Hauv lub neej txhua hnub, peb siv ntau li ntau sijhawm los tu peb tug kheej: xws li noj haus, so lossis mus dhia cev kom peb lub cev muaj zog. Txawm li ntawd los, nyob rau ntawm sab ntsujplig, kuj muaj ntau tug ho tsis quav ntsej lossis tso dhau tsis tu peb sab ntsuj plig. Kọj kev ntseeg puas yuav nyob ruaj khov yog tias tsis tau tu kom loj hlob txhua hnub? Thiab peb yuav ua li cas kom yus sab ntsujplig loj hlob?

Hnub no, yog hnub 12/3/2026, Peb kev thov Vajtswv txhua hnub thov caw sawvdaws nrog kawm Vajtswv txojlus ua ke nrog M. Sellers txog lub ntsiab lus: XYAUM KHO LUB NEEJ SAB NTSUJPLIG

Nej yuav tsum muab siab rau ntseeg, nej thiaj yuav paub peb tus Tswv Yexus Khetos uas yog peb tus Cawmseej, thiab paub nws txojkev hlub zuj zus mus. Sawvdaws yuav tsum niaj hnub hwm nws thiab hwm mus ibtxhis li. Amees. (2 Petus 3:18)

Thaum tseem ua haujlwm yog tub rog hiav txwv, kuv xyaum dhia cev txhua lub sijhawm. Peb mus tom hiav txwv 12 lub hli, thiab lub sijhawm ntawd, kuv xyaum dhia cev txhua hnub xws li: nqa hlau, dhia ko taw, thiab ntau zaj ntxiv. Thaum rov qab los tsev, txawm kuv twb muaj plaub caug ntau xyoo lawm los, kuv pom tias kuv tseem muaj zog heev.

Tiamsis, thaum so kev ua tub rog tom hiav txwv thiab rov los ua neej li qub, txhua yam cia li hloov tag. Thaum ntej, kuv kuj xyaum dhia cev txhua hnub, tiamsis siv sijhawm tsawg dua. Kuv kuj tsis sawv ntxov li yav tag los, kuv sawv lig dua. Thiab zuj zug mus kuv tsuas dhia cev qee zaug ib kiab lawm xwb. Tom qab, kuv kụj tsis xyaum nqa hlau, tsuas dhia ko taw lawm xwb. Zuj zug mus, kuv lub cev zoo uas kuv siv siv zog kho yav tag los cia ploj mus tag. Thaum tsis xyaum dhia cev txhua hnub, kuv pom kuv lub cev poob zog zuj zug mus thaum twg tsis paub.

Peb sab ntsujplig los kuj ib yam nkaus li ntawd, thaum siv sijhawm los nyob nrog Vajtswv, thov Vajtswv, nyeem Vajtswv txojlus, peb yim nkag siab Vajtswv dua, thiab paub tias yug yog leejtwg nyob hauv Vajtswv, thiab peb yuav nrog Vajtswv sib raug zoo dua.

Tiamsis qhov tub siab yog peb pheej tso dhau tej lub sijhawm tseem ceeb no. Haujlwm, tsev neeg, phoojywg thiab ntau yam haujlwm sib txawv ua rau peb qee tsis tau sijhawm los rau Vajtswv. Tej thaum yav tag los peb kuj siv sijhawm ntau rau Vajtswv, tiamsis zuj zug mus, peb tsuas maj nroos thov Vajtswv kom dhau. Tiamsis ua li ntawd koj puas hnov txaus rau koj lub neej sab ntsujplig?

Hauv phau 2 Petus, Timthawj Petus ntuas cov ntseeg txog Tswv Yexus yuav rov qab los, thiab txhawb cov ntseeg ua lub neej dawbhuv thiab fwm tug Tswv thaum tseem ua neej tos tus Tswv rov qab los. Petus ntuas cov ntseeg: Nej yuav tsum muab siab rau ntseeg, nej thiaj yuav paub peb tus Tswv Yexus Khetos uas yog peb tus Cawmseej, thiab paub nws txojkev hlub zuj zus mus. Sawvdaws yuav tsum niaj hnub hwm nws thiab hwm mus ibtxhis li. Amees. (2 Petus 3:18)

Timthawj Petus hais txog ob lub ntsiab lus tseemceeb uas cov ntseeg yuav tsum ntshaw kom loj hlob: loj hlob hauv kev hlub thiab loj hlob hauv kev paub Vajtswv. Loj hlob hauv kev hlub ntuas kom peb nco ntsoov tias peb tau cawmdim los ntawm Vajtswv txojkev hlub pub dawb, thiab txojkev hlub ntawd pab kom peb loj hlob ntxiv, peb tsis yog vam ntawm peb tug kheej lossis peb lub zog.

