Coob leej xav tias yog yuav muaj kev cuam tshuam loj dav rau lub ntiaj teb ces yuav tsum muaj lub meej mon siab, yuav tsum tau nyob rau tej qhov chaw tseem ceeb hauv lub ntiaj teb. Tab sis Vajlugkub qhia peb paub ib yam uas txawv heev: tsuas yog muaj lub siab ncaj ncees rau Vajtswv, thiab mob siab pab coj cov neeg nyob hauv koj txoj kev cuam tshuam kom mus rau txoj kev ruaj siab ntawm Vajtswv ces yuav pom tau kev hloov pauv loj tshaj plaws. Qhov ntawd yog lub luag hauj lwm ntawm tus kws cob qhia.

Hnub no, yog hnub 14/03/2026, peb kev Thov Vaj Tswv Txhua Hnub thov caw koj los kawm Vaj Tswv Txoj Lus dlau ntawm tus qhia Terry Murphy muaj lub ntsiab lus: KEV CUAM TSHUAM NTAWM TUS KWS COB QHIA

Yau‑as ua tej uas Tus Tswv pom tias zoo mus tag pov thawj Yehauyada sim neej (II Xwmtxheej Vajntxwv 24:2)

Cov Phau Ntawv Xwmtxheej Vajntxwv qhia rau peb paub txog ntawm vaj ntxwv Davi thiab Nws cov xeeb ntxwv los ua Vajntxwv kav tom qab nws. Tom qab lub tebchaws raug faib ua ob feem lawm, Yixayee nyob rau sab qaum teb thiab Yudas nyob rau sab qab teb, kev keeb kwm thiaj li txuas ntxiv nrog ntau tus vajntxwv ua zoo thiab tej tus vajntxwv ua phem.

Yixayee tau paub los ntawm qhov muaj ntau tus vajntxwv phem heev, cov vajntxwv ntawd muaj Ahab, uas yog tus txiv ntawm Yexebees, yog ib tug vajntxwv uas phem tshaj plaws. Qhov kev cuam tshuam phem ntawd kuj kis mus txog rau Yudas thaum Ahab tus ntxhais Athaliyas tau yuav Yaulees uas yog vaj ntxwv.
Nkawd yug tau ib tug tub hu ua Ahaxiyas. Thaum nws txiv tuag lawm nws thiaj nce mus ua vaj ntxwv kav Yudas tau ib ntus luv xwb. Qhov tu siab, yog Ahaxiyas kawm raws nws niam tej kev phem thiab ces sai heev nws kuj dhau los ua ib tug vaj ntxwv phem heev. Qhov uas zoo rau Yudas yog nws raug tua sai heev. Tab sis kev txom nyem tsis tau xaus li ntawd. Nws niam Athaliyas thiaj siv lub sijhawm ntawd los txeeb lub meej mon, thiab nrhiav txhua tus uas nyob hauv cajceg vajntxwv uas muaj peev xwm los txeeb ua vajntxwv tua pov tseg.

Txhua yam zoo li twb tsis muaj kev cia siab rau Yudas. Tab sis Vajtswv tseem tab tom ua haujlwm ntsiag to rau hauv Yudas tebchaws.

Ahaxiyas muaj ib tug muam. Nws tsis muaj cai los txais lub meej mon Vajntxwv, tab sis nrog nws tus txiv uas yog tus pov thawj Yehauyasdas, nws tau txaus siab los cawm Yo-as, uas yog Ahaxiyas tus tub dim ntawm kev tua pov tseg ntawd. Nkawd thiaj muab tus me nyuam zais cia thiab tu nws loj hlob ntsiag to.

Tau xya xyoo nkaus, Yo-as loj hlob nyob hauv qhov tsis muaj neeg paub, raug cob qhia thiab tau tiv thaiv. Mus txog thaum tus me nyuam muaj xya xyoo lawm, Yehauyasdas thiaj sawv cev los npaj kev hloov meej mon, tsa Yo-as los ua vaj ntxwv thiab xaus Athaliyas lub meej mon ua phem ntawm vajntxwv.

Txij thaum ntawd los mus txog rau thaum kawg ntawm nws lub neej, Yehauyasdas yeej ib txwm nyob ntawm vajntxwv Yo-as ib sab. Ib qho haujlwm loj tshaj hauv lub sijhawm uas Yo-as kav yog kev rov kho lub Tuam Tsev uas Xalaumoo tau ua, qhov chaw uas ntau tiam vajntxwv phem ua tsis dawb huv, thiab muab qhov chaw ntawd coj los pehawm Vajtswv li thaum ub. Tab sis qhov tseem ceeb yog: Yo-as tsuas ua tau tej yam no thaum Yehauyasdas tseem muaj sia nyob xwb. Nyob rau 130 xyoo ntawm tus pov thawj lub neej, vajntxwv tau ua yam uas haum Vajtswv siab, thiab tag nrho haiv neeg tau txais koob hmoov.

