Niam! Tsuas yog ib lo lus pheej hais thiab xwb tab kuj txaus ua rau koj tej kev qaug zog ntawm lub neej dlau mus. Tej zaum ntshe hauv peb txhua tus lub siab lub ntsws, pom niam daim duab: nrog tej pa taws tsws uas pheej hnov, yog tej lus thov Vaj Tswv luj loog ntawm lub txaj pw, los yog ntsia ntsoov nws tej me nyuam rau txhua txoj hau kev. Nyob rau niam hnub rau lub xyoo no, peb txhua tus cia li nco txog txhua yam uas dlau los thiab kev cob qhia ntawm txoj kev ntseeg uas niam tau tseb rau hauv peb lub siab lub ntsws. Cia li siv hnub tshwj xeeb no los ua tsaug rau tus pojniam uas zoo tshaj plaws hauv koj kuv peb lub neej.

Hnub no, yog hnub 10/05/2026, peb kev Thov Vaj Tswv Txhua Hnub thov caw koj los nrog peb kawm thiab mloog Vaj Tswv Txoj Lus dlau ntawm Gene Markland muaj lub ntsiab NIAM.

“Yexus pom nws niam thiab tus thwjtim uas nws hlub heev sawv ua ke ntawd, Yexus hais rau nws niam hais tias, “Niam, tus uas nrog koj sawv ntawm ko yog koj tus tub.” Yexus hais rau tus thwjtim ntawd hais tias, “Tus uas nrog koj sawv ntawd ko yog koj niam.” Txij thaum ntawd los tus thwjtim ntawd txawm coj Yexus niam mus nrog nws nyob lawm” (Yauhas 19:26-27).

“Niam” tsuas tib lo lus ntawd xwb twb ua rau cim nco txog tau yam. Ntawd yog rov qab nco txog niam txhais tes qhwv tej qhov txhab ntawd lub hauv caug, thiab niam nwj twjywm rau ntawm lub qhov txhab ntawd ua rau tej mob cuag li ploj tag. Ntawd yog niam lub siab luag ntxhi thiab npuaj tes thaum kuv mus ua yeeb yam rau hauv tsev kawm ntawv thaum kuv kawm qib 2, thaum ntawd kuv tsuas tau ua ib tsob ntoo xwb twb tsis tau hais ib lo lus li. Ntawd kuj yog tej zaj xwm txheej thiab tej lo lus thov ntawm lub txaj pw, yog qhov chaw kuv kawm tau zaj kawm txog kev ntseeg hauv kuv lub neej, yog lees txais tias: Vajtswv yog tus tsomkwm kuv, kuv yuav muaj txaus txhua yam.”

Qee zaug, kuv rov qab tig saib niam phoo Vajluskub uas twb qub qub – yog phoo ntawv tseemceeb uas niam pheej coj nrog nraim thaum niam mus kho tus mob lub raum. Txawm raug mob nyhav los niam tseem yog ib qhov koob hmoov loj, niam tseem niaj hnub qhia kev ntseeg rau lwm tus uas raug mob. Txawm tias sijhawm no niam twb mus nrog Vajtswv nyob lawm los, niam lub neej thiab niam txoj kev hlub twb tseem nyob hauv kuv lub siab mus tsis ploj.

“Niam” kuv kuj tseem pom tias kuv txais tau koob hmov ntau npaug thaum kuv muaj ib leej niam zoo tshaj plaws – yog ib leej niam uas ua txhua yam rau nws tej menyuam. Kuv tus poj niam yog ib leej niam uas yeej hlub, qhia, qhuab ntuas, txhawb zog, thov pab, ua si zoo siab thiab siv tagnrho nws lub tswvyim los pab kom tej menyuam tau lub neej zoo thiab kaj siab. Nws yog tus poj niam uas tseem poob kua muag thaum tej menyuam pib mus kawm ntawv thib pom lawv ib leeg mus tsheb buýt. Yog li kuv thiaj coj nws mus noj txhais txhua tagkis kom nws tsis txhob nyuaj siab. Thaum pom tej zaub mob qab nws yuav yooj yim tu nws tej kua muag lawm. Kuv pojniam yog ib tug qauv zoo rau kuv tej me ntxhais kawm lawv txhua hnub.

“Niam” muaj ntau leej niam zoo nyob hauv peb lub neej. Txawm tias txhua xyoo peb yeej tseg ib hnub los txhawb nqa niam los, yeej tsis txaus yog muab piv rau tej uas niam tau ua pub rau peb.

