Niam să ồng mọ, oh mi koñ gơboh, ngai rlô ồng mọ, oh mi tòm ngai do bè gơ lơh taih? Mờng ờs tòm ala ngai do, bol he rơp lòt dê tiah do tiah ne nàng jòi bơta rlô. Mơya gơs dồ bơta gơ pơr lơ̆ wơl là tŭ rê bol he gơs bơta bol glăr rlau! Bơh bol he cèng oă phăn cèng là bơta kơlôi rcăng. Tòm bơta dòn kung bè hơ̆ sơl, oă cau tòm bol he găm añ ờ nòng hơđăng bơ nì “ phăn añ broă niam” kơn jơ̆, kơlôi lah bol he păl lơh oă broă niam sồng di păl mờ lơgar đăng trồ. Ngai do, bol he dồ nùs băl dòp dồ nơm vé kwơ màng tus dê tiah “ rlô bòl” kwơ màng ngăn. Hơ̆ là dồ nơm phăn păl càng bol he cèng lòt băl ngăn hơ̆ là nùs gơn kơ nờm. Jơh nùs wă rọ bol he tus hơ đăng bồt bơlào Bơta Dòn.

Ngai do, ngai 30/04/2026, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Missey Butler bơh tơnggume BƠTA RLÔ HƠĐĂNG BỒT BỜ LÀO BƠTA NĐÀC

“Oh mi geh dong klàs kơnòm di bơta nđàc mơ bơh bơta dòn, bơta hơ̆ ò di bơh oh mi ò, mơya la bơta ai gòi Yàng Tom Trồ dê; kung ò di bơh broă lơh ò, tồ ò gơs cau lơi jòng să.” (‭‭Ephesô‬ ‭2‬:‭8‬-‭9‬ ‭)

Tŭ tơngai rlô hòn chò rlau jơh mờ añ gơs hơ̆ là ala ngai añ lòt să tòm añ in. Đơs ngăn, añ ò wă bè lơi là bơta rlô, bơta pa, tian tus dê tŭ añ cơnđoà lòt tòm gùng dà kwơ màng do.

Bơta lơh bơta lòt hơ̆ gơlik gơs kwơ màng hơ̆ là bơh dồ nơm bồt bơlào sơnđăn là Bơta Nđàc. Gen ngăn bol he kung neh geh kơno sơl? Hơ̆ là dồ bă tiah krơi is, gơlik klàs bơh ala bơta gồr gàch. Cau ơm mrêp mờ bồt bơlào hơ̆ là dồ nơm bòn dờng sơnđăn là “ Păl Lơh Ngăn”. Gen ngăn bol he kung neh tus tềng hơ̆ sơl. Să tòm añ kung ò găm gơs bơta koñ gơboh mờ bơta gồr gàch mờ kis mhăr dê tiah hơ̆ tai. Kòp tŭ rê wơl tiah hơ̆, añ sền gŏ añ ò gơs dồ êt lơi bơta pràn.

Dê mờ tŭ cơnđoà tus bồt bơlào Bơta Nđàc, añ neh tìp dồ nă cau lăm niam lơ hơn ngăn- sơnđăn là Jê-hô-wa. Là cau chong sơñio gùng nàng añ ò lòt hŭi.

Tơnơ̆, añ lòt dê gùng mrêp dà lềng, lời ala ryà dà lềng khồm, mờ tup dê blàng jơng añ lòt. Añ lùp is: Ñchi bơh tài añ lòi dê să tòm gơs bơta gê ga ngăn mờ ala broă lơh niam bè hơ̆ tiah? Tòm ala bă tiah kòp hơđang gùng rài kis, añ neh lời hŭi jơnau Sră Goh là cơng tàng neh geh bơ srăm tŭ sơn rờp dòn dòp Yàng: “Oh mi geh dong klàs kơnòm di bơta nđàc mơ bơh bơta dòn, bơta hơ̆ ò di bơh oh mi ò, mơya la bơta ai gòi Yàng Tom Trồ dê; kung ò di bơh broă lơh ò, tồ ò gơs cau lơi jòng să.” (‭‭Ephesô‬ ‭2‬:‭8‬-‭9‬)

Añ nhŏ in să tòm bơh bơta dòn lah: să tòm păl pơndơl sồng “di pal” mờ lơgăr trồ. Gơ drờm bè dồ bơta yăl bơh dồ nă cau chài lơh wơl che dà găm kơnòm bềng bơta gơbài tòm broă lơh tus còp dê lơ yang dà Niagara dờng ne. Cau kôñ hơ̆ sền dồ bă nền cê lơ yang dà gen khin cha đơs: “Añ kơlôi lah să tòm añ rơp chài lơh wơl tiah do?” Gen ngăn là dồ bơta kơlôi pơn nhừ să, mờ ngăn bơta nđàc Kơnràñ dê ò păl chàng gơs tai.

