Kon bơngai lu bơ̆n ngăl lăng gah ‘ngoaih: nơ̆r pơma rơngơp, akâu jăn ‘lơ̆ng hơbŏ, bơ̆jang gơh hơgei. Dôm lu tơdrong noh sĭt kăl tơpă. Mă lei lu bơ̆n hăm mơn ‘bôh dôm lu tơdrong gah ‘ngoaih noh đei đơ̆ng lăm jơhngơ̆m mă Kră Yang tơplih bơih ưh? Yua kơ thoi noh, lăm tơdrong arih rim năr, đei layơ lu bơ̆n kơ nhăm dêh kơ tơdrong gah ‘ngoaih hăm hiơt lê̆ kơ hơmet jơhngơ̆m kơdih ‘lơ̆ng rơgoh tôm tơdrong ‘bơ̆t anăp Kră Yang ưh?

Năr ‘nâu, ‘năr 13/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Nathalie Jeter kơ̆l ‘bai BƠWEI JƠHNGƠ̆M ‘LƠ̆NG RƠGOH

“Ơ Kră Yang ‘Bok Kei-Dei! Apinh Ih pơjing lăm Inh đei minh jơhngơ̆m ‘lơ̆ng rơgoh, Păng pơjing ming ‘nao lăm inh minh pôm bơhngol tơpăt.” (Hơriso 51:10)

Inh ưh kơ sĭ bơngai hơlen lăm tơdrong jang hơpuih hơmet hnam. Kăl kơ dôm lu tơmam đei proh hơmet, lăng gah ‘ngoaih ‘lơ̆ng rơgoh noh inh huay bơih. Yua kơ thoi noh, inh ngăl hiơt kơ ngăl lăng noh kang kŭr bơbơh kial atol tơ tơnăr hnam, noh jơ̆ anih minh ‘nu bơngai juăt kơ pơ’lơ̆ng ưh kơ đei lê̆ kơplah hơpuih hơmet.
Mă lei, kơplah năm tơ anih nai brei mơsơ̆ ‘nâu, inh đei tơ’blŏk kơ tơdrong kăl gah hơpuih hơmet tơ anih mă ưh kơ đei bu ‘bôh. Lăm minh pơge hrôih, kơplah lăng đơ̆ng ‘măng ‘mŏk anih tep, inh ‘bôh yă kră sŏk ko oei hơpuih hơmet cham sư. Hnam sư noh ala ‘biơ̆ kơ trong, tơdah ưh kơ hơlen lăng ưh kơ đei bu ‘bôh bơbŭng pra hnam noh.

Inh đei jet kơdih yua kơ kiơ yă noh iung đơ̆ng hrôih na hơpuih anih mă hlơp thoi noh, anih mă ưh kơ đei bu lăng ‘bôh?

Rŏ lăng sư oei chang gô tơmoi gĭt kăl. Kư̆m rŏ lăng sư jơ̆ bơngai pơnam kơplah lăng pra hnam oei trôk. Mă khan yua kơ kiơ noh, ‘bôh tơdrong noh inh tơchĕng kơ kơdih akâu inh. Inh mơn ‘bôh tơdrong arih lăm jơhngơ̆m inh đei dôm lu “anih tam mă hơpuih hơmet”. ‘Ngoaih kơ inh hăm Kră Yang, ưh kơ đei bu lăng ‘bôh anih noh. Đei lơ wơ̆t inh ngăl kơnhăm dêh lăng gah ‘ngoaih, jơ̆ bơngai nai lăng ‘bônh kơ ‘bôh, mă hiơt kơ bơwei pah lăm jơhngơ̆m kơdih. Tơ gah lăm, inh mơn băt kơplah ‘Bok Kei-Dei hơmet ‘lơ̆ng rơgoh, tơplih đơ̆ng gah lăm, na tơ plih tơ gah ‘ngoaih ‘bônh đĕch.

Pơtao Đawit hlôh rơđah dêh tơdrong ‘nâu. Sư hlôh kơ jơhngơ̆m ‘lơ̆ng rơgoh kăl hloh ‘bơ̆t anăp ‘Bok Kei-Dei noh thoi yơ. Yua kơ thoi noh, đơ̆ng rŏng kơ pơm yoch hăm Kră Yang, hăm jơhngơ̆m băt kơ tơbral, sư krao khan pơma thoi âu: Ơ Kră Yang ‘Bok Kei-Dei! Apinh Ih pơjing lăm Inh đei minh jơhngơ̆m ‘lơ̆ng rơgoh, Păng pơjing ming ‘nao lăm inh minh pôm bơhngol tơpăt. Ơ Kră Yang ‘Bok Kei-Dei, apinh Ih lăng lăng inh păng băt kơ jơhngơ̆m inh. Pơlong lăng inh bĕ păng băt kơ tơdrong tơchĕng inh; Apinh Ih lăng lăng inh hăm đei yoch kơnê̆ kiơ ưh? Apinh Ih chông anhăk inh lăm trong arih ling-lang. Anih jrŭ wă khan lăm tơpu kon.” (Hơriso 51:10 păng 139:23-24”

