Lu bơ̆n băt kơ ‘Bok Kei-Dei jơ̆ Tơ’ngla tih hloh, Sư ‘bôh păng băt tôm tơdrong lăm tơdrong arih lu bơ̆n. Mă lei đei kơplah, lăm dôm tơdrong pơmat păng tơdrong pơlong lăng, lu bơ̆n krao apinh păng chang gô Kră Yang, mă lei nhen thoi Sư oei thĕng hreh ‘bơ̆t anăp anih tơdrong bơ̆n. Lăm dôm kơplah thoi noh, Kră Yang wă kơ lu bơ̆n ‘bôh băt kơ tơdrong kiơ? Hăm trŏ tơdrong thĕng hreh ‘noh jơ̆ nơ̆r krao lu bơ̆n yak năm hăm tơdrong lui gơnang păng chu yom Sư hloh lăm đon lui ưh?

Năr ‘nâu, ‘năr 30/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Diane Markins kơ̆l ‘bai KƠPLAH KRĂ YANG THĔNG HREH.

“Ơ ‘Bă, dah gơh, ăn kơ Inh klaih đơ̆ng tơdrong gleh âu. Mă-lei Ih ‘nĕ pơm kiơ̆ kơ Inh, pơm kiơ̆ kơ Ih đĕch.”  (Mathiơ 26:39)

Tam đei layơ lu bơ̆n đei ơh sơ’ngon, đĭ jơhngơ̆m krao apinh păng chang gô tơdrong tơgŭm đơ̆ng Kră Yang, nhen thoi lăp sơng iŏk tơdrong thĕng hreh ưh? Yua kơ liơ Kră Yang đei thĕng hreh ‘bơ̆t anăp tơdrong ơh sơ’ngon đơ̆ng lu bơ̆n? Hăm trŏ Sư ưh kơ hiơ̆k bơngơ̆t kơ lu bơ̆n, dah phŏ Sư kŭm ưh kơ đei?

Inh đơ̆ng đei tơ ‘bơ̆p mơn lăm jơhngơ̆m tơdrong ‘noh, kơplah inh ngeh khan Kră Yang ưh kơ mơ̆ng nơ̆r đơ̆ng inh krao khan. Kơplah mĕ inh ‘bĭch ưh kơ hơdơ̆r tơ giơng bơngai jĭ, lu ‘bok pơgang pơma khan yă đei lôch lăm ‘ngok bơih păng gô ưh kơ layơ hơdơ̆r. Kơplah noh, inh lăp băt krao apinh Kră Yang tơbăt khan nơ̆r lu ‘bok pơgang pơma ưh kơ trŏ. Mă lei mĕ inh ưh pă đei hơdơ̆r dơ̆ng bơih, ưh kơ đei tơl tơwih nơ̆r inh krao, kŭm ưh pă đei lăng ‘bôh inh dơ̆ng bơih. Ưh kơ đunh đơ̆ng rŏng yă lôch.

Đơ̆ng rŏng, kơplah kon drŏkăn inh truh sơnăm mơlôh păng pơtơm tơ’bơ̆p hăm dôm tơdrong jĭ gah jơhngơ̆m pran rai dêh, inh đei ơ̆t kơ sŏng sa păng krao khan ưh kơ pơdơh wă kơ kon gơh pơklaih. Lăm lơ sơnăm, inh arih lăm tơdrong ưh kơ hơđơ̆ng păng ơh sơ’ngon, lăm anih tơdrong nhen thoi ưh kơ đei tơplih. Hăm trŏ Kră Yang hrăt hrot dêh? Hăm trŏ Sư ưh kơ hiơ̆k bơngơ̆t kơ tơdrong ơh sơ’ngon inh? Dah tơdrong inh krao apinh jơ̆ anat dêh hăm Sư?

