Bol he òs sùm đơs bol he gam kis tom bơta nđàc Yàng, mơ ya oă dơ̆ bol he cơnoà lòt kờp ngai mơ oă ngan ơnòng kơnjơ̆. Bol he kis kung bè jơh ală bơta la kơnòm di bơta pơnđơl pràn he dê. Bol he yal tơnggit he khat gơboh, mơ ya tŭ lơi kung cơnoà lòt tom bơta kơnjơ̆-kơnjùt. Bol he đơs bơh bơta rlô bòl tom bơta lơngai, mơ ya nùs gen ò tŭ lơi rlô bòl.

Bol he tơngkah bal mơ gơp lah yô Yàng dê la nggòc, mơ ya rài kis bol he dê git làm bơta hơ̆ sơl? Mơ bol he cơnoà lòt ngan kờp ngai tom gùng lòt bơta hòn-chò bơta nđàc dê hala ò?

Ngai do, ngai 23/04/2026, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Daphne Delay bơh tơnggume GÙNG LÒT BƠTA NĐÀC DÊ.

“Bol mê tui tĕ yô añ jê mơ bơtê jat añ, bơh añ gơs nùs niam-lơnhơn mơ pơndềt să, gen hwềng soàn bol mê rơp geh rlô bòl” (Mathiơ 11:29-30)

“Ơ jơh ală cau kong bòl glar lơh broă mơ àñ kơnjơ̆, tus tĕ hơ añ; añ rơp ai bol mê in rlô bòl. Bol mê tui tĕ yô añ jê mơ bơtê jat añ, bơh añ gơs nùs niam-lơnhơn mơ pơndềt să, gen hwềng soàn bol mê rơp geh rlô bòl. Bơh yô añ la ƀuơn mơ phan àñ añ jê la nggòc.” (Mathiơ 11:28-30)

Yàng Jesu sùm git mbe rgơi bư tus di bơta jê sồt jrô rlau jơh tom nùs cau dê. Jơnau Yàng sơrlèt rlau mơ tŭ tơngai, lơh bol he in kah rngal digùl ală bơta giga òs mòng tom rài kis do. Krơi ìs ngan, lòt găn ală pah rài, kòn mơnùs gam kư ntoàt sùm mơ ală bơta ndròm bal: bòl glar, roh jơh pràn, mơ gơs tŭ la hwềng nùs rọ-ràñ. Digơlăn tài bơh hơ̆ mơ Sră Goh tơngkah bol he bàñ bòl glar tom broă lơh niam, tài bơh Yàng git, kòn mơnùs ƀươn ngan bòl glar ò git lơh!

Yàng Jesu ò hòi jà bol he prap gar dô gùng duh khoai, mơ la cơnoà mut tom bơta gơtom klac mơ Kơnràñ. Gùng duh khoai ƀươn lơh cau in kơlôi sơnơng tus ală bơta pal lơh tơmtoh, pal prap wil-tơl. Mơ ya bơta gơtom klac gen pha is. Hơ̆ la bơta gơtom klac ngan, la cơnoà lòt bal. Tom tŭ gơs bơta gơtom klac ngan mơ Yàng Tom Trồ, gen bơta bol he dòn ò gam la ơnòng-kơnjơ̆ pal pơnđơl nàng prap gar, mơ ya gơlik gơs tơnggu kòñ kis bol he dê. Ai dilah mìng gơs bơta dòn hơđang sră pơàr, jơnau đơs mơ ò gơs bơta gơtom klac yò đo gen ò gam òbat tai bol he kung rơp lơbơn roh pràn.

Yàng Jesu đơs lah: “Ơ jơh ală cau kong bòl glar lơh broă mơ àñ kơñjơ̆, tus tĕ hơ añ…” Ală bơta sồr lăm, gơn kơnòm mơ gùng duh khoai òs lơh kòn mơnùs in sền gŏ àñ kơnjơ̆. Añ gam đơs ală bơta sồr lăm bơh kòn mơnùs ai mơ lơh kơnjơ̆ ìs he, ò di bơta bơto sồr Jơnau Yàng dê. Tài bơh ală gơnoar broă gùng duh khoai mơ siău bơta nđàc neh lơh cau in roh jơh pràn.

