Bơngai lui kơ Kră Yang, tơpă bu lăm lu bơ̆n kŭm đei lơ nơ̆r krao apinh đĭ jơhngơ̆m hăm Kră Yang. Lu bơ̆n apinh Kră Yang kơ tôm tơdrong đei tơproh ‘lơ̆ng, kơ hnam dơnŏ đei hiôk hian, dah kơ mĭnh jơ gĭt kăl ayơ noh đei truh ‘lơ̆ng tôm. Mă lei, đơ̆ng rŏng kơ năr krao khan noh, tơdrong ưh kơ kiơ̆ thoi wă đei truh. Rŏ lăng lu bơ̆n đei jet kơdih: yua kơ liơ tơdrong ơh sơ’ngon ‘nâu đei truh hăm bơ̆n? Yua kơ liơ Kră Yang nhen thoi ưh kơ đei mơ̆ng kơtơ̆ng nơ̆r bơ̆n krao apĭnh?

Năr ‘nâu, ‘năr 10/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih D. Leon Pippin kơ̆l ‘bai KƠPLAH KRĂ YANG NHEN THOI PĂ ĐEI MƠ̆NG

“Sư gô krao khan apinh Inh, Inh gô tơl tơwih kơ sư; Lăm năr pơmat-tat, Inh oei hơdai sư, dŏng pơklaih sư păng pôk pơư kơ sư.” (Hơriso 91:15)

Chris đei chang gô năr ‘blŏk hơdơ̆r kơ năr tơpŭ jĭt ‘bar sơnăm sư đơ̆ng đunh năr bơih. Sư ‘maih chơt hiôk kơ năr gĭt kăl noh tơ anih pơngôi pơchơt. Pơge năr ‘noh, Chris iung đơ̆ng hrôih, ‘nă hal păng ‘bĕnh blai tơdrong chang gô, lui tơpă khan kơdih gô đei mĭnh năr ‘blŏk hơdơ̆r năr tơpŭ chơt hiôk tơpă.

Adrol kơ đĭ hnam dơnŏ lĕch hlôi đơ̆ng hnam, ‘bă Chris, kŭm jơ̆ mĭnh ‘nu ‘bok bơtho, krao đĭ đăng pơpôi hơdai păng krao khan. Sư apinh Kră Yang ăn kơ tơdrong năm chă ngôi đei chơt hiôk păng bơwei đĭ hnam dơnŏ đei hiôk ‘lơ̆ng.
Tơdrong yak năm nhen thoi kơjung hloh kơ thoi juăt hmă. Mă lei tuch luch, anih chă ngôi pơchơt kŭm ‘bôh ‘bơ̆t hơnăp. ‘Bă đei pơdơ̆ng hơmet gre đang na Chris đei kơtah jur. Rok trong năm truh tơ anih tĕch wĕ, sư mơ̆ng kơ tơ̆ng nơ̆r ôr pơrĕt ‘nă hal, nơ̆r hiĕk re đơ̆ng lu anih pơngôi pơchơt. Na Chris lăng ‘bôh tơdrong pơngôi pơchơt hơ iă sư lăp đon: seh pơm hăm ‘long pơdăr ‘bar hơtăl. Sư băt hloi, ‘noh gô jơ̆ tơdrong pơchơt blŭng a đĭ hnam dơnŏ hơdai pơngôi.

Chris kơdâu truh tơ anih pơdăr, tŏk hăt hot anih kơpal, na tŏk tơ kơpal kơdŭ seh tih. Lăm kơplah jơ ‘noh, Chris jĭt ‘bar sơnăm nhen thoi ưh pă oei ‘bơ̆t doh bơih. Lăm đon tơchĕng, sư jing mĭnh ‘nu bơngai hao aseh tơ gah yă Nâm, oei pơm tơ’bôh ‘bơ̆t anăp tơpôl lơ ôr jreo, jur tŏk, pơdăr jơ̆p ưh kơ pơdơh.

