Puas tau muaj zaum twg koj cia li hnov qab yam uas koj tab tom nrhiav lossis yam uas koj yuav hais rau ib tug twg ntawd dhau ntawm qhov rooj lawm tau? Cov tub txawg sab soj neeg lub hlwb lawv hu tias yog ib qhov tshwm sim tuaj pheej tshaj yeej ib txwm tshwm rau peb tib neeg. Tshuav Vajtswv no zoo li cas? Puas muaj zaum twg Vajtswv kuj hnov qab ib yam li peb thiab?

Hnub no, yog hnub 11/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm VAJTSWV NCO

“Vajtswv rov qab nco txog Laxees thiab teb nws tej lus thov…” (Chivkeeb 30:22)

Lub nroog uas muaj paj ntau heev txais tos kuv rov qab los tom qab ntau xyoo ncaim mus lub sijhawm ntawd cua txias zias thaum yuav xaus xyoo. Qhov chaw no yeej ib txwm zoo li qub, yeej zoo nkauj li qub. Nyob hauv muaj tib neeg coob coob yog tej qhov chaw nyob ntsiag to, yog tej kev nce nplooj ntoo ntsuab xiab cuag li tab tom tos twg twg. Kuv ua twjywm saib txhua txoj kev uas peb lub tsheb mus dhau. Xwb tim kuv pom muaj ib vaj txiv tab tom siav nyob ntawm kev. Muaj ib tsob, ob tsob, peb tsob. “Tej paj txiv duaj! Yog paj txiv duaj lawm tiag!”. Kuv xav tsis thoob cia li qw nrov nrov. Tamsim ntawd lub tsheb cia li lem rau lwm txoj kev. Kuv khuv xim nrog tej kev xav twj ywm tias: “Kheev lam tau taug kev hauv qab tej tsob paj txiv duaj ntawd mas”.

“Kheev lam…” yeej ib txwm yog ob lo lus muaj ntau txoj kev xav. Ib me ntsis kev xav txog yav dhau los. Ib qhov kev tshaw rau tamsim. Tej kev cia siab rau lub neej tom ntej. Nyob ib qhov twg hauv Vajluskub, peb kuj pib ntsib tej lo lus “kheev lam” zoo li ntawd. Thiab Laxees lub neej yog ib qhov piv txwv. Laxees yog Lanpas cov ntxhais, uas yog Yakhauj dablaug. Laxees yog tus uas Yakhauj nyiam, ntau zaug tseem hlub tshaj niam loj. Xav tias Laxees lub neej yuav tau txais kev hlub puv npo nrog nws tus txiv, tiamsis tsis yog li ntawd, nyob puag hauv yawg lub siab, Laxees yeej muaj tej yam uas “Kheev lam” … Vim Laxees yug tsis tau menyuam rau Yakhauj (Chivkeeb 30:1). Tshuav, Yakhauj tus niam loj ho yug tau plaub tug tub rau yawg. Qhov uas muaj menyuam yog ib qhov kev xav tau loj heev rau Laxees, txog qhov uas nws txaus siab hlo cia nws tus ntxhais qhev mus nrog Yakhauj pw, thiab yug menyuam hloov nws chaw.

Txog rau thaum… “Vajtswv tseem nco ntsoov txog Laxees; nws thiaj teb Laxees tej lus thov thiab pub kom nws muaj menyuam. Nws xeeb tub, yug ib tug me tub thiab hais tias: Vajtswv tau tshem kuv txoj kev txaj muag lawm, thiaj tis npe hu ua Yauxej tas rov qab hais tias: thov Vajtswv ntxiv ib tug tub rau kuv thiab” (Chivkeeb 30:22). Tshuav txoj kev zoo siab twg loj dua! Nyob hauv ib lub ntuj tus tshim ntsuas rau ib tug pojniam yog tsis muaj menyuam yog ib qhov kev txaj muag rau tus pojniam, thiab kev txaj muag uas txhua tus pojniam yuav tau ris, ces tej lus hais tawm hauv Laxees lub qhov ncauj yog yam uas peb yuav nkag siab tau. Yog ua ntej ntawd, peb ntsib Laxees tsis muaj menyuam nws ntshaw muaj menyuam txog qhov uas nroo rau nws tus txiv tias: thov koj muab menyuam rau kuv, yog tsis li kuv tuag xwb; ces thaum no yog ib tug Laxees muaj kev zoo siab puv npo. Nws tis tus tub npe hu ua Yauxej txhais tias “ntxuav” los ntuas kom tus kheej nco ntsoov tias Vajtswv tau ntxuav Nws txoj kev txaj muag mus lawm.