Añ tơn dut bơta kơlôi, lì dồ nơm bềl hơđang bràs mờ sền dê mat tơngai mut băl mờ ala màu gơ glòm jơh trồ. Bơta sền gŏ hơ̆ bal mờ ryà dà lềng lơh añ in gơs bơta rngoh rngac ngăn. Tòm hwềng soàn, añ kơno dồ jơnau đơs cau cih sră dê Thomas Merton mờ tŭ hơ̆ añ êt tai lời hŭi: “Cau dòn Yàng ò di là cau lơh oă broă niam, hơ̆ ngăn là cau git dòp git bơta niam Yàng Tòm Trồ dê.”

Gen dê tŭ hơ mơ, añ sền gŏ bơta gơ rơng gô tòm hwềng nùs dờng ngăn. Bơta gơ tơr lah hơ̆ là “ dồ nơm gai lòs” bơta jòng, pơn nhừ is să he! Gen ò jŏ, añ sền gŏ să tòm nggui tơn hơđang blàng bràs bơcah. Gen broă do neh gơlik gơs bè lơi? Añ gơs bơta wi wơ di gùl bơta tơlah tơling mờ bơta hòn chò ò rgơi đơs.

Ni sơ na, añ kơno dê jơnau đơs Kơnràñ. Tơng gơr măt, añ sền gŏ blàng tê dờng Kơnràñ tơmù nàng hwài añ lik bơh blàng bràs bơcah. Kơnràñ đơs: “Tus do, găm oă ngăn phăn gŏ niam hàng mờ bol he ò hềt sền gŏ.”

Trồ mang tŭ Kơnràñ đơng đèn lồng. Añ, bè dồ nă kòn dê, jat bơ nơ̆ Kơnràñ. Gen ngăn gơs dồ bơta lơh añ in lah añ păl dòn kơnờm dê Cau tề lăm do. Tơnơ̆ jơh tơl bơta, Kơnràñ rgơi đơs “ Jơnau đơs bồt bơlào Bơta Nđàc”. Broă añ dê mìng là păl bơ srăm wă jơnau đơs hơ̆ mờ cơnđoà jat tềl jơng Kơnràñ hơđang blàng bràs.

Tŭ cơnđoà hơđap lài añ, Kơnràñ sền rmê dê añ. Mŭ mat bềng bơta tơngai đằl Kơnràñ dê neh nhŏ lơhơn ngăn. Añ sền gŏ añ ò di bè dồ nă cau nach crih lòt hŭi gùng dê tiah do. Kơnràñ lòt mờ añ kơno jơnau đơs gơ prong Kơnràñ dê tòm càl dà lềng dồ bă niam hàng: “Jơnau Yàng la ồs đèng jơng añ in, La bơta àng gùng dà añ jê,” (Đơs Crih‬ ‭119‬:‭105)

Gen dê phuk hơ̆, añ git lah să tòm añ rơp gơlik gơs “ làng bol tòm” dê tòm tiah Bơta Nđàc niam hàng do. Gen di gơlan gơs dồ ngai, añ rơp lơh “ cau dong kòl cau lăm gùng” Kơnràñ in.

Dan jà bol he dô nùs bal tòm bơta hòi dan: Khoai Bèp niam lơhơn, kòn ưn ngài Kơnràñ bơh bơta khat gơboh kwơ màng mờ Kơnràñ pà ai kòn in tòm ngai. Ơ Yàng, dăn dong kòn săng sơ bì jơh bơta kơn jơ̆, bơta bol glăr tòm tŭ kòn kư̆ pơnđơl nàng gơlik gơs di pal. Tŭ do, kòn dăn geh dòp vé bơta dòn nàng cơnđoà tòm bơta rlô ngăn tòm bơta nđàc Kơnràñ dê. Dăn tề lăm kòn, sòl pơl đàng tòm gùng kòn bơh Jơnau Yàng, mờ dong kòn git jơh nùs gơn kơnờm tòm blàng tê niam lơhơn Kơnràñ dê. Dăn bơta ring lơngai Yàng dê at bồ hwềng nùs kòn bơh do tus sùm sùm. Kòn jơh nùs hòi dăn tòm sơnđăn Yàng Jê-su Krist, A-men.

Ơ ồng mọ, oh mi koñ gơboh, ngai do tơng kah bol he in git bơta khat gơboh là phăn bàn kwơ màng. Mờ tòm gùng dà bơta dòn kung bè hơ̆ sơl, bơta khat gơboh ò tus bơh bơta he pơnđơl lơh wơl rài kis he geh wil tơl. Bơta khat gơboh ngăn tus là tŭ săng sơbì jơh ala bơta kơn jơ̆ nàng at blàng tê Cau Tề Lăm Dờng Màng-Bơtau Dong Klàs bol he dê. Tŭ bol he ò jòi lơgar đăng trồ bơh broă lơh niam tai, hơ̆ kung là tŭ bol he geh lik klàs nàng cơnđoà mut tòm tiah geh rlô ngăn. Hwềng soàn bol he ò găm tai bơta kơlôi rcăng “Bol he neh lơh tơl sơl?”, mờ ya geh lơngai tòm bơta koñ gơboh wil tơl Kơnràñ dê. Kơp koñ tòm ngai kwơ màng do, bol he kung jòi bàn bơta khat gơboh mờ ring lơngai digah bơta nđàc dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.