Gơs tú lơi ồng mò oh mi sên gó lah he ming hòi cau ndai in tú he pal cang dong kơl sơl? Kòp ngai gen ò hòi lùp còp să. Tòm rai kis đah hwềng he dê kung behớ sơl, gơs tú bol he sền sơbàn bơta gơkló Yàng dê la dô nơm “tiah dong kơl” mơ ming tus tòm tú cang lơm. He ơm lơngai lơngò tòm ală ngai ring lơngai, húi jơnau đơs Yàng dê, gen tòm tú càlrbut tus he đơs: “Ơ Yàng, Kơnràn ơm tiah lơi?”. Behớ gen ngan la he kỡn gơboh Yàng sơl, hala ming lòt tus hơ Yàng nàng dan Yàng dong he tú he tìp gơlong bol glar lơm?

Ngai do, ngai 17/04/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume GÙNG CHE DUH NÀNG DONG TĂ.

“Añ kòñ gơboh di Yàng Jehôwa, tài bơh Kơnràñ neh kơno añ. Mơ jơnau rac dan añ jê. Tài bơh Kơnràñ neh wèt tồr iat añ, Gen tàng añ rơp hòi dan mơ Kơnràñ jơl jơh rài kis añ jê.” (Đơs Crih 116:1-2)

Ồng Chad ò rgơi đơs bơta lơi, ơt nhơm tă tú kơno jơnau đơs cau hớ dê. Neh mòr bàr sơnam rau kon klau ồng dê la Derek neh lik bơh hiu tòm tú gơhào nùs mơ ồng ò git bơta lơi bơh khai tai. Ồng hòi điện thoại mơ cih sră oă ngan khai in, mơ ồng ò geh hơ wơl. Ală ngai, kơnhai lòt gan, kon klau ồng ò gó rê wơl. Bulah bơh sơnròp ồng Chad chò hòp ngan tú kơno jơnau đơs kon klau kỡn gơboh ồng dê, mơya nùs ồng dê dơrcul mơ ồng gơs bơta kơlôi sơnơng lah: “digơlan khai tìp bơta kal ke lơi”.

“Ơ bèp, kon pal cang jền priă nang ò ơm jam” – kon klau ồng dê sơntòm đơs. Jơnau yal yau ồng Chad dê lơh bol he kah tus Jep-the tòm sră Ală Kwăng Cahrna 11. Ồng ai lơh krơi tòm tú ală cau kwăng kra bòn Galaat lòt tus jòi ồng tơnớ mơ tú bơtrơh ồng. Jep-the la kon klau dô nă cau klau Galaat dê ơ ur dri, ồng Jep-the gam kol kơt tòm ală jơnau đơs ò niam mơ srat rơma bol khai dê. Ồng ò tú lơi húi ală jơnau đơs oh bi ồng dê tòm tú bơtrơh ồng lik bơh bòn, mơ bol khai đơs lah bol khai rơp ò ai pà dô êt phan lơi Jep-the in.

Tơnớ mơ tú ơm tòm bòn Top, Jep-the gơs dô mpôl ling khai dê. Bulah bol khai la ală cau ơm gơlềng gơlang mơ lòt phà kơnau jat khai.

Tòm tú lang bol Ammôn lơh kơlin tòm lơh tòm bòn Israel, ală cau kwăng kra bòn Galaat lòt tus dan Jep-the dong kơl. Bol khai kỡn ồng lơh cau at bồ mpôl ling, Mơya Jep-the ò hơ dô bă buôn soh bol khai in ò.

