Gơs tŭ lơi oh mi neh ơn jơh nus nàng lơh dô nơm bơta di, mơya kong wơl “tuh dạ lơngăm”bơh bơta lơh iơh cau ndai di hala ò? Gơs tŭ lơi oh mi neh ơn jơh “hwềng nus” di dô nơm broă lơh lơi sơl, gen tàng geh gơs cau ndai nhắ hơ đăng nàng ai jơh phan bàn? Hala moat jrum rlau, oh mi neh kong cau ndai kup kơryan mơ sền ò sơp di đáp mat cau kờn gơboh? Dialh jơnau yal wơl la “gơs”, dăn ban gơ lơh be ơm dô nă, tài bơh Bơtau Dong klas neh lot hơ đăng gùng bol glar hớ.

Ngai do, ngai 27/04/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl dê Brad Henry bơh Tơnggume: BƠTA ƠM MÓ PHA LIN

“Tòm tŭ Kơnràñ kong cau lah sơrpah, gen Kơnràñ ò lah sơrpah wơl; tòm tŭ kong bòl glar jê sồt, gen ò đơs pơhìn, mơya Kơnràñ kư̆ jào phi să tòm Kơnràñ dê Bơtau cahrña dô bă song ring.”(I Pier 2:23)

Kơlôi sơ nơng té di gơnap gơnoar Bơtau Dong Klas Jesu di: ming bơh dô jơnau đơs, hàng rbô cau gơn rơh rơp săng tơlik jơh ală bơta bol glar ji sột. Mơya Yang neh ơm mó. Nchi bơtài? Dialh Yang sac rwah joi bơta song ring is tơm tŭ hớ, gen mpồng dong klas bol he di neh til. Yang Jesu neh dợp dô bơta lơh nền “tơm gơl ò wil tơl” dơng rlau jơh tờm jơh rài: Yang ăn jơh bơta ji sột bol he di, nàng ai bol he in bơta song ring gơ klo la bơta bol he ò di pal nàng dợp geh.

Tơm rài kis, tŭ bol he kis jat be “sa kar lơi tơm wơl kar hớ” gơwet mơ ală cau bơrsèl tơnhial, bol he rgơi geh nàng pha mơ dô bơta tơm dră mơya he rơp tơn roh dô nơm hwềng soàn. Ală cau găm nus sền ò sơp di oh mi bol khai ngan la cau găm lềng làng tơm bơta klăm jơngo-bol khai ò git Yang, mơ ò git he găm lơh bơta lơi.

Oh mi pal dợp git dô bơta dong klas hwềng soàn: tơnggume dơng bol he ơm hơ đăng ù do ò di là prap khà jen pria dờng hala bơt bơtào broă lơh lik gơs cồng nha àng gơcra. Ală bơta hớ mìng là pơnah. Gơnoar sôr dô nă cau geh dong klas di la lik gơs “đèng sol pơn đăng àng” digul càl rơbut dờng.

Dilah oh mi neh lot găn oă bơta tơm tiah oh mi lơh broă, oh mi rơp dợp git cồng nha lik gơs ò di bơh dô mpàng tê kon mơnus. Bơta cồng nha lik gơs là bơh Yang neh ơn tê hơ đăng broă lơh hớ, mơ tú Yang neh ai tê ruc wơl, ală bơta pran he di lik gơs ò kwơ. Ban lời bơta jong să pơrlồm oh mi la “cau gơnoar dơng” ală bơta cồng nha di. Bơh bơta jong să do tian gơs bol he gơ lơh geh nus gơhào gơjran tơm tú kong bol glar. Mơya dilah he git la ală bơta gơtơn tus bơh bơta nđac, bol he tơl bơta pơn dệt să nàng ò càng bơtơl pran tơm dră wơl.

Yang “Kơnràñ kư̆ jào phi să tòm Kơnràñ dê Bơtau cahrña dô bă song ring.”
Hoi dăn te nàng Yang ai bol he in dô bơta dòn dơng tian gơs ò càng sal tê. Kah te la Yang ngùi rài kis bol he di dô bă gơnap gơnoar rlau jơh tú he ò lời bơta jong să lơh bơh iơh jơnau cơng tàng Yang di. Yang Jesu ò di mìng kong di ală cau sò tơm, mơ Yang găm hoi dăn bol khai in. Dunnia geh bìng lìu kon mơnus ò git tus di bơta “rài kis găm sùm sùm”, bol khai kis jat be gơnoar pran mơng os.

