Gơs tŭ lơi he sền dô nơm phim, sền dô dăp sră mơ păl đơs driau wơl gơkrơi tài bơh bơta cơnđòa lòt găn nisơna gơlik gơs ir sơl? Rài kis bŏl he gơs dơ̆ kŭng be dô nơm dap phim gơs ală pơnah ò kơlôi git lài. Mơya gơs dô jơnau sŏng dờng màng rlau jơh: digul ală bơta gơlơngơr dunnia do di, Yang Tom Trồ găm at bồ, tơ’ai lah tòm ală bơta be dềt rhền rlau jơh. Mơ gơs dơ̆ dô nơm pơnah dềt rhền bŏl he tồn lah neh pồn prap mơya bơh hơ̆ la gùng lòt Yang ngùi nàng ràng tơlik tồi glài, sôr bŏl he păl măt tòm tọh mơ măt bơh ală cồng nha sac rwah tìs glài.

Ngai do, ngai 21/04/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Jennifer Devlin dê bơh Tơnggume CỒNG NHA Ò KƠLÔI TUS

“Mơya dilah bol mê ò lơh jat behơ̆ gen bol mê tìs glài mơ Yàng Jehôwa; mơ bol mê git nền ngan lah tồi glài bol mê rơp gơtuh wơl hơđang bồ bol mê dê.” (Khà Làng Bol 32:23)

Ăñ gơboh gơbài ngăn ală sră yăl tơnggit bơkah tôr. Jơnau yăl sơntom bơh dô nơm tòm yăl mơnang, gen nisơna “ò jai tơlơ̆ tê”, ală bơta tòmgơl be càl, tồ ràng tơlik dô nơm bơta gơlik gơs nisơna, lơh ăñ ĭn păl sền rmê tòm dap sră nàng sền cồng nha lồi dut mbe lơi. Gơs ală pơnah gơlơh bŏl he in bulah la ală pơnah dềt rhền, lơh tòmgơl jơh măt sền mơ lơh bŏl he in păl sền rmê tòm bơta neh rơndăp pha is.

Sră Goh kŭng gơs bềng tơl oă broă gơlik gơs behơ̆. Gơs ală dap sră bềng gơs jơnau sŏng bơh Yang Tom Trồ mơ làng bŏl Kơnrẵn pơrlơ̆u digul bơta kịch tính, lòt nrah nring, ñŏ kơñhơl mơ lãng mạn tai. Bŏl he bơtê geh git nđợ bơta bơh Yang Dong – Bơtau koñ gơboh tian gơs ò di mìng dŏng tơwài bŏl he, mơya găm bơtọ dềt mềr kis niam nùs Kơnrẵn bơh ală jơnau yăl tơnggit “Cau ngăn broă sŏng” tòm Sră Goh.

Gơlơh be Yang Tom Trồ òs lơh pràn kơldăng rlau jơh bơh ală broă dềt rhền. Gơs dơ̆, dô bơta dềt rhền hala gùng dà lòt dềt ngăn tom tòm bơta yăl lơh gơlik gơs bơta krơi pha is rlau jơh jơh cồng nha ĭn. Gơs dô jơnau yăl tơnggit bơkah tôr ngăn tom Sră Goh ràng tơlik dô gơnoăr pràn bơh ală bơta dềt rhền di, cih tòm II Samuel 11 – 12.

Tòm Tap Sră di, Dabit, cau niam nùs Yang Tom Trồ, neh lơh nền ơm wơl tòm gơlăng bơtau ala wơl lòt tòmlơh. Ồng là dô nă bơtau dờng at bồ dô dà lơgar pràn kơldăng. Mơya tòm tŭ mpồl ling bơtau găm ơm đah bơdih tòmlơh nàng sền gar dà lơgar rĭng lơngai, bơtau ơm lơngai tòm gơlăng bơtau wơl. Tòm phuk jây lơbơn nùs, Dabit ntào lòt yơng hơđăng rkăng hìu gơlăng, khai gŏ dô nă cau ur hang mơnĕ ngăn ŭm dà. Mơ bơtau neh lơh dô bơta sac rwah tìs.

