Ayăt kơ bơ̆n ngăl ưh kơ ‘bôh kiơ̆ hăm trong hrơ̆ng hreng dah krưp dêh wă kơ lu bơ̆n tam krăng kơchăng, kŭm ưh kơ pơm tơ’bôh pơrŏ jơhngơ̆m pran wă kơ bơ̆n ‘bôh băt păng weh ataih. Tơplơ̆ dơ̆ng, lu sư đei hrĕp hreh ôn akâu sư lăm dôm kơ trong gơlong juăt, dôm kơ tơdrong tơchĕng mă lu bơ̆n trŏ kơ lăng jơ̆ “hmă đĕch”, păng dôm kơ tơdrong juăt mă lu bơ̆n ưh kơ đei hiơ̆k bơngơ̆t truh. Lu sư lei lăi thoi kơ dôm lu kon ‘bih oei ‘bĭch ôn akâu ‘bơ̆t doh- păng lăp kăl kơ minh yak năm ưh kơ pơ’lơ̆ng, tơdrong truh gô ưh kơ băt lê̆ adrol.

Năr ‘nâu, ‘năr 16/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Laura Bagby kơ̆l ‘bai KON ‘BIH ÔN AKÂU

“Thoi noh na iĕm athei chu yom kơ ‘Bok Kei-Dei, apinh ‘Bok Kei-Dei pơpuh yang Satan yŏng pơgơ̆r yang kơnê̆, ‘nĕ ăn oei jê̆ iĕm, na yang Satan ưh kơ pơ̆n oei jê̆ iĕm, jăk hloi tơ nai.” (Yakơ 4:7)

Dah đei mĭnh pôm kon ‘bih oei ôn hlơp ‘bơ̆t yơ noh, lei rŏ lăng inh gô jơ̆ bơngai tơ ‘bơ̆p sư- dah sư gô chă truh tơ inh.

Inh ‘bôh băt tơdrong ‘nâu blŭng a kơplah oei bơ̆jang tơ Anih Bri Yosemite. Năr ei, inh hơdai hăm mĭnh ‘nu bơngai buăl hơdai năm jơ̆ng hoh trong ataih wă chă “đak kơtah ôn hlơp” kơplah lăm bơyan phang tŏ ang, ‘bĕnh kơ tŭk ‘mui thoi juăt.

Tăp dăr rok trong gơlong lu nhôn năm jơ̆ dôm kơ tơmo tih- mĭnh anih mă ‘bih ‘maih oei ‘bơ̆t doh. Thoi noh na kơplah noh, inh ưh kơ đei tơchĕng truh kơ ‘bih, mă trŏ kăl kơ đei tơchĕng. Inh lăp kơ nhăm mĭnh tơdrong kơnhăm đĕch: chă mă ‘bôh đak kơtah noh, mă khan bơngai buăl hơdai inh đei khă athei pơ‘lơ̆ng, muh măt ‘bôh hơđăl tơdrong gleh lap.

Na păng, inh đei găn dơ̆ng minh ‘bôt- kiơ̆ trŏ thoi đei ‘bôh hơđăl. Mĭnh pôm kon ‘bih lĕch đơ̆ng tơmo tih, jê̆ inh lăp tim mă truh minh met. Inh ôr pơret rơ̆n mah truh kơdih inh kŭm ưh kơ ‘bôh băt. Nơ̆r ôr jơwa re, lăm thong kông, re kơ tơ̆ng hơlơ̆k lơ wơ̆t lăm bri kông.

Kon ‘bih bŏ lăng đei ‘bôh băt dôm kơ pơpơ̆ ‘noh, ‘bôh băt tơdrong kơnê̆ păng hrĕnh tĕnh drŭt tơrŏng păng brŏk tơ anih oei ôn. Mă lei adrol kơ ‘biao ưh kơ ‘bôh, sư đei ăn kơ inh ‘bôh mĭnh tơdrong ưh kơ gơh kơ hiơt: re kơtơ̆ng kiĕng pơpơ̆ sik sak đơ̆ng mĭnh pôm kon ‘bih đei bih hơkăm. Inh wă jê̆ juă ‘bơm sư- minh pôm kon ‘bih lăp dôm phŭt adrol ‘noh ưh kơ đei ‘bôh ‘bơ̆t doh lăm đon tơchĕng inh.

Tơdrong yoch kŭm lei lăi thoi noh. Sư gơh oei ‘bơ̆t doh đunh bơih mă lei lu bơ̆n ưh kơ đei băt. Sư đei lăm tơdrong tơchĕng, na ‘net ‘net chă đei anih oei juăt lăm anih bơhngol lu bơ̆n. Dĭng truh kơ minh năr, dah lu bơ̆n krao khan, đŏk Nơ̆r ‘Bok Kei-Dei, dah mơ̆ng kơtơ̆ng dôm lu nơ̆r bơtho tơ’bôh ăn gơh hơgei đơ̆ng ‘nhŏng mŏ ŏh lăm Kră Yang, lei Yang Bơhngol ‘Lơ̆ng pơtơm tơ’bôh ăn tơdrong tơpă oei đei lăm jơhngơ̆m lu bơ̆n.