Mă lei tơdrong chơt hiôk noh ‘bônh kơ tôch hrĕnh tĕnh.

Kơplah Chris tơsĕr huŏng đơ̆ng “aseh tih” sư, jơ̆ng sư đei tơsĕr păng đom lăm tơmam juă pơsei. Sư pơ̆k tơ ala. Tơmam juă pơm kơ hơbăn sư hyah păng trŏ jrŭ lăm jơ̆ng sư.

Tơdrong jĭ dêh đei truh. Chris đei ba hăt hot lăm anih kâp kuư̆ jê̆ dei, hnam dơnŏ tăp dăr. Kơplah lăng ‘bôh pham păng hơkar sĕch đei hyah, sư hơngơ̆t. Bơngai jang pơgang tơbăt tơdrong jĭ trăp dĭng mah đei sĭt truh 73 jrŭm.

Chris đei ơh sơ’ngon. Sư nhen thoi hiơ̆k bơngơ̆t. Sư jơ̆ mĭnh lăm dôm lu bơngai glơi đak gơh hơgei lăm khŭl glơi đak tơ hnam trương, sư ưh kơ ngeh kơplah ‘bok pơgang pơma khan tŏ sĕt hloh dang drâu giĕng ‘mơ̆i sư gơh pơtơm glơi đak dơ̆ng. Lăm tơdrong ơh blĕk păng ơh sơ’ngon, Chris hue lăng tơ ‘bă sư, nhơ̆m păng pơma jŏk:

“‘Bă đei krao khan kơ lu bơ̆n gô đei mĭnh năr chơt hiôk, khan ưh kơ đei bu jĭ jăn. Mă lei kon đei jĭ jăn, păng lu bơ̆n ưh kơ đei hiôk chơt hloi!”

‘Bar giĕng đơ̆ng rŏng, Chris đei tơdrong jĭ đon dêh. ‘Bok pơgang đon- muh- hơlŏng khăm đon pah ‘ma kơ sư na pơma:

“Chris, pŭn tơpă kơ kon ưh kơ đei glơi đak lăm kơplah ‘nâu.”

“Yua kơ kiơ ‘bok pơgang? Ưh kơ gơh hơmet bơih ah?”

“Đon kon đei jĭ đuh păng….”

Chris hiơ̆k tơtăm pơma: “Ưh kơ trŏ jơ̆ tơdrong kiơ trăp dêh ưh?”

‘Bok pơgang lăng tơ sư păng pơma hơđăl:

“Đei. Dah kon ưh kơ đei jĭ jơ̆ng păng pơtrơp glơi đak, lăm đon kon rŏ lăng gô đei pơchah, păng kon gô đei klĭk ling ‘bơ̆t đon ‘noh.”

Chris đei tơtơ̆ na nhơ̆m. Tơdrong tơbăt ‘nâu đei kơnê̆ hloh kơ sư tơchĕng. Sư đei chang hơmĕng ‘nâu lăp jơ̆ mĭnh tơdrong jĭ hmă đĕch, khan dah jơ̆ng klaih, sư gô wơ̆t anih glơi đak thoi adrol. Mĕ sư dui sư lăm kơtơh, păng ‘bar ‘nu mĕ kon nhơ̆m hơdai.

Kơplah brŏk truh tơhnam, Chris jơ̆ bơngai jur đơ̆ng gre hơdrol. Sư jol khŏl iung, kăl kơ đei gơning tơ gre wă kơ dơ̆ng tơ păt. Kơplah ‘bă lĕch đơ̆ng gre, Chris đei pơma, nơ̆r pơma hơdar mă lei ‘bĕnh tơdrong tơchĕng:

“‘Bă ơi, đei kơplah kon ‘bôh thoi Kră Yang ưh kơ đei mơ̆ng kiơ hloi. Mă lei ‘bă ngăl đei pơma, Kră Yang đei pơkă khan: “Sư gô krao khan apinh Inh, Inh gô tơl tơwih kơ sư; Lăm năr pơmat-tat, Inh oei hơdai sư, dŏng pơklaih sư păng pôk pơư kơ sư.” (Hơriso 91:15)

Na Chris jol khŏi dăr hlôi kơ gre, na kuăr iŏk ‘bă sư hăm tơdrong kuăr kơjăp tơpă, kơ̆l gơning lăm kơ tơh ‘bă păng nhơ̆m:

“Pĭnh drong mơnat đơ̆ng ‘bă….kon đei tơdrong glăi lơ dêh.”