Ồng đơs wơl: “Mơya Jepthe đơs mơ cau kwang kra cau Galaat lah: “Ò di bol mê jơh tơl nă neh sang añ mơ neh bơtrơh añ bơh di hìu bèp añ jê ơ? Ñchi bơh tài tŭ do bol mê tus hơ añ tòm tŭ bol mê gơtìp bơta bòl glar taih?” (Ală Kwang Cahrna 11:7). Ală cau kwang at bồ bòn Galaat kừ hòi jà ồng, mơ hơ ồng in lah bol khai rơp ai ồng in lơh gơs cau at bồ bòn Galaat dilah ồng pha rlau mơ lang bol Ammôn. Lôi dut, Jep-the lòt bal mơ bol khai, mơ Yàng Tòm Trồ neh ngui ồng nàng dong tă lang bol.

Ẵn lùp is lah, gơs tú lơi Yàng moat jrum bơh ală bơta he lơh Yàng in sơl? Cau dunnia ò tú lơi kah tus bơta hòi dan, jơl tus di tìp bơta kal ke. Tú hớ jơnau hòi dan neh húi gơlik gơs jơnau rac dan dong kơl. Oă ngan cau ming kah kơlôi tus ală broă tòm dunnia lơm ò kah tus Yàng tai, jơl tus di tú tìp ală bơta rlau mơ pràn he dê. Cau dòn Yàng kung behớ sơl, húi hwơr tòm bơta hòi dan, nàng tú tìp bol glar kal ke gen sòng hòi dan mơ Yàng.

Kòn mơnùs òs gơs bơta kơlôi sơnơng lah pal cang gơs “yàng đeng” nàng rgơi dong kơl tòm tú tìp bol glar kal ke ò di la cang dô nă Bèp nàng tòm bơh bơr. Dan kah té lah: Tú gơlong bol glar ò di la tú sơntòm bơta bơtào bơta hòi dan. Dô nơm mơnàng kớ nền pal geh bơta tòm ală ngai prăng nàng tú càrbut tus, hiu đah hwềng he dê rgơi ntào kớ.

Yàng sum kơno jơnau hòi dan kon Kơnràn dê, mơya moat jrum ngan dilah bol he gơwèt mơ Kơnràn bè la dô nơm “”gùng che duh nàng dong tă”- ming hòi tú he cang lơm. Rơp gơlik gơs mbe lơi tú Yàng lơh he in bè he neh lơh mơ Kơnràn? Ưnngai Yàng bơh nùs nđàc sơngit Kơnràn dê dơng rlau mơ nùs sơ-êt sơ-êl bol he dê, Kơnràn di pal nàng dòp geh oă rlau tai. Yàng di pal nàng he sùm jòi jat, ò di ming tìp bơta bol glar kal ke lơm mơ tài bơh bol he kỡn gơboh Yàng.

Dan jà bol he dô nùs bal tòm bơta hòi dan: Khoai Bèp kỡn gơboh, ưnngai Bèp neh sum ơt ơl mơ kơp gơn kon, bulah kon ming jòi tus Kơnràn tòm tú kon lồi gung lơm. Dan Yàng toh tồi glài kon in tòm tú kon húi Yàng tú kon ơm ring lơngai mơ ming jòi Yàng tòm tú kon tìp bol glar kal ke lơm. Dan dong kon nàng kon in gơs dô rai kis pràn kơldang tòm bơta hòi dan, đềt mêr mơ Yàng mơ đơs mơ Yàng lah kon kỡn gơboh Bèp. Dan ai kon in git ơn Yàng lài hơđap, bulah ring lơngai hala bol glar kal ke, dan ai kon in sên gó bơta ring lơngai tòm Kơnràn. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, bẵn lòi he mơ Yàng gơs dô “bản hợp đồng” mơ ming gơs tòm tú he tìp bơta kal ke . Bẵn lòi Yàng gơlik gơs cau ò kweng mơ he tòm tú he chò hòp mơ mơp dơl jòi Yàng tòm tú he lồi gung. Kơp kỡn jơnau hòi dan ồng mò oh mi dê ngai dô la jơnau dô nă cau kon dê tòm bơh bơr mơ Bèp, bơh nùs gơn kơnòm bè nhơm tă kòp tú kòp jơ, ò di la tú he tìp calrbut gen song jòi Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.