Đawit đei krao khan: “Ơ Kră Yang ‘Bok Kei-Dei, apinh Ih lăng lăng inh păng băt kơ jơhngơ̆m inh. Pơlong lăng inh bĕ păng băt kơ tơdrong tơchĕng inh; Apinh Ih lăng lăng inh hăm đei yoch kơnê̆ kiơ ưh? Apinh Ih chông anhăk inh lăm trong arih ling-lang. Anih jrŭ wă khan lăm tơpu kon.” (Hơriso 139:23-24). Dah krao khan thoi noh, lu bơ̆n kăl kơ hơmet jơhngơ̆m bơ̆n, yua kơ Yang Bơhngol ‘Lơ̆ng gô tơ’bôh dôm kơ lu “kon ‘bih” oei hrĕp hreh ôn lăm chăl arih lu bơ̆n.

Mĭnh nơ̆r pơma hơlĕnh, mĭnh nơ̆r pơma kơnê̆ pơm ơh sơ’ngon kơ bơngai nai, tơdrong et sik suai, tơdrong ưh kơ mĭnh jơhngơ̆m, dôm kơ tơdrong hưch wă ưh kơ trŏ…Kơplah lu bơ̆n blŭng a ‘bôh băt ‘noh trŏ jơ̆ tơdrong yoch, rŏ lăng pơm tơ’bôh blŭng a đơ̆ng lu bơ̆n jơ̆ hli tơ rơ.

Yua kơ adrol ‘noh, lu bơ̆n ngăl lăng dôm kơ tơdrong ‘noh lăp jơ̆ tơdrong iĕ. Jơ̆ trŏ kơ kon bơngai thoi noh. Jơ̆ tơdong glăi đơ̆ng bơngai nai. Jơ̆ yua kơ đơ̆ng anih. Jơ̆ yua kơ đơ̆ng jơhngơ̆m. Phŏ kŭm jơ̆ “tơdrong pơgơ̆r” đơ̆ng bơ̆n. Lu bơ̆n ưh tim mă tơchĕng khan dôm kơ tơdrong nhen thoi ưh kơ đei pơrăm ‘noh tă kơ gơh đei kơnê̆ truh kơ pơlôch chăl arih bơhngol bơ̆n kiơ̆ kơ khei năr.

Mă lei bơnê kơ Kră Yang, lu bơ̆n ưh kơ kăl kơ arih lăm tơdrong hli tơrơ dah mơlâu dah tơdrong tơpă đei tơ’bôh. Lu bơ̆n lăp kăl pơm mĭnh tơdrong: drơ̆ng iŏk tơdrong yoch jơ̆ trŏ tơdrong yoch, tơbral, păng sơng iŏk tơdrong huay kơ jô̆ yo.
Sơ̆p Hla Bơar Nơ̆r ‘Bok Kei-Dei chih: “Kơlih kơ thoi noh na bơ̆n dah roi tơdrong yoch bơ̆n kơ Sư, na Sư gô pơklaih bơ̆n đơ̆ng tơdrong yoch tơpă păng ‘nhao jơhngơ̆m bơ̆n đơ̆ng dôm tơdrong kơnê̆.” (I Yôhan 1:9).

Păng Nơ̆r Kră Yang krao lu bơ̆n: “Thoi noh na iĕm athei chu yom kơ ‘Bok Kei-Dei, apinh ‘Bok Kei-Dei pơpuh yang Satan yŏng pơgơ̆r yang kơnê̆, ‘nĕ ăn oei jê̆ iĕm, na yang Satan ưh kơ pơ̆n oei jê̆ iĕm, jăk hloi tơ nai.” (Yakơ 4:7)

Pơma pha dơ̆ng: ‘nĕ kơ ăn kon ‘bih ‘noh oei doh.

Thoi noh dah ưh kơ hơmet lê̆ tơdrong yoch lei thoi yơ? Gô thoi yơ dah lu bơ̆n rơih… ưh kơ pơm kiơ hloi? Dah lu bơ̆n pơhiơ̆, weh wer, dah pơm thoi ưh kơ đei tơdrong kiơ lei liơ?

Hmach tơpă, tơdrong yoch ưh kơ đei hiong kơdih. Sư lăp jing rai kơnê̆ hloh. Sơ̆p Hla Bơar Nơ̆r ‘Bok Kei-Dei tơbăt khan lu bơ̆n gơh “hli kơ yang kơnê̆ pơhlŭ iĕm.” (Êphêsô 4:27)

“Hli kơ” ‘noh ưh kơ trŏ jơ̆ tơdrong iĕ. Sư jơ̆ mĭnh hơnă kơjăp ăn kơ tơdrong yoch pơtrơp wơ̆ pran. Păng dah nŏng kơ ăn thoi noh, kon ‘bih iĕ blŭng a gô jing tơdrong gơh pơlôch bơngai.

Yakơ 1:15 pơma hơđăl: “jing pơm yoch. Tơdrong yoch bơ̆n rai tih rai lơ boih, na bơ̆n gô truh kơ tơdrong lôch.”

