Tòm gung lòt bơta dòn, di gơlăn oă cau neh gơpừ. Gơs ală bơta konh alah lơh bol he in bassil, gơs ală tồi glài lơh bol he in kơñjơ̆ mơ kơlôi lah he ò gam di pal nàng pơnjat cơnđòa lòt mơ Yàng. Mơya ngăn sơl la bơta kong alah la cồng nhà bơta dòn he dê? Hala hơ̆ là tŭ jơ nàng bol he in sền wơl, gơjràñ sang glài, mơ dô dơ̆ tai git lam bơta lơh pa wơl Yàng dê?

Ngai do, ngai 03/05/2026, tơnggu Hoi Dan Kòp Ngai dăn ja ông mò oh mi kơlôi dơnờng bal jơnau Yang kơnòfm bơta dong kol Tina M. Hunt bơh tonggu me BƠTA NĐÀC TƠNƠ̆ MƠ ALĂ DƠ̆ GƠPỪ.

“Bol he kư ờm sùm tom tồi glài tồ bơta nđàc in geh bơntơl lìu làc ơ? Ò di behơ̆ ò! Bol he neh chơt gơwèt hơ tồi glài, gèn mbe bol he găm kis tòm tồi glài taih?” (Rô ma 6:1b-2)

Ur klau añ gơs dô dơ̆ sền bóng chày. Bơh òs lơh oă broă tòm dô dơ̆ lĕ, añ găm sền bơta pơrlòng bal mơ lơh broă hơđăng máy tính ndăng. Mơya đơs ngăn lah, añ ơn nùs nhòm tòm broă lơh añ jê oă rlau, ai bơta pơrlòng hơ̆ gèn gŏ gơlơh ngkàm.

Bau klau añ đal git bơta hơ̆ gèn ngêl mơ đơs mơ añ dô êt jơnau kơnhơl, mơya tŭ hơ̆ añ ngăn là ò wơng bi hơ̆ kờñ đơs ñchi. Mơ tŭ bơta đơs tơmbơh bơh broă bóng chày kừ pơnjat, bol he đal git broă sền bóng chày dong bol he gơs gơtòm klĕ mơ geh dô ềt bơta bơtê đah hwềng kwơ màng.

Tòm plai prah mơ chi, dilah dô nă cau chài pờng plai mơ ò geh tòm pê dơ̆ gèn cau hơ̆ pal kong roh dơ̆ pơng plai hơ̆. Mơya bơta hơ̆ ò gơs gơtha la bol khai pal kong roh jơh bơta pơrlong. Khai mìng kòl tơlik ing bơh di sâ̆n, mơ mùt tòm ơnih rlô, iat kơno cau bơtô bơta pơrlòng lơh rơndăp wơl bơta pơrlòng, mơ kờp gơn tŭ lơmpah mùt wơl tòm sân.

Rài kis bơta dòn bol he di kùng behơ̆:

Tòm tŭ cơnum sa dơ̆ lồi dùt, Piêr neh ràng tơlik he la dô nă dòn song ngăn mơ Yàng Jesu. Ông đơs nền cê lah: “Bulah añ pal chờt bal mơ Kơnràñ, añ kùng ò pơndang sang Kơnràñ ò” (Mathiơ 26:35). Mơya Yàng Jêsu neh yăl lai lah ông ròp pơndang sang Kơnràñ pê dơ̆ lai mơ tŭ iar nrau. Mơ tòm th ngăn behơ̆, Piêr neh kong alah.

Bulah behơ̆, ông ò kol Yàng sang lơi. Tơnơ̆ mơ tŭ Yàng kis wơl, Yàng Jêsu neh lòt jòi tip Piêr. Kơnràñ ai ông in tŭ lơmpah nàng bơtao wơl. Pê dơ̆ ông Piêr neh pơndang sang Yàng, gèn kùng pê dơ̆ Kơnràñ lùp ông lah: “Mê gơboh Añ sơl?”. Mơ kòp dơ̆ behơ̆, Kơnràñ jao phi ông in dô nơm gơnoẳ broă là ê tĕ belàt Kơnràñ dê.

Jang 21: 15- 17 cih lah:

“Tơnơ̆ mơ tŭ neh sa rau, Yàng Jesu đơs mơ Simôn Piêr lah: “Ơ Simôn, kòn Jôna, mê kờñ gơboh di Añ rlau mơ ală cau dô sơl?” Piêr đơs lah: “Ơ Yàng, ơi, Kơnràñ git lah añ gơboh di Kơnràñ .” KƠnràñ đơs lah: “Ròng siam tĕ ală belàt kòn Añ je.” Kơnràñ đơs dơ̆ bàr mơ khai lah: “Ơ Simôn, kòn Jôna, mê kờñ gơboh di Añ sơl?” Piêr đơs lah: “Ơ Yàng, ơi, Kơnràñ git lah añ gơboh di Kơnràñ .” Kơnràñ đơs lah: “Ê tĕ belàt Añ jê.” Kơnràñ đơs mơ khai dơ̆ pê lah: “Ơ Simôn ,kòn Jôna, mê gơboh di Añ sơl?” Piêr moat jrùng bơh Kơnràñ đơs mơ khai dơ̆ pe: “Mê Gơboh di Añ sơl?” Gèn khai đơs lah: “Ơ Yàng, Kơnràñ git jơh ală bơta, Kơnràñ git lah Añ gơboh di Kơnràñ.” Yàng Jesu đơs lah: “Ròng siam tĕ ală belàt Añ jê.”

