11.03 Amăn Jơ Krao Khan Rim Năr: ‘BOK KEI-DEI ‘BLŎK

Buăl tam đei mơn hiơt kơ tơdrong kiơ buăl oei chơchă dah tơdrong buăl kăl kơ pơma hăm bơngai bu noh kơ plah yak năm mă ‘bônh kơ hiơt ưh? Lu ‘bok bơ̆jang hlôh băt gah jơhngơ̆m đon khan noh “Ngăl ‘bônh kơ hiơt” (Doorway effect), lăng nhen kơ hmă đĕch mă lei oei truh kơ kon bơngai lu bơ̆n. Na gah ‘Bok Kei-Dei noh thoi yơ? Lei Sư hăm ‘bônh kơ hiơt thoi kơ lu bơ̆n ưh?

Năr ‘nâu, ‘năr 11/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm ‘bai ‘BOK KEI-DEI ‘BLŎK

“Kră Yang ‘Bok Kei-Dei ‘blŏk dơ̆ng kơ Rachel, na Sư mơ̆ng nơ̆r Rachel apinh păng ăn kơ Rachel đei hơ’lơ̆p.” (Blŭng-a 30:22)

Tơ pơlei tih đei rơbâu kơ pơkao sơng iŏk inh wih wơ̆t brŏk lăm bơyan tơngiĕt, đơ̆ng rŏng kơ lơ sơnăm ataih đơ̆ng pơlei pơla. Anih ‘nâu kư̆m oei lei lăi thoi sơ̆, oei ‘lơ̆ng rŏ. Yak năm tơ rok trong pơlei tih đei lơ bơngai na tơ anih mum hrĕp hreh, jơ̆ dôm kơ krang đei hla hơngo hơlŭng nhen oei chang gô bu noh. Inh dơ̆ng lăng đơ̆ng rim kơ trong mă lu nhôn oei yak năm. Na blư ‘bôh, pơkao dreng cheng trong. Minh tơ nơm ‘long. ‘Bar tơnơm ‘long “ Pơkao dreng! Trŏ bơih noh pơkao dreng!”, inh ‘bôh hlĭch pơma hloi. Na kơplah noh, gre tơ guĕch tơ gah nai. Inh hue lăng hmach păng hơpơi wă: “Rŏ kơ yak năm ala kơ tơ nơm ‘long noh i”.

“Rŏ kơ…” oei ling lang oei đei jơhngơ̆m rơnguơ̆ kơ đêl sơ̆. Hơpơi kơ dang ei. Hơpơi kơ lơ tơdrong tơ anăp. ‘Bôh lơ tơ lăm sơ̆p hla bơar ‘Bok Kei-Dei, lu bơ̆n đei tơ’bơ̆p “rŏ kơ” thoi noh. Na chăl arih Rachel đei tơ’bôh tơdrong noh. Rachel jơ̆ minh lăm ‘bar ‘nu kon drŏkăn La‘ban mih Jakôp. Rachel jơ̆ bơngai Jakôp ‘mêm, truh tơ ‘mêm hloh kơ akăn tơm. Na ngeh kơ chăl arih Rachel tôm mah kơ tơdrong ‘mêm đơ̆ng klo sư, mă lei ưh ôh, tơ lăm jơhngơ̆m, Rachel oei đei dôm kơ tơdrong “rŏ kơ”… hăm Rachel ưh kơ đei pơjing ăn kơ Jakôp kon (Blŭng a 30:1). Lăm kơplah đei thoi noh, bơngai akăn Jakôp, đei tơpŭ pêng ‘nu kon drŏnglo ăn kơ klo sư. tơdrong đei pơjing kon hăm klo noh jơ̆ jing tơdrong hơpơi wă tih hăm Rachel, truh tơ sư ăn kơ kon sư apinh klo sư, păng tơplih bơngai pơjing kon ăn kơ măr sư.

