tej uas Vajtswv tau hu peb.

Vajtswv yuav nthuav qhia rau koj paub txog tej koob hmoov peev xwm uas muab npog cia lawm kom koj siv los ua Vajtswv haujlwm thiab pab lwm tus. Koj tau Vajtswv hu – los tseg rau ib lub sijhawm zoo li no.

Thov caw nrog kuv peb thov Vajtswv ua ke: Tus Tswv nyob rau ib lub sijhawm uas tsis muaj dabtsi nyob rau hauv lub neej no, thov pab kom kuv paub nres thiab hnov koj lub suab hu. Thov qhib kuv lub qhov muag kom ntsia pom tej kev cheem tsum ib ncig kuv. Thov pub kom kuv muaj lub siab txo hwjchim los ua tej haujlwm Vajtswv txib, txawm tsis muaj neeg ntsia pom thiab lees txais. Kuv thov muab tag nrho kuv lub sijhawm, lub peev xwm thiab lub siab tso rau hauv koj txhais tes. Thov siv kuv raws li koj lub siab nyiam, ntawm qhov no thiab lub sijhawm no. Kuv thov hauv Tswv Yexus Khetos lub npe, Amees.

Cov kwv tij, tsis yog tus twg twb yuav nyob rau ntawm ib qhov chaw nto npe, tau txhawb nqa, tau lawv npuaj tes qhuas muaj tej tus niam tsev lawv niaj hnub khwv tiv thaiv lawv tsev neeg, thiab koom tes pab ntau qhov kev cheem tsum sab nraud – yeej tsis muaj leej twg paub txog. Tiamsis koj puas ntseeg, Vajtswv muaj cuab kav ua tau tej haujlwm loj dua nyob kiag rau lub sijhawm uas peb xav tias ua tsis tau tshaj. Kuj zoo ib yam li Vajtswv tau xaiv cov niam tsev uas me tshaj los tsa ua niam vajntxwv rau ib lub tebchaws, Vajtswv kuj muaj cuab kav siv koj thiab kuv rau Vajtswv lub siab nyiam. Yog tias hnub no koj tseem tsis tau paub ua dabtsi, tsis paub yus tej koob hmoov yog dabtsi, ces tsis tas txhawj. Tej zaug Vajtswv tsis tos koj ua ib yam dabtsi loj, tiamsis tsuas xav kom koj npaj txhij rau yam uas Vajtswv tab tom tso ntawm koj xub ntiag. Peb yeej tsis paub tau tej zaug qhov ntawd ho yog qhov chaw uas Vajtswv yuav siv koj kom ua tau haujlwm loj – rau ib lub sijhawm zoo li ntawd.

Cov kwv tij sawv daws, tshwj xeeb yog cov niam tsev, koj yog Vajtswv tus ntxhais, koj tau tsim los rau ib lub homphiaj tshwj xeeb. Tsis yog tsuas yog pojniam hnub li hnub no xwb, tiamsis nyob rau hauv txhua hnub. Thov kom Vajtswv txoj kev hlub yuav ntxiv zog, ntxiv koob hmoov rau cov niam tsev kom khov kho, ua ib lub neej muaj nqis, tawg paj txi txiv rau Vajtswv lub npe pub rau sawv daws.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.