Yam muaj nqis tshaj hauv koj lub neej yog dabtsi? Nyob ntawm ntau tug, tej thaum yog tsev neeg, haujlwm, tej yam zoo hauv lub neej. Tiamsis kuj muaj ib txhia neeg ua siab tso tag txhua yam mus lawv Vajtswv lub suab hu. Lawv saib tus Tswv yog lub hlaws muaj nqis, yog yam khoom plig loj tshaj plaws hauv lawv lub neej thiab ua siab ruaj caum lawv tus Tswv qab txawm yog yuav ntsib tej kev txhawj kev ntshai.

Hnub no, yog hnub 17/3/2026, Kev thov Vajtswv txhua hnub thov caw sawv daws nrog kawm Vajtswv txoj lus ua ke nrog tus sau Jonathan Macnab txog lub ntsiab lus: LUB HLAWS MUAJ NQIS

“Thiab Ntuj Ceebtsheej piv ib yam li ib tug tub luam mus nrhiav yuav cov hlaws uas muaj nqis. 46Thaum nws mus nrhiav pom ib co hlaws uas muaj nqis dua tej huv tibsi lawm, nws txawm rov los muab nws lub cuabtam muag thiab muab cov nyiaj mus yuav cov hlaws ntawd.” (Mathais 13:45-46)

“Thov foom kom koj yuav txais tau kev zoo siab thiab koob hmoov hauv lub neej. Thiab tom qab thov foom kom koj yuav nrhiav tau ib hub nyiaj kub.”

Ntawd yog ib lo lus foom zoo ntawm cov neeg Ai-len puas thaum ub, thiab nws kuj zoo li ntau lo lus foom zoo uas peb pheej tau hnov nyob rau tej lub caij xyoo tshiab lossis koobtsheej, yog cia siab tias lub neej yuav puv npo kev zoo siab, muaj kev txhawb zog thiab ntau yam zoo. Nyob rau ntawm ntau tug cov neeg Ai-len lo lus foom zoo ntawd ua rau nco txog hnub koobtsheej Patrick. Thiab yog muab ua tib zoo xav txog, peb yuav pom tias: tom qab lo lus ntawd muaj ib lub ntsiab lus tob dua.

Kom totaub txog qhov ntawd, peb tig rov qab mus saib txog Patrick lub neej – nws lub npe tau muab tis rau ib hnub koobtsheej uas ntau lub tebchaws tau coj. Yawg yog ib tug xibfwb tau siv tag nrho yawg lub neej mus qhia moo zoo rau cov neeg Ai-len txij puas thaum tiam thib 5. Patrick tau hais li no: “Kuv hais meej hais tias txhua yam uas kuv muaj puav leej yog los ntawm Vajtswv los.” Ib hnub tshiab, yawg pib los ntawm kev thov Vajtswv: “Khetos nyob nrog kuv, Khetos nyob ua ntej kuv, Khetos nyob tom qab kuv, Khetos nyob hauv kub…”

Nyob ntawm Patrick, Khetos yog tagnrho txhua yam uas yawg muaj. Tseeb tiag, thaum hluas yawg yeej tsis paub txog Vajtswv. Yawg tsuas ntsib Vajtswv tiag tiag nyob rau thaum uas yawg lub neej nyob rau ntu uas tsaus ntuj nti, thaum yawg raug laws noj laws haus, thiab yawg raug ntes mus tim ai-len ua cev qhev. Thaum ntawd Patrick thiaj muab nws lub neej fij tag nrho rau Vajtswv. Tom qab Vajtswv pab yawg nrhiav tau kev rov qab los tsev, tiamsis ob peb lub xyoo tom qab, yawg rov mus rau tebchaws Ai-len. Zaug no yawg tsis yog raug quab yuam tuaj, tiamsis yog yawg npaj siab khov kho fij yawg lub neej tuaj ua dej num.

Rau qhov nyob ntawm Patrick, tau ntsib Khetos yog yam khoom plig muaj nqis tshaj hauv yawg lub neej. Zoo li Tswv Yexus tau qhia hauv zaj piv txwv:
“Thiab Ntuj Ceebtsheej piv ib yam li ib tug tub luam mus nrhiav yuav cov hlaws uas muaj nqis. 46Thaum nws mus nrhiav pom ib co hlaws uas muaj nqis dua tej huv tibsi lawm, nws txawm rov los muab nws lub cuabtam muag thiab muab cov nyiaj mus yuav cov hlaws ntawd. Mathais 13:45-46

Patrick to taub tias lub hlaws muaj nqis ntawm twb yog Tswv Yexus Khetos . Thiab vim yog lub hlaws muaj nqis ntawd, yawg ua siab tso tseg txhua yam.

