Gơs ală gùng rơndap gơ mìng ròp sơmtom tòm tŭ bol he dòp rò lik bơh ơnih òs mòng. Rài kis òs gơ ò di la dô nơm nhà dà ring drik, mơya gơ la dô nơm gùng hòr ò dơh mơ jơh ală liăng dờng mơ trồm jrô. Oh mi khin chà nàng sang lòi gơnoăr ăt bồ, cơnđòa mùt tơm dô nơm gùng rơndăp ò di bơh tê he lơh nền? Gơs dơ̆, rài kis bơklơn bol he păl tòm tip mơ ală bơta mơ bol he kờñ dô pleh rlau jơh. Bơh tòm tiah mơ bol he kơlôi lah he mòr gơpừ, gơ la tiah bol he joi ban bơta kis pràn rlau jơh bơh di Yàng Hơđăng Trô.

Ngai do, ngai 24/04/2026, tơnggu Hòi Dan Kòp Ngai dăn jà ông mò oh mi kơlôi sơnơng bal jơnau Yàng kơnòm bơta dong kòl Danni Andrew bơh tơnggu me HƠĐƠM HIÒNG DÀ JRÔ.

“Bañ lơi dà tih hòr pơrdô ăñ, hala dà jrô sa loan añ, hala trồm jrô til wơl bơr gơ hơđăng ăñ.” (Đơs Crih 69: 15)

Tòm tŭ añ găm kơnòm dềt, di gơlăn la prăm năm, mè gơ tơn tùs. lăm añ lòt rê dà. Cau kơnòm gèn kừ sàc dà, kơnhơl mơ dòp rò ală dà be òs. Bàr nă cau bi dờn kơlôi lah rờp chờ hòp ngăn di lah tơn krăm añ tòm dà. Tòm tŭ dà gơ bồr jơh bồ añ, bơta rngòt rngơt dờng gơtơn tùs. Jơl tùs di tŭ ală bi ăñ hồ añ in guh wơl mơ ai wơl nhờm tă, bơta chò hòp bơh dà neh gơlik gơs rngòt rngơt. Bơh hơ̆, tŭ lơi dà gơbồr ndơp bồ añ la añ nrơt nrơl.

Rềp do ăn gơtùp tơl mơ rơndeh, mơ añ pal lòt găn bơta bơtê geh bời jŏ jòng bơh jê sồt di ngkơi, wĕ mơ pơnì. Añ ò dòp rò niam mơ ală gùng sơm bời, gèn tang cau chài dong kờl neh sồr añ thử dông sơm hơđơm dà. Ò wơng la mbe lơi, lơh ală bơta bơtê hơ̆ tòm dà pha is mơ tŭ lơh hơđăng tiah răñ rsơh, mơ să jăn añ sơntòm pràn wơl niam rlau kơnòm bơta bơtê tòm dà.

Gơs dơ̆ añ iat kơno dô bơta bơtô, đơs lah kis mơ Yàng Jesu ndrờm be jùr tòm dô nơm hiòng dà. Tŭ sơnrờp oh mi mìng la lơh tơnsùh jơng dô èt, dà tùs kơndơl jơng, mơ ò rngòt kol dà pơrdô. Tŭ dà tús di gơltang, oh mi gam lơngai. Mơya tŭ cơnđoà tùs ngai rlau tai, dà gơ guh tùs di but, prằn gơđồng dà di sơntòm hwoài oh mi. Mìng tòm tŭ oh mi trăm tòm dà mơ jơh să jăn he, oh mi ngăn rgơi geh khat gơboh wañ lơnggơh.

Tŭ do añ neh pơndùt bơta bơtê dong sơm mơ cơnđòa tùs ơ dŭ bơtê tòm dà. Tòm tŭ bơtê tòm pơnah dà thờl tờm tơnau, gơlơh be ò pha is mơ tŭ bơtê hơđăng tiah rañ rsơh. Bơta jề tòm să jan añ sơntòm gơwơl mơ añ ò rgơi hơwơl dô bă niam gơwèt mơ bơta bơtê tồ dong he. Mơya tŭ añ cơnđòa tùs dà jrô rlau tai, nền cề lah gơs ngui phăn nàng dong kờl nàng gàr să jan he ò gơkrăm, tŭ hơ̆ añ rgơi bơtê dô bă khat gơboh mơ cèng wơl oă bơta kwơ màng să jăn he in.

Mìng tòm tŭ ăñ tĭn krăm să añ tòm ơnih dà jrômơ jơh nùs nhờm mơ đơs lah: “Khai Yàng, dan cèng kòn tùs hơ tiah Kơnràñ kờñ”, ngăn añ geh ring lơngai. Bơh tòm hơđơm dà jrồ hơ̆, bơta dòn añ jê tòm Yàng gơlik gơs pràn kơl dăng rlau jơh mơ tŭ lơi. Tŭ añ tơn krăm să he tòm hiòng dà mơ Yàng Dong Jesu ai, Kơnràñ yờ đơ añ. Kơnràñ la phăn ngui dong bơta kis añ jê. Tòm tŭ añ cơnđoà mùt tòm ponah dà jrô, will tơl la he jao phi rài kis he Kơnràñ in, rài kis añ sơntòm gơs gơtha. Mơ añ ò găm gơ lơh he găm gơkrăm tai.