Tòm jây phuk cau yau kon mơnùs di at bồ, Dabit lơh nền lah oă cau bau ur gơn kơp tòm gơlăng kŭng ò tơl lơh bôr bềng bơta hàm koñ ồng di. Ồng lơh jat nùs koñ is, tơhir geh gơs cau ur hàng mơnĕ ngăn găm ŭm dà hơđăng rkăng hìu cau ndai. Bơh măt sền tìs bơh sơnrờp hơ̆ neh lăm tus lơh tìs glài pơnjat: Broă lơh.
Bơtau sôr cau dĭ he jòi lùp cau ur hơ̆ ồng pa sền rmê. Cau ur hơ̆ là ñcau? Khai rơp tus băl mơ ăñ sơl? Tòm tŭ jòi lùp, Bơtau cham pràn dính git lah “Cau ur hang mơnĕ” do ò mìng gơs bau klau, mơya găm la bau ur dô nă cau lơh ling găm tòmlơh tòm mpồl ling he di!

Gen bơta hơ̆ rơp kơryan gùng dà tơnrọh do sơl? Ò. Cau at bồ mìng git să tom he găm sôr cau lòt cèng cau ur tus, mơ bŏl he rơp kơlôi sơnơng tus broă pơnjat…
Ò pha is be ală bơta rơndăp bơ̆ iơh hơđăng truyền hình, pơnah găm wơl jơnau yăl sền iat kơno be geh ràng tơlik. Ồng wă rò cau ur ri, bic băl mơ khai, gen cau ur hơ̆ neh lơh gọh să tom khai bơh bơta bơ̆ bơl gen khai rê hiu bơh bơta basil baso. Do là jơnau yăl tơnggit “koñ gơboh dô măng” neh gơlik gơs oă pah rài lài or. Dabit buơn ngăn ngùi gơnap gơnoăr nàng lơh hừh nùs hàm koñ is gen bơtrơh cau ur dô lik.

Tơnơ̆ mơ tŭ Dabit geh pit geh cau ur hơ̆, digơlan ồng kơlôi lah ồs hàm koñ is rơp sum sum ò gơs cau git. Digơlan ồng ò càng kơlôi sơnơng tai bơh măng ti, hala bơh cau ur hơ̆ tai.

Mơya, dô nơm broă gơlik gơs. Cau ur hơ̆ neh bŭn.

Cau ur hơ̆ sôr cau lòt yăl mơ bơtau gơs bơtơl dô nă kon păl sền gar, dô nơm broă păl tìp, dô nơm broă păl lơh. Nisơna, tồi glài pồn ndơp gen Dabit neh rơndăp neh lot jat gùng dà ồng ò kơlôi tus. Cồng nha bơh broă bŏl ồng rơp tơlik mat tơnơ̆ mơ sĭn kơnhai tai. Mơ dô “bơta rơndăp B” ồng geh lơh tơn mo. Ñchi ồng rơp lơh? Ồng rơp neh tòmgơl bơta lơh tìs do mbe lơi taih?

Ala dơñ dòp mơ gơjrañ săng glài bơh ò git kơrhia, at bồ, ală jơnau blac pơrlồm he di, bơtau hơ̆ sơlơ ngai sơlơ tò jrô pơnồng bềng tơl oă bơta sac rwah tìs glài iơh bơsak. Tŭ bau klau cau ur lik rê bơh tiah tòmlơh be Dabit rơndăp, khai ò “dô nùs lơh” bơta rơndăp òm cau bơtau di.

Mơ lồi dut, bơta rơndăp tơnchớt neh gơlik gơs, jơh ală bơta găm tòm tê cau “niam nùs Yang Tom Trồ”. Ò git cau lơi kơlôi geh Dabit ngùi kai băl mơ cau ling he di. Tian gơs chồl cau hơ̆ chơt tòm tiah tòmlơh hơđap, tiah sơbơng rọh rlau jơh, mìng nàng he geh klàs să tom he?

Lọh lang, Yang Tom Trồ ò lòi ală broă ơm mŏmŏ. Nathan, cau dĭ gơna Yang di tơlik mat bơh dô jơnau yăl tơnggit dềt: Ne Dabit, bơtau neh kơno jơnau yăl tơnggit do sơl? Dô nă cau pas gơs oă ngăn belat mơ kơnrồ, mơya kup wơl dô nơm belat rlau jơh cau rbah di – kup ai bơta niam rlau jơh cau hơ̆ gơs.

Dabit gơhao gơjrañ, cahcahrña mơ gơjrañ ngăn. He gơs kơlôi lah Yang Tom Trồ găm tơrleh bồ tŭ sền gŏ cau gơs glài gen chok wơl tồi glài să tom he sơl? Jơnau yăl tơnggit Nathan ngăn neh lơh “rngoh rngac” tus Dabit, mơ tŭ bơtau pơndut jơnau đơs, Nathan neh lah pơrhơng cau gơs glài bơh Jơnau Yang di, ràng tơlik lah Kơnrẵn git lọh ală bơta gơlik gơs.

