Jê sồt la bơta ò cau lơi rgơi pleh klas tòm rai kis. Mơya ală têl sồt tus bơh ală cau mơ bol he kòñ gơboh gen lơh bol he in jê sồt rlau jơh. Bol he buôn sac gùng kal nùs, prăp nhal, hala ơm ơm lik ngai ală bơta gơtơmklac lơh he in jê sồt. Mơ ya hơ̆ ngăn sơl là gùng Yàng kờñ bol he ntao diđap mơ bơta jê sồt sơl?

Ngai do, ngai 20/04/2026, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl Joy Brunson bơh tơnggumê RÀNG TƠLIK BƠTA NĐÀC DIGÙL ALĂ BƠTA JÊ SỒT

“Gen Yàng Jesu đơs mơ khai lah: “Ơ bơyô, ñchi bơta mê kòñ lơh gen lơh tĕ?” Gen bol khai tus ai tê sơmbat kup Yàng Jesu.” (Mathiơ 26:50)

Dilah geh lup lah ñcau la cau neh lơh oh mi in jê sồt, digơlăn bol he rơp kơlôi tus ò di ming dùl mơya la oă sơnđăn. Añ găm tôn lah he la cau cau buôn ngăn toh glài, mơya gen dơp git lah bơta hơ̆ ò buôn soh be he kơlôi. tòm rai kis, gơs dơ̆ añ kol cau ndai lơh jê sồt, mơya kung gơs dơ̆ să tòm añ neh lơh jê sồt cau ndai.

Oă năm neh rlau, ur klau ẵn gơs tũ lơm pah pơjum tòm klac tòm dô nơm Hiu Jum Goh mơ bòl hi kơlôi la “wil tơl”. Bòl hi kõn ơnih tiah hỡ, bơh ông cau gơnoăr bơtọ, mpồl lăm duh khoai jơl tus ală cau dòn tòm Hiu Jum Goh. Sơlơ dềt mêr, bol he sơlơ tơryăng tơryông duh broă, bơtao gơs dô bơta gơtơmklac, mơ sơlơ lăng mpôl hơ̆ be la dô pơnah ò rgơi siơ̆u tòm rai kis he dê.

Mơ gen dô ngai nê, bol he sền gŏ gơs cau lơi hơ̆ neh đơs ală bơta ò tòm toh song ngăn bơh he, mơ bơta hơ̆ neh lơh oă cau rhơi rhơi ngai bơh bol he, bulah bol he neh pơnđơl pràn rang tơlik mơ jôi gùng nàng yăl loh. Añ gơlơh be he neh kol pơrlơ̆ dră mơ jêsồt. Añ sơntơm lùp Yàng: “ñchi bơh tai ală bơta gơlơh behơ̆, ơ Yàng?”

Neh gơs dơ̆ añ ming kòñ lik bơh Hiu Jum Goh hơ̆ mơ. Kơp dơ̆ lòt pơjum, añ gơlơh be ơm is lúi. Bulah bau klau añ pơndơm pal cang ơm tai tòm Hiu Jum Goh dô ết tŭ tai nàng ơm gơn bơta tề lăm Yàng dê, mơya nùs añ kư găm gơlơh moat jrung mơ roh gơn kơnơm. Dô măng nê, añ ñim tòm bơta hôi dăn mơ đơs mơ Yàng lah lơh mbe lơi nàng añ rgơi pơnjat ntao diđap ală cau neh lơh jê sồt he. mơ tòm bơta ring ngit hơ̆, añ geh Kơnràñ tơngkah lah pơnjat tĕ gơwet mơ bol khai mơ bơta kòñ gơboh, bơta nđàc mơ bơta kong ơt be Yàng Jêsus neh lơh.

Tòm Sră Goh, bol he gŏ dô nơm yal yau ơs mơng bơh bơta pơrlơ̆ dră, hơ̆ la yal yau Juda Iskariôt dê. Juda ò di la dô nă cau nac crih gơwet mơ Yàng Jêsus. Ông la dùl tòm jơt bar nă cau rềp rlau jơh. Bol khai geh sac, geh kis mơ Kơnràñ, geh lòt jat Kơnràñ tòm lam gơnoăr broă. Juda geh kơno oă bơta bơto Yang Jesus dê, geh sền gŏ oă bơta krơi Kơnràñ dê, ngui sao bal, lòt bal mơ Kơnràñ kơp ngai. Mơya, cau geh sền la đềt mêr la cau pơrlơ̆ dră Kơnràñ.

Bơta lơh bol he in pal kơlôi sơnưng la Yang Jesus neh git lai bơta hơ̆. Kơnràñ git Juda rơp pơrlơ̆ dră, rơp jao Kơnràñ mơ ală cau kòñ tơnchơt Kơnràñ. Mơya bulah git lai, Yàng kung găm sac Juda lơh cau bơtê, găm ai ồng in lòt bal, găm kờñ gơboh ồng mơ gơwet hơ ồng be la ală cau bơtê ndai.

Tòm bơta yờ sao lồi dut, tòm tŭ Yàng Jêsus đơs rơp gơs dô nă cau pơrlơ̆ dră Kơnràñ, gen Juda lùp: “Ơ Rabi, hơ̆ la añ ơ?” Kơnràñ ho lah: “Ngan be mê neh đơs.” (Mathiơ 26:25). Tơnơ̆, tòm tŭ Juda lăm mpôl ling tus kup Yàng mơ ngui dô bơta cum nàng lơh til sơñio, Yàng Jesus găm hôi ồng la “bơyô”: “Gen Yàng Jesu đơs mơ khai lah: “Ơ bơyô, ñchi bơta mê kòñ lơh gen lơh tĕ?” Gen bol khai tus ai tê sơmbat kup Yàng Jesu.”