Thib ob, loj hlob ntawm kev paub Vajtswv. Tsis muaj leejtwg yuav paub Vajtswv tiag tiag yog tias tsis nyiam Vajtswv txojlus thiab tsis ntshaw Vajtswv hauv nws lub neej. Paub VVajtswvpab kom peb sawv khov kho tsis raug dab ntxwgnyoog haub ntxiag mus caum tej kev ntshaw ntiajteb.

Yog li ntawd, yog ib tug ntseeg Vajtswv tiag, peb tsis txhob lam coj lub ntseeg xwb. Yuav tsum tau xyaum kho yus txoj kev ntseeg txhua hnub. Peb paub tias yog xav kom yus muaj lub cev ntaj ntsug zoo ces peb yuav tsum xyaum dhia cev. Yog xav kom muaj kev ntseeg khov kho, peb puas tso dhau lub sijhawm tseg rau Vajtswv? Yog peb xav kom yus kev ntseeg ruaj khov vim li cas peb ho tsis saib xyuas yus sab ntsujplig kom zoo

Thaum tsis siv sijhawm rau Vajtswv lawm, kev kev ntseeg yuav qaug zuj zug. Peb yuav feeb meej txhua yam ntawm sab ntsujplig thiab yoojyim mus yuam kev. Dab ntxwgnyoog yeej soj peb txhua hnub, xav ua kom peb poob kev txhaum thiab siv tej haujlwm maj nroos los nqug kom peb mus nyob deb Vajtswv. Dab ntxwgnyoog paub tias thaum peb muaj lub neej nyob ze nrog Vajtswv, peb yuav tsis muaj sijhawm poob rau kev txhaum.

Yog li koj puas siv sijhawm tiag tiag rau Vajtswv txhua hnub? Koj puas ntshaw Vajtswv tiag tiag thiab xyaum kho koj lub neej sab ntsujplig? Hnub no yog lub sijhawm koj tig rov qab los rau ntawm Vajtswv txojlus, kom loj hlob ntxiv ntawm koj kev txuas mus rau ntawm Khetos. Kuj zoo li peb lub cev yuav tsum xyaum coj xyaum dhia txhua hnub, peb lub neej sab ntsujplig kuj yuav tau xyaum coj thiab tu txhua lub sijhawm.

Thov caw peb nrog thov Vajtswv ua ke: Leejtxiv tug uas muaj kev hlub, thov pab kom kuv ntshaw nrhiav Koj thiab ntshaw ua lub neej kom muaj Koj tshwm ntsej muag dua txhua yam. Thov Koj pab kom kuv nyiam thiab hlub lub sijhawm tau nrog Koj nyob ua ke, txhua hnub kuv loj hlob hauv Vajswv koj txoj kev hlub thiab paub Koj zoo dua. Kuv taij thov txhua yam los ntawm Tswv Yexus Khetos lub npe, Amees!

Ib tsoom kwvtij sawvdaws, xav kom kev ntseeg loj hlob peb yuav tsum tau tu tau xyaum. Yuav tsum teem sijhawm tseg rau txhua hnub rau koj los cuag Vajtswv dhau los ntawm kev Thov Vajtswv thiab nyeem Vajtswv txojlus. Peb tsis yog ua kom raws kev raws cai xwb tiamsis peb lub siab yuav tsum ntshaw nrhiav Vajtswv tiag tiag kom peb: Paub Vajtswv, hlub Nws ntau dua, thiab peb lub neej txi txiv pub rau Vajtswv. Kev loj hlob ntawm sab ntsujplig yuav tsi loj kiag tamsim, tiamsis yog peb tsau siab ntso tu kho peb sab ntsujplig ces peb lub neej yuav sau tau tej paj txiv dhau los ntawm peb kev nyob ze Vajtswv txhua hnub.

Nyob zoo rau peb txhua tus, thov foom kom nej sawv daws  tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected].