Đei layơ lu bơ̆n kiơ̆ Kră Yang đei jơhngơ̆m ‘lơ̆ng pran dêh… truh tơ đei tơdrong bơ̆n apinh? Kơplah oei kơ’bah, lu bơ̆n chă Kră Yang pă đei pơdơh. Mă lei, kơplah nơ̆r krao khan đei tơl ăn, dôm tơdrong đei hơmet ăn, lu bơ̆n ngăl ‘bônh kơ wơ̆t dơ̆ng tơ tơdrong arih so, nhen thoi pă kăl kơ Kră Yang dơ̆ng bơih. Lu bơ̆n chơchă dôm tơdrong đei pŭn đơ̆ng Kră Yang lơ hloh kơ chă Kră Yang. Na tơdah hrăn kơ thoi noh, lu bơ̆n gô mơn kơ rơhông, yua kơ tơdrong arih tơpă đei chă ‘bôh lăm anih Kră Yang oei hơdai.

Năr ‘nâu, ‘năr 07/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kathy Thomas kơ̆l ‘bai CHƠCHĂ MUH MĂT KRĂ YANG

“Jơhngơ̆m inh khan kơ Ih, “chơchă bĕ muh măt Sư,” Na inh khan! Inh gô chơchă muh măt Ih.” (Hơriso 27:8)

Mă tơpă, truh tơ dang ei, “tơdrong hlôh wao gah jang chŭn mir” lơ hloh lăm chŭn mir hnam dơnŏ nhôn noh rŏ lăng lăp … đei rong lơ meo. Yua kơ thoi noh, kơplah lu hơlơ̆p pơkuĕl apinh rong minh pôm meo dơ̆ng, inh ưh kơ đei hiôk tŏ sĕt hloi. Inh đei jet ming mă rơđah: “Lei wă rong kon ayơ?” Na đơ̆ng noh lu sư chĕp ba ‘bơ̆t anăp inh kon meo oei iĕ ioch, meo ‘brong sŏk gôh – kơnê̆ ưh pă gơh pơma dŏng sư thoi yơ.

Inh jơ̆ bơngai ‘mêm kơ meo. Na kơplah noh inh đei đăm tŏ meo bơih, inh ưh kơ wă đei thim meo dơ̆ng, mă loi minh pôm kon meo lăng ưh kơ đei ‘bôh ‘lơ̆ng tŏ sĕt hloi. Inh pơma khan “Ưh!” Mă lei đei minh ‘bar khei hlôi hloh, inh đei mơn ‘bôh tơdrong ưh kơ ‘lơ̆ng: ưh kơ đei bu ‘maih wă rong kon meo iĕ, kơnê̆, meo ‘brong sŏk gôh hloi. Lê̆ sư ‘bơ̆t doh đĕch. Lu nhôn dan ăn anăn sư noh Snickers.
Inh hơpơi inh đei roi thoi âu, meo kon kơnê̆ noh wơ̆ ‘lŏ gô jing ‘lơ̆ng. Mă lei ưh kơ thoi noh. Sư wơ̆ ‘lŏ jing … minh pôm meo tih păng kơnê̆ thoi kơ đêl so đĕch. Mă khan thoi noh, kiơ̆ kơ minh tơdrong hlĭch dêh, Snickers jing minh pôm meo mă inh mêm hloh.

Rim wơ̆t ăn kơ meo tơmam sa, lu sư đei jum dăr kơ inh, hmoi ơ – ôih ơ –aih. Mă lei kơplah tuh tơmam sa, lu sư weh đĭ hloi. Pă đei tơ’ngit dah oei jê̆ dơ̆ng bơih, pă đei lăng tơ inh dơ̆ng bơih.

‘Ngoaih kơ Snickers. Sư adrin năm jê̆ inh, truh tơ tŏk hao tơ ao tai inh, wă kơ … lăng inh, trŏ hloh noh “lăng pơnhen tơ muh măt inh”. Dôm lu kon meo nai lăng tơ tơmam sa mă inh đei ăn kơ lu sư. Đei sa bơih lu sư tơwih rŏng năm weh đĭ hloi.
Kư̆m đei inh jet kơdih: hăm trŏ ‘Bok Kei-Dei kư̆m ‘bôh thoi noh kơplah lu bơ̆n năm tơ hnam akŭm rim kơ năr Tơpơh ưh? Lu bơ̆n năm lơ tơpă, hơri ư ang, kơkuh, tơ’bôh jơhngơ̆m ‘mêm kơ Sư. Mă lei, kơplah Sư ăn dôm lu tơdrong lu bơ̆n chang gô, kơplah “pơnhan” ‘bĕnh bơih, lu bơ̆n hăt hot kơ weh hloi.