Măr sư hơdai yak tơ gah hnam, oei rôp băl ti, rim ‘nu đei chĕp ba dôm kơ tơdrong tơchĕng kơdih. Bơngai mĕ đei bơnê kơ Kră Yang lăm jơhngơ̆m yua kơ hnam dơnŏ sư. Bơngai ‘bă đei thĕng hreh tơchĕng pơwao Nơ̆r ‘Bok Kei-Dei: “Ti ‘ma Ih ‘bĕnh kơ tơdrong tơpăt.” (Hơriso 48:10)

Trŏ, ‘Bok Kei-Dei ling lang pơm trŏ thoi dôm tơdrong kiơ Sư đei khan!

Lăm jơhngơ̆m băt khan kơdih đei mĭnh ‘nu ‘bă ‘lơ̆ng rŏ, Chris đei mĭnh wơ̆t dơ̆ng pơhrăm iŏk lui gơnang kơ nơ̆r krao khan đơ̆ng ‘bă.

Tơ gah ataih, re kơ tơ̆ng tơgiĕp đơ̆ng gre chơ bơngai jĭ. Chris đei pơdơh kơplah ‘blŏk truh kơ re kơ tơ̆ng noh, na mĭnh wơ̆t dơ̆ng bơnê kơ ‘Bok Kei-Dei lăm jơhngơ̆m- yua kơ Sư đei wei lăng, bơwei sư, kiơ̆ thoi mă blŭng a sư ưh kơ hlôh băt.

Apĭnh đĭ đăng krao khan hơdai: Kơkuh kơ Kră Yang, đei kơplah kon krao khan đĭ jơhngơ̆m, mă lei dôm tơdrong kiơ đei truh tă ưh kơ đei lei lăi thoi kon chang gô. Phŏ kŭm đei ơh sơ’ngon, hiơ̆k bơngơ̆t păng ngĭl ngŭl kơ Kră Yang. Mă lei apinh tơgŭm kon lui gơnang kơ Kră yang mă khan kơplah kon ưh tim mă hlôh tơdrong Ih oei bơ̆jang. Dah oei ơh sơ’ngon dah bơ̆l hăl, apinh tơ’blŏk kơ kon ‘blŏk khan Kră Yang oei oei jê̆, oei mơ̆ng kơtơ̆ng, păng pơm tôm tơdrong mĭnh jơhngơ̆m yua kơ đei yua kơ kon. Apinh tơgŭm kon băt pơjao đĭ đăng anih Kră Yang, băt bơnê kơ Kră Yang mă khan lăm kơplah dôm tơdrong nhen thoi ưh tim mă tôm mah. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng buăl đei krao khan lơ tơpă, mă lei dôm tơdrong ưh kơ đei truh thoi chang gô. Dah thoi noh, athei ‘blŏk khan Kră Yang oei bơ̆jang, kiơ̆ thoi Sư wă, lăm jơnăr Sư. Mă dang ei buăl ưh tim mă hlôh, ưh tim mă ‘bôh hơđăl nơ̆r tơl, Sư oei ling lang bơwei buăl. Đei kơdôm kơplah, lăp dah hlôi tơ’bơ̆p đĭ dôm tơdrong păng lăng đêl, lu bơ̆n ‘nao wă ‘bôh băt khan tơdrong bơ̆n đơ̆ng đei lăng jơ̆ “tơdrong truh” đei trŏ jơ̆ tơdrong bơwei ‘bĕnh tơdrong ‘mêm mơnat mă Kră Yang ‘măn ăn kơ chăl arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.