Jơh ală bơta geh bơt mòn sơntòm bơh mơnàng. Dô nơm hiu bulah hang mơnĕ mbe lơi, mơ ya dilah bơt hơđang mơnàng ù lơbơn gen kung ƀươn rlơm tom tŭ tìp cal rbùt. Kung behơ̆ sơl, Hiu Jum Goh rgơi têh dờng tom oă pơnah, mơ ya dilah mơnàng lơggơh-lơngơr gen ngan la ò kwơ. Pơrlơ̆ wơl, dilah Hiu Jum Goh geh bơt hơđang mơnàng kơ̆-cê la să tòm Yàng Jesu, gen bulah gơlòng bòl glar dờng mbe lơi, Hiu Jum Goh kung kư kơ̆-cê mơ pơnjat pơnđang sòl Yàng in.

Ngai do, ngai 02/05/2026 Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Aaron Little bơh tơnggume MƠNÀNG KƠ̆-CÊ HIU JUM GOH DÊ.

“Kơnràñ kung la bồ să-jan dê, hơ̆ la Hiu Jum Goh. Kơnràñ la tòm-ryàs, la cau sơnròp kis wơl bơh bơta chơt, tô tom jơh ală bơta Kơnràñ la bồ.” (Kôlôse 1:18)

Añ neh tom klac bal mơ Hiu Jum Goh rlau mơ 45 năm bơh di ngài dòn Yàng. Tom gùng lòt hơ̆, añ neh sền gŏ oă bơta tom pơrgơl. Añ geh têh dờng bal mơ ală ryà ală sèng đơs chò òs mong pah rai 80-90 dê, mơ sền gŏ bơta ntoat tơngguh pràn kơldang ală mpồl lềp kơñi cau dòn Yàng tŭ do. Mơ tom ală năm rềp ngan do, Hiu Jum Goh gơs bơta kơlôi sơnơng jat gùng ngui ală gùng ‘xã hội’ mơ ală bơta rgơi yal tơnggit jak chài (truyền thông kỹ thuật số) kung be dô pơnah ò tŭ lơi rgơi siău.

Hiu nhă añ neh tom klac mơ duh khoai Yàng tom dô Hiu Jum Goh gơs khà cau dòn mơ bơta rơndap ò di dềt, ò di dờng, tiah mơ ală bơta pal cang đah hwềng bol he dê geh ai tơl. Ting hơ̆ gơs bơta duh khoai pràn ngan, bơta bơto sồr tơmtoh mơ Sră Goh, mơ oă tŭ lơmpah nàng duh broă. Tơnơ̆ mơ dô tŭ tơngai, bol he lơh nền lòt tus hơ dô Hiu Jum Goh pa geh bơtao gơs mơ gơs bơta gơtom klac rlau. Tiah hơ̆, ală cau at-bồ ngac-ngar ngan, Hiu Jum Goh dềt do sơlo ngai sơlo ntoat tơngguh. Ală cau lơi tus còp kung rgơi đal git bơta pha ìs. Bơta lơh gơs bơta pha is digơlăn gơ ơm tom bơta chò-hòp wă rò nàc mơ gơtom klac đềt mêr ală cau dòn dê. Añ dòn lah Yàng gam lơh ală bơta pa sùm hơđang Hiu Jum Goh, mơ geh pơnah tom broă lơh hơ̆ la dô bơta hòn-chò dơng. Mơ ya gơs dô bơta nisơna neh gơlik gơs.

Bol he geh jà tus tom dô bơta tơm tìp mat krơi is, mìng tom 15 phuk, bol he geh yal tơlik lah cau gơnoar bơto sền gar tiah ntê neh gơkòl lòi gơnoar broă dô bă nisơna. Ò pal cang đơs nê̆-nên, mơ ya bơta hơ̆ lơh añ ai lơh nrơt-nrơl ngan. Ală bơta gơtom klac òs mòng nisơna ò gam tài be lài, mơ bơta ring-lơngai mơ añ neh gơs gơlơh bè neh tơrlah jơh. Dô bơta roh gơchoh dơng rlau mơ ală bơta añ kơlôi sơnơng.

Mơ ya, tom ală ngai tơnơ̆ hơ̆, dô bơta crih-crài neh sơntòm gơlik gơs. Gơs ală bơta gơtom klac be òs mìng ơm bơdơh wơl tom bơta đơs tơmbơh be òs digùl añ mơ ală oh mi tom Hiu Jum Goh mơ do gơlik gơs jrô rlau. Bol he tom pà ală bơta moat-jrùng mơ pơndòm-pơniàng bal mơ gơp cơnoà pơnjat. Gơs ală cau bơh lài mìng git đah bơdih mơ tŭ do neh gơlik gơs ală cau bơyô ngan. Lai or, bol he òs đơs bơh bơta dô bă bal tom Hiu Jum Goh kung be dô bơta kơlôi sơnơng, mơ ya tŭ do bol he pa git lam ngan bơta hơ̆ jat gùng mơ ò gơs cau lơi kơlôi tus.

Kơnòm di ală bơta gơlik gơs mơ sèng Sră Goh tom Kôlôse 1:18 gơs bơta kis pràn rlau jơh gơwèt mơ añ: “Kơnràñ kung la bồ să jan dê, hơ̆ la bồ Hìu Jum Goh. Kơnràñ la tòm ryas, la cau sơnròp kis wơl bơh bơta chơt, tồ tòm jơh ală bơta Kơnràñ la bồ”.

