Di gơ lan tòm bol he kung neh gơs tŭ lùp is: “Tus dê tŭ lơi añ mơ lik bơh bơta gi ga do taih? Bol he gơ lơh be gơkòl tòm rài kis do: dô nơm broă lơh ò rgơi săng sơrbì, dô bơta rơn dap ta sèng neh jŏ rau mơ ò gơlik ngan, ală bơta bol glar kư̆ ting sum, ală gơ noar broă kơn jơ̆ kơn jut kòp ngai. Mơya ồng mò oh mi dòn nin la tòm tiah gơkòl jàm hơ̆, Yang gam kơp gơn nàng ràng tơlik ala bơta “dờng mơ ndơp ndơr” bol he pal cang mìng ơm mŏ mơ iat kơ no lơm?

Ngai do, ngai 16/04/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Lori Wilkerson Stewart bơh tơnggume: DIGÙL TŬ TƠNGAI KONG GƠKÒL JÀM

‘Lùp tĕ Añ, Añ rơp ho wơl mê in; Añ rơp yal mê in ală broă dờng mơ ndơp ndơr, la ală broă mê òhềt tŭ lơi git.’ (Jeremi 33:3)

Añ neh ntào bơtê tòm klờng neh jơt poan sơ nam rau. Lài mơ tŭ cơn đoà mut tòm nam dơ̆ jơt pe, añ kơ lôi hơ̆ rơp la nam lồi tòm bơta bơtê tòm klơng añ jê. Añ neh rcang sir dô bơta tòm gơl, pơyoa sra mut bơtê tòm klờng cao học mơ mpau bơh dô bă tiah pa. Mơya, nam dơ̆ jơt pe hơ̆ gơ lơh jòng rlau jơh tòm rài kis añ jê. Tŭ ntas pơn dut nam học tòm kơn hai prau, añ chò hòp pơyoa sra rlô, rơn dap phăn nàng lòt tus dô bă tiah pa.

Hơ̆ la nam 2006 – tòm kơnhai prang – nam gơs bơta sơrlồng sơrlàng tòm bơta kă brô tiah brê. Bol he ò rgơi tac tiah hiu. Gơ mut tòm bơta ò gơs gùng ndai tai, gen añ pal dăn rê broă lơh yau.

Nam dơ̆ jơt poan tus, kơn jơ̆ kơn jut mơ oă bơta gơ lòng. Bồ dơ ngoh añ ò găm ơm tòm klờng bơtê. Kòp ngai, añ gơ lơh bol glar, dan Yang ai bơta pran kơl dang mơ gơs hweng nus nàng bơ tê cau kơ nòm gan dê nus nhơm di pal. Tơnơ̆ mơ tơrgòm jơh bơta gơn kơ nơm dê bơta rơbdap tap sèng bơh tŭ ngai tơnơ̆ ring niam, añ pal rê wơl mơ sră pơr àr, ală sră lơh bơta lòng òhêt sir mơ ala tŭ jơ tơrgòm mè bèp kơn jơ̆ kơn jut. Añ gam pal bơ tê.

Sră Jeremi tap 33 sơn tòm mơ bơta kal ke ngan: ‘Tòm tŭ Jeremi gam kong jàm tòm rơng hìu ling kơp gàr, …. ‘ (Jeremi 33:1). Tòm tŭ jơ kal ke hơ̆, Yang Jehowa đơs mơ ồng lah: ‘Lùp tĕ Añ, Añ rơp ho wơl mê in; Añ rơp yal mê in ală broă dờng mơ ndơp ndơr, la ală broă mê òhềt tŭ lơi git.’ (Jeremi 33:3)

Ồng mò oh mi gơboh dê sèng Sră Goh dô sơl? Rài kis añ iat kơno sèng do neh oă dơ rau. Mơya, añ ò hềt tŭ lơi ơn nus ơn tôr lah Yang neh ai pà jơ nau hơ pơ gon hơ̆ tòm tŭ ồng Jeremi gam kong gơ kòl jàm.

Ñchi bơtài cau gơ noar hwơr Yang Tòm Trồ dê kong jàm tòm gơ lang bơtau taih? Hơ̆ la nam jơt phàm Bơtau Nebucatnetsa, Jerusalem kong cau Babylon kup gơr wàng. Bơtau Sedekia tài bơh ò kòñ ală jơnau gơ noar hwơr bơh bơta cahrña gen neh kup jàm ồng Jeremi. Tŭ tơ ngai lòt gan, ồng Jeremi ò tòm gơl bơta yal tơlik mơ ồng găm ơm tềng hơ̆, tòm hiu jàm.

Ồng mò oh mi sền gŏ să tòm he tềng hơ̆ sơl? Digơlan bol he lòt jat nùs kòñ Yang dê, tian gơs ơn nùs ơn tôr bơto yal jơnau Yang, mơya rài kis gơ lơh he in be he kong cahrña.

Digơlan he ơm tòm tiah kong jàm. Digơlan he kơp gơn nàng geh lik klas bơh “hiu jàm” să tòm he dê. Digơlan he ji gloh tơrhir geh iat kơ no jơnau Yang.

Bơta kong jàm ồng Jeremi dê geh kong ò dê mìng la bơta kơryan kal ke. Gơ wèt dê đah hweng soan, hơ̆ la tŭ jơ Yang ai gơ noar gơlik gơs, nàng ồng dơh wơl ala bơta sơrlồng sơrlang gùt dar nàng ơm mŏ mŏ dê đap mat Yang. Tòm tiah kong jàm, jơ nau Yang ntas mơ loh làng rlau jơh.