Qhov tu siab, tom qab Yehauyasdas tuag lawm, Yo-as kuj pib poob mus rau hauv kev txhaum. Tab sis qhov ntawd kuj ua rau pom ib qho tseeb: tus neeg uas tseem ceeb hauv II Xwmtxheej Vajntxwv 22–24 tsis yog tus vaj ntxwv, tiam sis yog tus kws cob qhia uas sawv tom qab nws.

Txhua lub xyoo ntawd, txoj kev cuam tshuam uas muaj zog tshaj tsis yog los ntawm lub vajntxwv lub zwm txwv, tiam sis yog los ntawm ib tug neeg coj kevntsiag to, txhawb nqa, thov Vajtswv thiab txaus siab txais tej kev phem tsis zoo los raug. Mus txog qhov uas nws zoo siab txais tej kev puas tshuaj ntawm txoj kev sib raug zoo hauv nws lub tsev neeg, tsuas yog ua yam uas Vaj Tswv pom zoo.
Qhov ntawd yog ib zaj tim khawv zoo heev txog lub luag hauj lwm ntawm tus kws cob qhia.

Yog li koj ne? Hauv koj lub neej, koj tab tom cuam tshuam rau leej twg? Koj tab tom mloog, txhawb siab, txhawb nqa thiab thov Vajtswv rau leej twg? Koj tab tom sawv ib sab ntawm leej twg, los pab txhawb thiab ntseeg tias tus ntawd yuav ua yam uas yog?

Txawm hais tias tus neeg ntawd yuav ntxiv taug txoj kev uas yog lossis tsis yog, cia li nco txog zaj ntawm Yehauyasdas thiab Yo-as. Cia li ua siab ntev thiab ua ncaj ncees cog koj txoj kev cuam tshuam zoo rau lwm tus. Vim tej zaum, yog koj tab tom pab hloov tsis yog ib tug neeg xwb, tiam sis yog tag nrho ib tiam neeg.

Thov caw nrog kuv peb thov Vajtswv ua ke: Tus Tswv, nyuam yaus ua Koj tsaug vim cov neeg cob qhia uas Koj tau muab tso rau hauv nyuam yaus lub neej, cov uas tau ntsiag to txhawb nqa, qhuab ntuas thiab thov Vajtswv pab kom nyuam yaus taug txoj kev uas yog Koj pom zoo. Thov pab kom nyuam yaus paub hwm thiab saib muaj nqis txoj hauj lwm ntawm kev cob qhia hauv Tus Tswv Koj, thiab kuj txaus siab dlau los ua ib tug sawv ib sab ntawm txhua tus los ntawm lub siab txo hwj chim thiab kev ncaj ncees. Txawm tias tsis muaj leej twg lees paub lossis qhuas, thov kom nyuam yaus tseem ua siab ntev hlub, txhawb nqa thiab coj lwm tus rov qab los taug Koj txoj kev tseeb. Thov Koj siv nyuam yaus lub neej me kom ua tau ib txoj kev cuam tshuam zoo rau ntau leej. Nyuam taij thov txhua yam hauv Tus Tswv Yexus Khetos lub npe, Amen.

Cov phooj ywg hlub tshua, txawm tias koj tab tom nyob rau qhov twg ntawm txoj hauj lwm, tsis txhob saib me txoj kev cuam tshuam uas Vajtswv tau muab rau koj. Tej zaum koj tsis sawv saum lub rooj qhuab qhia Vajtswv Txojlus lossis tsis nyob rau hauv tej chaw sam thiaj, los koj tseem muaj peev xwm sawv ib sab ntawm ib tug neeg twg li – los mloog nws, thov Vajtswv, thiab ceeb toom kom nws taug kev raws Vajtswv txoj kev. Koj kev ruaj siab ntawm Vajtswv yeej tsis muaj hnub poob qab hau li. Cia li cog kev cuam tshuam zoo ntxiv, nrog lub siab ntev thiab puv npho kev hlub. Tej zaum, qhov uas koj nyob ntsiag moo to niaj hnub no yog tab tom tuav rau ib tiam neeg kom mus raws li Vajtswv lub siab nyiam.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.