Añ kh tùs dô nơm bơta yal yau Pier dê:

“Kơnràñ đơs lah: “Tùs tĕ!” Pier lik bơh ơhò lòt hơđang nhà dà tùs hơ Yàng Jêsu. mơya tòm tŭ gŏ càl dơng, gèn rngòt ngăn mòr gơkram tòm dà, gèn hòi dơng lah: “Ơ Yàng dong añ” Yàng Jêsu ăi tê mơ sơmbat di khai mơ đơs lah: “Ơ cau gơs dô ềt bơta dòn, ñchi bơh tai mê pin taih?” (Ma Thiơ 14:29- 31).

Tŭ Piêr gŏ Yàng Jêsu lòt hơđăng nhà dàlềng, ông lik bơh ơhò mơ lòt wèt hơđah mơ Kơnràñ. Mìng tòm tŭ pơlac mat bơh di Kơnràñ gèn tàng ông sơntờm gơ krăm.

Tŭ lơi añ găm tơnggờr sền di Yàng Jêsu, añ ò tŭ lơi rngòt di dà. Tŭ añ pơrlàc mat bơh di Kơnràñ añ sơntòm rngòt. Tòm tŭ tơnkrăm he tòm pơnah dà jrô, añ ơn bơta dòn tò Yang Dng Jêsu mơ lòi Kơnràñ tề lăm tì tiah Kơnràñ kờñ. Mìng la añ găm tơnggơr sền dê Kơnràñ, añ ròp ò tŭ lơi gơ krăm.

Tiah hiòng dà mơ Yàng Dong Jêsu hòi jà oh mi ơn să, oh mi găm ntao tìng lơi? Ngăn la tiah dà mìng tus di kŭ kơndờl jơng? Ngai do, khin chà tĕ cơnđòa ngai rlau tai mơ jrô rlau tai. Lòng tĕ ală cơnđòa jơng hơ̆ ròp cèng oh mi tùs tiah lơi. Băñ loi bơta rngòt krơ̆ jơng he găm ntao di gah hiòng dà, tòm bơta ai lơh blai soh bơh ò hềt ƀừ di Kơnràñ.

Dan jà bol he dô nùs bal tòm bơta hòi dan: Khoai Yàng, kòn dăn ơn Kơnràñ in jơh ală bơta rngòt rngơt mơ ală bơta jê sồt pồn ndơp tòm dơlăm nus kon. Oă dơ̆ kòn neh pơnđơl cơnđòa is tùs di gùl hiòng rài kis, mơ nàng lơh roh bơta pràn mơ gơ kram tòm bơta kơlồi rngòt. Tŭ do, kòn săn lòi gơnoăr at bồ nàng jao phi wil tơl jơh ală bơta tòm mpang tê Kơnràñ dê. Dan ai kòn in bơta dòn khin chà nàng cơnđòa lik bơh ohò mơ cơnđòa mùt tòm pơnah dà jrô bơta nđàc dê. Dăm prăp kŏ mat kòn sùm tơnggờr sền di Kơnràñ, tồ bulah ryà dà gơ lơnggàc oă ngăc, kòn găm joi bàn bơta lơngai m ơpha lin. Digùl dà jrô, dăn Yàng yờ đơ mơ cèng kòn tus taih Kơnràñ kờp kờñ. Bơh mìng tòm Kơnràñ, kòn ngăn geh khăt gơboh ngăn. Kòn jơh nùs hòi dăn tòm sơnđăn Yàng Jêsu Krist, Amen.

Ơ ală ông mò oh mi kơñ gơboh, hiòng dà neh la dô bơta rngòt dờng ngăn añ jê tòm tŭ găm kơnòm dềt, do gơlik gơs la tòn ryas bơta kis mơ la tiah sơm bơi hwềng soàn añ jê. Krơi is ngăn tòm tŭ bol he jao Yàng in gơnoăr ăt bồ, gèn “trồm jrô” ò găm la trồm bồr ndơp, nơ la dàlêng ơnàngò git nđờ bơta lơh pa dê. Di gơlăn la oh mi găm cèng tòm he ală bơta tềl sồt bơta rngòt rngơt dê, ală bơta jề sồt lơh oh mi rngòt cơnđoà tùs. Mơya kah tĕ, Bơtau neh sờmbat tê Piêr dê kùng găm ơm rềp di gah oh mi. Băñ rơngòt dà jrô, rngòt tĕ broă kis dô rài kis rò ràñ, siơ̆u bơt gơs măt Kơnràñ dê. Oh mi rcăng sềr nàng lòi Kơnràñ gơlik gơs la dô nơm phăn ngui dong bơta kis mìng dùl mơ tề lăm oh mi mùt tờm gùng rơndăp ò tŭ lơi lồi tòm ngai do mơ?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.