Oh mi neh gơs tŭ lơi ơm wơl nàng sền swì wơl gùng lòt he dê mơ Yàng hala ò? Lah oh mi găm ngăn cơn đòa lòt jat Kơnràñ hala ming lòt sền Kơnràñ. Hala gơs tŭ lơi bol he lòt hiu jum, đơs chờ goh, iat bơta bơto, mơya tòm tŭ ntao diđap bơta cal rbut ơm bơta pơrdac piang sa ôi ao dê, ală bơta lề làc tòm bơta gơtơmklac, hala bơta ơm is gơrwang gut dar, bol he đăl git lah he găm ơm bơh Yàng ngai ngai. Bơta jê sồt dơng rlau jơh cau git Yàng dê la bơta rhung rhăng tòm tŭ đăl git he ming la dô nă “cau sền” ntao sền lơgar Kơnràñ bơh ngai ò di là lòt jat Kơnràñ.

Ngai do, ngai 01/05/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng kơnòm dê bơta dong kơl Martha Noebel dê bơh tơnggumê LÒT SỀN HALA LÒT JAT?

“Ngan behơ̆, añ sền jơh ală bơta kung be bơta roh lơm, bơh bơta dòp git Yàng Jesu Krist, Yàng añ jê, la dờng màng rlau jơh;” (Phi líp 3:8)

Gơlơh be bulah Yàng Jesus lòt tus tiah lơi, mpôl oă cau kư lòt tus ting hơ̆ – bơh bòn dơng tus bòn dềt, bơh mơnơm tus ală bòn hala hiu jum. Digơlăn, oă cau tòm bol khai lòt jat Kơnràñ ming năng sền mơ mat ală bơta krơi mơ bơta sơmbơi. Kung gơs cau kòñ iat bơh bơta bơto pa. Dô êt ndai gen gơlơh gơboh diđap bơta jak chai Kơnràñ dê bơh Boh lăm mơ ală jơnau hwơr.

Mơya , digul tơlăk tơman cau lòt jat Kơnràñ kơp ngai, ming gơs dô it cau hơ nên ngăn “lòt bal” mơ Yàng Jesus. Ming dô it nă cau bơtê lơh nên săng rai kis yau, lik ngai bơh hiu nhă, gơp bơyô, lơi broă hiu nhă mơ broă lơh năng phi să he bơh cau ndai. Lôi dut, ming dô mpôl dềt ală cau be ơs chò nùs don duh jơh ală bơta he gơs, bơh bơta gơn kơnơm tòm rai tơnơ̆ găm sùm sùm.

Ngai do, oh mi mơ añ kung pal ai dô bơta sac rwah. Bol he rgơi “lòt sền” Yàng hala “lòt jat” Kơnràñ. Bol he rgơi sac ntao bơh ngai sền lăng be la dô nă cau sền lơh hàc, hala sac ơm digah Kơnrañ, tơl rềp nàng dơp git bơta bơ dê tê, iat bơta tă nhơm mơ sền gŏ bơta nđac tòm gar mat Kơnràñ. Bol he rgơi ơm ting hơ̆ tòm tŭ Kơnrañ hôi dăn mơ Bèp, mơ kung tòm tŭ Kơnrañ ntao diđap bơta ơñiai dunnia dê. Bol he rgơi git Kơnrañ dô bă dềt mêr: be dô nă cau Bơyô, dô nă cau Bi mơ la Bơtau Dong Tơwai he dê.

Tŭ lơh nên lòt bal mơ Yàng Dong Jesus, bol he ò găm ntao sền dô bă ò git lơh lòt tai. Bol he ming ơm tòm Kơnrañ mơ Kơnrañ ơm tòm bol he. Ală bơta lơi Kơnrañ lơh gơring tus bol he, mơ ală bơta lơi bol he lơh kung bơ tus Kơnrañ. Rgơi đơs, bol he găm ceng bal dô yô mơ Kơnrañ. Ò găm ngai hala cah is tai, tai bơh bol he găm kis bal. Bol he mơ Kơnrañ la dùl tòm Bèp.

Sùm gơs dô nơm khà păl tơm tơm tŭ cơnđòa lòt jat Bơtau Krist, mơya kung sùm gơs ală bơta lơngai lòt bal. Bol he ơs sền lăng tòm ală bơta he păl tơmgơl tồ gơlik gơs Cau Dòn Krist mơ hŭi ală bơta nđac he dơp geh. Bol he ơs ming wet tus tòm ală bơta kalkê, ală bơta gơlik gơs, ală bơta tơm lơh mơ ală bơta kơlôi rcăng. Ala ting hơ̆, bol he cang wet tus tòm ală bơta he geh ai pà.

Lai ngăn, bol he gơs geh bơta kis sùm sùm, dô rai tơnơ̆ sùm sùm tơnơ̆ mơ ală sơnăm kơnhai liah hơđăng ù. Pơnjat, nùs nđàc sơngit mơ bơta toh glài Yàng dê sùm là bơta gar nên bol he in, bulah ngai do gơlik gơs bơta lơi. Ò di ming behơ̆, Kơnrañ kung rcăng sir dô bơta rơndăp nima mơ wil tơl ai is rai kis ông mò oh mi in, mơ kung sum gơs mat digah oh mi tòm kơp ală bơta tơmlơh hala bơta gơlong kălkê. Bol he rgơi ơm iang bơh gơnoăr at bồ Yàng dê jrơm gom jơh ală bơta, ò gơs dô bơta lơi gơlik gơs gơ ơm đah bơdih bơta at bồ mơ git lam Kơnrañ dê. Rlau mơ hơ̆, Kơnrañ kung ai bol he in gơnap gơnoăr hơđăng jong, bơh bơta pràn, gơnoăr pràn jơl tus dê gơnap gơnoăr să tòm Kơnrañ dê. Nàng gen lôi dut, bơta sền gar Yàng dê rơp prăp gar bol he diđap ală cau sò tơm, prăp jơng bol he in sùm ntao kơ̆.

Bol he păl cang bơta lơi tai nàng đăl git lah: tòm tŭ duh broă Yàng, ală bơta bol he dơp geh dơng rlau bar dơ̆ gơwet mơ ală bơta bol he roh?

Gar măt bol he păl geh ơn nền cê tòm ală bơta he găm geh tòm Yang mơ ală bơta găm ơm gơn hơ đap. Be cau gơ noăr Pol tòm sră pơ yoa cau dòn tòm Phi-lip, bol he păl sền ală bơta là ò kwơ, ò di là siơ̆u dơng “bơh bơta dơp git Bơtau Krist Jêsus, Yang añ, la dơng mang rlau jơh.” Jơh ală bơta bol he săng lơi tŭ do rơp geh ai wơl rbô dơ̆ tòm lơgar trồ. Kơr bơta nđàc Yang Tom Trồ sùm sơ kềng hơ đah bol he bơh bơta kòñ gơ boh ò cang bơta lơi Kơnrañ dê. Bol he ò tŭ lơi alah, mơ Kơnrañ kung ò tŭ lơi lơi bol he pal kong iơh.

Dan jà bol he dô nùs bal tòm bơta hòi dan: Khoai Yang kòñ gơ boh, kòn ơn jơnau ưnngai bơh Kơnrañ neh dong kòn mơ hôi jà kòn mut tòm bơta gơtơmklac dềt mêr mơ Kơnrañ. Dan toh glai kòn in dilah bơh lai, kòn tus mơ Kơnrañ be la cau tus sền gợi mơ ò ngăn là lòt bal. Ơ Yang, digul ală bơta lơgah lơgañ mơ kơlôi rcăng rai kis dê, dan dong kòn sền gŏ bơta gơs mat Kơnrañ digah kòn. Dăn dong kòn bañ sền tòm ală bơta he roh, mơ sền tòm bơta passơm liu lac tòm bơta nđàc Kơnrañ. Dăn dong kòn don song mơ kơ̆ nus lòt jat Kơnrañ. Kòn jơh nus hôi dăn tòm sơn đăn Yang Jesus Krist, Amen.

Ơ ală ồng mò oh mi kòñ gơboh, bañ lơi he sùm dô nă cau nac críh ntao digah bơta nđàc. Kơnrañ găm ntao ting hơ̆, gơn oh mi ơn tê he tòm tê Kơnrañ, nang bal mơ Kơnrañ cơn đòa lòt găn dê ală sơ diang klăm jơ ngo cik bal mơ ală bơta tơngguh gơ klŏ. Di gơ lăn ngai do oh mi gam rngot bơh ală bơta he pal săng lơi, mơ ya kah tĕ lah, ming tòm tŭ khin săn lơi ală bơta ò kwơ dunnia dê, mpang tê bol he dê rơi tơl nàng dơp lêng ală phan kas mang lơ gar trồ dê. Bañ pin wil wơl tai bơh kơp jơ phuk bol he kis ngai bơh Kơnrañ la dô jơ phuk bol he lơh roh gơtha ngăn rai kis dê. Đơs tĕ mơ Yang tŭ do lah: “Ơ Yang, kòn ò kòñ ming lòt nang sền Kơnrañ. Kòn ngăn kòñ lòt jat Kơnrañ, kòñ geh lòt bal mơ Kơnrañ bơh dô jơl tus sum sum.”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.