Lơ bơngai tơchĕng khan ‘maih pơjing mĭnh tơdrong đei tơplih tih hloh kơ teh đak lei kăl kơ đei tơdrong jang tih, đei dơ̆ng ‘bơ̆t dôm anih gĭt kăl lăm teh đak. Mă lei Sơ̆p HLa Bơar Nơ̆r ‘Bok Kei-Dei tơ băt ăn kơ lu bơ̆n ‘bôh mĭnh tơdrong pha ra: lăp kăl kơ đei mĭnh jơhngơ̆m tơ năp hăm Kră Yang, đĭ jơhngơ̆m chông anhăk dôm lu bơngai lăm anih đei tơplih đơ̆ng kơdih yak năm lăm trong lui yom lei gơh ba ăn tơdrong tơplih tih hloh. ‘Noh trŏ jơ̆ tơdrong jang đơ̆ng bơngai tơ‘bôh ăn.

Năr ‘nâu, ‘năr 14/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Terry Murphy kơ̆l ‘bai ĐEI TƠPLIH ĐƠ̆NG BƠNGAI TƠ‘BÔH ĂN

“Jôas pơm tơdrong ‘lơ̆ng tơpăt ‘bơ̆t anăp Kră Yang lăm đĭ sơnăm Jêhôiada pơm ‘bok soi.” (II Hơ’mon 24:2)

Dôm sơ̆p hla ar Hơ’mon roi đêl hơ’mon gah pơtao ‘bok Đawit păng dôm lu kon pơtrơp pơm pơtao sư. Đơ̆ng rŏng kơ dêh char đei tơklah jing ‘bar, hăm Isơrael tơ gah gơal păng Juđa tơgah yă nâm, tơdrong đơ̆ng chăl sơ̆ pơtrơp hăm lơ hơ’mon gah dôm lu ‘bok pơtao ‘lơ̆ng păng dôm lu ‘bok pơtao kơnê̆.

Isơrael gơh băt truh hăm lơ ‘bok pơtao pơm kơ nê̆ dêh, lăm noh đei Ahap, klo kơ Jêsa’bên, mĭnh lăm dôm lu ‘bok pơtao pơm kơnê̆ hloh. Đei ‘bơm tơdrong kơnê̆ noh truh tơ Juđa kơplah kon drŏkăn Ahap jơ̆ Athalia iŏk pơtao Jôram pơm klo.
Sư tơpŭ kon drŏnglo jơ̆ Ahasia. Sư pơm pơtao tơ Juđa lăp lăm mĭnh jơnăr kơđeh đơ̆ng rŏng kơ ‘bă sư lôch. Hmach dêh, Ahasia pơm kiơ̆ dôm tơdrong ưh kơ trŏ đơ̆ng mĕ sư păng hrĕnh tĕnh jing mĭnh ‘bok pơtao pơm kơnê̆. Tơdrong trŏ kơ chơt hiôk kơ Juđa jơ̆ sư đei ‘bônh kơ đei pơlôch.

Mă lei tơdrong truh ưh tim mă dơ̆ng ‘bơ̆t doh. Mĕ sư jơ̆ yă Athalia iŏk jơ năr noh iŏk tơdrong pơgơ̆r, tơdrong ưh kơ tơproh jơ̆p kơ adrĕch adrŭng wă pơlôch đĭ dôm lu bơngai bu gơh tơgar iŏk anih pơm pơtao.

Tôm tơdrong nhen thoi pă đei hơmĕng hăm Juđa. Mă lei ‘Bok Kei-Dei oei hrĕp hreh bơ̆jang.

Ahasia đei mĭnh ‘nu mŏ. Sư ưh kơ đei wă pơtrơp pơm pơtao, mă lei hơdai hăm klo sư jơ̆ ‘bok soi Jêhôiada, sư ăn akâu jăn sư wă dŏng pơklaih Jôach, kon drŏnglo Ahasia hlôi đơ̆ng tơdrong blah pơlôch. Lu sư ôn lê̆ bơngai ‘lơ̆p păng wei rong lăm hrĕp hreh.

Đĭ lăm pơh sơnăm, Jôach wơ̆ ‘lŏ lăm tơdrong ôn hlơp, đei bơtho păng bơwei. Truh kơ sư tôm pơh sơnăm, Jôhôiada tang măt pơm mĭnh tơdrong blah tơgar, pôk Jôach tŏk pơm pơtao păng pơtôch chăl pơm kơnê̆ đơ̆ng Athalia.

Đơ̆ng noh truh tơ đĭ chăl sư, Jêhôiada ling lang oei hơdai pơtao Jôach. Tơdrong kĕ jei tih hloh lăm chăl pơgơ̆r đơ̆ng Jôach jơ̆ tơdrong hơmet ming hnam hơkŭm Sôlômôn, anih đei lơ jơhnơr pơtao pơm kơnê̆ pơm ‘mê̆ ‘mach, păng pôk tơdrong kơkuh kơ ‘Bok Kei-Dei wơ̆t trŏ anih. Mă lei tơdrong gĭt kăl jơ̆: Jôach lăp gơh pơm tơdrong ‘noh kơplah Jêhôiada oei arih. Lăm đĭ 130 sơnăm chăl arih đơ̆ng ‘bok soi ‘noh, ‘bok pơtao pơm tơdrong kiơ̆ Kră Yang Yêhôwa lăp đon, păng đĭ adrĕch adrŭng đei sơng iŏk pŭn hiôk.