Mă lei ‘Bok Kei-Dei chang gô lu bơ̆n hloh kơ noh. Păng Sư trŏ kơ đei lơ hloh kơ noh. Sư dŏng iŏk lu bơ̆n đơ̆ng tơdrong yoch kơnê̆, trŏ kơ bơ̆n mơlâu. Rim pơge, Sư ‘me rong pơhngol lu bơ̆n, păng krao lu bơ̆n năm jê̆, păng tơ oei thĕng hreh lăm tơdrong ‘mêm đơ̆ng Sư. Sư wă kơ lu bơ̆n đĭ jơhngơ̆m năm jê̆ Sư, chơchă muh măt Sư. Sư lăp đon kơplah lu bơ̆n oei lăm Sư, wă kơ lu bơ̆n hưch wă kơ tơdrong Sư oei hơdai.

Năr ‘nâu, buăl tam adrin năm jê̆ Kră Yang bơih ưh? Tơplih kơnhăm kơ tơdrong Sư tuh ăn, buăl hăm chơchă tơdrong pŭn hiôk tơm đơ̆ng Sư oei hơdai ưh?

Na kơplah jơ ‘nâu, athei dơ̆ng ‘mơ̆i. Athei ăn kơ ‘Bok Kei-Dei wei rong bơhngol oei rơhing đơ̆ng buăl. Athei bơnê kơ Sư yua kơ tơdrong pŭn hiôk Sư tuh ăn. Athei jê̆ Sư hloh dơ̆ng. Athei chơchă muh măt Sư. Athei sơng iŏk tơdrong ‘mêm mơnat đơ̆ng Sư. Athei hiôk chơt đơ̆ng lăm tơdrong Sư oei hơdai.

“Bu gơh tŏk tơ kông Kră Yang? Bu gơh kĕ dơ̆ng lăm anih rơgoh Sư? Noh lu bơngai đei ti rơgoh păng jơhngơ̆m rơgoh, Ưh kơ wă ăn bơhngol sư tơdrong yoch glăi, Kŭm ưh kơ pơkă hơlĕnh. Bơngai noh gô đei pŭn hiôk đơ̆ng Kră Yang, Păng tơdrong tơpăt đơ̆ng Kră Yang ‘Bok Kei-Dei, Tơ’ngla dŏng pơklaih Sư. Noh boih adrĕch adrung lu bơngai chơchă Kră Yang, Wă khan lu bơngai chơchă muh măt Kră Yang ‘Bok Kei-Dei Jakôp.” (Hơriso 24:3-6)

Apĭnh đĭ đăng krao khan hơdai: Kơkuh kơ Kră Yang, apinh huay kơ jô̆ yo kơ kon kơplah kon chơchă tơdrong pŭn hiôk đơ̆ng Ih lơ hloh kơ chă Ih. Đei lơ wơ̆t kon năm jê̆ Ih yua kơ kon kăl kơ Ih tơgŭm, mă lei kơ plah tôm tơdrong đei bơih, jơhngơ̆m kon ‘bônh kơ weh đơ̆ng Ih. Apinh bơtho kon băt kơ ‘mêm kơ tơdrong Ih oei hơdai hloh kơ tơdrong pŭn hiôk đơ̆ng Ih ăn. Apinh ăn kơ kon đei jơhngơ̆m rơhing jê̆ Ih, chơchă muh măt Ih rim năr, yua kơ minh ‘nu Ih đĕch tôm mah ăn kơ kon bơih. Apinh wei rong bơhngol rơhing đơ̆ng kon hăm tơdrong ‘mêm mơnat păng tơdrong rơnŭk rơnoa đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng lăm năr ‘nâu Kră Yang oei jet lu bơ̆n: “Kon hăm đei jơhngơ̆m chơchă muh măt Inh ưh?” Tŏk bŏk lơ tơdrong hiơ̆k bơngơ̆t, tŏk bŏk dôm tơdrong apinh oei tam mă đei tơl ăn, hơppơi kơ lu bơ̆n năm hiơ̆ ‘biơ̆, hrĕp hreh păng oei lăm tơdrong Kră Yang oei hơdai. Ưh kơ sĭ chơchă tơpang ti ngăl tuh ăn tơdrong pŭn hiôk đĕch, na lu bơ̆n kư̆m athei chơchă muh măt ‘mêm mơnat đơ̆ng ‘Bok Kei-Dei. ‘Nĕ kơ chă Kră Yang kơplah kăl kơ Sư đĕch, na athei yua kơ ‘mêm kơ Sư. Yua kơ đơ̆ng Kră Yang oei hơdai lu bơ̆n gô đei tôm mah tơpă, đei pơdơh hiôk hian.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.