Bơtau at bồ hơ̆ păl tìp bơh cồng nha tồi glài he di. Yang Tom Trồ là Bơtau sŏng rĭng mơ sŏng ngăn, Kơnrẵn rơp lơh glài kon sau Kơnrẵn tŭ bŏl khai tơnkram tòm tồi glài. Mơ tơnggume Yang di hơ̆ la cèng cau gơs glài tus hơ bơta gơjrañ săng glài.

Broă lơh bŏl he di la ñchi? Bulah êt nă tòm bŏl he tìs ală bơta tồi glài kơnjơ̆ be hơ̆, mơya kŭng băñ bơngơl gơla mơ jọng să kơlôi lah he niam rlau cau ndai tài bơh he ò tơnkram be bŏl khai. Bŏl he ò tŭ lơi bơt bơtào rài kis bơh broă pơndròm bơta pràn he gơwèt mơ bơta lơbơn pràn cau ndai. Niam rlau jơh, bŏl he kah kơlôi sơnơng tap sèng Sră Goh do mơ cih kah tòm hwing nùs lah: Yang rơp tòm toh mơ măt bơta tồi glài mơ geh ràng tơlik ală bơta lơh tìs dilah bŏl he ò rgơi lơh mơ gơjrañ săng glài.

Tơnggume Yang di la cèng bŏl he ri wơl gơtòmklac dềt mềr dipăl mơ Kơnrẵn, bulah bơta păl tơm wơl la ñchi. Bèp hơđăng trồ neh koñ gơboh ai pà bŏl he ală jơnau yăl tơnggit rài do mbe lơi, nàng wèt sền bŏl he tus dô rài kis sàng gọh rlau mơ bơtọ bŏl he bơh bơta iơh rmơh bơta tồi glài di. Bŏl he òs pơnđơl he ò lơh tìs mơ pồn prap tồi glài nàng ò tus ho Yang bơh hwing nùs gơjrañ săng glài. Bulah găm kơt tòm tồi glài lơi, digơlan bŏl he kŭng păl tìp bơh dô nơm gơnoăr broă nisơna lơh tòmgơl rài kis he sum sum.

Digul oă bơta sac rwah mơ ală lơh nền kòp ngai, dăn băñ tŭ lơi sền òsớp ală broă dềt rhền gơlik gơs tài bơh cồng nha broă lơh di rơp gơtònmut tòm rài kis bŏl he tòm ală tŭ bŏl he ò kơlôi sơnơng tus rlau jơh!

Dan jà bol he dô nùs bal tòm bơta hòi dan: Ưnngai Yang tài bơh Jơnau Yang ngai do tơngkah kon bơh bơta sàng gọh mơ sŏng rĭng Kơnrẵn di. Dăn Yang tọh glài kon ĭn, tài bơh gơs ală tŭ kọn neh lòi ală bơta kơlôi sơnơng ò sŏng gơs tòm nùs. Ơ Yang, dilah tòm nùs kọn găm gơs ală tồi glài pồn ndơp lơi, dăn Yang Hwing Gọh lah pơrhơng mơ ai pà kọn ĭn bơta khin cha nàng gơjrañ săng glài, tồ kọn ĭn geh lơh wơl pa tòm bơta koñ gơboh Kơnrẵn di. Dăn sền gar cơnđòa kọn lòt kòp ngai, ai kọn ĭn drơng kơp diđap ală bơta ơnnia mơ git sac rwah gùng dà niam nùs Kơnrẵn. Kọn jơh nùs họi dăn, Ai sơnđăn Yang Jesu Krist. Amen.

Ơ ală ồng mọ ọh mi koñ gơboh, băñ lòi bơta pơnhừ să pơrlồm la bŏl he niam rlau mơ cau ndai. Yang ai gơnoăr ală broă gơlik gơs, gơs dơ̆ hơ̆ là ală cồng nha ji sồt, nàng cèng bŏl he ri wơl mơ Yang, tơrbŏ wơl ală bơta gơtòmklac di păl. Băñ pơnđơl jòi ală bơta pồn prap, tài bơh bơta khat gơboh ngăn mìng tus tŭ bŏl he tìp măt bơh tồi glài bơh dô nơm hwing nùs ji sồt moat jrung.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.