Gơs ală tŭ tòm rài kis, bol he hòi dan dô nă cau gơp să kong kòp jê, mơya bơta kòp jê hơ̆ ò geh bòi. Hala gơs tŭ bol he kơp gơn dô nơm broă lơh pa mơya ală tŭ lơm pah gơ lơh be gơ til jơh, bơta kalke kư̆ gam kal ke. Tòm ală tŭ hơ̆, bol he òs buơn ngan nàng gơ ruc wơl, pin wil wơl bơta gơnap gơ noar Yang dê. Mơya, bơ ta dòn mìng gam gơs tŭ gơs bơta krơi is gơ lik gơs sơl ơ? Hala bol he gam lòi nùs don nin tòm Yang, bulah ò hềt gŏ bơta dong tă?

Ngai do, ngai 25/04/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Tom Toya bơh tơnggume: NÙS DÒN KƠNÒM YANG.

‘Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền bơta rơndap lài Kơnràñ dê. ‘ (Rôma 8:28)

Nam 1996, añ ơm tòm bòn dềt Colorado, Hoa Kỳ. Añ mù tus do bal mơ cau bơ yô Paul nàng lòt bơtê tòm klờng Sră Goh. Tòm ring àng drim, mat tơngai bềng tơl tòm ơdŭ wă rò nac mơ tòm tŭ sền dê đah bơdìh, añ gŏ ală kòn dềt kơnhơl. Tòm ală bol gơ gơs Fadre, dô kòn ur jơt bar sơ nam, ơm tòm dô nơm hiu tòm bòn añ ơm. Khai ơm mŏ mŏ , jơng gơs pùt mơ bài.

Tŭ añ gŏ oh, tòm nùs añ nisơna gơ chồl bơ trut kòñ tus hòi dan oh in. Añ don nin Yang Tòm Trồ rgơi sơm bòi, mơ ya tòm nùs añ gơs bơta rngòt. Añ rngòt dilah oh ur ò geh sơm bòi gen be lơi taih? Hala añ wờng tìs bơta kơp kòñ Yang dê sơl? Tơnơ̆ mơ dô êt jŏ kơlôi sơ nơng, añ lơh nin lơh jat bơta tề lam Yang Hwềng Goh dê mơ tus nàng hòi dan oh ur in mơ jào phi bơta gơlik gơs Yang in.

Añ mù hơ đơm, lik bơ dìh mơ tus rềp ală kòn dềt. Añ lùp digơlan bol khai kòn lòt bal mơ añ nàng hòi dan Fadre in sơl. Lài mơ tŭ hòi dan, añ đơs mơ bol khai lah Yang Jesu la Bơtau sơm bòi ală cau kòp jê, Yang kòñ gơ boh mơ iat kơno ala jơ nau hòi dan bol he dê. Bol khai chò hòp lòt hòi dan Fadre in. Fadre đơs lah: Ngai or oh gơ jơ kleh jơng, gen bi hòi dan oh in di sơl?

Añ nhim mat, ơn tê hơđang jơng oh dê mơ hòi dan, dan Yang bư dê Fadre mơ sơm bòi oh in jat nus kòñ Yang dê.

Tơnơ, añ lùp oh gơ lơh be lơi. Fadre đơs gam jê. Bol he ò ruc wơl mơya kư chôl bơtrut oh pơnjat don kơnòm Yang mơ hòi dan dô dơ̆ tai. Gen tang, Fadre rgơi nă ntào, tian gơs ntoat. Oh đal git jơng ò jê be lài tai. Bơta chò hòp gơ bêng tơl tòm nus añ mơ ală kòn dềt. Añ ưn ngai Yang tài bơh Yang neh iat kơno jơ nau hòi dan mơ sền gar Fadre.

Bơta git làm hơ̆ tơngkah añ lah kòp nă cau dòn Yang rgơi hòi dan ală cau ndai in. Yang Tòm Trồ gam lơh broă jat gùng dà mơ tŭ jơ Yang dê. Gơs tŭ bơta sơm bòi tus mhar, gơs tŭ bat ngan mơ kung gơs tŭ Yang ngùi ală cau gơ noar sơ nơm dong kòl nàng bol he geh bòi.

Sră Goh cih: ‘Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền bơta rơndap lài Kơnràñ dê. ‘(Rôma 8:28)

Gơs ală tŭ bol he hòi dan mơ geh Yang ho tơn. Mơya kung gơs ală tŭ bol he hòi dan jŏ jòng ngan mơya gơ lơh ò gơs bơta lơi tòm gơl. Tòm ală tŭ jơ hơ̆, nùs nhơm he dê be lơi tiah? Bol he rơp pin wil wơl gơnap gơ noar Yang hala gam pơnjat dòn kơ nòm dê Yang taih?

Jơnau Yang tòm Rôma 8:28 bơto tơngkah lah Yang Tom Trồ gam at bồ, mơ ală bơta gơ lik gơs tòm rài kis, jơh ală bơta kòp jê hala bơta kalke, geh Yang ngùi nàng lơh gơs kwơ ală cau kòñ gơ boh Yang. Bơta sơm bòi digơlan ò tus jat gùng dà he kơp kòñ , mơya bơta hơ̆ ò gơs gơtha la Yang ò lơh broă. Yang gơs dô bơta rơndap tap sèng jòng rlau, jrô ndơp rlau mơ sum ring niam bol he in.

Bơta dòn bol he dê òs geh tôr tiar lòt gan ală bơta gơ lòng. Bơta dòn la dòn dê ală bơta mat ò sền gŏ. Gen tàng, bơta dòn ò dê geh ràng tơlik tŭ bơta krơi is gơ lik gơs mơ ya pal ràng tơlik loh làng rlau bulah bơta krơi is ò gơlik gơs.

Bulah Yang sơm bòi hala ò, gen bol he sac rwah dòn kơ nòm mơ pơnjat cơn đoà lòt mơ Yang. Be cau sàng goh

Augustino neh đơs: “Bơta dòn la dòn dê ală bơta ò hềt gŏ, mơ phan bàn bơta dòn la gŏ ală bơta he dòn.”

Dan jà bol he dô nùs bal tòm bơta hòi dan: Khoai Yang, kòn ưn ngài Yang tài bơh ală bơta jê sồt Yang kong nàng kòn geh sơm bòi. Kòn don Yang la Bơtau sơm bòi, ò dê mìng hơ đang bơta kòp jê đah poac să lơm mơ kung lơh pa wơl ala bơta jê sồt tòm nus. Dan Yang ngùi kòn gơlik gơs cau hòi dan ala, nàng kòn rgơi yò đo mơ hòi dan ală cau lơi gơ tìp bơ ta bòl glarr gùt dar war we kòn dê. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, tŭ đal git lah gơ nap gơ noar Yang gam lơh broă tòm ngai do, kòp nă bol he geh hòi jà jơh nus dòn kơ nòm dê gơ nap gơ noar Yang, dan Yang rang tơlik bơta nđac ring niaam ală cau lơi geh tìp bơta kalke hala kis tòm bơta klam jơ ngo.

Hòi dan gơwèt mơ nus dòn kơ nòm, kung be đal git bơ ta at bồ Yang dê. Bulah Yang ho jơnau jat gùng dà bol he kơp kòñ hala ò, bol hê gam kư̆ dòn nin lah Yang la Bơtau Kòñ gơ boh , song ring mơ ring niam – Bơtau sum git bơta ring niam rlau jơh ală cau kòñ gơ boh dê Yang,

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.