Muaj tej ntu nyob hauv peb lub neej txawm yog peb twb siv zog heev lawm los, txhua yam cuag li yeej tsis hloov pauv. Zoo li thaum uas koj tos ib lub sijhawm tshiab nyob rau hauv tes haujlwm, lossis thov Vajtswv rau ib yam dabtsi twg tseem ceeb yeej tseem tsis tau teb. Tej lub sijhawm zoo li no, peb yooj yim qaug zog. Peb pheej xav tias thaum Vajtswv ua haujlwm, peb lub caijnyoog yuav zoo dua? Yog txhua yam nws yeej tseem zoo li qub, tsis paub peb puas tseem ncaj ncees txaus nrog Vajtswv mus?

Hnub no, yog hnub 08/05/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm THAUM LUB CAIJNYOOG TSIS TAU HLOOV PAUV

“Twb yog vim lawv ntseeg, lawv lub koob meej thiaj nrov ncha moo lug mus thoob plaws qhov txhia chaw. Tiamsis lawv tseem tsis tau tau tej uas Vajtswv coglus tseg hais tias Vajtswv yuav pub rau lawv.” (Henplais 11:39).

Kuv twb muaj ib lub sijhawm nyob thiab ua haujlwm nyob rau lwm lub nroog. Ua ntej kuv mus, kuv cia siab tias txhua yam yuav tsis muaj dabtsi, yus tsuas yog mus raws li Vajtswv ua tus coj kev ces txoj kev tom ntej yuav yooj yim. Tiamsis qhov tseeb tiag tsis zoo li ntawd.

Ntawd yog ib nyob rau hauv lub sijhawm uas txomnyem tshaj. Kuv hnov qaug zog, nco tsev thiab muaj ntau zaug tsis nkag siab tias dabtsi tab tom tshwmsim tuaj. Txhua yam tsis zoo li kuv tau xav, kuv tej haujlwm nyhav thiab yuam kom yuav tau siv ntau lub zog. Kuv hnov cuag li yeej tsis muaj sijhawm so. Qhov uas txuas nrog phooj ywg tshiab dhau los txomnyem, thiab kuv kuj txuas tsis tau nrog Pawg Ntseeg vim sijhawm ua haujlwm ntau heev.

Kuv hnov kuv nyob ib leeg thiab tsuas xav los mus tsev xwb. tomqab ntau zaug thov Vajtswv thiab nug Vajtswv tias vim li cas txhua yam tsis zoo li kuv xav. Kuv ntseeg tias Vajtswv muaj ib yam twg ntawd tseg rau kuv, txawm yog thaum ntawd kuv tsis nkag siab tas. Thiab kuv tau txiav txim siab yeej tsis yooj yim, tias kuv yuav nyob twj ywm thiab tso siab plhuav rau Vajtswv ua tus coj kev.

Nees nkaum xyoo tom qab, thaum uas tig rov qab mus ntsia , kuv pom tias ntawd yog ib qhov kev txiav txim siab yog. Kuv kawm tau txoj kev ntseeg Vajtswv ntau dua. Yog tias hnub ntawd kuv rov qab los tsev, tej zaum kuv lub neej thaum no twb txawv lawm. Qhov tseem ceeb, tej zaum kuv tau ua poob yam uas Vajtswv xav qhia kuv nyob rau lub sijhawm muaj kev txomnyem ntawd.

Txoj kev uas kuv ntsib dhau no ua rau kuv nco txog Yauxej nyob hauv Vajluskub. Thaum Yauxej raug ntes mus kaw, yawg yeej tsis tau tso tawm tamsim. Yawg lub neej thaum ntawd tseem phem tshaj. Tiamsis yam uas yuav tau ceev faj yog Vajluskub hais meej meej tias “Tus Tswv tiv thaiv Yauxej thiab ua siab ntev rau yawg”.

Chivkeeb 39:20-23b sau: “Yauxej tus tswv thiaj coj Yauxej mus kaw rau hauv qhov chaw uas kaw Falaus cov neeg raug txim, ces Yauxej txawm mus nyob rau hauv lub tsev lojcuj ntawd lawm. Tiamsis tus Tswv yeej nrog nraim Yauxej thiab foom koob hmoov rau Yauxej, ces tus uas saib lub tsev lojcuj thiaj txaus siab heev rau Yauxej. Nws tsa Yauxej ua tus saib tagnrho cov neeg raug txim thiab ua tus saib txhua yam uas nyob hauv lub tsev lojcuj.[…] rau qhov tus Tswv nrog nraim Yauxej thiab pub tswvyim rau Yauxej ua tau txhua yam haujlwm tiav huv tibsi.

Peb pheej xav tias yog Vajtswv nrog nraim peb nyob, txhua yam yuav dhau los yooj yim dua. Tiamsis zaj xwm hais txog Yauxej lub neej nws ho txawv: Vajtswv txoj kev tshwm ntsej muag tsis yog thaum twg twb yuav hloov lub caijnyoog tamsim, tiamsis nws hloov pauv txoj kev peb sawv khov kho rau lub sijhawm ntawd. Vajtswv txoj kev tshwm ntsej muag tsis nyob ntawm lub caijnyoog zoo li cas. Vajtswv nrog Yauxej nyob hauv tsev rau txim thiab tom qab tawm hauv tsev rau txim los. Nws yeej tseem ua haujlwm thaum uas txhua yam cuag li txomnyem, tsis yog lub sijhawm tau zoo xwb.

Yauxej ua neej ntsib dhau ntawm yam tsis ncaj ncees hauv lub neej: raug tej kwv tij ntxeev siab, raug muag mus ua qhev, tas raug iab liam thiab muab ntes mus kaw. Tiamis, yawg yeej ncaj ncees thiab ntseeg siab rau Vajtswv vim yawg ntseeg Vajtswv txoj kev tshwm ntsej muag. Thaum kawg, Vajtswv siv Yauxej los cawm ntau tus ntxiv.

Ntau zaug, peb xav tias ua siab ntev hauv txojkev ntseeg yuav coj peb mus rau qhov zoo raws li peb ntshaw. Tiamsis Vajluskub qhia tias ua siab ntev, ua ntej yog ncaj ncees rau Vajtswv nyob hauv txhua lub sijhawm, txawm yog thaum uas peb yeej tseem tsis tau pom Vajtswv ua haujlwm. Kev ntseeg tsis yog pom tas mam ntseeg, tiamsis yog ntseeg Nws txawm thaum uas tsis tau pom.

Qhov tseeb tiag, thaum saib hauv Henplais 11, peb pom tias cov neeg uas muaj kev ntseeg tsis yog ntsib dhau kev muaj yeej xwb, tiamsis tseem ntsib dhau ntawm lub caijnyoog: “Twb yog vim lawv ntseeg, lawv thiaj ntaus tau tebchaws tagnrho. Lawv ua neeg ncaj ncees thiab lawv tau tej uas Vajtswv coglus tseg hais tias Vajtswv yuav muab rau lawv. Lawv ua rau tsov ntxhuav rua tsis taus qhovncauj. Lawv tua tau cov hluavtaws uas cig hlob hlob thiab khiav dim hniav ntaj hniav riam. Lawv qaug zog, tiamsis lawv ho rov qab muaj zog. Lawv muaj tswvyim ua tsov ua rog thiab lawv tawmtsam yeej lwm haivneeg cov tubrog” (Henplais 11:33-34).

Txawm yog lawv “mus txeeb tau txhua lub tebchaws” lossis “kaw tsov ntxhuav qhov ncauj los” lawv kuj “Muaj qee leej raug luag thuam thiab raug luag nplawm, thiab muaj qee leej raug luag muab saw hlau khi thiab cia luag muab kaw rau hauv tsev lojcuj … lawv mus nyob tom tej roob mojsab qhua thiab pem tej roob. Lawv nyob hauv tej qhov zeb qhov tsua thiab khawb qhov av nyob.” (nqe 36-38).
Qhov uas zoo thooj yam ntawm cov neeg uas muaj kev ntseeg yog ntseeg Vajtswv, kom lawv ua tau siab ntev nyob rau hauv txhua lub caijnyoog. Yog li, txawm yog thaum uas koj tab tom ntsib kev tomnyem, thaum koj tsis pom tseeb txoj kev tom ntej, koj yeej nkag rau hauv txoj kev ntseeg nws. Tej zaum yam uas Vajtswv tab tom ua ua ntej yog qhia koj paub Vajtswv txoj kev tshwm ntsej muag, tsis yog hloov pauv koj lub caijnyoog tamsim. Thiab qhov chaw ntawd, ntseeg Vajtswv tsis yog nyob saum ntaub ntawv, tiamsis yog yam uas koj yuav ntsib dhau.

Thov caw nrog kuv peb thov Vajtswv ua ke: Tus Tswv, Koj cog lus tias Vajtswv lub homphiaj thiab Vajtswv lub tswv yim nyob hauv kuv lub neeej yog lub homphiaj zoo. Yog li, thov pab kom kuv paub Koj txoj kev zoo thiab kev ncaj ncees txhua hnub, txawm yog tej lub sijhawm zoo lossis txomnyem. Thov Vajtswv pab kom kuv ntseeg thiab mloog Vajtswv lus, nyob rau qhov twg koj tso rau kuv, thiab mus nrog txoj kev kaj siab hauv Vajtswv ua tus coj. Kuv thov hauv Tswv Yexus Khetos lub npe, Amees.

Cov kwv tij txhua tus, koj puas tab tom nyob rau tej hnub txomnyem ntawd? Tej nra nyhav, kev txhawj ua rau koj hnov qaug zog npaum cas? Vajtswv tej lus hnub no txhawb koj mus nrog kev ncaj ncees thiab cia siab rau Nws txawm yog lub caijnyoog tsis tau hloov pauv. Nyob hauv koj lub siab puas hnov tsis kaj siab lossis ib lub nra nyhav twg, cia li muab fij rau Vajtswv, vim Vajtswv paub zoo txhua yam uas koj tab tom ntsib dhau. Cia li thov Vajtswv ua tus coj kev kom koj mus dhau tej kev txomnyem thiab pom txog Vajtswv lub homphiaj zoo nyob rau hauv tej kev sim siab ntawd.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.