Thaum raug kaw ntev dhau lawm, yam uas txaus ntshai qee zaum tsis yog lub chav kaw lawm, tiam sis yog lub ntiaj teb sab nraud. Peb cia li swm tsis ntshai tej qhov chaw ntawd lawm, txog rau qhov kev ywj pheej ho dhau los ua yam uas peb txhawj ntshai. Sab nraud dav heev, txawv heev, thiab muaj ntau yam uas tswj tsis tau. Yog li peb thiaj xaiv nyob twj ywm, txawm tias lub chav kaw twb qhib lawm, vim tawm mus rau sab nraud zoo li yuav txaus ntshai dua. Tab sis yog peb pheej nkaum nyob hauv qhov chaw ywj pheej, yog li ntawd peb puas paub txog lub neej kov yeej uas Vaj Tswv twb npaj tseg tos koj lawm?

Hnub no, yog hnub 15/03/2026, peb Kev Thov Vaj Tswv Txhua Hnub thov caw koj los nrog peb kawm Vaj Tswv Txoj Lus dlau los ntawm tus qhia Nina Keegan muaj lub ntsiab TSIS TXHOB NYOB TWJ YWM RAU HAUV CHAV KAW UAS TWB QHIB

“Tub sab tsuas yog tuaj nyiag thiab tua thiab ua kom puam tsuaj xwb.’’ (Yauhas 10:10)

Roatan yog ib lub koog pov txwv me, nyob deb ntawm ntug dej hiav txwv Honduras kwv li 100 km. Nws yog ib lub koog pov txwv zoo nkauj heev uas kuv tau muaj hmoo mus xyuas ntau zaus.

Nyob ze Roatan tsuas yog ib zaug caij nkoj luv xwb yog mus txog ib lub koog pov txwv me hu ua Little French Key. Lub koog pov txwv me no tau tiv thaiv los ntawm tej lub pob zeb loj thib ob hauv ntiaj teb, nyob ib ncig yog dej xiav ntsuab xiab zoo nkauj heev. Lub koog pov txwv uas nyob deb ntawm lwm qhov chaw no kuj yog qhov chaw uas muaj ib lub vaj tsiaj me tab sis tshwj xeeb heev kawg nkaus li.
Cov tswv ntawm lub vaj tsiaj ntawd tau cawm ntau hom tsiaj uas raug mob thiab raug tsim txom los ntawm cov uas coj tsiaj mus dlia rau neeg saib thiab los ntawm cov neeg uas saib tsiaj tsis muaj nqis thoob plaws ntiaj teb. Lawv tau tsim tsa ib qho chaw tiv thaiv rau cov tsiaj ntawd saum lub koog pov txwv zoo nkauj no, qhov chaw uas cov tsiaj tau txais kev hlub thiab kev saib xyuas zoo heev.

Ib tug tsiaj uas kuv nyiam tshaj plaws yog tus tsov ntxhuav npe hu ua Charlie. Charlie tsis paub tias nws yog tsov ntxhuav li. Nws tus yam ntxwv mos muag zoo li ib tug miv hauv tsev, thiab ntxim hlub zoo li ib tug menyuam dev. Ua ntej nws tau coj los rau lub vaj tsiaj, nws cov rau tes raug rho lawm, tsuas tshuav ob peb tug hniav kaus xwb, tshuav daim tawv tuav pob txa lawm xwb thiab tawv nqaij muaj kab mob ntau heev txog qhov uas yuav luag tsis zoo li “vaj ntxwv ntawm hav zoov”. Xav tias nws yuav tsis muaj tau txoj sia nyob ntxiv. Tam sim no Charlie twb laus heev lawm, tab sis tseem muaj zog zoo, thiab feem ntau nws tsuas pw tsaug zog ntawm thaj chaw lub hnub ci.

Tag nrho Charlie lub neej nws nyob hauv kev raug kaw. Nws yeej tsis paub tias lub neej ntawm ib tug tsov ntxhuav nyob hauv hav zoov zoo li cas tiag. Yog tam sim no muab Charlie tso rov qab mus rau hauv hav zoov qus, nws yuav tuag. Nws tsis muaj peev xwm tiv thaiv nws tus kheej, vim nws yeej tsis muaj sijhawm los ua raws li hom tsiaj uas nws tau tsim los. Nws lub neej raug kaw zoo li nws raug kaw hauv chav kaw.

Muaj pes tsawg leej hauv peb twb tau tawm ntawm lub vaj loog saib tsis pom uas kaw koj, tab sis tseem tsis tau ua neej raws li qhov uas peb tau yug los ua neej? Koj puas hnov tias koj tab tom raug khuam, zoo li sab nraud yog ib lub ntiaj teb dav heev uas koj tab tom plam?

Tus Tswv Yexus tau los cawm thiab tso cov neeg uas raug kaw.