Thaum tau Vajtswv hu mus rau Ai-len, yawg tau ncaim yawg tsev neeg thiab lub neej uas tshav ntuj nrig. Nyob hauv kev ua Vajtswv haujlwm, yawg ntsib ntau kev tawm tsam ntawm tej thawj coj cov ntseeg, lawv hais tias yawg mus yuam kev lawm. Tsis hais yawg tseem ntsib ntau yam kev phomsij thaum rov qab mus rau lub tebchaws uas yav tag los yawg raug ntes mus ua cev qhev

Sijhawm no, peb tig rov qab mus rau hnub koobtsheej ntawd, nrog tej lus foom zoo puas thaum ub. Patrick muab tagnrho nws lub neej fij rau tug Tswv tes dej num ua rau ntau tug nco txog, txog qib uas yawg lub npe twb nyob nrog tebchaws Ai-len tej kev cai, koobtsheej. Tiamsis yam uas ua rau yawg muaj nqis tsis yog nyob ntawm lub koob npe ntawd. Yawg lub siab mos muag: Tswv Yexus thiaj yog pob khoom nyiaj kub muaj nqis nyob tom kawg txoj kev.

Yog li, lo lus nug rau peb yog: Peb yuav fij yam dab tsi kom tau nrog Peb tug Vajntxwv ntawm txhua tug vajntxwv muaj kev sib raug zoo? Muaj yam dabtsi peb tabtom tuav rau yus tug kheej xwb? Tsis kam muab fij rau Vajtswv tagnrho. Thaum mus txog tom kawg, peb puas yuav tau hu ua ncaj ncees tsau siab – zoo ib yam li Patrick?

Tiag tiag, thaum Patrick ua tiav nws txoj kev mus, yawg tau txais mus nrog Vajtswv tug muaj hwjchim ci ntsa iab nyob. Thiab ntau ntau tug yuav tau nrog yawg sib raug zoo saum ntuj ceeb tsheej, rau qhov yawg twb tau fij tag nrho txhua yam ko tau paub Yexus Khetos, uas yog yawg tug Tswv:

Kuv ua kuv lub neej kom haum Yexus Khetos siab, kuv thiaj li tso ib puas tsav yam tseg. Kuv saib tej ntawd zoo ib yam li tej liamsim uas luag muab povtseg lawm xwb; kuv ua li ntawd kom kuv thiaj tau Yexus Khetos los ua kuv tus Tswv. Filipis 3:8-9

Thov caw nrog kuv peb thov Vajtswv ua ke: Ua tsaug rau Vajtswv Koj txoj lus tau ntuas kuv hnub no: “Yam dabtsi thiaj yog pob khoom muaj nqis tshaj ntawm kuv?” Thov Koj zam txim rau kuv vim ntau zaug kuv cia tej khoom tsis ruaj tsis khov hauv ntiaj teb no txeeb Vajtswv koj lub chaw. Thov pab kom kuv paub txhawb nqa Tswv Yexus tib leeg yog pob khoom plig muaj nqis tshaj plaws , tseem ceev tshaj plaws. Thov pab kom kuv muaj ib lub siab khov kho yuav ua haujlwm, fij tagnrho txhua yam uas kuv muaj, kom ua tau lub neej haum Leejtxiv koj siab thiab ncaj ncees mus txog hnub kawg. Kuv ua Koj tsaug los ntawm Tswv Yexus Khetos lub npe, Amees.

Ib tsoom phoojywg, nrog Tswv Yexus mus tsis yog tsuas mus rau ntawm txoj kev uas yoojyim xwb. Tej thaum Vajtswv yuav hu peb mus rau ntawm thaj chaw uas twb tau ua rau peb tu siab, kom peb ci mus rau cov ntsuj plig uas tab tom yuam kev. Qhov no yuam kom peb yuav tsum tso tag txhua yam, txuas txais yuav Khetos tib leeg xwb. Yog li peb puas nrhiav Tswv Yexus zoo li peb pob nyiaj pob kub uas tseem ceeb tshaj plaws, thiab tso tseg txhua yam, muab peb lub neej tag nrho nrog tus Tswv mus?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected].