Rài kis tòm dunnia do bềng bơta jê sồt. Mơya roh dồ nă cau tòm hìu nhă tềng tiah lơgar ndai la bơta jê sồt dờng ngan. Lơngai ngan bol he in ngai do, la cau dờn Yàng, tài bơh bol he duh khoai Yàng Tòm Trồ bềng bơta kờn gơboh mơ niam lơ-hơn. Yàng ờ tú lơi sang lòi nùs nhơm jê sồt, Yàng sùm sơm bòi mơ ơt ơl nàng dong bol he.

Ngai do, 22/4/2026, rơndap bơta hòi dăn kòp ngai hòi jà ồng mọ oh mi kơ-lôi Jơ-nau Yàng bơh tơnggume YÀNG TÒM TRỒ SÙM GAM LƠH BROĂ.

“Lơh tĕ pràn kơldang mơ khin cha. Bañ rngòt cù kìr tài bơh bol khai, bơh Jehôwa Yàng Tom Trồ bol mê dê lòt bal mơ bol mê, Kơnràñ rơp ò tŭ lơi sang bol mê hala lòi bol mê.” (Yal Wơr 31:6)

Nggui tòm hìu jum, an rgơi kơ-no jơnau máy sưởi ntas, kung kơ-no jơnau moat jrùng dồ nă cau mò dê. Ùr klau mò dê bal mơ kon klau 17 nam pa mơ rê ơm tòm lơgar ndai, ờ hềt lơh yô mơ oă cau tòm hìu jum, tú do mo pal đơs jơnau tơngac bau klau mò dê nàng cèng bồc rê wơl hơ lơgar tòm mò dê.

An moat jrùng sền cau mò bòl glar do, să jan mò rgai ngan, bal mơ bơat nhìm rac bềng ngan bơta bòl glar mò dê. Nùs nhơm an jê ngan, an kah wơl ngai mơ kơnòm bol hi dê sang rài kis do. Hìu nhă cau bi an dê jê nùs ờ git nđờ, kal ke ngan nàng dờp broă gơlik gơs hớ. Hìu nhă an dê kung ơm tòm bơta moat jrùng sơl. Mơ an jòi jat muh mat Yàng Tòm Trồ dê tòm bơta moat jrùng hớ.

Gơs dồ jơnau yal bềng bơta pơndờm pơniang geh cih wơl tòm Sră Goh. Tòm rài ală cau wang cah rnha, gơs dồ bơta jê gloh rung gơtơntus mơ neh lơh dồ nơm hìu nhă pal lòt tiah ndai nàng jòi phan kis, hớ la hìu nhă ồng mọ Elimelec mơ mò Naomi. Bal mơ bàr nă kon klau, Naomi lòt tus lơgar cau Moap dê nàng ơm kis, tiah mơ hìu nhă mò gơn kơ-nòm rơp jòi bàn phan ngui sa nàng prap gar bơta kí. Mơya tềng tiah do neh kơ-nhau bơta kis bau klau mơ bàr nă kon klau mò dê.

Tòm tú bơta jê sồt gam bềng tòm nùs nhơm mò Naomi, Yàng Tòm Trồ sùm gam lơh broă dồ bă lơ-bơn niam tòm nùs mò Ruto, kon ban mò dê. Ngan bè hớ, tú Naomi sràt bơtang đơs bal mơ bàr kon ban he dê lah: “Nùs mè sràt bơtang oă rlau mơ ală kòn, tài bơh tê Yàng Jehôwa dê neh tơrwơl tòmdră mơ mè.”, mơya jơ-nau đơs mò Ruto dê bè dồ jơ-nau hơ nền pràn kơldang tus dê oă rài: “…Mè lòt tiah lơi añ rơp lòt tiah hơ̆, mè ơm tiah lơi añ rơp ơm tềng hơ̆. Làng bol mè dê rơp la làng bol añ jê, mơ Yàng Tom Trồ mè dê la Yàng Tom Trồ añ jê.” (Ruto 1:16).