“Niam” Hauv txoj kev cawm dim loj, muaj ib leej niam zoo tshwjxeeb heev. Ntawd yog tus poj niam tau koob hmoov ntawm Vajtswv qhov muag. Tau Vajtswv xaiv los yug Tus Tswv Cawmseej Yexus. Nws tau Vajtswv tso siab txawm tias nws tseem yog ib tug ntxhais hluas, tsis tau paub txog ntau yam thiab pluag, tiamsis nws twb tseem tau Vajtswv xaiv los yug thiab tu Tswv Yexus. Pom cuag li muaj ntau yam kev sim siab teeb meem los raug rau nws lub neej, tiamsis txawm tsis nkag siab tag tej teeb meem ntawd los – ntawm tej kev liam txim, saib tsis taug mus rau ntawm huab tais raws nrhiav tua pov tseg – nws twb tseem ua siab ua tiav nws tes hauj lwm, siv tag nrho nws lub neej los tu tus Menuam Vaj. Dhau ntawd, thaum txog sijhawm, tus Cawmseej thiaj qhia tawm Nws yog tus Vajntxwv ntawm txhua tus vajntxwv, yog Tus Tswv ntawm txhua tus Tswv.

Tej no tshoov tau peb xav mus lub ntsiab uas tob dua: Muaj pes tsawg feem ntawm kev ruaj siab, kev hlub tob, kev ua siab ntev ntawm Tswv Yexus yog los ntawm tus leej niam sab nqaij tawv no los? Txawm tias txhua tus yamntxwv zoo yeej yog los ntawm Vaj Leejtxiv los, tiamsis peb kuj pom Vajtswv yog tus tsomkwm dhau ntawm Malis kev tu tswv Yexus. Yog li, peb tsis txhob hnov qab txhawb nqa Tus Tswv leejniam hauv ntiajteb no, rau qhov nws twb tau Vajtswv siv los tu Tswv Yexus loj hlob zoo.

“Niam” nws kuj yog tus txhawb nqa Tswv Yexus tawm mus ua dejnum rau sawvdaws, thaum nws txhawb nqa tus Tswv hauv thawj zaj txujci.

Hauv Yauhas 2:1-11, saib pom cuag li thaum pib Tswv Yexus yeej tsis xav ua zaj txujci muaj dej hloov ua cawv, rau qhov tus Tswv hais tias tsis tau txog Nws lub sijhawm. Tiamsis, “Thawj zaug txujci tseemceeb no Yexus ua hauv lub zos Kanas uas nyob hauv lub xeev Kalilais; nws ua li ntawd qhia nws lub hwjchim rau sawvdaws pom, thiab nws cov thwjtim pom li ntawd lawv ntseeg nws. (Yauhas 2:11). Txawm Nws yog Vajtswv Tib leej Tub los tus Tswv yeej txais tau kev hlub niam tub: Ib leej niam uas ua txhua yam zoo rau nws tug menyuam.

Thiab Nws nkag siab leej niam plooj siab, txais yuav niam kev hlub thiab tu Nws txawm yog thaum ntawd tus Tswwv tseem raug txomnyem ntxuav saum tug ntoo khaublig.

Yexus pom nws niam thiab tus thwjtim uas nws hlub heev sawv ua ke ntawd, Yexus hais rau nws niam hais tias, “Niam, tus uas nrog koj sawv ntawm ko yog koj tus tub.”

27Yexus hais rau tus thwjtim ntawd hais tias, “Tus uas nrog koj sawv ntawd ko yog koj niam.” Txij thaum ntawd los tus thwjtim ntawd txawm coj Yexus niam mus nrog nws nyob lawm. Yauhas 19:26-27

Tswv Yexus thiab Nws niam txoj kev hlub tsis yog tsuas xaus rau saum roob Khaulakhautha xwb. Thaum Malis nrog cov thwjtim koom siab thov Vajtswv ua ke saum lub chav tsev siab hnub hnub Peetekos, nws tau puv npo Vaj Ntsujplig, thiab txoj kev sib raug zoo ntawd twb tseem muaj los txog hnub no. Malis yog ib tug qauv zoo rau txhua tug poj niam uas ua niam, thiab tug Tswv kuj yog ib tug qauv zoo rau txhua tug uas ua menyuam.

Niam. Cia li hlub niam tag siab tag ntsws. Saib taug niam thiab txhawb nqa niam zoo li ib pob khoom plig muaj nqis uas Vajtswv muab pub rau koj lub neej. Niam tsim nyog tau txais txhua yam uas zoo tshaj plaws.

Thov caw nrog kuv peb thov Vajtswv ua ke: Kuv Leejtxiv uas nyob saum ntuj ceeb tsheej, kuv ua Koj tsaug ntau kawg nkaus uas koj tau pub kuv muaj ib leej niam uas zoo kawg nkaus. Ua Koj tsaug txog niam lub siab ntev thiab lub siab hlub, ua rau kuv pom Koj txoj kev hlub. Thov Koj foom koob hmoov rau txhua leej niam. Thov ntxiv zog rau lawv thiab pub lawv muaj kev kaj siab txhua hnub. Thov ntuas qhia kom kuv paub ua lub neej hwm niam thiab kom Koj lub npe tau nrov ncha dhau ntawm kuv tsev neeg. Kuv ua Koj tsaug los ntawm Yexus Khetos lub npe, Amees.

Ib tsoom phoojywg, niam hlub yuav dhau mus, tiamsis niam txoj kev hlub thiab kev ntseeg ua tau tseb yuav nyob mus li hauv peb lub siab. