Đei layơ buăl jet yua kơ kiơ Yang Yêsu ưh kơ đei krao lu bơngai đei hŏk kơjung păng đe pôk pơ ư, mă rơih iŏk dôm lu bơngai drŏnglo lăng lŭch kơ đe mă pơm jơ̆ng ‘bang Sư? rŏ lăng ‘Bok Kei-Dei ưh kơ chă lu bơngai đe pôk pơ ư dah bơngai ‘lơ̆ng rŏ, mă chă lu jơhngơ̆m băt kơ chu yom. Sư yua lu bơngai lŭch kơ đe wă tơ’bôh tơdrong mơ sêh Sư. Hrei ‘nâu kư̆m thoi noh, Kră Yang oei yua lu bơngai lăng lŭch kơ đe, ưh kơ đei bu ngeh khan wă tơgŭm dŏng pơklaih lu bơhngol oei ơh sơ’ngon lăm teh đak ‘nâu.

Năr ‘nâu, ‘năr 09/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Mike Wolff kơ̆l ‘bai MINH JƠHNGƠ̆M IUNG NĂM YUA KƠ ANĂN KRĂ YANG

“Păng inh kơtơ̆ng nơ̆r Kră Yang khan: “Inh gô wơh bu năm? Bu gô năm kơ lu bơ̆n?” Inh tơl: “Đei inh tơ âu, apinh ih wơh inh năm.” (Êsai 6:8)

Inh oei năm hơdai khŭl akŭm pha ra ‘biơ̆. Khŭl lu nhôn pơpôi lu bơngai drŏnglo chơchă tơdrong chông anhăk đơ̆ng Yang Bơhngol ‘Lơ̆ng. Lu nhôn đei ‘bôh tơdrong hlĭch tơpă. Na đei minh wơ̆t tơ’bơ̆p ưh kơ thoi inh proh hơmet. Inh đei tơ’bơ̆p minh ‘nu bơngai drŏkăn đei đon lui, adrin hlĭch dêh. Inh krao kơ mŏ noh ‘Bar‘bara.

‘Bar‘bara năm tơ lu nhôn đei tơdrong arih thoi kơ tôch bơih. Mŏ noh chông ba ‘bar ‘nu kon drŏnglo, minh tơdrong hơmĕng kơ hnam dơnŏ gô đei dŏng pơklaih. Minh ‘nu hơdai hăm khŭl inh, na minh ‘nu tơ oei lăm gre tơ anih ming gre. Rŏ lăng kư̆m ‘bônh kơ hlôh, bu mă đei ‘nă hal wă kơ ‘maih khŭl hơdai “dôm kơ lu mih ma” hrăn kơ krao khan?

Klo ‘Bar‘bara arih đei jĭ hiĕn hiang. Jơ ‘nâu, ‘bar ‘nu kon drŏnglo kư̆m đei jĭ jăn: ưh kơ lăp kơ tơmam sa, pơm kơ Brad ling lang jĭ kơ̆l, na Jimmy layơ kư̆m jĭ đon. Truh tơ Brad pơma dơnuh hăm mĕ sư khan ưh pă ‘maih arih dơ̆ng bơih. kơplah ‘Bar‘bara roi tơdrong noh, inh lăng tơ muh măt Brad ‘bôh rơđah jơhngơ̆m sơ’ngon. Inh adrin ưh kơ ăn đak măt lĕch. Khŭl lu nhôn hăt hot kơ hơmet tơmam sa păng ka phê tơ anih nai yua kơ ‘Bar ‘bara khan ‘bâu đĕch pơm kơ Brad đei tơdrong jĭ.

Hnam dơnŏ sư năm jơ̆p kơ anih, đơ̆ng lu ‘bok pơgang truh tơ hnam pơgang tih. Ưh kơ đei bu băt kơ tơdrong jĭ noh. Lui ngeh kơ ‘Bok Kei-Dei gô pơklaih, lu sư kư̆m đei chơchă lu bơngai đei anăn ‘Bok Kei-Dei yua krao khan pơklaih. Na ‘Bar‘bara ưh kơ achăng. Nhen thoi yă adro lăm tơdrong hơ’mon pơm kơ yŏng pơgơ̆r pơma khan:

“Dah iĕm mơ̆t oei tơ hnam ayơ, iĕm oei hloi tơ hnam noh đĕch truh tơ năr iĕm wă năm tơ pơlei nai. Dah pơlei ayơ ưh kơ wă sơng iŏk iĕm, thoi noh na lăp iĕm brŏk đơ̆ng pơlei noh iĕm sơpuih ‘bruih tơ jơ̆ng iĕm wă tơbăt ăn kơ lu sư ‘Bok Kei-Dei wă phak ning-mônh.” (Luka 9:4-5)

Kư̆m nhen thoi noh, mŏ ‘Bar‘bara chơ̆n jơhngơ̆m tơdŭ ‘măng, lui ngeh gô đei năr Kră Yang tơl tơwih. Đei bơngai jet mŏ thoi âu: yua kơ kiơ đơ̆ng kơ dôm lu tơdrong bơ̆jang, mŏ năm chă lu bơngai drŏ nglo lăng lŭch kơ đe thoi lu nhôn? Nơ̆r tơl đơ̆ng sư pơm kơ jơhngơ̆m inh pơpơ̆. Klo mŏ noh, ‘nhŏng Chuck, Kră Yang đei pơtrŭt păng chông anhăk năm tơ âu, wă kơ đei bơngai minh jơhngơ̆m krao khan hơdai. Kơplah jơ noh, inh đei mơn rơđah Yang Bơhngol ‘Lơ̆ng đei pơsĭt lăm jơhngơ̆m inh: ‘Bok Kei-Dei đei krao iŏk lu bơ̆n bơngai ưh kơ đei anăn mă đe pôk pơ ư- dôm lu bơngai chă ka, bơngai iŏk jên thuê̆ mă Yang Yêsu đei krao – kơplah Sư pơma khan đei bơngai yak năm hloi, wă kơ pơklaih ming thoi kơ blŭng a. Tơplih kơ dôm lu muh măt lăng rŏ ‘lơ̆ng, Kră Yang chơchă dôm lu bơngai đei minh jơhngơ̆m đon, chă Kră Yang tơpă păng chu yom kơ Sư.

‘Bok Kei-Dei oei krao lu bơ̆n wih wơ̆t tơ Hnam Akŭm mă Kon Sư đei tơ’bôh. Sư krao lu bơ̆n lĕch đơ̆ng tơdrong lui kiơ̆ kơ kon bơngai pơjing đei tôm mah, ‘lơ̆ng trŏ; lĕch hlôi đơ̆ng lơ tơdrong rơngei, tơdrong pơlong lăng tŏ sĕt đĕch – tơdrong noh gô pơm kơ đon lui rơdu. Sư krao iŏk lu bơ̆n kiơ̆ Yang Yêsu lăm tơdrong arih rim năr, lăm hnam dơnŏ, tơ lăm anih bơ̆jang, păng tơ lăm anih juăt kơ nhă đak – wă pơjing khŭl Bơngai Lui tơpă.

Lu bơ̆n đei krao iŏk jing minh ‘nu bơngai drŏnglo ‘Bok Kei-Dei – tơdrong mă thoi hnam dơnŏ mŏ ‘Bar‘bara đei chơ chă. Lu bơ̆n gô jing bơngai đei tơplih, arih tơpă hăm đon lui, păng đei jơhngơ̆m ‘mêm kơ Kră Yang. Dôm lu tơdrong đei ‘bôh lăm teh đak ‘nâu dôm lu tơdrong tưk tơ iung lu bơ̆n dôm kơ sơ năm adrol, ‘net ‘net đei rai tơ‘bôh dôm tơdrong rơdu. ‘Nâu jơ̆ ‘nao “blŭng a kơ dôm tơdrong jĭ wă tơpŭ” kơplah rơhing kơ Yang Yêsu Krist rai tih, na dôm lu tơdrong mă đei chơ chă lăm teh đak gô hiong răm. Yang Bơhngol ‘Lơ̆ng gô chông anhăk lu kon bơngai oei wơ̆l jrok păng ơh sơ’ngon năm chă lu jơhnơr plơ̆ng ‘nao chu Kră Yang wơh.
Lu nhôn đei ‘bar jơ pơma dơnuh păng krao khan hơdai ‘Bar‘bara păng ‘bar ‘nu kon drŏnglo sư. Đơ̆ng rŏng kơ krao khan ăn kơ ‘Bar‘bara păng Brad, khŭl lu nhôn lĕch năm tơ anih ming gre, ngôi hơdai Jimmy wă krao khan ăn kơ sư. Inh ưh kơ ‘bônh tơ’bôh đơ̆ng lăm jơhngơ̆m păng ưh kơ hơmĕng kơ đei dang ei hloi, mă lei kơplah lĕch đơ̆ng anih noh, inh chang hơmĕng gô đei tơdrong pơklaih- yua kơ inh lui ngeh thoi âu, lu nhôn jơ̆ anih mă Kră Yang chông anhăk hnam dơnŏ noh năm truh tơ lu nhôn. Na đei minh tơdrong inh ‘bôh sĭt: muh măt Brad ‘bôh praih hloh rơđah dêh kơplah mơ̆ng gah tơdrong tơpă tơpăt.

Lu nhôn băt bơnê kơ Kră Yang yua kơ mŏ ‘Bar‘bara, yua kơ jơhngơ̆m pơ̆n nuih mă hŭi kơ đei, păng đon lui kơjăp mă hrei ‘nâu ưh kơ đei ‘bôh. Mŏ noh đei tơ’blŏk kơ inh gah tơdrong inh đei krao iŏk: krao wơ̆n lu bơngai lĕch đơ̆ng tơdrong arih kiơ̆ kơ tơdrong pơjing tơdrong lui rơdu thoi kơ Laođisê, wă kơ jing bơngai đei tơplih ăn kơ Hnam Akŭm ‘nao kơ Kră Yang. Tơ’ngla sek tơlang tih hloh oei chơchă kon bơngai mă đe ưh kơ ư ang, kăl kơ lu sư drơ̆ng thoi âu: “Kơkuh kơ Kră Yang, đei kon tơ âu. Apinh wơh kon!” Dôm lu bơngai lăng thoi kơ hmă đĕch noh gô chông anhăk păng hơmĕng ba ăn kơ lu bơhngol hiong răm, tŏk bŏk teh đak oei wơ̆l jrok.

Apĭnh đĭ đăng krao khan hơdai: Kơkuh kơ Kră Yang mă ‘mêm, mă kon jơ̆ bơngai lŭch kơ đe, apinh yua chăl arih kon wă ba ăn tơdrong chang hơmĕng, tưk tơ iung tơdrong ‘mêm Ih ăn kơ lơ bơngai oei đei gleh lap păng ơh sơ’ngon. Apinh bơtho kon băt kơ lui gơnang păng chu yom Ih rim năr, đei jơhngơ̆m sơng iŏk dôm tơdrong Ih đei krao wă bơ̆jang. Hơpơi kơ kon ling lang yak năm hơdai minh jơhngơ̆m hăm mŏ oh, rim năr sơtơ̆p kŭl tăng krao khan păng pơlung tưk tơ iung dih băl hăm tơdrong ‘mêm ‘Bă. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘Bok Kei-Dei oei mơ̆ng dôm lu nơ̆r krao khan ling lang. Păng Sư oei krao lu bơ̆n lĕch đơ̆ng tơdrong arih hiôk chơt lu bơ̆n na mơ̆t lăm anih anat anot, ba ăn tơdrong hơdah ăn kơ lơ bơngai. Kơplah lu bơ̆n đei jơhngơ̆m sơtơ̆p kŭl tăng minh jơhngơ̆m krao khan, Kră Yang gô pơm dôm tơdrong hloh kơ tơdrong lu bơ̆n tơchĕng. Hơpơi kơ Kră Yang ăn kơ rim ‘nu lu bơ̆n đei jơhngơ̆m kơjăp, na tơdŭ ‘măng, lui gơnang, minh jơhngơ̆m, krao khan păng chang gô năr Kră Yang bơ̆jang, tơplih jing ‘anao dôm lu jơhngơ̆m ơh sơ’ngon jum dăr kơ lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.