Broă lơh mò Ruto dê ờ tus bơh nùs nhơm bằ lơhiă, mơya bơh nùs nhơm dờn nên dê Yàng Tòm Trồ. mơ nùs nhơm kơ cê mơ mò gơs hớ la tềl sơnio tê Yàng Tòm Trồ lơh broă tòm hìu nhă ồng mò Elimelec, mơ mò Naomi dồ bă kơ cê ngan.

Kis dê gùl làng bol bềng bơta tồi glài tòm tiah Moap, mơya nùs nhơm mò Naomi sùm gơwèt hơ làng bol mò dê, mơ gơkơnòm dê Yàng Tòm Trồ. “bơh khai neh kơno lah Yàng Jehôwa neh wèt sền làng bol Kơnràñ dê mơ neh ai bol khai in phan sa.” mò Naomi sơntòm rơndap broă rê wơl hơ lơgar mò dê tơnớ mơ bau klau mơ bar nă kon klau mò dê neh sang rài. Tòm tú Naomi sùm dờn kơ-nòm tòm bơta at bồ Yàng Tòm Trồ dê, mơya mò kung gam bềng bơta jê sồt mơ sràt bơtang tài bơh ờ hềt gó bơta lơ-bơn niam Yàng dê. “Bañ hòi añ la Naômi tai, mơya hòi tĕ añ la Mara tài bơh Bơtau Gơnap Gơnoar neh lơh rài kis añ sràt bơtang ngan.” (Ruto 1:20).

Kis tòm tiah cau yoan tòm lơgar ndai, tiah mơ bol he kơ-lôi is lah rơp cèng wơl rài kis tơngkah tơngkan, mơya gơ-wèt mơ dồ êt cau, tiah hớ la tiah neh kơñau ală cau tòm hìu nhă bol khai dê, mơ lòi wơl ală nùs nhơm bềng bơta jê sồt dờng ngan.

Ờ di mìng cau ur tòm ngai an tìp tòm hìu jum ngai hớ, oă hìu nhă neh sang lòi dà lơgar tòm nàng lòt lơgar ndai jòi rài kis niam rlau, mơya bơta moat jrùng neh tus mơ ală hìu nhă hớ tòm lơgar hớ dê. Bơta jê sồt dờng ngan bè ală pềs koh poăc să, lòi wơl ală tềl sồt bềng dà mat tòm nùs nhơm cau dê. Gơlơh bè să tờm añ, an sùm kah mơ sề gó muh mat chò hòp kơ-mòn an kờñ gơboh dê. Gơs tú tòm bơta mpau, an gó mat kơ-mòn an dê sền añ, koar añ tòm bơta chò hòp ngan. Ngai mơ bol hi dờp jơnau yal tơnggit kơ-mò neh sang rài, bol hi kơ-no lơh bol hi in rơm să ngan, mơ rngòt rngơt bơh bơta bòl glar tòm rài kis do. Hớ la tú jơ añ sền gó bơta siơu lơ-bơn mơ dềt rhền kon mơnus dê dêđap dunnia klam jơngo, añ jòi jat mơ ơn nùs kơ-lôi tus dê Bơtau Crơng Gơs tòm ală bơta jê sồt moat jrùng do.

Mơ tơnớ, Yàng Tòm Trồ pờ mat añ: bơta jê sồt dờng mò Naomi dê tòm bơta chơ roh ờ di la tiah lồi dut, mơya hớ la tiah mơ bơta dờn sơl geh dờng, kơ nề tòm Yàng Tỏm Trồ. bulah mò Naomi đơs jơnau sràt bơtang bè lơi, Yàng Tòm Trồ sùm lơh broă đah ngkòi. Tòm bơta sền gó kon mơnus dê, mò Naomi rê wơl bal mơ phan jatài đah hwềng dờng ngan: Ruto, kon ùr ban mò dê.