Sơ̆p Hla Bơar Nơ̆r ‘Bok Kei-Dei ăn kơ lu bơ̆n ‘bôh Yang Yêsu kŭm đơ̆ng đei tơ ‘bơ̆p jơ phŭt ơh sơ’ngon lăm pơgar Gêtsêmanê. Sư krao khan hăm ‘Bok Kei-Dei ‘Bă: “Ơ ‘Bă, dah gơh, ăn kơ Inh klaih đơ̆ng tơdrong gleh âu. Mă-lei Ih ‘nĕ pơm kiơ̆ kơ Inh, pơm kiơ̆ kơ Ih đĕch.” (Mathiơ 26:39)

Lăm Pah So, “gleh” ngăl jơ̆ rup pơma truh kơ tơdrong hil mĭl păng tơdrong sek tơlang tơpăt đơ̆ng ‘Bok Kei-Dei hăm tơdrong yoch (Hơriso 75:8, Êsai 51:17, Jêrêmi 25:15). Păng “gleh” mă Yang Yêsu đei pŭ iŏk ‘nâu ưh kơ sĭ jơ̆ tơdrong jĭ jăn gah sĕch akar kơpal ‘long pơglang, na kŭm jơ̆ tơdrong Sư pŭ iŏk tơdrong yoch đơ̆ng đĭ đăng kon bơngai, pŭ iŏk tơdrong hil mĭl tơplih kơ kon bơngai, păng đei ‘Bok Kei-Dei achăng. Tơchĕng kơ dôm tơdrong hiong răm păng jĭ jăn đơ̆ng lu bơ̆n dang ei ưh kơ đei kiơ gơh pơting hăm tơdrong ơh sơ’ngon jĭ jăn mă Yang Yêsu đei pŭ iŏk.

Yang Yêsu jơ̆ ‘Bok Kei-Dei, mă lei Sư kŭm jơ̆ kon bơngai tơpă. Yua kơ jơ̆ thoi kon bơngai, na Sư kŭm mơn băt tơdrong sơ’ngon, hli tơtăm, jĭ jăn păng dôm tơdrong tơblah tơ anăp. Mă lei, Yang Yêsu đei drơ̆ng sơng iŏk dôm kơ ơh sơ’ngon păng chu yom tôm tơdrong kiơ̆ kơ ‘Bă wă na krao apinh: “Mă-lei Ih ‘nĕ pơm kiơ̆ kơ Inh, pơm kiơ̆ kơ Ih đĕch.”

‘Bok Kei-Dei ‘Bă ưh kơ iŏk lê̆ tơdrong gleh ‘noh đơ̆ng Yang Yêsu, mă lei ling lang oei hơdai păng ăn jơhngơ̆m pran lăm tơdrong chu iŏk jĭ jăn. Bơngai chih sơ̆p Luka đei chih khan: “Na đơ̆ng noh blư kơ minh ‘nu linh jang ‘lơ̆ng đơ̆ng plĕnh jur tơ Sư wă tơgŭm Sư.” (Luka 22:43)

Đơ̆ng noh, lu bơ̆n pơhrăm iŏk khan tơdrong thĕng hreh đơ̆ng ‘Bok Kei-Dei ưh kơ đei trŏ khan jơ̆ Sư ưh kơ hiơ̆k bơngơ̆t. Đei kơdôm kơplah Sư ăn kơ tơdrong thĕng hreh truh wă kơ lu bơ̆n gơh pran kơtang păng kĕ chơ̆n hloh lăm tơdrong pơlong lăng. Dah kŭm trŏ kơ Sư wă bơtho lu bơ̆n băt lui gơnang kơ Sư, mă khan kơplah đei tơ’bơ̆p hăm dôm kơ tơdrong hiong răm tih thoi kơ tơdrong lôch đơ̆ng dôm lu bơngai lăm hnam dơnŏ ‘mêm.

