Nyob zoo rau txhua tus uas yog menyuam tabtom maj nroos hauv lub neej, thiab nyob zoo rau txhua leej niam uas tabtom khwv khwv twjywm. Koj puas tau muaj ib zaug ua tib zoo tig mus saib niam txhais tes uas ntxaug ntxaug, lossis pom niam lub hauv pliaj twb muaj ntau kab nkhaus? Peb muaj ntau yam yuav txhawj txog xws limov noj, nyiaj txiag, ua rau peb pom niam tshwm nyob ntawd yog yam pheejtshaj xwb. Peb yoojyim hais lus ua tsaug rau tej neeg sab nrau tiamsis qee zaug ho khuv xim lub ntsej muag luag rau niam tus uas twb pub rau peb txojsia. Muaj tej tug xav ua zoo rau niam los niam twb tsis ua neej nyob lawm, thiab muaj qee leej niam hnov kho siab hauv nws lub tsev vim tej menyuam tsis tabncuab txog. Tagkig sawv ntxov no, peb cia li siv ib mentsis sijhawm los twjywm xav txog leejniam txoj kev hlub, kom ntuas peb lub siab nco ntsoov tias: Niam yog qhov koob hmoov loj uas Vajtswv tau muab pub rau yus.

Hnub no, yog hnub 9/5/2026, kev thov Vajtswv txhua hnub thov caw sawvdaws nrog tus sau Cathy Irvin kawm txog lub ntsiab lus: NIAM- POB KHOOMPLIG MUAJ NQIS HAUV LUB NEEJ

“Yuav tsum hwm nej niam nej txiv, nej thiaj yuav muaj sia ua neej nyob ntev rau hauv lub tebchaws uas kuv muab pub rau nej nyob.” (Khiavdim 20:12)

Puas muaj txoj kev hlub twg hauv qab ntuj no piv tau niam txoj kev hlub? Thaum xav txog tej uas niam tau ua rau cov menyuam, puas yuav muaj phoo ntawv twg sau tag, lossis yuav siv tagnrho lub ntuj lov piav thiaj tag?

Niam tau ua tag txhua yam: sijhawm, kev pw, tej pluag zaub mov noj. Niam lub kua muag uas poonb tsis muaj twg pom, niam sawv ntxov thăm ntuj tsis tau kaj los npaj pluag noj pluag haus rau tsev neeg. Tu vaj tu tsev, ua haujlwm thiab tseem ntau ntau pluag mov sov so rau tsev neeg… niam yeej tshwm nyob hauv. Tshwjxeeb yog tej pog, pog koob uas twb laug lawm tiamsis tseem ua siab ntev tu tej xeeb ntxwv los ntawm lub siab hlub tshua, tsis suav nqi zog. Ib hnub ua niam cuag li ntev tsis txawj xaus.

Yam dabtsi ua rau leej niam thiaj ua tau zoo npaum li ntawd? Kuv ntseeg tias, Vajtswv tau tso rau hauv leej niam lub siab tus cwjpwm uas zoo tshwjxeeb. Tus Tswv pub rau niam muaj zog ua tag txhua yam rau 24 teev ib hnub uas tsis muaj leejtwg yuav ua tau. Nws pub rau niam muaj lub zog tiv taug txhua yam kev txomnyem, mob siab rau tej menyuam. Ntawd yog Tug Povthawj Hlob lub siab, tus Tswv uas khuvleej tagnrho peb tej kev qaug zog.

Niam khwv tag hnub tag hmo tiamsis tsi ntshaw kom tau txais nqi zog hauv ntiajteb no. Yog li, nyob rau Niam hnub, peb cov uas tau txais niam txoj kev hlub tsis txawj tu ntawd cia li qhia tawm peb lub siab ua tsaug: “Niam, kuv ua koj tsaug rau tagnrho txhua yam uas koj tau ua thiab tseem tabtom ua rau kuv.”

Txawm tias tej taig thaj qab li qab, tej tsev paj zoo nkauj, lossis ib tsab ntawv ua tsaug,ib pluag mov qab… tagnrho tej ntawd yeej pauv tsis tau tej uas niam tau ua. Tiamsis ntawd yog lub siab qhia tawm kom niam paub tias peb yeej tsis hnov qab niam, peb yeej nco ntsoov niam. Hno yog zoo sijhawm rau peb hais tias “Niam, koj yog pob khoom plig muaj nqi tseem ceeb uas Vajtswv tau pub rau kuv lub neej.” Thaum koj saib taug koj niam, Vajtswv yuav luag ntxhi rau koj, rau koj yog koj tabtom saib taug ib tug neeg tseemceeb uas Vajtswv tsim muaj.