Buăl hăm đei rơhing wă kơ đei jơhngơ̆m ‘lơ̆ng rơgoh ling lang ‘bơ̆t anăp Kră Yang ưh? Wă kơ arih đei minh chăl arih ‘lơ̆ng rơgoh, athei bơwei tơdrong pơgơ̆p hăm ‘Bok Kei-Dei ling lang. Na tơdrong krao khan noh bơ̆n năm tơ Kră Yang, apinh Sư hơpuih hơmet jơhngơ̆m, tơgŭm lu bơ̆n tơbral tơdrong yoch păng tơplih tơdrong arih lăm Sư. Thoi kơ ‘bok Pôl đei pơma khan kơ lu bơ̆n “Hăm ‘nĕ hiơt krao khan kơ Sư ling-lang.” (I Têsalônika 5:16-18)

Tơdrong krao khan ưh kơ đei hơgăt lăm minh jơ năr ayơ, na athei tơ’bưh ling lang lăm tơdrong arih lu bơ̆n hăm Sư. Lu bơ̆n krao khan kơplah lu bơ̆n iung đơ̆ng tep, hơdrol kơ wă sŏng sa, kơplah năm jang dah năm hŏk, lăm trong brŏk tơhnam, dah hơdrol kơ wă tep… Rim kơ nơ̆r krao khan jơ̆ tơgŭm lu bơ̆n hơmet ming jơhngơ̆m.

Wơ̆t tơ lăm tơdrong hơ’mon, buăl hăm oei ‘blŏk kơ yă mă inh đei pơma ‘bơm noh ưh? Kơ sơ̆ năr noh, inh lăng tơ ‘măng ‘mŏk păng ‘bôh minh ‘nu ‘bok năm ‘bơ̆t anăp ‘măng yă noh, đei chĕp ba minh hơchô̆ pơkao. Kơplah noh inh hlôh yă noh hơpuih hơmet yua kơ sư ưh kơ wă kơ đei bruih brăm ‘bơ̆t pra hnam. Dah pơma mă trŏ hloh, tơdrong ‘mêm noh jơ̆ pơtrŭt tih wă kơ sư hơmet mă ‘lơ̆ng hloh kơplah tơ’bơ̆p bơngai sư ‘mêm.

Kư̆m thoi noh, hăm tơdrong pơgơ̆p hăm ‘Bok Kei-Dei, tơm đơ̆ng tơdrong ‘mêm Sư jơ̆ tơdrong pơtrŭt lu bơ̆n iung gah pơge, krao khan hăm Kră Yang, na ăn kơ Sư “hơpuih hơmet” tơ lăm anih jrŭ, hlơp lăm jơhngơ̆m. Hơdrol kơ tơ’bơ̆p tơdrong hrăt hrot păng tơdrong yoch hăm tơdrong arih rim năr, tơdrong hơmet jơhngơ̆m tơm kơ tơdrong gĭt hloh mă lu bơ̆n kăl kơ pơm hơdrol rim năr.

Apĭnh đĭ đăng krao khan hơdai: Kơkuh kơ Kră Yang mă ‘mêm, Ih jơ̆ Tơ’ngla lăng ‘bôh jrŭ lăm jơhngơ̆m kon bơngai. Năr ‘nâu kon năm tơ Ih, apinh Kră Yang chhŭt tơdrong yoch lăm jơhngơ̆m kon. Apinh tơ gŭm kon tŭk lê̆ dôm lu tơdrong pơm kơ jơhngơ̆m kon kơnê̆ păng ưh kơ tôm mah ‘bơ̆t anăp Ih. Hơpơi kơ kon ‘maih wă kơ tơdrong ‘lơ̆ng rơgoh păng rơhing kơ tơdrong arih pơgơ̆p hăm Ih rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, jơhngơ̆m jơ̆ tơdrong đei tơ’blŏk blŭng a lăm tơdrong bơtho đơ̆ng Yang Yêsu: “Ih athei đĭ jơhngơ̆m đon tơchĕng ‘mêm kơ ‘Bok Kei-Dei ih”. Wă kơ bơwei jơhngơ̆m ling lang mêm kơ Kră Yang, ling lang tơpăt ‘bơ̆t anăp Kră Yang, lu bơ̆n kăl kơ bơwei tơdrong krao khan ling lang. Lu bơ̆n kăl kơ pơtơm đơ̆ng blŭng a păng pơtôch kơ lăm minh năr hăm tơdrong krao khan păng lăng ming lăm tơdrong arih kơdih. Rim kơ mơn đei lăm jơhngơ̆m ‘mê̆ ‘mach yua kơ tơdrong yoch dah tơdrong tơchĕng kơnê̆, apinh krao wơ̆n buăl năm tơ Kră Yang păng krao khan thoi kơ pơtao Đawit thoi âu: “Ơ Kră Yang ‘Bok Kei-Dei! Apinh Ih pơjing lăm Inh đei minh jơhngơ̆m ‘lơ̆ng rơgoh, Păng pơjing ming ‘nao lăm inh minh pôm bơhngol tơpăt.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.