Truh tơ … “Tơdrong hiôk chơt mă Rachel Kră Yang ‘Bok Kei-Dei ‘blŏk dơ̆ng kơ Rachel, na Sư mơ̆ng nơ̆r Rachel apinh păng ăn kơ Rachel đei hơ’lơ̆p.” (Blŭng-a 30:22)

Hăm đei jơhngơ̆m ayơ tih hloh dơ̆ng! Lăm chăl arih bơngai hơwŏng noh jơ̆ tơdrong pơting pơtŏ tơdrong gĭt kăl kơ minh ‘nu bơngai drŏkăn, păng noh jơ̆ tơdrong mơlâu mă bơngai drŏ kăn pŭ iŏk, na dôm kơ lu nơ̆r pơma đơ̆ng Rachel noh jơ̆ tơdrong ‘bônh kơ hlôh. Tơdah adrol kơ noh, lu bơ̆n tơ’bơ̆p Rachel hơwŏng, rơhing wă kơ đei kon truh tơ ơh sơ’ngon pơma tơtok pơtă hăm klo sư thoi âu: Athei ăn kơ inh đei kon, dah ưh, inh gô lôch; na jơ ‘nâu Rachel đei tơdrong hiôk chơt. Sư krao anăn kon sư noh “Yôsep”, wă khan “ôp” wă tơ’blŏk kơ sư ‘blŏk noh đơ̆ng ‘Bok Kei-Dei jơ̆ tơ’ngla ôp tơdrong mơlâu sư.

Jơhngơ̆m chơt hiôk mă Rachel đei noh đơ̆ng ‘Bok Kei-Dei. Nơ̆r ‘Bok Kei-Dei đei chih thoi âu: “ ‘Bok Kei-Dei ‘blŏk kơ Rachel…” (Blŭng a 30:22). Đơ̆ng minh ‘bar kơ chư “ ‘Bok Kei-Dei ‘blŏk…” mă lei đei lơ tơdrong gĭt. Nơ̆r ‘nâu kư̆m đei chă ‘bôh lăm sơ̆p hla bơar ‘Bok Kei-Dei đei lăm anih nai thoi kơ: “ ‘Bok Kei-Dei ‘blŏk kơ Nôê hăm dôm lu sem bri păng sem dơrong lăm duk hăm sư” pơm kơ đak huay pă lơ̆p dơ̆ng bơih (Blŭng a 8:1). Dah kơplah ‘Bok Kei-Dei ‘blŏk kơ Ane na ăn kơ sư pơjing minh ‘nu kon drŏ nglo (Isamuel 1:20). Dah kơplah ‘Bok Kei-Dei ‘blŏk kơ tơdrong pơgơ̆p Sư hăm Apbram, hăm Ysăk, hăm Yakôp păng ăn kơ kon pơlei Isơrael lĕch đơ̆ng Êyiptơ năm tơ anih đei pơkă ăn.

‘Bok Kei-Dei ‘blŏk, tơdrong noh, wă khan? Rŏ lăng Sư kư̆m ngăl đei hiơt thoi kơ kon bơngai lu bơ̆n? Ưh ôh, Nơ̆r ‘Bok Kei-Dei ưh kơ đei pơma thoi noh. ‘Ngoaih kơ noh, kơplah pơma khan ‘Bok Kei-Dei ‘blŏk, sơ̆p hla bơar ‘Bok Kei-Dei pơma kơ tơdrong ‘lơ̆ng tơpăt Sư. Na kơplah Kră Yang ‘blŏk kơ tơdrong kiơ noh, Sư gô pơm jing keh. Kră Yang băt păng ‘blŏk kơ tơdrong ‘mêm mơnat kư̆m hăm dôm tơdrong bơngai lui kơ Sư pơm yua kơ anăn Sư (Hêbơrơ 6:1). Yua kơ đơ̆ng tơdrong ‘mêm đơ̆ng Kră Yang, Sư gô ăn kơ jơhngơ̆m lu bơ̆n hơpơi kơplah mă lu bơ̆n pă đei ‘blŏk.

Gre mă chơ lu nhôn oei yak năm na tuch luch, dơ̆ng ‘bơ̆t anih lu nhôn wă oei minh ‘bar năr tơ anăp. ‘Bôh tơ anih noh đei ‘long hơngo kơ jung păng đei ‘long pơkao dreng. Inh hiĕk tơchĕng “rŏ kơ …” inh năm tơ rok trong…Truh tơ năr mă ‘bar kơplah oei yak năm tơ lăm anih lu nhôn oei, inh ‘bôh bri ‘long pơkao dreng ‘bơ̆t ter dơnâu đak hlăng. Kư̆m đei pơkao ‘brĕo tơ ter trong pơm kơ inh ‘bôh hlĭch hlăch nhen thoi inh wơ̆l mơ̆t tơ anih yang thoi kơ bơngai hơ’lơ̆p Alice lăm phim hơ’lơ̆p. Inh ‘bôh hơ iă dêh kơ anih noh. Na Inh hiĕk, mơn ‘bôh ‘Bok Kei-Dei oei ‘blŏk. Kră Yang băt kơ jơhngơ̆m inh hơpơi wă mă khan hơpơi wă tơdrong iĕ đĕch. Na Kră Yang tuh ăn kiơ̆ kơ tơdrong Sư ăn hloh kơ inh tơchĕng.

Lĕch đơ̆ng anih bri ‘long dreng ‘lơ̆ng rŏ noh, jơhngơ̆m inh bơnê kơ Kră Yang đei ăn kơ inh ‘bôh tơdrong pơjing ‘lơ̆ng rŏ đơ̆ng Kră Yang. Na inh đei pơma hăm Kră Yang dôm kơ đei hơpơi wă kơ lăm sơnăm ‘nao. Yua kơ inh băt kơ ‘Bok Kei-Dei ‘blŏk. Na inh lui ngeh kơ Sư gô pơm keh tơdrong hơpơi wă noh kiơ̆ kơ Sư păng trŏ kơ jơ năr Sư. Yua kơ Kră Yang ưh kơ đei layơ hiơt.

Apĭnh đĭ đăng krao khan hơdai: Kơkuh kơ Kră Yang, jơ̆ ‘Bă ‘mêm mơnat kơ lu nhôn, bơnê kơ Kră Yang yua kơ lu nhôn oei kơkuh kơ Tơ’ngla huay kơ đei layơ hiơt. Ih ling lang ‘blŏk păng pơm keh dôm tơdrong Ih pơkă. Ih ling lang băt păng ‘blŏk kơ dôm lu tơdrong hơpơi đơ̆ng lu nhôn mă kơplah nơ̆r noh tam mă pơma tơlĕch. Bơnê kơ Kră Yang yua kơ Ih ling lang pơm keh dôm tơdrong lu nhôn apinh kiơ̆ kơ trong ‘lơ̆ng tơpăt Ih. Lu nhôn băt bơnê kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kon bơngai lu bơ̆n ngăl ‘blŏk kơ tơdrong trŏ kơ hiơt păng hiơt kơ tơdrong kăl kơ ‘blŏk, mă lei ‘Bok Kei-Dei ưh kơ thoi noh. Sư hiơt lê̆ dôm tơdrong yoch lu bơ̆n kơplah lu bơ̆n băt tơbral tơpă ‘bơ̆t anăp Sư, na Sư ‘blŏk dôm tơdrong hơpơi wă đơ̆ng lăm jơhngơ̆m lu bơ̆n pơyơ̆r ăn kơ Sư. Năr ‘nâu tơdah buăl oei đei jơhngơ̆m hơpơi wă ayơ tam mă pơ̆n roi, buăl athei pơyơ̆r ăn kơ Kră Yang. Tơdah dôm lu nơ̆r krao khan ayơ mă Kră Yang oei wă kơ buăl chang gô, athei chơ̆n jơhngơ̆m chang gô. Athei apinh dơ̆ng. Athei lui gơnang. Yua kơ Tơ’ngla lu bơ̆n oei kơkuh noh jơ̆ ‘Bok Kei-Dei oei ‘blŏk kơ lu bơngai lui kơ Sư.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.