Ò di la là dô bơta moat jrum ò ơ, dilah bol he lời bơta jong să lơh kalkle cau ndai in lot joi jơnau song? Đơs tus di lồi dut, di đap mat Yang, jơh tơl nă bol he là tis glai. Oh mi geh dong klas ò di bơh oh mi jak chai rlau hala niam lơhơn rlau, mơ là bơh Yang neh sac oh mi nàng ai bơta nđac. Mìng bơh bơta nđac hớ kung wil tơl rau nàng he sang jơh ală bơta sơ êt sơ êl.

Ngai tơ nớ, tŭ dunnia gut dar oh mi gơ lơh be tơrlah tơrlơm ban bơtơl pran nàng geh pha, hoi dăn té.

Tŭ ală jơnau đơs iơh rơmơh di oh mi-ban tờm dră, hoi dăn té bol khai in.
Tŭ nus is he di kơp kờn bơta song ngan- hoi dăn mơ Yang Hwêng Goh nàng geh bơta lơngai lơngo tơm nus.

Băl mơ tŭ oh mi sền gó dunnia do gơ tơm dră mơ oh mi-sền té di chi pơng.
Ban kơlôi rcăng, Yang Jesu neh git jơh ală bơta pun dơp. Yang la Bơtau rơp bơsong lồi dut. Lời té bơta jong să oh mi di hơ đơm jơng chi pơng di mơ lot tus tơm bơta khat gơboh Yang di.

Dan jà bol he dô nùs bal tòm bơta hòi dan: Khoai Ynag kờn gơboh, kon ưn ngai Yang bơh Yang neh git loh ală bơta moat jrum, ală bơta ò song ring mơ ală dà mat hor ờm kon di tơm broă lơh kung be tơm rài kis. Dăn toh glai kon in bơh gơs dớ kon lời bơta jong să dơng rlau, lời nus srat bơtăng dờng rlau mơ nus kờn gơboh. Tú jơ do, kon dăn ơn jơh ală bơta ăn kơnjớ, ală bơta ò song ring, bal mơ ală bơta kơp kờn geh bơsong di jơng chi pơng dê. Dăn Yang Hwêng Goh ai kon in bơta lơngai lơngo, tồ kon ò tờm dră mơ gơ jat be poac să, mơ pha lin bơh bơta pơn dệt să. Dăn ai kon in sền gó ală hwêng soàn găm ơm tơm bơta roh rùi ngkời di jơnau bơrsèl tơnhial, nàng kon ò gơs nus sơ ệt sơ êl mơ rgơi hoi dăn bol khai in. Dăn rài kis kon di la jơnau jong rơ bơta nđac Yang di, la bơta àng sol pơn đăng bơta àng gơklo lơgar trồ di. Kon jơh nus hoi dăn tơm Sơn Đăn Yang Jesu Krist, A-men.

Ơ ală ồng mò oh mi kờn gơboh, dunnia rgơi tă tơlik cồng nha hala tiang pơnrơ oh mi di, mơya bol khai ò rgơi nàng tă tơlik bơta oh mi là kon Yang Tơm Trồ di. Ban lời ală bơta ò song ring lơh pun dớp gơnoar broă rài kis oh mi di. Tú oh mi sac ơm mó nàng gơs nus kờn gơboh, hớ la tú bơta gơklo Yang di pơn đăng sol . Kah té la, bơta song ring kon mơnus di gơ lơh ò song, mơya bơta cah rnha lơgar trồ di sùm song ring. Dăn bơta lơngai Yang di at bộ tơm nus oh mi, nàng bulah rài kis giga, oh mi kung rgơi nàng nhó bơh git la he gơrê mơ Yang. Dô ngai pa dăn Ynag ai oh mi in geh pha bơh gơnap gơnoar Bơtau neh pha lin mơ dunnia.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.