Lăm chăl jơhnơr mă bu bu kŭm kơdâu pơjei wă kơ huay kơ đei achăng lê̆ thoi dang ei, pơhuach jơnăr tơpă jơ̆ tơdrong kơ̆m. Drŏkăn phŏ kŭm đei hrăt hrot hloh kơ ‘noh: đei kăl kơ pơjing tơdrong jang, đei kăl kơ bơwei ‘lơ̆ng hnam dơnŏ păng hiơ̆k wei rong kon hơ’lơ̆p. Lu bơ̆n yua iŏk rim jơ phŭt wă bơ̆jang, tơiung akâu jăn, wă adrin arih minh chăl arih đei gĭt. Mă lei, lei tơm gĭt chăl arih hăm tơpă oei lăm dôm kơ jơ bơ̆jang ưh kơ pơdơh, dah bơ̆n nŏng kơdŏu na hiơt kơdih oei yak brŏk tơyơ? Lei hăm đei layơ lu bơ̆n pơdơh wă jet kơdih: Kră Yang hăm đei krao inh bơwih bơwăn, lăm kơplah trŏ jơ năr ‘nâu- jơ năr mă Sư đei dan ăn kơ lu bơ̆n, ‘bơ̆t dâu?

Năr ‘nâu, ‘năr 08/03/2026, năr Teh Đak ‘măn kơ năr Drŏkăn păng jơ̆ năr Drŏkăn Khŭl Lui, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Cathy Irvin kơ̆l ‘bai YUA KƠ TƠDAH KƠPLAH JƠ‘NÂU ĐEI TƠDRONG THOI LÂU.

“Yua kơ tơdah ih ngăn lăm jơ ‘nâu gô đei trong nai dơ̆ng pơklaih adrĕch Juđa, mă-lei ih păng hnam dơnŏ ‘bă ih kư̆m gô lôch răm. Bu băt lê̆ ih gơh pơm yă pơtao kư̆m yua kơ tơdrong lâu?” (Esther 4:14)

Hăm đei lơyơ buăl jet kơdih: yua kơ liơ tơdrong yua iŏk jơnăr đei gĭt kăl thoi noh? Mĭnh năr ‘nei lăm jơ pơdơh, inh hơoei hrĕp hreh ‘bơ̆t gơ’bang bơ̆jang păng thar tơchĕng pơwao: lei, kơdih đei ăn dôm yơ khei jơnăr hlôi ưh kơ đei yua?

Tơpă, inh ưh kơ trŏ jơ̆ bơngai ‘maih ngôi đĕch ôh. Inh bơ̆jang 40 jơ rim giĕng, phŏ kŭm đei jơ lơ hloh. Inh năm tơ hnam hơkŭm hơnơ̆ng, hiơ̆k bơngơ̆t kơ hnam dơnŏ, ‘măn jơnăr kơ ‘nhŏng oh păng buôl buăl. Tơdrong arih lăng gah ‘nguaih rŏ lăng đei hrăt hrot, tôm mah.

Mă lei inh ‘blŏk đêl dôm kơ jơ năr lăng hmă đĕch dôm kơplah lăp kăl kơ pơdơh tŏ sĕt đĕch, inh kŭm đei gơh tơgŭm mĭnh ‘nu bơngai bu noh, dah pơm mĭnh tơdrong kiơ noh đei tơm kăl hloh kơ chăl arih ‘nâu. Păng inh ‘bôh băt mĭnh tơdrong đei hlĭch tơpă: tơdrong pơm kơ inh mơn ‘bôh kơdih arih đei yua păng tơm kăl hloh đei lăp dang đăm jơ rim giĕng.

Tơ Khŭl Bơngai Lui inh đei mĭnh hnam dơnŏ ‘mêm dêh. Inh ngăl tơgŭm lu sư lăng bơwei kon hơ’lơ̆p lu sư lăm anih phŏng khŭl hơ’lơ̆p, ‘lơ̆p noh đei jĭ trăp. Lăp ‘bar gơsơ̆ rim khei đĕch, mă lei layơ lĕch brŏk inh kŭm ‘bôh jơhngơ̆m inh đei ‘bĕnh tơdrong hiôk chơt, nhen thoi inh đei sơng iŏk lơ hloh dôm kơ tơdrong kiơ inh đei ăn.

Dah pơma truh tơ tơdrong bơ̆jang kơ Kră Yang tơpă, inh ưh kơ đei tơchĕng truh kơ dôm tơdrong tih hloh. Inh tơchĕng truh kơ jơ năr hơ’lơ̆p ‘noh hiĕk re kơplah lu nhôn pơchơt klơ̆m ‘bơlŏng hơdai băl. Inh tơchĕng truh kơ rup sư hơoei hreh, ‘bar pah ti chĕp kơjăp ‘bĕng kuy iĕ. Oh hơiă dêh. Yua kơ đei tơdrong jĭ hăm lơ tơdrong pha nai, oh đei gom wă kơ huei kơ đei hiup iŏk yŏng jĭ. Păng rim wơ̆t oh đei chro ti, wă kơ inh pôk, jơhngơ̆m inh đei ‘bôh thoi hơdah.

