Lăm tơdrong arih rim năr, lu bơ̆n ‘măn lơ jơ năr wă bơwei akâu jăn: đơ̆ng sŏng sa, pơdơh dĭng truh kơ pơjuăt wă kơ đei jơ hngơ̆m ‘lơ̆ng hloh. Mă lei, dah pơma truh kơ tơdrong arih bơhngol, lơ bơngai lăm lu bơ̆n đei jing ưh kơ bơngơ̆t păng ‘bônh kơ hiơt. Lei đon lui hăm gơh dơ̆ng kơjăp dah ưh kơ đei rong bơwei rim năr ưh? Păng lu bơ̆n kăl kơ pơm kiơ ăn kơ tơdrong arih lăm Kră Yang bơ̆n gơh wơ̆ pran

Năr ‘nâu, ‘năr 12/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih M. Sellers kơ̆l ‘bai PƠHRĂM PƠJUĂT TƠDRONG ARIH LĂM KRĂ YANG.

“Inh roi lê̆ kơ iĕm thoi noh wă kơ iĕm gơnang kơ Kră Yang bơ̆n Yêsu Krist mă dŏng pơklaih bơ̆n. Thoi noh na tơdrong lui iĕm rai đunh rai wơ̆ kơjăp. Păng inh wă kơ iĕm rai đunh rai hlôh wao tôm tơdrong Sư. Bĕ bôl jơ̆p teh ư-ang Sư đơ̆ng dang ei truh ning-mônh ưh kơ layơ tôch. A-men.” (II Pêtrôs 3:18)

Lăm năr oei bơ̆jang lăm khŭl linh tơ đak dơsĭ, inh pơjuăt kơdŏu pơnam. Trong năm đei đunh jĭt khei, păng lăm đĭ khei năr noh, inh nhen thoi pơjuăt rim năr: hyŏng tơmo, kơdŏu, păng lơ tơdrong pơjuăt nai. Kơplah brŏk tơ hnam, mă khan loi kơ puăn jĭt sơnăm, inh mơn ‘bôh jơhngơ̆m pran inh oei ‘lơ̆ng pran.

Mă lei, kơplah đơ̆ng đơ̆ng lĭnh păng wih brŏk hăm tơdrong juăt rim năr, dôm tơdrong pơtơm tơplih. Blŭng a inh oei bơwei pơjuăt, mă lei jơ năr tŏ sĕt ‘biơ̆. Inh ưh pă ‘maih iung lăm kơplah puăn jơ pơge thoi adrol, na ăn kơ akâu jăn iung klui ‘biơ̆. Na ‘net ‘net, inh lăp pơjuăt dôm wơ̆t lăm mĭnh giĕng. Đơ̆ng rŏng kơ noh, inh ưh pơdơh kơ tưk tơmo, lăp pă kơdŏu. Nŏng kơ thoi noh, jơhngơ̆m pran, akâu jăn, kŏng ti păng jơhngơ̆m pran,…dôm kơ tơdrong inh đei pơmat tat wă pơjing dang ei rai hiong đĭ. Dah ưh pă pơjuăt hơnơ̆ng, akâu jăn inh rơdu layơ ưh kơ băt.

Chăl arih gah bơngol lu bơ̆n kŭm lei lăi thoi noh. Kơplah ‘măn jơnăr oei hơdrô̆ hăm Kră Yang, đŏk Nơ̆r ‘Bok Kei-Dei, krao khan, lu bơ̆n rai hlôh gah Kră Yang hơđăl hloh, băt ‘bôh kơdih bơ̆n jơ̆ bu lăm Sư, păng tơdrong pơgơ̆p lu bơ̆n hăm Kră Yang rai jrŭ să hloh.

Mă lei tơdrong trŏ kơ sơ’ngon jơ̆ lu bơ̆n ngăl achăng jơ năr gĭt kăl ‘nâu. Tơdrong jang, hnam dơnŏ, buôl buăl păng tôm tơdrong hrăt hrot nai pơm kơ jơ năr ‘măn kơ Kră Yang jing tŏ sĕt đĕch. Rŏ lăng adrol ki lu bơ̆n đơ̆ng ‘măn lơ jơ năr hăm Sư, mă lei ‘net ‘net, tơdrong ‘noh lăp pă jơ̆ dôm nơ̆r krao khan hăt hot. Mă lei thoi noh tam tôm mah kơ chăl arih bơhngol đơ̆ng lu bơ̆n ưh?

Lăm II Pêtrôs, ‘bok Pêtrôs tơ’blŏk kơ lu bơngai lui gah tơdrong Kră Yang Yêsu wă jur dơ̆ng, na kŭm pơlung tơiung lu sư arih chăl arih ‘lơ̆ng rơgoh păng lui yom lăm kơplah chang gô Sư jur dơ̆ng. Lăm tơdrong chang gô noh, sư đei khan bơtho kơ lu sư “ “thoi noh wă kơ iĕm gơnang kơ Kră Yang bơ̆n Yêsu Krist mă dŏng pơklaih bơ̆n. Thoi noh na tơdrong lui iĕm rai đunh rai wơ̆ kơjăp.” (II Pêtrôs 3:18)

‘Bok Pêtrôs kơnhăm ‘bar tơdrong mă bơngai lui kơ Kră Yang kăl kơ hơpơi wơ̆ kơjăp: wơ̆ kơjăp lăm tơdrong dŏng pơklaih păng wơ̆ kơjăp lăm tơdrong lui hlôh băt kơ Kră Yang. “ Wơ̆ kơjăp lăm tơdrong mơnat ăn đĕch” tơ ‘blŏk kơ lu bơ̆n khan lu bơ̆n đei pơklaih yua kơ đơ̆ng tơdrong mơnat ăn đĕch, păng kŭm trŏ kơ tơdrong mơnat ăn đĕch ‘noh na lu bơ̆n pơtrơp wơ̆ pran, ưh kơ trŏ yua kơ đơ̆ng jơhngơ̆m pran kơdih dan akâu jăn bơ̆n adrin.

