Kơplah oei chĭt phak đunh bơih, tơdrong hli noh ưh pă khan lăm adrŭng chĭt noh ôh mă lei ‘noh tơdrong arih gah ‘ngoaih. Lu bơ̆n juăt kơ đei tơdrong pơgăn noh truh tơ tơdrong rơngei pơm kơ bơ̆n jing hiơ̆k bơngơ̆t. Tơ ‘ngoaih să dêh, hlĭch dêh păng lơ tơdrong pơm kơ bơ̆n ưh kơ gơh wă bơwei lăng. Kơlih thoi noh bơ̆n rơih iŏk oei lăm adrŭng chĭt phak pơm hăm mam mă khan đei pơih bơih ră, yua kơ lĕch đơ̆ng noh bơ̆n ‘bôh hli hloh. Mă lei dah bơ̆n oei lăm anih ưh kơ đei tơdrong pơlong lăng lei bơ̆n hăm wă băt kơ tơdrong arih kĕ jĕi mă Kră Yang hơmet ăn kơ bơ̆n tơ anăp?

Năr ‘nâu, ‘năr 15/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Nina Keegan kơ̆l ‘bai NĔ KƠ LING LANG OEI LĂM ADRŬNG PƠIH BƠIH.

“Bơngai chă tơtông truh, sư wă tơtông iŏk đĕch păng wă pơrăm đĕch. Mă-lei inh truh tơ âu wă ăn kơ triu arih păng hiôk chơt tơpă.” (Yôhan 10:10)

Rottan ‘noh minh pôm bŏl đak iĕ, ataih kơ đak dơsĭ Honduras dang 100 km. Noh anih bŏl đak ‘lơ̆ng na inh pŭn đei năm chă ngôi lơ wơ̆t.

Rotan ‘noh bŏl đak Little French Key bơ̆n năm hăm thŏng nan jê̆ đĕch truh bơih. Bŏl đak ‘nâu jŭm dăr kơ sư ‘noh tơmo lơ̆ng lăm đak tih să mă ‘bar lăm teh đak ‘nâu, jum dăr kơ sư đak dreng hlăng ‘lơ̆ng. Bŏl đak hơtaih ‘nâu sư kŭm đei minh anih rong sem dơrong anih iĕ mă lei pha ra dêh.

Lu bơngai wei anih sem dơrong lu sư dŏng pơklaih sem dơrong jĭ păng đơ̆ng đe teh dong đơ̆ng anih pơdah siêk păng kư̆m đơ̆ng lu bơngai wei ưh kơ hiơ̆k bơngơ̆t kơ rim đơ̆ng dêh char. Lu sư pơjing minh anih wei rong lơ̆ng tơ kơpal bŏl đak, anih mă lu sem dơrong đei bơwei tơnăp păng ‘lơ̆ng tơpă.

Sem dơrong inh ‘mêm hloh noh dăm brang anăn Charlie. Charlie ưh kơ băt sư dăm brang. Iơ̆m thoi meo hnam, ‘lơ̆ng thoi kŏ iĕ. Adrol kơ ba tơ anih wei rong, đe toh tơngiơh, minh ‘bar tŏ hơnĕnh, hơkĕ ‘bôh kơting, jĭ rơka tơ’boch roch ‘bĕnh ‘bang kơ akâu lăng ưh pă nhen “yŏng tơm lăm bri brah”. Lăng ưh pă hơmĕng kơ arih. Chalie dang ei sư kră dêh bơih mălei oei pran păng ling lang tep tơ anih đei drang tŏ.

Chăl arih Charlie arih lăm adrŭng chĭt pơkơ̆ng, sư ưh kơ băt chăl arih dăm brang bri ‘noh thoi yơ. Tơdah dang ei achăng sư tơ bri brah lei sư lôch. Sư ưh kơ băt bơwei kơ dih sư, sư ưh kơ băt sư pran thoi blŭng a đei pơjing sư. Tơdrong arih sư chĭt lăm adrŭng.

Đei dôm ‘nu lăm lu bơ̆n đei lĕch hlôi đơ̆ng adrŭng chĭt pơkơ̆ng mă măt kon bơngai lăng ưh kơ ‘bôh noh mă bơ̆n oei arih ưh kơ trŏ thoi kơ đei pơjing đơ̆ng blŭng a? Buăl hăm mơn oei đom, nhen thoi tơ ‘ngoaih to să sap mă buăl oei achăng lê̆?

Kră Yang Yêsu jur wă pơklaih lu bơngai oei chĭt lăm hnam phak.

Tơdrong kiơ oei pơm kơ buăl ưh kơ hơđơ̆ng, pơm kơ buăl arih ưh kơ trŏ ‘blep? Tơdrong kiơ pơm kơ buăl oei kơtă ưh kơ pơ̆n weh đơ̆ng anih juăt kơ hiôk? Hăm trŏ hli kơ răm, hli kơ ưh kơ băt? Hăm trŏ kơ ‘bôh bơ̆n ưh kơ ‘blep, ưh kơ ‘lơ̆ng tơpăt?