Hơ’ngon dêh, lăm kơplah Jêhôiada lôch, Jôach kŭm pơtơm tơsĕr pơ̆k. Mă lei trŏ kơ tơdrong ‘noh tă kơ đei pơdah mĭnh tơdrong tơpă: bơngai tơm kơ hơ’mon lăm II Hơ‘mon chăl 22-24 ưh kơ trŏ jơ̆ ‘bok pơtao, ‘noh jơ̆ bơngai tơ’bôh ăn dơ̆ng gah rŏng sư.

Lăm đĭ dôm khei sơnăm ‘noh, tơdrong tơplih pran kơtang hloh ưh kơ truh đơ̆ng anih pơm pơtao, mă lei đơ̆ng mĭnh ‘nu bơngai đei hrĕp hreh chông anhăk, dŏng tơgŭm, krao khan păng gô drơ̆ng iŏk tơdrong truh. Phŏ kŭm sư kăl kơ đei sơng iŏk dôm tơdrong kơnê̆ lăm kơdih tơdrong pơgơ̆p lăm hnam dơnŏ, lăp wă pơm tơdrong trŏ ‘lơ̆ng ‘bơ̆t anăp ‘Bok Kei-Dei.

‘Noh jơ̆ mĭnh nơ̆r pơm kơdranh ‘lơ̆ng dêh gah tơdrong jang đơ̆ng bơngai tơ‘bôh ăn.

Thoi noh lei buăl thoi yơ? Lăm chăl arih bơ̆n, buăl đei tơplih bơngai bu? Buăl oei mơ̆ng, bơtho tơ’bôh, dŏng tơgŭm păng krao khan kơ bu? Buăl oei dơ̆ng hơdai bu, wă tơgŭm păng lui gơnang khan bơngai ‘noh gô pơm tơdrong trŏ?

Mă bơngai ‘noh pơtrơp yak trŏ trong dah ưh, athei ‘blŏk truh kơ hơ’mon đơ̆ng Jêhôiada păng Jôach. Athei kĕ chơ̆n păng tơnăp rei tơdrong tơplih ‘lơ̆ng rŏ đơ̆ng buăl. Yua kơ rŏ lăng, buăl oei hơdai lăm tơdrong tơplih ưh kơ sĭ lăp mĭnh ‘nu bơngai, mă jơ̆ đĭ mĭnh jơhnơr.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Kră Yang yua kơ dôm bơngai tơ’bôh ăn Ih đei dan ăn lăm chăl arih kon, dôm lu bơngai oei hrĕp hreh dŏng tơgŭm, bơtho khan păng krao khan kơ kon băt gĭt kơ tơdrong jang đơ̆ng bơngai tơ’bôh ăn lăm Kră Yang, păng kŭm gô jing bơngai dơ̆ng hơdai bơngai nai hăm jơhngơ̆m chu iŏk đon ala păng tơnăp. Mă ưh kơ đei sơng iŏk dah pôk pơ-ư, hơpơi kơ kon oei adrin ‘mêm mơnat, dŏng tơgŭm păng chông bơngai nai wih brŏk hăm tơdrong tơpăt đơ̆ng Ih. Apinh Kră Yang yua chăl arih iĕ hloh đơ̆ng kon wă ba ăn tơdrong tơplih ‘lơ̆ng rŏ kơ lơ bơngai. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă buăl oei ‘bơ̆t anih ayơ, ‘nĕ kơ lăng ưh kơ gĭt tơdrong tơplih mă Kră Yang đei pơjao ăn kơ buăl. Rŏ lăng buăl ưh kơ dơ̆ng ‘bơ̆t anih bơtho dah hloh kơ bơngai nai ‘bơ̆t lăm ŭnh hơdah tơ anih pơdah, mă lei buăl oei gơh dơ̆ng hơdai mĭnh ‘nu bơngai bu noh- wă mơ̆ng kơ tơ̆ng, krao khan păng tơ’blŏk ăn kơ lu sư yak năm lăm trong kiơ̆ Kră Yang. Tơdrong tơnăp đơ̆ng buăl ‘bơ̆t anăp ‘Bok kei-Dei ưh kơ layơ jơ̆ ưh kơ đei yua. Athei pơtrơp rei tơdrong tơplih ‘lơ̆ng rŏ, hăm jơhngơ̆m kĕ chơ̆n păng ‘bĕnh tơdrong ‘mêm mơnat. Băt thoi yơ, trŏ tơdrong oei hơdai hrĕp hreh đơ̆ng buăl năr ‘nâu đei bơwei ăn kơ mĭnh jơhnơr yak trŏ kiơ̆ thoi Kră Yang wă.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.