Digul ală ngai ò bơtoah, rài kis bŏl he pơndròm be rơndeh ntoat găm jòi gùng tom trồ jơngọ bềng tŭ mhwăl. Măt sền gŏ diđap gơlik lu li mơ ală bơta rơndăp lài bŏl he di gơlik ò kwơ. Digul ală rkwet rkwe rài kis di, gen bŏl he khin sơmbat tê at rài kis hala phi sá tòm bơta tề lăm Bơtau Ê Gar hwing soàn he?

Ngai do, ngai 28/04/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Martha Noebel dê bơh Tơnggume GƠKÒL TÒM CÀL RBUT

“Jào phi tĕ jơh ală bơta kơlôi rcang oh mi dê Kơnràñ in, tài bơh Kơnràñ òs sền gàr oh mi sùm.” (I Pier 5:7)

Rơndeh ri wơl hiu tơnơ̆ tŭ lòt còp wăñ klờng bơtê đại học năm hơ̆ găm là dô bơta kah gơhôr sum sum, ò tŭ lơi rọh jơh tòm bồ dơngoh ăñ. Ăñ ò tŭ lơi hŭi gơlơh nrơt nrơl tŭ gùng lòt hơđap mat he nisơna gơlik gơs pha is, pha is bơh tŭ sơnrờp ăñ pa jă jơng tus.

Tŭ lòt còp wăñ klờng neh pơndut rau, mpồl rơndăp neh rơndăp dô nơm rơndeh điện tồ ală cau pa bơtê mut klờng dô bă băl lòt gut dăr bọn dờng. Yăl song, nùs ăñ tŭ hơ̆ kŭng kơp koñ ngăn lòt băl mơ ală bơyô he. Mơya gut dăr ală bơkao pier sơntom duh oă, ăñ đơs òm tòm nùs he păl git kơrhia la niam rlau. Ăñ sac rwah at rơndeh is tòm he di, kơp koñ òm he rơp ntoat dô lik tus gùng dờng lài mơ tŭ pier njơm ndơp gùng lòt.

Mơya, tòmtọh be “kọn mơnùs kơlôi ò pơndròm be Yang kơlôi”. Măt gùng mbur be bŏng be dơngi lơh ăñ ĭn ò gơtui nàng pleh tòm hơđăng gùng dờng. Digul trồ noat rmit mơ rọh jơh bơta pràn, ăñ mìng git lĕ lon at rơndeh ntoat tus hơđap, lĕ lon mơ kơ̆ dơn tòm bơta kơlôi sơnơng.

Tŭ hơ̆, ăñ họi dăn mơ Yang jơh nùs tòm kòp tŭ nhờm tă. Ăñ đơs lah: “Khoai Yang, dăn Kơnrẵn at kơ̆ tê kọn ĭn!” Bơta rngòt rngơt gut dăr tŭ ăñ sền tòm pah gòi bọ hơđap măt, gơlơh ơm is dô nă mơ dềt rhền at bồ hwing soàn. Mơya krơi is lah, bơh digul pah gòi bọ hơ̆, Yang sọl gùng nàng ăñ sền gŏ dô nơm gùng tòm dô nơm hiu ơpah dềt. Măng hơ̆, tòm dơlăm hiu ơpah ram băl mơ piang sa bơkah, ăñ rngoh rngac dòp git bơta nđàc tơngkah tơngkăñ Kơnrẵn di. Yang ò di mìng sền gar bơta kis ăñ, mơya Kơnrẵn găm rcang ăñ ĭn bơta rlô bŏl wil tơl digul càl rbut dờng.

He git sơl, lơh nền klọ săng gơnoăr at bồ nàng don kơnòm Yang kŭng bềng bơta bŏl glăr be broă at rơndeh digul rbut miu piar behơ̆. Mơya dòn bơr Kơnrẵn ò di gơtha la săng ală bơta, mơya la ơn bơta dòn he di Bơtau gơnap gơnoăr rlau mơ he. Bulah he găm tìp bơh ală bơta iơh lơi, lòi tĕ jơnau ho pơgon Kơnrẵn di thoa rơpa nùs he: “ “Jào phi tĕ jơh ală bơta kơlôi rcang oh mi dê Kơnràñ in, tài bơh Kơnràñ òs sền gàr oh mi sùm.” (I Pier 5:7)

Bar ngai tơnơ̆, tŭ ală bơta àng sọl pơnđăng ram sơntom lơh rọh piar dờng, ăñ sền bơh mpồng dềt hiu ơpah mơ gŏ ală rơndeh neh sơntom ntoat wơl rau. Tŭ hơ̆, ăñ git lah Yang neh lơh gọh gùng dà nàng ăñ ri hiu rĭng lơngai. Ăñ săng piar hơđăng rơndeh, chò nùs tồ sơntom gùng ri hiu pe jơ ri gùng tòm bơta rĭng lơngai wil tơl.

Dan jà bol he dô nùs bal tòm bơta hòi dan: Khoai Bèp koñ gơboh, kon ưnngai Kơnrẵn tài bơh digul ală càl rbut rài kis, Kơnrẵn găm òs la tia king crŭ rĭng lơngai rlau jơh. Dăn tọh glài tòm ală tŭ kọn kơnòm pràn is gen hŭi hwơr mpang tê gơnap gơnoăr Bèp di. Jơ do, kon dăn jào ơn ală bơta kơlôi rcang, ală ơnòng njơ̆-njŭt găm lơh njơ̆ pơnì kon mơ ọh mi kọn tòm tê Kơnrẵn. Kơp koñ bơta lơngap lơngai mơ bơta nđàc tề lăm krơi is Kơnrẵn di bềng tơl hơđăng kòp cơnđòa kọn lòt. Kọn jơh nùs họi dăn. Kọn ai sơnđăn Yang Jesu Krist, Amen

Ơ ală ồng mọ ọh mi koñ gơboh, bulah ngai do he găm ơm dô nơm rơndeh par ngài bơh bọn lơgar, găm kơp gơn diđap mpồng reh, hala mìng mìng buơn lơbơn bơh ală bơta kơlôi rcang phăn ngùi sa sọh, priă phê…dăn kah lah: ală bơta kơlôi sơnơng he rơp geh sền gar rĭng lơngai, tŭ he phi jào ală bơta tòm mpang tê koñ gơboh Bèp Hơđăng Trồ. Băñ lòi nùs henjơ̆-njŭt rlau tai. Dô nùs băl tĕ băl mơ cau gơnoăr bơtọ Pier jào phi jơh Kơnrẵn ĭn, tài bơh Yang bŏl he là Bơtau Dòn sŏng sum.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.