Tòm bơta tòmpràn să, gơs dô bơta bơtê la “dô nă cau chài là jròng” gơtha la dô nă cau chài gơs goanoăr dờng màng ngăn tòm dô mpôl cau pơrlòng. Kùng behơ̆, Yàng neh lơh Piêr bơh dô nă cau neh pơndang sang Kơnràñ gơlik gơs là dô nă cau bơtê la jròng Hiu Jum Goh sơnròp di. Bơta hơ̆ ò tùs bơh pràn jak Piêr dê, mơ wil tơl la tùs bơh bơta nđàc Yàng Tom Trồ dê. Ò di ming Piêr gời, Sră Goh kung ai bol he in git oă cau neh gơtùp pừ mơya neh geh Yàng bơtao wơl:

Môisê neh tis glài tơnchờt cau tòm tŭ gơjràñ nùs, mơya geh Yàng sàc nàng tề lăm lang bol Israêl mùt tom tiah hơ ai.

Dabit tis glài rìs àr bơrnàn mơ tonchờt cau, mơya tŭ gơjràñ sang glài, ông geh Yàng hoi la cau niam nùs Yàng Tom Trồ.

Pol la cau neh kùp kơryăn Cau Dòn Krist, mơya neh geh tomgơl nàng gơlik gơs cau bơt bơtao Hiu Jum Goh.

Yàng Tom Trồ neh sac mơ neh ngui ală cau ò wil tơl nàng lơh tơnggu broă găm sùm sùm Kơnràñ dê.

Bol he git bơta nđàc mơ bơta bơt bơtao wơl Yàng dê la dô nơm phăn pà, mơya nàng dòp phăn pà gèn bol he pâ̆l càng gơs bơta hơ wơl. Ông Piêr neh ñìm ràc ròc dô bă jề sồt ngăn tòm tŭ dòp git he neh pơndăng sang Yàng, mơ tơnơ̆ hơ̆ ông gơjràñ sang glài, dòp lêng bơta bơtao wơl YÀng dê. Bơh hơ̆ tàng, bol he gŏ bơta gơjràñ săng glài sùm gơlòt bal mơ dô bơta lơh nền tòm gơl.

Bol he ò rgơi neh tis glài rau gèn tò să bơh tơnggu lah “poac să lơbờñ loñò” mơ pơnjat sền òsơp gơwèt hơ tồi glfi. Cau gơnoăr bơtô Pol neh đơs lah: “Bol he kư ờm sùm tom tồi glài tồ bơta nđàc in geh bơntơl lìu làc ơ? Ò di behơ̆ ò! Bol he neh chơt gơwèt hơ tồi glài, gèn mbe bol he găm kis tòm tồi glài taih?” (Rô ma 6:1b-2)
Bol he geh dòp geh bơta nđàc ngai do la bơh Yàng Dong Klàs neh tơm dô nơm khà kàs màng ngăn hơđăng chi pơng, gèn tàng bol he “mbe bol he găm kis tòm tồi glài taih?”

Bàñ lòi ală bơta gơ pừ lơh oh mi in rùc wơl tòm gùng pờrlòng đah hwềng, mơya ntao tĕ, gơjràñ sang glài mơ pơnjat cơnđòa tai. Yàng Jesu la Bơtau kờñ gơboh, bơtao wơl, mơ găm la “cau tề lăm bơta pơlòng” đah hwềng bol he dê tòm gùng pơrlòng đah hwềng do di.

Dan jà bol he dô nùs bal tòm bơta hòi dan: Khoai Yàng kờn gơboh. Kòn ưn ngai Kơnràñ neh ò sang lòi kòn kòp dơ̆ kòn lơbờñ lơñò hala gơtùp pừ, mơya tòm Kơnràñ kòn sùm joi bàn bơta ring lơngai mơ bơta pa wơl. Dan dong kòn ò rùc wơl tòm bơta dòn kòp tŭ kòn tis glài mơya kừ sơnđing di bơta kờn gơboh mơ bơta nđàc Kơnràñ dê, nàng geh Kơnràñ bơt mòn mơ koh mhơ̆wơl nàng gơlik gơs niam nùs Kơnràñ. Kòn jơh nùs hoi dăn tòm sơnđăn Yàng Jesu Krist, Amen.

Ơ ală ông mò oh mi kờn gơboh , gơs bơta tồi glài lơi găm lơh ông mò oh mi ơm ngai bơh bơta gơs măt Yàng dê taih? Gơs tồi glài lơi lơh oh mi in kơlôi lah Yàng ròp ò tŭ lơi toh he in? Ò gơs bơta gơtup pừ lơi iơh rmơh mơ Yàng ò rgơi bơtao tơngguh wơl bol he. Ngai do, tùs tĕ hơ Yàng tòm bơta gơjrăñ săng glài, dan Yang bơtao wơl mơ lơh pa wơl rài kis đah hwềng ông mo oh mi di. Ưn ngai tĕ Yàng bơh bơta kờn gơboh mơ bơta toh glài Kơnràñ dê găm sùm tơngkah tơngkăñ hơđăng rai kis ông mò oh mi di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.