Lăm hơ’mon gah yă Esther, đei mĭnh nơ̆r pơma pơm kơ inh đei ‘blŏk răk. ‘Bok Mokđêkai jơ̆ bơngai đei wei rong păng tơgŭm wă kơ yă Esther đei pơm yă pơtao, đei khan hơđăl hăm yă khan: “Bu băt lê̆ ih gơh pơm yă pơtao kư̆m yua kơ tơdrong lâu?” (Esther 4:14). Tơdrong sư khan jơ̆ “Kon đei tơpŭ trŏ jơnăr thoi lâu.” Nơ̆r pơma ‘noh nŏng kơ re kơtơ̆ng lăm đon tơchĕng inh. Inh ‘bôh băt khan: kơdih kŭm oei dơ̆ng lăm “jơnăr lei lăi thoi ‘noh”- mĭnh jơ năr hơđăl tơpă, păng đei thoi hmă đĕch- wă pơjing dôm kơ tơdrong tơplih đei yua ‘bơ̆t trŏ anih ‘Bok Kei-Dei dan ăn kơ bơ̆n.

Inh kŭm ‘nao pơkeh mĭnh ‘bai pơm rơih iŏk trong trŏ gah tơdrong mơnat ăn gah bơhngol. Inh đơ̆ng đei pơm ‘bai ‘nâu lơ sơnăm adrol bơih, mă lei jơ ‘nâu, inh ‘bôh băt đei dôm kơ tơdrong tơplih. Hăm trŏ ‘noh jơ̆ tơ’bôh đơ̆ng tơdrong wơ̆ pran gah bơhngol? Inh đĭ jơhngơ̆m chang hơmĕng jơ̆ thoi noh.

Tơdrong ăn đĕch bơtho Nơ̆r Kră Yang đơ̆ng inh tơ’bôh hơđăl đơ̆ng tơdrong đei yua. Inh hơiă dôm kơ jơ pơge pơhrăm Nơ̆r ‘Bok Kei-Dei. Păng tơdrong pơm kơ inh mơn lăm jơhngơ̆m lei lăi, ‘noh jơ̆ kơplah jơhngơ̆m krao khan tơgŭm kơ dôm lu hơ’lơ̆p jĭ jăn lăm inh ‘net ‘net đei tơ’bôh, đơ̆ng trŏ tơdrong jang inh oei jang hăm ŏh ‘lơ̆p đei jĭ pha ra ‘biơ̆ noh. Inh lăp gơh roi hăm Kră Yang khan: “Kơkuh kơ Kră Yang, kon bơnê kơ Ih yua kơ đei krao kơdih kon kơ minh jơ năr thoi lâu.”
“Yua kơ tơdah ih ngăn lăm jơ ‘nâu gô đei trong nai dơ̆ng pơklaih adrĕch Juđa, mă-lei ih păng hnam dơnŏ ‘bă ih kư̆m gô lôch răm. Bu băt lê̆ ih gơh pơm yă pơtao kư̆m yua kơ tơdrong lâu?” (Esther 4:14)

Mă khan tơdrong inh oei bơ̆jang lăp jơ̆ bơwei mĭnh ‘nu bơngai ‘lơ̆p, ưh kơ đei tih hloh thoi kơ tơdrong jang yă pơtao Esther, mă lei ‘noh oei jơ̆ jơ năr wă hơdai lăm tơdrong jang Kră Yang. Păng ‘noh kŭm jơ̆ tơdrong mă Kră Yang krao kon pơlei Sư bơ̆jang. Bu lăm lu bơ̆n kŭm đei mĭnh tơdrong mơnat ăn đĕch wă pơjao: rŏ lăng lăp jơ̆ mĭnh tơdrong hiĕk, mĭnh tơdrong kuăr, mĭnh ‘bai hơri ư-ang, dah mĭnh hơ’mon klah song đĭ jơhngơ̆m.

Inh ‘bôh băt khan, mưh lăp jing mĭnh ‘nu bơngai pơlung đei jơ̆ mĭnh tơdrong ăn đĕch tih dêh, hloh ‘noh jơ̆ hăm mĭnh ‘nu bơngai mĕ đei kon hơ‘lơ̆p oei jĭ trăp. Rŏ lăng jơ̆ pơjao kơ bơngai tơ‘bơ̆p tơdrong anat lăm kơ sô̆ jên tŏ sĕt đĕch, dah wă ‘măn jơ năr hloi lăm khŭl hơ’lơ̆p wă roi hơ’mon kơ lu hơ’lơ̆p mơ̆ng, buăl kŭm gơh pơjing dôm kơ tơdrong tơplih ‘lơ̆ng rŏ kơ Hnam Kră Yang. Athei apinh Kră Yang tơ’bôh kơ buăl băt tơdrong kăl yua oei ‘bơ̆t yơ, păng bơtho kơ buăl yua tơdrong ăn đĕch đơ̆ng kơdih. Jơhngơ̆m buăl oei dŏng tơgŭm tơdrong kiơ?