Laxees txoj kev zoo siab yog Vajtswv muab pub. Vajluskub sau tias: “Vajtswv nco txog Laxees…” ̣(Chivkeeb 30:22). Tsuas ob peb lo lus “Vajtswv nco…” tiamsis muaj lub ntsiab lus tob. Lo lus no kuj nrhiav ob nyob ob peb qhov hauv Vajluskub xwb li: “Vajtswv yeej nco ntsoov Nau-es thiab txhua tsav yam tsiaj uas nrog nws nyob hauv lub nkoj, nws thiaj ua kom cua ntsawj, thiab dej pib nqig zuj zus mus” (Chivkeeb 8:1). Lossis thaum Vajtswv nco txog Hanas thiab pub rau nws yug tau ib tug tub (I Xamuyees 1:20). Lossis thaum Vajtswv nco txog Nws tej lus cog tseg rau Aplaham, Ixaj thiab Yakhauj thiab Vajtswv coj cov neeg Yixalayees tawm hauv tebchaws Iziv mus rau tebchaws cog lus tseg.

Vajtswv nco, qhov no muaj lub ntsiab li cas? Puas yog Vajtswv kuj pheej hnov qab zoo li peb tib neeg? Tsis yog, Vajluskub tsis hais li ntawd. Thaum uas hais tias Vajtswv nco, Vajluskub xav hais txog Vajtswv txoj kev ncaj ncees tias thaum Vajtswv cog lus ib yam dabtsi, Vajtswv yuav ua kom tiav. Vajtswv paub thiab nco txog lub siab hlub tej haujlwm uas Vajtswv haiv neeg tau ua rau Vajtswv lub npe (Henplais 6:1). Tias los ntawm Vajtswv txoj kev hlub tshua, Vajtswv yuav pub yam uas peb lub siab ntshaw rau peb thaum uas peb tsis nco txog lawm.

Lub tsheb thaum kuv mus ntxiv thiab thaum kawg. Nres rau ntawm qhov chaw peb yuav nyob ob peb hnub tom ntej. Ib muag ib muag nrog tej nplooj ntsuab thiab tej paj txiv duaj. Kuv luag twj ywm thiab xav tias “kheev lam…” thaum kuv tau taug kev… txog hnub ob thaum kuv mus kev taw ntawm thaj chaw peb nyob, kuv nrhiav pom ib vaj paj txiv duaj ntawm lub pas dej ntsuab xiab. Paj tawg puv nkaus txoj kev ntawd thiab zoo yam li kuv tab tom mus yuam kev rau hauv ib lub ntuj txawv uas tus menyuam ntxhais Alice nyob hauv cov menyuam yaus zaj movies. Kuv saib txhua yam lub sijhawm ntawd, luag ntxhi, pom tias Vajtswv tau nco txog. Vajtswv paub zoo yam uas kuv lub siab ntshaw txawm yog tej ntawd tsis muaj dabtsi. thiab Vajtswv tau pub rau kuv tshaj qhov uas kuv xav txog.

Thaum kuv tawm hauv lub vaj ntawd los, kuv lub siab puv npo tej lus ua Vajtswv tsaug thaum kuv tau pom txhua yam zoo nkauj kawg nkaus ntawd. Tas kuv rov qab ntxhi twj ywm rau Vajtswv txog kuv tej kev ntshaw rau ib xyoo tshiab. Vim kuv paub tias Vajtswv yuav nco. Thiab kuv ntseeg tias Vajtswv yuav ua kom tiav tej kev ntshaw ntawd raws li Vajtswv txoj kev thiab Vajtswv lub sijhawm. Vim Vajtswv tsis muaj ib zaum twg hnov qab.

Thov caw nrog kuv peb thov Vajtswv ua ke: Tus Tswv, koj yog peb tus Vajtswv zoo, ua Vajtswv tsaug vim peb tab tom pehawm ib tug Vajtswv tsis muaj hnub hnov qab. Koj nco ntsoov thiab ua kom tiav koj txhua lo lus cog tseg. Koj paub thiab nco txog peb tej kev tshaw txawm yog thaum tej lus ntawd yeej tseem nyob saum qhov ncauj. Ua Vajtswv tsaug vim Vajtswv ua tiav tej yam uas peb thov raws li Vajtswv txoj kev zoo. Peb nco Vajtswv tshav ntuj. Kuv thov hauv Tswv Yexus Khetos lub npe, Amees.

Cov kwj txhua tus, peb tib neeg pheej nco txog tej uas peb pheej hnov qab thiab hnov qab yam uas peb yuav nco, tiamsis Vajtswv tsis zoo li ntawd. Vajtswv hnov qab peb tej kev txhaum uas peb ua yuam kev thaum peb tas siab lees rau Vajtswv, thiab Vajtswv nco ntsoov peb tej kev tshaw uas peb fij rau Nws. Hnub no yog koj tab tom muaj tej kev ntshaw twg tsis tau kam qhia rau leej twg, koj cia li muab fij rau Vajtswv. Yog muaj tej lus thov Vajtswv twg uas koj tseem tos, ua siab ntev. Ntseeg. Vim tus uas peb pehawm yog tus Vajtswv uas nco txog Nws tej menyuam.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.