Mơ ya Yàng Jesu đơs lah: “Añ rơp ai bol mê in rlô bòl…tui tĕ yô añ jê mơ bơtê jat añ gen hwềng soàn bol mê rơp geh rlô bòl” Yàng Jesu gơs dô bơta gơtom klac jat be òs, ò rồn-bơklơ̆n gơwèt mơ Yàng Bèp. Bơta gơtom klac hơ̆ ò sơnđìng di gơnoar broă hala sồr lăm. Kơnràñ dòn kơnòm Bèp mơ Bèp kung dòn kơnòm Kơnràñ. Tom Sră Goh, bol he ò tŭ lơi gŏ Yàng Jesu gơpừ dô dơ̆ lơi. Kung be tom suơn Ghetsemane kung ò pơpừ, tom tŭ Kơnràñ jơh nùs rang tơlik bơta jê-sồt, dan Bèp tă mơngàn do dilah rgơi- bol he gam sền gŏ gùng lòt bơta nđàc dê sùm tom tŭ hơ̆.

Mơ sền tĕ, Kơnràñ đơs: “Bơh yô añ jê la ƀươn mơ phan àñ añ jê la nggòc.” niam ngan tom tŭ Kơnràñ ngui jơnau “yô”. Hơ̆ la dô nơm phan àñ di ngkọ phan poan jơng hala dô bơta àñ kơnjơ̆ gơkol kơt. Bulah bol he òs kơlôi yô la àñ kơnjơ̆, Yàng Jesu đơs “yô” Kơnràñ dê ƀươn ngan mơ nggòc. Kơnràñ đơs bơh ală bơta Kơnràñ jao bol he in, gơnoar broă Kơnràñ jao bol he in geh lơh jat tom rài kis he.

Bơta do gơs bơta kơlôi sơnơng ìs, mơ kung lơh jat jơh tơl nă cau in. Jơnau Yàng la mpàn sơnio ai rài kis bol he in, ting hơ̆ gơs ală sơnoa rnoàs mơ gùng tề lăm dong bol he cơnoà lòt kơ̆-nền digùl dunnia do. Digơlăn oh mi kơlôi lah khat gơboh ngan la ò tui yô lơi, mơ ya nền cê gen gơ pơrlơ̆ wơl. Tom tŭ ò gơs bơta tề lăm, ò gơs bơta sơnio lăm, ò gơs bơta gơ tơnggŏ, bol he rơp lòt lềng-lang mut tom kơnhwal sơrbơng roh mơ yar dă. Mơ ya hơđơm yô ƀươn Bơtau Crơng Gơs Trồ Tiah dê, Kơnràñ sền gar jơng bol he klàs bơh bơta gơtup pừ mơ lăm bol he tus hơ tiah bềng dà toh mơ dà kròt.