Leejtwg yuav piv tau rau niam txoj kev hlub? Hauv ntiajteb no tsis muaj twg, tshwj yog leejtxiv txoj kev hlub, niamsis ntawd ho yog lwm zaj xwm txawv. Tsuas muaj Vajtswv txoj kev hlub thiaj piv tau xwb, rau qhov Nws tau tso Nws tib leej Tub los pub rau peb.

Tej thaum nyob rau hnub tshwjxeeb no, koj yuav hnov kho siab vim koj niam tau ncaim lub ntiajteb tseg lawm, lossis koj tabtom tog yuav tau los ua ib leej niam. Yog li ntawd, koj cia li tuav ib tug viv ncuas tes, thiab qhia tawm koj kev zoo siab rau lawv. Yog tias koj yog ib leejniam tabtom nyob ib leeg vim tej menyuam tau ncaim mus deb, nco ntsoov tias: Vajtswv hlub koj, Nws yeej nrog nraim koj. Koj yeej tsis nyob ib leeg.

Nyob hauv Vajtswv lub qhov muag, tug pojniam yeej tseemceeb heev. Koj muaj nujnqis thiab zoo kawg nkaus. Thov kom Vajtswv yuav qhuas txog tej uas koj tau ua rau lwm tus, thiab tshwjxeeb yog tej uas koj tau nqes tes rau Vajtswv tes haujlwm.

Thiab thov kom peb txhua tus nco ntsoov Vajtswv txojlus tau samhwm:

“Yuav tsum hwm nej niam nej txiv, nej thiaj yuav muaj sia ua neej nyob ntev rau hauv lub tebchaws uas kuv muab pub rau nej nyob.” (Khiavdim 20:12)

“Thov koj cia kuv mus nram luag tej teb thiab mus khaws tej nplej uas cov neeg hlais nplej ua poob. Kuv cia siab hais tias kuv yuav mus ntsib tus uas kam cia kuv khaws nws tej nplej.” (Luv 2:2)

Thov caw nrog kuv peb thov Vajtswv ua ke: Vajtswv tus uas muaj kev hlub, Koj yog lub hauv paug ntawm txhua txoj kev hlub. Hnub no kuv tsav los ze ntawm Koj ua Koj tsaug vim tau puv kuv muaj ib leej niam hauv lub neej no. Kuv thov Koj zam txim rau tej zaug uas kuv tau ua tsis zoo lossis hais tsis zoo rau kuv niam tus uas khwv khwv pab kuv. Thov Tus Tswv koj ntxiv zog rau txhua leej niam uas tabtom qaug zog, nplig txhua leej niam uas tabtom kho siab, thiab pub kev kaj siab rau txhua tus uas lawv niam twb tau ncaim lub ntiajteb no lawm. Thov qhuab ntuas kuv kom kuv paub saib taug niam thiab hlub niam los ntawm txoj kev hlub uas Koj tau muab pub rau kuv. Kuv ua Koj tsaug los ntawm Yexus Khetos lub npe, Amees.

Ib tsoom phoojywg sawvdaws, niam txoj kev hlub coj peb mus rau ntawm Yexus Khetos txoj kev hlub hauv ntiajteb no: Yog txoj kev hlub muab pub dawb tsis yuav pauj. Yog cov uas tau txais txoj kev hlub ntawd, thov kom peb ua lub neej kom tsim nyog. Qhia tawm kev hlub thiab lub siab hwm niam. Txhob tog thaum tsis muaj niam lawm mam khuvxim. Tej khoom kim nyiaj kuj pauv tsis tau lub siab hlub tiag. Yog tias hnub no koj tseem muaj niam, ntawd yog koj ib qhov koob hmoov loj. Yog koj niam tau ncaim koj lawm, cia li ua zoo lawv li niam tau qhia. Nco ntsoov tias, tej haujlwm me uas koj ua qhia tawm kev hwm niam tsis yog tsuas ua rau niam sov siab xwb tiamsis tseem yog ib qhov khoom plig haum Vajtswv siab. Vajtswv saib taug tej uas niam tau ua thiab Nws yuav foom koob hmoov rau tej menyuam uas saib taug “qhov khoomplig” uas Nws tau muab pub rau koj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.