Bol he kung be hơ̆, gơs tŭ Yang ai gơ noar ală tŭ kong “kup jàm” gơlik gơs be dô nơm tŭ lơm pah nàng nền ngan iat kơno Yang. Sền wơl ală tŭ jơ neh lòt gan: ală tap sră dờng màng bơh bơta dòn dê os gơlik gơs tòm tŭ klăm jơ ngo hala kong jàm – be Watchman Nee, John Bunyan, Martin Luther, Catherine Marshall, hala să tòm ồng Pol. Tòm tŭ jơ “dơh wơl” hơ̆ neh dong kòl bol khai tơl bơta ngềt ngơt mơ bơta ngac ngar đah hwềng, nàng cih wơl ala tap sră bềng liu bơta bong mơña Yang Hweng – Bơtau os ho bơh jơ nau lơ bơn niam tòm hweng nus.

Rlau mơ hơ, dilah bol he git tơn bồ duh rngot tòm tu jơ do, gen tơnggu dơng màng mơ Yang wèt sền hơ la ai pà bol he in bơta pơn dang sol àng jrô ndơp bơh Yang Dong Klas Jesus. Tu Yang pơn jat hơ mơ ồng Jeremi tòm di gùl hiu jàm, Yang neh ràng tơlik bơh Bơtau Mêt si a rơp tus. ‘Tòm ală ngai hơ̆ mơ tŭ tơngai hơ̆, Añ rơp lơh dô nơm Ntê bơta song ring gơcat Dabit in; Bơtau hơ̆ rơp lơh gơs bơta song ring song ngan tòm lơgar do. ‘ (Jeremi 33:15). Ồng mò oh mi go sơl? Ò gơs bơta jro ndơp ndai rlau tai, ò gơs bơta rang tơlik lơi dờng màng rlau la git Yang Dong Klas Jesu! Kơ nòm dê bơta ràng tơlik hơ mơ jơ nau cau gơ noar hwơr Jeremi sơn tòm bơh bơta klam jơ ngo mơ tòm gơl tus sèng đơs chò bơh bơta dong klass, bơta lơh pa wơl bơh Jerusalem bêng bơta gown kơ nòm.

Gơs dô bơta bơh rài yau niam ngăn: tòm ngai bơte bơta tòm pơn dang mơ cau blơ mut tòm klơng, cau kơ nòm pal pồn hơ đơm cơ nơng. Dô nă cau kơ nòm ơ du jơt bar neh pồn hơ đơm cơ nơng an jê. Khai đơs: Ơ mò, ala sèng cih hơ đơm cơ nơng mò dê gơs gơ tha be lơi?

Mơya tu ring ang drim hơ đơm cơ nơng hơ neh tòm gơl rài kis an. An geh bơ tê bơh bơta ơm ngêt ngơt mơ kơp gơn Yang. Yang Dong Klas Jesu neh ràng tơlik sa tòm Yang an in kòp àng drim. Gơs tu Yang la Rabi, la Yang Tòm Trồ gơ nap gơ noar, la Mơ nang Kơ cê, la tiah King Cru an jê, la Bơtau ê sền gar hweng saon an – ala bơta an pal càng, Yang Jesu ai pà towngkah tơng kan. Ò dê mìng be hơ, tu jơ do an sền nam dơ jơt poan la nam gơ boh gơ bài rlau jơh, tài bơh an gơs bơta nđac bơ to sôr ala cau kơ nòm niam rlau jơh.

Dan jà bol he dô nùs bal tòm bơta hòi dan: Khoai Yang, kòn ưn ngài Yang la Bơtau sum towlik mat ơm bal mơ kòn tòm thong bơta gơ lòng. Khoai Yang, hweng soan kòn gơ lơh bol glar tài bơh pal kơp gơn, gơ ,ơh be gơ hui tòm hiu jam bơta kal ke. Dan Yang ai pà kòn in tôr đah hweng nang iat kơ no jơ nau lơ bơn niam Yang dê tòm tu ring ngêt ngơt do. Dn Yang rang tơlik să tòm Yang kòn in, nàng kòn geh git làm bơh Yang dô bă jro ndơp. Dan Yang lơh ala mơ nàng bơta gơ kòl jàm gơlik hiu jòng bơta hòi dăn dê, bă tiah nàng kòn dòp rò bơta pơn đang sol ring pa bơh Yang. Dan bơta nđàc mơ bơta lơ ngai jòng oă rlau mơ bơta git wa rơp gơ wàng bồ dơ ngoh mơ nus nhơm kòn tòm Yang Jesu Krist. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, dilah ngai do he go să tòm he gam ơm tòm “bă tiah gơ kòl jàm” lơi tòm rài kis, bulah kalke tòm broa lơh, moat jrung tòm hiu nhă hala ala bơta kơn jơ kơn jut jro ndơp ò rgơi ràng tơlik mơ cau lơi, gen dan ồng mò oh mi ban gơ plo nus. Ban pơn đơl tòm bơta roh gơn kơ nòm, sac rwah te ơm ngêt ngơt mơ pôn să he tòm bơta tolik mat sang goh Yang Tòm Trồ dê. Kư pò nus nàng Yang cơn đoà mut tòm nus mơ sơn tòm bơta tòm klac dềt mêr ò git nđò mơ hweng soan he dê. Tài bơh tu he bàn Yang di gùl bơta kal ke, bơta tơlik mat Yang dê rơp lơh ala ngai kong jàm hơ gơlik tu jơ gơs kwơ mơ ring lơ ngai rlau joh mơ bol he os lòt gan. Kơp kòn di gul bơta gơ kòl jàm, ồng mò oh mi rơp jòi bàn bơta khat gơ boh tòm bơta nđac Yang dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.