‘Bok Kei-Dei oei tơ’bôh tơdrong ‘mêm mơnat, jơhngơ̆m mơnat ăn păng tơdrong mơsêh mơyang đơ̆ng Sư, mă khan kơplah lu bơ̆n ưh kơ mơ̆ng kơtơ̆ng nơ̆r Sư. Đon lui tơpă jơ̆ pơtrơp lui gơnang anih Kră Yang, mă tơdrong ưh kơ đei tơplih păng nơ̆r krao khan nhen thoi ưh tim mă đei tơl tơwih kiơ̆ tơdrong bơ̆n hơpơi wă.
Lu bơ̆n đei ‘bônh kơ ră roi gah dôm wơ̆t bơ̆n đei Kră Yang tơl tơwih đơ̆ng tơdrong pơklaih dah dôm tơdrong mơsêh, mă lei ưh kơ đei pơma gah dôm kơ jơnăr tơdrong pơlong lăng đei đunh mă đei tơnăp krao khan. Mă lei, mă Kră yang đei tơl tơwih dah ưh lei lu bơ̆n oei đei pơlung yua kơ trŏ kơ bu bơwei jơhngơ̆m tơnăp hăm Sư lei bơngai noh đei jơ̆ bơngai kĕ jei. Na gô truh kơ jơnăr Kră Yang gô ăn kơ lu bơ̆n lăng ‘bôh hơđăl tơdrong oei hơdai păng chông anhăk đơ̆ng Sư. Tơdrong lu bơ̆n băt hơđăl jơ̆ Sư oei hơdai pŭ iŏk jĭ jăn hăm bơ̆n, mă khan lăm tơdrong thĕng hreh.

Dah năr ‘nâu buăl mơn ‘bôh nơ̆r krao khan đơ̆ng kơdih nhen thoi ưh kơ đei bu mơ̆ng ‘bôh, apinh ‘nĕ kơ tơhiong đon lui. Athei kơjăp lăm jơhngơ̆m, yua kơ kơplah lăm thĕng hreh, Kră Yang oei dơ̆ng gah buăl, oei bơtho, sŭt rơgoh, păng tơgŭm buăl gơh băt tơdrong mơnat ăn đĕch đơ̆ng Sư lơ hloh.

Hăm inh, đơ̆ng rŏng inh ‘nao wă ‘bôh băt khan lăm đĭ khei năr noh, Kră Yang oei pơlung inh, khan mĕ inh oei hiôk hian păng yă oei yak lăm tơdrong pơdơh pŭn hiôk đơ̆ng Sư. Dôm kơ tơdrong pơlong lăng lăm jơhngơ̆m pran kơ kon drŏkăn inh kŭm rai hlôi. Dôm kơ tơdrong pơlong lăng noh đei pơjuăt kon inh jing pơ̆n nuih păng kơjăp hloh lăm đon lui kơplah kon wơ̆ ‘lŏ.

Buăl tam đei layơ tơ’bơ̆p tơdrong thĕng hreh đơ̆ng Kră Yang ưh? Đon lui buăl hăm đei ngĭl ngŭl ưh? Buăl đei ‘bôh Kră Yang tơlĕch nơ̆r thoi yơ? Dah buăl oei chang gô nơ̆r Sư, athei pơtrơp mơ̆ng, na buăl gô gơh mơ̆ng kơtơ̆ng nơ̆r Sư.

Apĭnh đĭ đăng krao khan hơdai: Kră Yang ơi, kon bơnê kơ Ih yua kơ tŏk bŏk lăm dôm kơ jơ năr pơmat tat hloh, Ih oei ‘mêm mơnat, oei jê̆ păng pơlung kon. Apinh tơgŭm kon băt lui gơnang păng pơjao tôm tơdrong đơ̆ng kơdih ăn kơ Ih, păng lui khan Ih oei bơ̆jang lăm anih tơdrong đơ̆ng kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang oei ling lang oei hơdai lu bơ̆n, mă khan kơplah lăm jơ lu bơ̆n ưh kơ đei mơn băt đei tơdrong oei hơdai păng tơl tơwih đơ̆ng Sư. Lăm dôm kơ jơ năr pơmat tat hloh đơ̆ng tơdrong arih, athei lăng tơ ‘Bok Dŏng Pơklaih Yang Yêsu lu bơ̆n, jơ̆ Tơ’ngla đei pŭ iŏk ‘long pơglang, pŭ iŏk lơ tơdrong jĭ jăn păng đe pơma kơnê̆ hloh kơ bơngai bu. Kơdih Sư jơ̆ Tơ’ngla hlôh băt păng mơnat ăn kơ rim tơdrong jĭ jăn đơ̆ng lu bơ̆n. Yua kơ thoi noh, athei năm jê̆ Yang Yêsu păng pơdơh lăm tơdrong ‘mêm mơnat đơ̆ng Sư lăm năr ‘nâu.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.