Mă ‘bar, “Wơ̆ kơjăp lăm tơdrong hlôh băt kơ Kră Yang”. Ưh kơ đei bu tơpă gơh hlôh băt kơ Kră Yang dah bơngai ‘noh ưh kơ ‘mêm kơ Nơ̆r Kră Yang păng ưh kơ rơhing hlôi mơn đei Sư lăm chăl arih tơpă. Hlôh băt kơ Kră Yang tơgŭm lu bơ̆n dơ̆ng kơjăp lăm Sư, ưh pă đei pơhlŭ yua kơ đơ̆ng tơdrong yoch dah dôm tơdrong gĭt kơ lăm teh đak.

Yua kơ thoi noh, jơ̆ bơngai lui kơ Kră Yang tơpă, lu bơ̆n ưh kơ gơh arih hăm minh đon lui ưh kơ pran dah lăp pơdơh ‘bơ̆t tơdrong “bơwei tơdrong lui”. Đon lui kăl kơ đei pơjuăt rim năr. Lu bơ̆n hlôh khan wă kơ đei mĭnh akâu jăn pran ‘lơ̆ng, tơdrong pơjuăt kơdŏu jơ̆ kăl kơ đei. Thoi noh wă kơ đei mĭnh đon lui kơjăp, na thoi yơ lu bơ̆n đei achăng jơ năr năm hăm Kră Yang? Tơpă ưh kơ trŏ dah lu bơ̆n hơpơi đon lui kơdih pran kơjăp, mă lei đei ưh kơ bơngơ̆t kơ bơhngol kơdih bơ̆n.
Dah ưh pă ‘măn jơ năr oei hơdrô̆ hăm Kră Yang, đon lui lu bơ̆n gô jing rơdu. Lu bơ̆n hiong lê̆ tơdrong hơbĕch hơbal gah bơhngol păng ‘bônh kơ jrok trong. Yang kơnê̆ ling lang chop răp lu bơ̆n, hơpơi wă kơ lu bơ̆n pơ̆k huŏng, păng ngăl yua trŏ tơdrong hrăt hrot wă dui lu bơ̆n ataih đơ̆ng Kră Yang. Yang kơnê̆ băt hơđăl dah lu bơ̆n arih lăm tơdrong pơgơ̆p hơdai hăm Kră Yang, sư ưh pă đei jơ năr pơm kơ lu bơ̆n tơsĕl pơ̆k.

Thoi noh buăl hăm tơpă oei đei ‘măn jơnăr kơ Kră Yang rim năr ưh? Buăl hăm đei rơhing pơhrăm băt kơ Sư păng pơjuăt tơdrong arih hơdai hăm Kră Yang đơ̆ng kơdih ưh? Năr ‘nâu jơ̆ jơ buăl wih brŏk hăm Nơ̆r Kră Yang, pơtrơp wơ̆ ‘lŏ lăm tơdrong pơgơ̆p hăm ‘Bok Krist. Kŭm thoi akâu jăn kăl kơ đei pơjuăt, chăl arih đon lui đơ̆ng lu bơ̆n kŭm kăl kơ đei wei rong, pơjuăt rim năr.

Apĭnh đĭ đăng krao khan hơdai: Kơkuh kơ Kră Yang mă ‘mêm, apinh tơgŭm kon băt rơhing păng hơpơi wă gơh arih lăm tơdrong oei hơdai đơ̆ng Ih hloh kơ dôm tơdrong kiơ nai. Apinh ăn kơ kon ling lang ‘mêm kơ jơ năr gơh oei mĭnh drô̆ hăm Ih, wă kơ rim năr kon rai wơ̆ pran lăm tơdrong mơnat ăn păng lăm tơdrong hlôh băt kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đon lui wơ̆ kơjăp kăl kơ tơdrong pơjuăt, ‘noh jơ̆ tơdrong sĭt. Athei bơwei jơ năr hơđăl rim năr wă kơ năm jê̆ Kră Yang đơ̆ng tơdrong đŏk Nơ̆r ‘Bok Kei-Dei păng krao khan. Lu bơ̆n ưh kơ pơm tơ’bôh dôm kơ tơdrong pơm kiơ̆ gah bơhngol kiơ̆ hăm tơdrong pơgŏ dah thoi kơ măi, mă lei kăl kơ ‘bôh băt tơdrong kơnhăm hơđăl: wă kơ hlôh băt kơ Sư, wă ‘mêm kơ Sư lơ hloh, păng arih chăl arih đei plei trem kơ Sư. Tơdrong wơ̆ pran gah bơhngol ưh kơ đei truh hloh, mă lei jơ̆ đei yua đơ̆ng tơdrong tơnăp lăm dôm kơ pơm kiơ̆ khôi juăt mă lu bơ̆n oei bơ̆jang rim năr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.