Lu bơ̆n jơ̆ dôm kơ tơmam pơklep lăm akâu jăn ‘Bok Krist. Dah hơdai băl pơjing, lu bơ̆n hơdai băl pơm jing minh pôm rup tôm mah. Păng dah ưh đei đơ̆ng gah buăl, rup noh gô ưh pă tôm mah dơ̆ng bơih. Trŏ lăm tơdrong bơwih bơwăn ‘noh, lu bơ̆n đei hiôk lăm jơhngơ̆m, đei pơgơ̆p tơ’bưh dih băl, păng gơh arih trŏ hăm tơdrong mă Kră Yang krao bơ̆n.

‘Bok Kei-Dei gô tơ’bôh kơ buăl ‘bôh dôm kơ tơdrong mơnat ăn đĕch păng tơdrong gơh hơgei oei hlơp, wă kơ buăl bơwih bơwăn kơ Sư păng bơwih bơwăn kơ bơngai nai. Buăl đei Sư krao- kơ minh jơ năr thoi noh.

Apĭnh đĭ đăng krao khan hơdai: Kơkuh kơ Kră Yang, lăm dôm kơ jơnăr hmă đĕch thoi noh lăm chăl arih âu, apinh tơgŭm kon băt pơdơh wă mơ̆ng kơ tơ̆ng nơ̆r Ih krao. Apinh pơih măt kon wă ‘bôh tơdrong kăl yua tăp dăr kơ kon. Apinh ăn kơ kon jơhngơ̆m iơ̆m dim tôm mah wă bơ̆jang tơdrong jang Kră Yang pơjao, mă ưh kơ đei bu lăng ‘bôh dah ‘blŏk răk. Kon pơjao jơnăr, tơdrong gơh hơgei păng jơhngơ̆m kon lăm tơpang ti Ih. Apinh yua kon kiơ̆ thoi Kră Yang wă, lăm anih ‘nâu păng lăm trŏ jơ năr ‘nâu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ưh kơ trŏ bu kŭm đei dan ăn ‘bơ̆t mĭnh anih adrol hloh, đei pơ-ư, đei bơngai nai tap ti bơnê. Đei dôm kơ bơngai drŏkăn rim năr hiơ̆k bơngơ̆t lăm tơdrong arih pơmat tat, adrin hiơ̆k kơ hnam dơnŏ kơdih, păng pơthim tơ pang ti wei rong kơ lơ rơbâu tơdrong kăl yua tơdrong nai- mă ưh kơ đei bu băt truh. Mă lei buăl hăm lui ngeh ưh, Kră Yang gơh bơ̆jang dôm tơdrong jang tih hloh lăm tơ anih dôm anih nhen thoi chu iŏk đon hơla hloh. Kŭm thoi Sư đei rơih bơngai drŏkăn iĕ hloh wă pơm Yă Pơtao kơ mĭnh dêh char, Sư kŭm gơh yua iŏk buăl păng inh kơ tơdrong athei tih hloh đơ̆ng Sư. Dah năr ‘nâu buăl oei hiơ̆k tơtăm, ưh tim mă băt tơdrong mơnat ăn đĕch đơ̆ng kơdih jơ̆ kiơ, lei kŭm ưh kơ kăl hiơ̆k bơngơ̆t. Rŏ lăng Kră Yang ưh kơ đei chang gô buăl pơm tơdrong kiơ tih hloh, mă Sư lăp hơpơi kơ buăl gô pơm hloi kơ tơdrong Sư oei dan ăn ‘bơ̆t anăp. Păng băt kiơ, trŏ anih ‘noh đei jơ̆ anih Sư gô yua buăl trŏ tơdrong mơsêh mơyang- kơ mĭnh jơ năr thoi lâu.

Ơ lu bơngai mơ̆ng mă ‘mêm kơ eng, gĭt noh jơ̆ bơngai drŏkăn, buăl jơ̆ dôm lu kon ‘Bok Kei-Dei, đei Sư pơjing hăm tơdrong kơ nhăm gĭt kăl. Ưh kơ sĭ lăp năr Teh Đak ‘măn kơ năr Drŏkăn năr ‘nâu, mă lăm rim năr, gô ling lang đei gĭt păng ‘mêm mơnat rim năr. Hơpơi kơ tơdrong ‘mêm, păng ăn đĕch đơ̆ng Kră Yang gô pơthim jơhngơ̆m pran, pơthim tơdrong mơnat wă kơ bơngai drŏkăn ling lang kơjăp, wă arih mĭnh chăl arih đei tơm kăl, ư-ang tơpă, pơchrang anih gĭt đơ̆ng Sư kơ rim bơngai.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.