Arih lăm tơdrong krôp krôm pơgăn bơ̆n rai đunh, pơm kơ bơ̆n rai ưh kơ hlôh, arih kiơ̆ thoi đêl juăt kơ pơm, arih ưh kơ đei ‘maih tơplih.

Nhen thoi ‘nơ̆r ‘Bok Kei-Dei đei chih: “Bơngai chă tơtông truh, sư wă iŏk pơrăm đĕch păng tơtông đĕch…” (Yôhan 10:10). Sư tơtông jơhngơ̆m pran, hiôk chơt, hơđơ̆ng păng tơdrong arih tơ anăp lu bơ̆n. Sư pơrăm tơdrong lui ngeh, kĕ jei, pran kơtang thoi nơ̆r ‘Bok Kei Dei athei bơ̆n arih pơm kiơ̆!

Athei ăn kơ ‘Bok Kei-Dei tơgŭm buăl kơplah tơ’bơ̆p tơdrong hli tơrơ kơdih păng Sư bơih gô tơgŭm buăl gơh kĕ hlôi. Yang Yêsu jur wă ăn kơ bơ̆n arih lăm tơdrong mơsêh mơyang Sư, đei jơhngơ̆m ‘mêm mơnat, kơchăng păng kơjăp. Lu bơ̆n krao iŏk wă jing bơngai bơ̆jang ưh kơ hli păng bơngai ră roi nơ̆r ‘Bok Kei-Dei pran kơtang.

Buăl kĕ jei đơ̆ng ‘Bok Kei-Dei ưh kơ đơ̆ng kơdih akâu buăl ôh. Kră Yang oei wei lăng buăl păng sư gô ưh kơ ăn bơngai ‘lơ̆ng tơpăt pơ̆k huŏng!

“Yang Bơhngol ‘Lơ̆ng ‘Bok Kei-Dei oei hơdai Inh. Sư rơih Inh wă năm bơtho ăn tơdrong ‘nao ‘lơ̆ng kơ lu bơngai dơnuh hin păng pơlung lu bơngai ơh sơ’ngon. Sư wơh Inh roi tơdrong Sư wă tơlĕch lu bơngai đe phak, păng pơklaih lu bơngai măt tol. Sư wơh Inh pơklaih lu bơngai mă đe pơjuă pơđep,păng roi kơ đe tơdrong Kră Yang wă pơklaih kon bơngai dang ei.” (Luka 4:18-19)

Apĭnh đĭ đăng krao khan hơdai: Kơkuh kơ Kră Yang, kon oei lăm hnam phak đunh bơih truh tơ jing hli kơ tơdrong rơngei Ih ăn kơ kon. Dôm tơdrong juăt hli, dôm tơdrong pơgăn oei rôp chô̆ kon pơm kơ kon kơdŭn tơrŏng tơplih kơ năm tơ anăp. Apinh Ih tơ’bôh kơ kon wă kơ kon băt tơdrong kiơ rôp chô̆ kon. Apinh ih ăn kơ kon pơ̆n nuih wă kơ kon gơh klaih mă khan kon oei hli tơrơ. Apinh Ih tơ’blŏk ăn kơ kon Yang Yêsu jur wă dŏng pơklaih lu bơngai oei lăm hnam phak, păng lăm Ih kon đei jơhngơ̆m pran đei tơdrong arih kĕ jei. Hơpơi kơ kon arih tơnăp ‘blep trŏ thoi Ih wă. Kon kŭp kơ̆l krao khan hăm anăn Kră Yang Yêsu Krist, A-men

Ơ lu bơngai mơ̆ng mă ‘mêm kơ eng , lăm năr ‘nâu, lăng pơnhen dôm tơdrong hơpơi wă lăm bơ̆n, dôm lu tơdrong lăng nhen ưh kơ’bôh mă bơ̆n hiơt lê̆ đunh bơih, dôm tơdrong gơh pơm mă bơ̆n hiơt lê̆ nhen ưh kơjing. Ưh kơ đei tơdrong kiơ ưh kơ gơh pơm ‘bơ̆t anăp Kră Yang. Tơngla ăn gơh hơgei, jơhngơ̆m pran, tơplih jing ‘nao, jing bơ̆n đei yua ‘bơ̆t anăp Kră Yang. Athei lăng tơ tơdrong hli tơrơ, jet sư, păng tơblah hăm tơdrong ‘lơ̆ng tơpăt đơ̆ng đon lui. Chăl arih ‘lơ̆ng rŏ oei chang gô tơ anăp. Athei adrin năm hăm đon lui gơnang kơ Kră Yang đơ̆ng năr ‘nâu!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.