Cau gơnoar bơto dơng ồng Pol cih bơta do Hiu Jum Goh Kôlôse in tom tŭ ồng ò gơs mat ting hơ̆. Hiu Jum Goh tŭ do gam ntào di đap ală bơta bơto sồr tìs nrah ală cau bơto ma blac, lơh gơhùc gơnoar broă mơ sơbàn mìng dùl lơm Yàng Jesu dê. Cau gơnoar bơto dơng ồng Pol neh lơh nền lah Yàng Jesu cau ơm digùl jơh ală bơta, bơta crơng gơs dê, bơta dong klàs dê, Hiu Jum Goh mơ rài kis kờp nă cau dòn. Tài bơh Yàng Jesu la bồ Hiu Jum Goh dê, gen tang Kơnràñ rgơi sền gar Hiu Jum Goh sơrlèt rlau ală tŭ tơngai kalkê rlau jơh.

Gơs tŭ, Yàng Tom Trồ ai gơnoar ală bơta sơlồng-sơlàng gơlik gơs nàng lơh Hiu Jum Goh geh sàng-goh. Tom tŭ dô bơta rơndap hala dô nơm broă gơkòl tơrlah-tơrlơm, tom tŭ ală cau at-bồ hala cau lơh broă gơpừ tom bơta dòn, bơta gam wơl la ñchi taih? La bơta rùc wơl hala bơta sơlo ntoat tom bơta dòn?

La kờp pơnah tom să jan Bơtau Krist, kờp nă bol he pal cang prap gar nùs nhơm he dòn-sŏng tom tŭ ntào digùl ală bơta gơlòng hala bơta lơi sò-dră di Hiu Jum Goh. Sră pơyoa Hebrơ tơngkah: “…bơh bol he dòp geh dô nơm lơgar ò tŭ lơi lơnggơr, gen pal kah bơta nđàc, mơ ai nùs ki ngàm duh rngòt nàng duh broă Yàng Tom Trồ dô bă niam nùs Kơnràñ” (Hebrơ 12:28)

Sră pơyoa Hebrơ tơngkah bol he pal cang gơs bar nùs nhơm.

Sơnròp, “git ưnngai tĕ”. Git ưnngai bơh bol he gơrê mơ lơgar gam sùm sùm, ò gơs bơta lơi rgơi tơnroh.

Dơ̆ bar, pal “ai tĕ nùs duh rngòt mơ duh broă Yàng Tom Trồ dô bă niam nùs Kơnràñ”, gơtha la duh broă Yàng ò di bơh bơta jòng să ìs hala nàng rang tơlik să tòm, mơ nàng lơh niam nùs Kơnràñ. Ò git nđò nă cau dòn neh rùc wơl tom bơta duh broă tom tŭ tìp ală bơta dơñọ̆-tơnhiàl, tom-sò hala gơlòng bòl glar, digơlan tài bơh oă tŭ bol he òhềt “ai nùs duh rngòt” mơ duh broă Yàng, hala nùs nhơm bol he dê ò di nàng lơh “niam nùs Kơnràñ”.

Jơnau song do pơndòm-pơniàng bol he ò di mìng tom ală tŭ tơngai kalkê Hiu Jum Goh dê, mơ kung ai ală cau lơi gam ntào di đap ală bơta gơlòng bòl glar rài kis dê. Tom tŭ oh mi lề-làc, moat-jrùng, hala sền gŏ he ò git gùng lơi, kah tĕ Yàng Jesu Krist, Bơtau sơnròp ală phan, gam kư gơs mat mơ at-bồ. Kơnràñ la pơnai lŭ kơ̆-cê Hiu Jum Goh in lòt gan kờp pah rài mơ kờp nă bol he.

Dan jà bol he dô nùs bal tòm bơta hòi dan: Khoai Yàng Jesu la mơnàng kơ-cê Hiu Jum Goh dê mơ rài kis kòn dê. Digùl ală bơta gùt dar sơlồng-sơlàng, dan tơngkah kòn kah lah kòn gơrê mơ lơgar ò gơkòl lơngơh-lơngơr. Gen tang, dan Yàng dong kòn ò rngòt mơ ya lơh nền duh broă Kơnràñ dô bă khin cha. Dan ngui rài kis kòn la gùng ceng wơl bơta dô bă bal mơ bơt bơtào să jan Kơnràñ dê.
Kòn jơh nùs hoi dan tom sơnđan Yàng Jesu Krist, Amen.

Ơ jơh ală ông mò, oh mi koñ gơboh, tom tŭ Hiu Jum Goh ơm tom bơta gơlòng bòl glar, Yàng sùm la bồ. Tom tŭ kòn mơnùs tơm pơrgơl, tom tŭ cau at-bồ gơpừ, mơ ya Yàng ò tŭ lơi tơm pơrgơl. Mơ tŭ să tòm oh mi gŏ he ò git lòt đah lơi, Kơnràñ gam at-bồ jơh ală bơta. Tài bơh Yàng Jesu la bồ, gen tang bol he kơ̆-nùs lah ò gơs bơta lơi sơrlèt rlau mơ bơta at-bồ Kơnràñ dê. Gen tang, pơnjat kis tĕ dòn-sŏng, prap gar nùs git ưnngai nàng duh broă Yàng dô bă niam nùs kòñ Kơnràñ. Tài bơh git lah digùl ală bơta gơlik gơs nisơna Hiu Jum Goh dê hala tom rài kis oh mi dê, Yàng gam tề lăm bol he mơ ngui bơta gơlik gơs nisơna hơ̆ nàng lơh bơta dòn bol he in gơlik têh dơng mơ kơ-cê rlau kờp ngai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.