Nyob hauv lub neej muaj tej yam nws me me tiamsis yooj yim ua rau peb tswj tsis tau tus kheej. Thaum uas ib hais lus npau taws lawm, yuav muaj qhov kev ntsia tsis txaus siab, lossis tej kev nkag siab tsis tsimnyog muaj. Tej teeb meem ntawd nws ib txwm tshwm tuaj thiab saib cuag li tsis muaj dabtsi. tiamsis nyob tob tob puag hauv, ntawd kuj yog lub sijhawm uas peb tab tom ntsib ib ntsus kev tsov rog ntawm sab ntsujplig qhov muag ntsia tsis pom, nyob hauv lub siab, tej kev xav thiab peb txoj kev ntseeg raug sim siab. Yog li peb yuav tau muaj yam dabtsi kom peb thiaj sawv taus khov kho thiab coj tau tus cwjpwm yog nyob hauv tej lub sijhawm zoo li ntawd?

Hnub no, yog hnub 07/05/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Beth Patch dhau ntawm Zaj kawm HNAV VAJTSWV COV CUAB YEEJ

“Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj.” (Efexaus 6:12)

“Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj. Yog li ntawd, nimno nej yuav tsum muab Vajtswv tej cuabyeej los hnav. Yog nej ua li ntawd thaum dab Ntxwgnyoog los tawmtsam nej, nej thiaj kovyeej. Thiab thaum tej kev tawmtsam ntawd dhau lawm, nej thiaj tseem nyob ruaj nrees.” (Efexaus 6:12-13).

Hnub ntawd, kuv mus yuav khoom hauv ib lub chaw muag khoom. Thaum uas tab tom zaum ntawm chaw tos tsheb, kuv ntsib ib tug txiv neeg npau taws heev. Yawg taw tes, npau taws thiab qw nrov nrov. Kuv tsis hnov yawg hais dabtsi vim lub tsheb kaw qhov rooj ruaj ruaj. Tsis xav kom phem tshaj, kuv thiaj tawm hauv chaw tso tsheb mus thiab tsav tsheb mus rau lwm qhov chaw yuav khoom. Saum ntawm lub tsom iav mus, kuv yeej tseem pom yawg sawv ntawd, coj tus yamntxwv npau taws heev, vim kuv khiav mus lawm tsis mloog yawg tej lus cem tab tom npau taws.

Kuv ua Vajtswv tsaug twj ywm vim Nws tau tuav kuv cia tsis pub kom kuv raug tsuas mus rau ib txoj kev sib ceg tsis muaj nqis. Kuv tes tuav lub kauj tsav tsheb ruaj ruaj, kuv lub hlwb yeej tseem ntxhov nyho. Puas yog yawg xav tau kuv qhov chaw tso tsheb? Lossis yog yawg nkag siab yuam kev rau kuv yog lwm tus?

Tiamsis thaum uas mus tau ib txua kev deb zog, muaj yam dabtsi twg ntawd hais rau kuv tias ntsus kev tsov rog no tsis yooj yim yog ntawm kuv thiab tus txiv neej ntawd. Vajluskub sau: “Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj.” (Efexaus 6:12).

Nyob ntawm qhov uas kuv ntsia pom ntawd, kuv cia li nres tsis nrhiav lo lus teb. Tus txiv neej ntawd tej zaug tab tom ntsib ib hnub tsis zoo, lossis muaj tej lub nra nyhav ntawm tus kheej ua rau yawg coj tus cwjpwm zoo li ntawd. Nyob hauv lub neej, ntsib tej yam zoo li no tsis yog ib yam uas txawv.

Paulus hais rau peb paub tseem yuav ntsib tej yam loj dua, yog ntsib lub hwjchim ntawm txoj kev tsaus ntuj tiam no. Tej uas peb ntsia pom, ntawm tib neeg, lub caijnyoog lossis tej teeb meem, tsuas yog sab nraud xwb. Tomqab tiag yog ib ntsus kev tsov rog tab tom tshwm tuaj, cuam tshuam txog peb tej kev xav thiab tib neeg tes haujlwm.

Tiamsis, qhov no tsis muaj lub ntsiab tias peb yuav tau tsis ris peb tus kheej lub nra, lossis saib tej haujlwm yuam kev ntawd yog sib. Thaum uas peb nkag siab txog ntsus kev tsov rog ntawm sab ntsujplig, peb yuav tau ceev faj dua rau peb lub siab, yog tsis li ntawd, peb yooj yim poob mus rau txoj kev npau taws, muaj kev tu siab lossis xav ua pauj.

Vim li Paulus thiaj txhawb peb: “…nimno nej yuav tsum muab Vajtswv tej cuabyeej los hnav. Yog nej ua li ntawd thaum dab Ntxwgnyoog los tawmtsam nej, nej thiaj kovyeej. Thiab thaum tej kev tawmtsam ntawd dhau lawm, nej thiaj tseem nyob ruaj nrees” (nqe 13).

Vajtswv tej cuab yeej yog qhov tseeb, kev ncaj ncees, kev kaj siab, kev ntseeg, kev cawmdim thiab Vajtswv tej lus. Ntawm no yog yam uas peb yuav tau “hnav” txhua hnub dhau ntawm txoj kev peb xav, peb xaiv, peb ua haujlwm. Peb yuav tau hnov Vajtswv tej cuab yeej nyob rau txhua hnub ntawm tej hnub tsis muaj dabtsi nrog rau tej hnub “muaj teeb meem”. “Hnub muaj teeb meem” tej zaum yog lub sijhawm peb yuav ntsib kev tawm tsam, kev tsis ncaj ncees, muaj kev tu siab, kev sim siab lossis kev ntxeev ntxias nyob rau hauv lub neej ntseeg.

Thaum uas tau npaj txhij txhua rau ntsus kev tsov rog, peb tej paj txiv tej zaug yog “sawv khov kho”. Nyob hauv lub ntiajteb puv npo kev hloov pauv, qhov uas sawv khov kho hauv Vajtswv tej lus tseem ceeb heev. Sawv khov kho hauv Vajtswv tej lus yog tuav tau kev ntseeg, tuav tau lub siab thiab lub hlwb tsis raug ntxeev ntxias thiab sim siab hauv lub ntiajteb no.

Peb tsis yog tawm tsam ib leeg nyob hauv ntsus kev tsov rog uas qhov muag ntsia tsis pom no, tiamsis Vajtswv pub rau peb muaj txaus cuab yeej cheem tsum kom sawv khov kho. Qhov tseem ceeb yog peb yuav tau paub tias yuav tau hnav Vajtswv tej cuab yeej los tawm tsam. Thaum uas tau npaj txhij txhua lawm, peb thiaj muaj cuab kav kov yeej ntsus kev tsov rog txawm yog yuav loj me li cas, thiab coj txoj kev muaj yeej mus fij rau peb tus Vajtswv.

Thov caw nrog kuv peb thov Vajtswv ua ke: Tus Tswv, thov pab kom kuv muab kuv lub siab thiab lub hlwb tso rau ntawm koj tej lus nyob hauv txhua ntsus kev tsov rog. Thov pab kom kuv nqa rau lub tsho thaiv uas yog qhov tseeb, kev ncaj ncees, kev kaj siab, kev ntseeg, kev cawmdim, thiab tej lus ciaj sia mus ua rog. Kuv ntseeg tias kuv yuav mus nrog kev muaj yeej thaum uas kuv tau Vajtswv npaj, thiab yim hnub yim loj hlob hauv txoj kev ntseeg thiab Vajtswv txoj kev hlub.
Kuv thov hauv Tswv Yexus Khetos lub npe, Amees.

Cov kwv tij txhua tus, koj puas pom tias yus yuav tau npaj los ntawm Vajtswv tej cuab yeej kom sawv khov kho nyob rau hauv ntsus kev tsov rog ntawm sab ntsujplig? Cia li thov Vajtswv pab koj hnav qhov tseeb, mus nrog kev ncaj ncees, thiab ceev lub siab cia rau ntawm Vajtswv txhua hnub. Thuam ntsib tej teeb meem lossis kev tsis sib haum hauv lub neej txhua hnub, cia li nthuav tawm Yexus Khetos lub siab dhau ntawm lo lus hais, tes haujlwm ua, thiab thov Vajtswv ntau ntxiv rau tej neeg ib ncig yus. Vim peb tab tom nyob hauv ib ntsus kev tsov rog, yog li peb yuav saib tsis tseem ceeb tsis tau, tiamsis yuav tau thov Vajtswv pub kom peb muaj lub neej thov Vajtswv thiab ceev faj kom paub tus yeebncuab thiaj yuav sawv taus khov kho.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.