Tòm jơnau Greek, jơnau “bơyô” (Hetairos) tòm sèng do cèng gơ tha la cau lòt bal, mpôl bal hala cau dô bơta kơlôi bal. Bơta hơ̆ ai tơnggŏ, tian gơs tòm tŭ ntao di đap bơta pơrlơ̆ dră, Yang Jesus găm ngui bơta nđac mo bơta kờñ gơboh nàng gơwet mơ Juda, ò di la bơta lah pơrhơng.

Tòm tŭ kơlôi bơh bơta do, bol he rgơi kơlôi lah: “ñcau la Juda tòm rai kis añ?”
Hơ̆ digơlăn la dô nă cau bơ yô neh dềt mêr ngăn mơ ya neh đơs joh oh mi bơh ngkơi, bơta lơh lòt ơs bol he dê la gơjrañ mơ roh gơn kơ nơm. tian gơs, bol ha rgơi dăn Yang bañ lơi cau hơ̆ in gơring tus dê bơta lơi tòm rai kis he dê tai. Mơya digơlăn Yang rơp ò lơh behơ̆ bơh Kơnrañ kơñ bơto bol he dô nơm bơta bơ tê ndai.

Oă dơ̆, ală bơta jê sồt jrô ndơp rlau jơh la tiah Yang tuh bềng bơta nđac Kơnrañ. Kơnrañ ngui kơp bơta gơlik gơs nàng bơt mòn bol he, dong bol he ndrơm be Yang Jesu rlau. Kơnrañ la Bơtau neh sac bơta kòñ gơ boh bulah tòm tŭ kol pơndang săng. Toh glai ò gơs gơtha la bol he pơn đơl pran hŭi ală bơta jê sồt, mơya la lơh nền ò lơi bơta srat bơtang hòn riah tom nus he.

Bulah behơ̆, toh glai ò hêt tŭ lơi la bơta buôn soh. Ngăn, hơ̆ la dul tòm ală bơta kal kê rlau jơh tòm rai kis cau dòn Krist. Mơya să tòm tòm ală kalke hơ̆, bơta don bol he dê geh long mơ têh dơng. Tòm tŭ sac toh glai, bol he gam đom jat krơh Yang Jesu.

Digơlăn ngai do oh mi gam cèng tom nus dô bơta jê sồt mơ cau lơi hơ̆ neh lơh he in. Mơya kơlôi sơnưng tĕ bơh yal yau Yang Jesu mơ Juda dê. Dilah Yang rgơi kòñ gơboh cau neh pơrlơ̆ dră he, gen Kơnrañ kung rgơi ai oh mi in pran kơl dăng nang kòñ gơboh mơ toh glai.

Digơlăn Yang ò tơm gơl tơn cau neh lơh je sồt oh mi, mơya Kơnrañ rgơi tòm gơl nus nhơm oh mi, lơh srat bơtăng gơlik gơs nđàc sơngit, lơh je sồt gơlik gơs bơta têh dơng đah hwêng. Găn dê bơta hơ̆, oh mi bơtê git kòñ gơboh cau ndai mơ bơta kòñ gơboh Kơnrañ ai oh mi in.

Behơ̆ gen, kơp dơ̆ kơ lôi tus “Juda” rai kis he dê, ala bơh ming kah tus ală je sồt , hôi dan tĕ Yang ai oh mi in dô nơm nus nhơm ndrơm be Kơnrañ rlau, nang gen oh mi rgơi sền lăng cau ndai mơ gar mat bơta nđàc dê mơ bơtê gung nang koñ gơ boh be Kơnrañ neh koñ oh mi.

Dan jà bol he dô nùs bal tòm bơta hòi dan: Khoai Yang, Kơnrañ git kon buôn ngăn koñ gơboh di ală cau koñ gơboh kon, mơya kalke ngăn nang kòñ gơboh di ală cau neh lơh kon in je sồsồt. Dan dong kòn bơ tê jat krơh toh glai mơ lơ bơn niam Kơnrañ dê, nang kon rgơi toh glai cau ndai in bulah tòm tŭ nus kon ò hềt rcang sir. Dan dong kon nang git lam ngăn bơta nđac liu lac Kơnrañ dê, nang kon kung rgơi gơwet mơ cau ndai mơ bơta nđàc.

Ơ ală ồng mò oh mi kòñ gơboh, pleh mơ ơm mŏ ò di la gùng la sơm bơi bơta je sồt, mơya bơta sơm bơi rơp tus tòm tŭ bol he khin ntao di đap. Tai bơh hơ̆, dilah tòm nus oh mi găm prap ală bơta je sồt, lai ngăn, lơi tĕ tŭ jơ ơm is mơ Yang mơ lơi Kơnrañ bơ dê ală têl sồt oh mi dê. Mơ kung, dăn tĕ Yang bơn tơl pran nang oh mi rang tơlik bơta nđàc mơ cau neh lơh je sồt he. Bulah digơlăn kalke ngăn, mơya sơn tơm tĕ mơ jơnau hôi dăn ala, dan Yang ai lơngai mơ lơh broă tòm rai kis bol khai. Mơ gen să tơm oh mi rơp dơp git lah să tơm nus he găm geh Yang tơm gơl, bơh kr ă kơl dăng gơlik lơbơn niam, bơh srat bơ tăng gơlik gơs niam lơnhơn.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.