Rlau mơ ală sơnoa rnoàs đơs bal geh yal tơlik tom Jơnau Kơnràñ dê, kờp nă cau dòn geh jao ală gơnoar broă pha ìs. Yô hơ̆ la ƀươn mơ nggòc. Dilah gơnoar broă oh mi gam àñ sùm lơh oh mi in kơnjơ̆-kơnjùt mơ roh pràn, digơlăn neh tus di tŭ sền wơl bơta hơ̆ ngan la bơta Yàng jao he in hala ò. Pơnyơu tom bơta tơmbau, bau klau mơ bau ur gơs ală bơta jao phi pha is. Bơta geh jao lơh gơs gơnoar broă bau klau in digơlan gơlik gơs la àñ kơnjơ̆ gơwèt mơ bau ur. Tom tŭ bau klau sền nggòc gơnoar broă at-bồ he dê, hala tom tŭ bar nă ò lòt bal tom bơta dòn kơnòm bal mơ gơp, bau ur ƀươn ngan pal đơp wơl pơnah siău. Mơ bơta do mhar ngan gơlik gơs dô àñ kơnjơ̆ mơ Yàng Tom Trồ ò gơs tŭ lơi rơndap behơ̆ cau ur in.
Yô gùng duh khoai dê kung rgơi lơh cau in roh jơh pràn behơ̆. Mìng tŭ lơi gơs bơta gơtom klac ngan mơ Yàng Jesu Krist, song bol he git lam gùng lòt bơta nđàc dê. Tom tŭ bol he dòn duh mơ dòn kơnòm di Kơnràñ, hơ̆ la tŭ bol he pràn kơldang rlau jơh. Kơnràñ đơs: “Bơta nđàc añ jê neh tơl mê in, bơh gơnoar pràn añ jê gơlik wil-tơl tom bơta lơbơn-lơño.” (II Côrinhtô 12:9). Tom tŭ bol he sền gŏ roh jơh pràn hala ală bơta gơlơh kơnjơ̆ ir, hơ̆ la têl sơnio loh lang ai gŏ bol he hala gam lơh jơh ală bơta mơ pràn ìs he dê, hala gam pơnđơl àñ ơnòng dô gơnoar broă mơ Yàng Tom Trồ ò jao he in.

Gen tang, lùp tĕ ìs nùs he: oh mi gơs bol glar mơ àñ kơnjơ̆ sơl? Dilah gơs, cơnoà lòt tĕ mơ Yàng Dong-Klàs Jesu mơ lơh broă bal mơ Kơnràñ. Bơtê tĕ gùng lòt bơta nđàc dê.

Dan jà bol he dô nùs bal tòm bơta hòi dan: Khoai Yàng, oă dơ̆ neh rlau kòn òs pơnđơl nàng lơh wil-tơl gơnoar broă, pơnđơl pràn prap gar dô nơm rùp sơnio niam kòn dê. Mơ ya jrô tom dơlăm nùs, nùs kòn kơnjơ̆-kơnjùt ngan ò git lơh. Kòn pơnđơl àñ ală bơta Kơnràñ ò tŭ lơi jao kòn in, mơ yoam pơrhiat Kơnràñ tài bơh àñ kơnjơ̆ hơ̆. Ơ Yàng, dan toh glài kòn in mơ bơt bơtào wơl kòn. Kòn kòñ bơtê mbe cơnoà lòt bal mơ Kơnràñ, lơh broă bal mơ Kơnràñ mơ dòn kơnòm di pràn Kơnràñ dê. Dan bơto kòn git gơtom klac bal mơ gùng lòt bơta nđàc dê, dô rài kis nggòc-nggơr mơ ring-lơngai tom bơta yò-đo bơta kòñ gơboh Kơnràñ dê. Kòn jơh nùs hoi dan tom sơnđăn Yàng Jesu Krist, Amen.

Ơ jơh ală ồng mò, oh mi kòñ gơboh, yô Yàng dê jao rơp sùm lòt bal mơ bơta nđàc Kơnràñ ai. Kơnràñ ò loì oh mi pal àñ ìs dô nă ală bơta pal lòt gan rlau mơ pràn oh mi dê. Gen tang kơp tŭ oh mi sền gŏ bòl glar mơ àñ kơnjơ̆, tùs tĕ mơ Yàng mơ jao jơh Kơnràñ in. Loì tĕ Kơnràñ dong kơl bol he lòi jơh ală bơta àñ ơnòng kơnjơ̆ ò gơrê mơ he, mơ dòp bơta ring-lơngai ngan bơh Kơnràñ ai. Bơta nđàc Kơnràñ rơp jơm-gòm hơđăng oh mi, nàng oh mi dòp geh pràn pa, cơnoà lòt tom bơta hừh-hơh mơ hòn-chò kờp ngai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.