Tòm bơta jê sồt bơh rơh cau hìu nhă, mò Naomi sùm dơn kơnờm mơ sơmbat kơ bơta boh lam Yàng Tòm Trồ dê, tề lam mò Ruto git loh làng bơta boh lam bơh broă tơwài wơl pơnah ù taih sre brê, mò ờ git mò neh tơrbó să tờm mò dê tòm hìu nhă mơ tòm rơndap dờng màng Yàng Tòm Trồ dê. Bơh ồng Obet, kơ-mòn klau mò Naomi dê, jơi bơtian bơtau David neh geh sơntờm – dồ jơi bơtian mơ bơh hớ Kon Yàng Tòm Trồ dê neh mut tòm dunnia tồi glài, gơlik gơs Kon Mơnus wil tơl mơ neh phi bơta kis Kơnràñ dê nàng lơh phan ơn twài glài dunnia in. mò Naomi neh kơnđu Obet tòm nùs mò dê, ròng siam kon dềt do dêgùl ală jơnau jòng rơ: “Jòng ro Yàng Jehôwa, bơh ngai do Kơnràñ ò sang lòi mò bơh neh ai mò in dô nă cau gơp bơtiàn dong tơwài. Dan kòn klau do gơlik tiơng pơnro tòm Israel! Khai rơp lơh pa wơl rài kis mò dê, mơ ròng siam mò tòm tŭ kra.” (‭‭Rutơ‬ ‭4‬:‭14‬)

Bơta lơh nền sang lòi bơta jê sồt, rê wơl mơ Yàng Tòm Trồ – Bơtau sơm bòi mơ lơh pa wơl – do la sơn tờm bơta kis pa dê.

Dan jà bol he dô nùs bal tòm bơta hòi dan: Khoai Yàng Tòm Trồ lơbon niam, kon ừn ngai Yàng tài bơh Yàng ờ lơh jat bè broă tồi glài bol kon dê. Kon ừn ngai Bèp sùm kờn gơboh mơ lơh ală broă niam Yàng dê bulah lah mò Naomi sràt bơtang tian gơs ờ gó tai bơta lơbon niam Yang dê. Dan Yàng Hwềng Goh tơngkah bol kon lah tòm bơta jê sồt mơ roh nùs bol kon dê, Yàng Tòm Trồ sùm ơt ơl mơ lơh sir rơndap niam lơngap lơngai mơ Yàng neh lơh nền lài tus dê rài kis bol kon dê. Yàng la Bơtau neh sơntòm lơh broă niam tòm bol kon, rơp lơh sir jơl tus dê ngai Yàng Jêsus Krist dê (Philip 1:6). Kon jơh nùs hòi dăn, ai sơnđan Yàng Jêsus Krist, Amen.

Ơ ală ồng mọ oh mi kờn gơboh, digơlan gơs oă do bol he moat jrùng bơh broă lơh bol he dê mơ sền gó Yàng Tòm Trồ dồ bă ờ di pal. Gơs ală tú tòm bơta chơt roh mơ jê sồt, bol he sền gó Yàng Tòm Trồ bè ờ lơh bơta lơi, lơh nùs nhơm he sràt bơtang. Mơya, ơ ồng mọ oh mi, bulah bol he gam kis tòm bơta jê sồt, bulah kon mơnus sang lòi, mơya Yàng Tòm Trồ sùm kờn gơboh bol he. Bulah he sang lòi làng bol Yàng dê tài bơh gơkòl jê sồt, Kơnràn sùm lòt bal mơ he. Kơnràn sùm gam lơh broă, cèng rài kis de tus tiah gơlik cồng nha mơ geh lơngai tòm Kơnràn. Bè hớ pal pơndềt să he hơđơm mpàng tê gơnap gơnoar Yàng Tòm Trồ dê, nàng tus dê tú niam, Kơnràn rơp yò tơnggụh bol he (1Pier 5:6). Pal kis gơn kơ-nờm Yàng bulah ờ gơs cau lơi sền gó, pal gơlik gơs brong dà cèng bơta kờn gơboh Yàng dê tus dê ală cau ndai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.