Tơdrong yoch ưh kơ dơ̆ng mĭnh anih. Sư rai wơ̆ pran, tơplih akâu, păng hơpoh să dah lu bơ̆n ưh kơ drơ̆ng iŏk.

Thoi noh lei pơm thoi yơ wă rô̆ đơ̆ng tơm dôm kơ tơdrong yoch “chô̆ pơkơ̆ng bơ̆n” thoi ‘bok Pôl chih lăm Hêbrơ 12:1, kơplah sư nhen thoi đei oei ‘bơ̆t doh đunh dêh bơih? Nơ̆r tơl ưh kơ oei ‘bơ̆t tơdrong gơh hơgei đơ̆ng kơdih lu bơ̆n.
Tơdrong Pơđơ̆k 3:5-6 chih: “Gơnang bĕ kơ Kră Yang hăm đĭ jơhngơ̆m, ‘Nĕ kơ gơnang kơ đon hlôh wao ih; ‘Blŏk băt bĕ kơ Kră Yang lăm rim trong ih pơm, Na sư gô pơm kơ trong ih tơpăt.”

Dah oei đom lăm tơdrong dăr lăm tơdrong yoch, lu bơ̆n kăl kơ dan đĭ đon lui ngeh anih ‘Bok Dŏng Pơklaih Yang Yêsu Krist jơ̆ Tơ’ngla Kĕ Jei, păng ăn tơdrong mơsêh mơyang đơ̆ng Sư pơm kơ “kon ‘bih” ‘noh đei kơdŭn tơrŏng.

Dôm kơ “pơhlŭ” gah bơhngol ưh kơ trŏ tơdrong kiơ hlĭch dah ataih dêh. ‘Noh jơ̆ hmă đĕch jơ̆ đei yua thoi hmă dah lu bơ̆n lui gơ nang tôm mah anih anăn Yang Yêsu Krist, tơbăt Nơ̆r Kră Yang iơ̆m dim, ư-ang anăn Sư, krao khan ưh kơ pơdơh, pôk pơ-ư tơdrong kĕ jei đơ̆ng Sư lăm đon lui.

Sơ̆p Hla Bơar Nơ̆r ‘Bok Kei-Dei chih lê̆ lơ jơ thoi noh. Dôm kơ nơ̆r jreo ôr pơret đơ̆ng kon pơlei Isơrael đei pơm kơdur Jêrikô pơchah păk (Jôsuê 6). ‘Bok Pôl păng Sila krao khan păng hơri ư-ang, păng hnam phak mah kyĭng kiơ̆ng, glang mam tơyaih đĭ (Tơdrong Jang 16:26). Păng kơplah Yang Yêsu Krist kơ tĕch jơhngơ̆m, che đe chô̆ pơgăn tơ hnam akŭm ‘Bok Kei-Dei tơm tơhek chuơ̆ng tŏk-bŏk đơ̆ng kơpal tơ ala hloi, pơih trong kơ lu bơ̆n năm jê̆ ‘Bok Kei-Dei (Markôs 15:37-38).
Lăp kăl kơ mĭnh jơhngơ̆m tơbral, mĭnh chăl arih krao khan, nơ̆r hơri ư-ang đĭ jơhngơ̆m- lei na lơ ayăt kơ lu bơ̆n đei thuơ. Lăm noh đei tơdrong yoch đơ̆ng kơdih lu bơ̆n.

Apĭnh đĭ đăng krao khan hơdai: Kơkuh kơ ‘Bă mă ‘mêm, đei kơdôm tơdrong đei hrĕp hreh oei đunh dêh bơih mă kon ưh kơ ‘bôh băt, mă lei dang ei kon băt ‘noh jơ̆ tơdrong yoch ‘bơ̆t anăp ‘Bă. Apinh ‘Bă huay kơ jô̆ yo kơ kon yua kơ đei lơ wơ̆t ưh kơ bơngơ̆t kơ nơ̆r tơ ‘blŏk đơ̆ng Yang Bơhngol ‘Lơ̆ng, yua kơ đei ăn tơdrong yoch đei anih oei lăm jơhngơ̆m kon na ưh kơ chu tơ ‘bơ̆p. Năr ‘nâu, kon tơbral dôm tơdrong ‘noh ‘bơ̆t anăp ‘Bă, kon tơbral păng wih brŏk hăm ‘Bă. Apinh tơgŭm kon đĭ jơhngơ̆m gơnang anih ‘Bă lăm dôm kơ trong kon yak. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, athei kral kơchăng. Athei apinh Yang Bơhngol ‘Lơ̆ng tơ’bôh ăn kơ buăl ‘bôh dôm lu ‘bih đei bih hơkăm oei nơnăm lăm bơhngol bơ̆n. Athei tơbral. Athei blah plơ̆ yang kơnê̆. Athei kơjăp lăm tơdrong krao khan, hơri ư-ang păng pôk pơ-ư tơdrong mơsêh mơyang đơ̆ng ‘Bok Dŏng Pơklaih Yang Yêsu Krist. Na păng, athei hơri ư-ang kơ Kră Yang yua kơ tơdrong dŏng pơklaih kĕ jei mă Sư đei ăn kơ buăl. Halêluya.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.