Yog li ntawd yam dab tsi tseem tab tom tuav koj, tsis pub koj ua neej nyob kaj siab lug? Yam dab tsi tab tom khi koj, ua tsis kam tawm dlau ntawm plaub phab tsa uas ua rau koj hnov nyob muaj kev thaj yeeb uas koj twb swm heev lawm? Puas yog kev ntshai ua tsis tau lossis ntshai tej yam uas koj tseem tsis tau paub? Lossis yog tej zaum koj hnov tias yus tsis tsim nyog, yus tsis zoo txaus?

Peb yeem nyob ntev rau hauv tej kev kaw ntawm cov pab ntsa ua tuav koj, ces peb yuav dhau los ua cov neeg uas raug txwv ntau dua, raug khi los ntawm tej kev siv qub, thiab kam lees txais ua ib lub neej nyob li ntawd.

Raws li Vajtswv Txojlus hais tias: “Tus tub sab tsuas los nyiag, tua thiab rhuav tshem xwb.” (Yauhas 10:10) Nws nyiag peb lub dag zog, kev zoo siab, kev thaj yeeb thiab peb lub neej yav tom ntej. Nws rhuav peb txoj kev ntseeg siab thiab nyiag lub neej muaj yeej, muaj hwj chim uas Vajtswv Txojlus hu peb ua neej nyob!
Cia Vajtswv pab koj sawv ntsib koj txoj kev ntshai, thiab Nws tus kheej yuav coj koj hla dhau txoj kev ntshai ntawd. Tus Tswv Yexus tau los kom peb muaj txoj sia nyob hauv Nws lub hwj chim, hauv kev hlub, thiab muaj lub siab tsim dleev, ruaj khov. Peb tau hu los ua cov tub rog uas tsis paub ntshai thiab ua cov tim khawv muaj hwj chim rau Yexus Khetos.

Koj txoj kev yeej nyob tag nrho hauv Vajtswv, tsis yog nyob hauv koj tus kheej lub zog. Nws tab tom tuav koj cia, thiab Nws yuav tsis cia tus neeg ncaj ncees ntog hlo li!

“Tus Tswv tus Ntsuj Plig nrog nraim kuv, vim nws tau pleev roj tsa kuv kom coj xov zoo mus rau cov uas pluag. Nws txib kuv mus tshaj tawm txojkev dim rau cov uas raug ntes, thiab tshaj tawm qhov uas cov dig muag yuav rov pom kev, thiab ua kom cov uas raug quab yuam tau nyob ywj pheej…” (Lukas 4:18-19)

Thov caw nrog kuv peb thov Vajtswv ua ke: Tus Tswv, nyuam yaus tau nyob hauv kev kaw ntev heev txog qhov uas nyuam yaus pib ntshai txawm yog txoj kev ywj pheej uas Koj pub rau nyuam yaus. Tej kev ntshai uas nyuam yaus twb dlau los lawm, thiab tej kev txwv uas nyuam yaus tau tso rau nyuam yaus tus kheej tau tuav nyuam yaus cia, ua rau nyuam yaus xaiv qhov nkaum es tsis kam ntseeg Koj mus rau yav tom ntej. Thov Koj ci ntsa iab rau nyuam yaus kom nyuam yaus pom tau yam twg tab tom khi nyuam yaus lub siab. Thov pub kom nyuam yaus muaj siab tawv tawm mus, txawm hauv lub siab tseem tshee thiab ntshai. Thov pab kom nyuam yaus nco ntsoov tias Tus Tswv Cawmseej Yexus tau los tso cov neeg raug kaw kom dim, thiab hauv Nws, nyuam yaus tau txais lub hwj chim ua neej muaj yeej. Thov kom nyuam yaus ua tau lub neej puv npho yam uas Tus Tswv tau npaj tseg rau nyuam yaus lawm. Nyuam yaus koom siab hauv Tus Tswv Yexus Khetos lub npe, Ameen.

Tus phooj ywg, txij hnub no mus cia li tig rov qab saib xyuas tej kev ntshaw tob tob hauv peb lub siab, tej yam uas saib tsis pom uas peb tau muab tso tseg rau ib sab lawm, thiab tej peev xwm uas peb tau muab tso tseg uas zoo li tsis muaj hnub ua tau. Hauv Tus Tswv Yexus tsis muaj ib yam uas ua tsis tau, Tus Tswv uas pub hwj chim, Tus Tswv uas ntxiv dag zog, thiab yog Tus Tswv uas ntxuav kom peb dawb huv, ua rau dlau los ua ib tug tsim nyog rau Nws. Cia li ntsia ncaj nraim rau txoj kev ntshai, nug nws, thiab tawm tsam hauv txoj kev zoo los ntawm txoj kev ntseeg. Peb lub neej ci ntsa iab tshaj plaws tseem tab tom tos peb nyob tom ntej. Cia peb txiav txim siab tawm mus hauv txoj kev ntseeg ntawm tus Tswv txij hnub no mus!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.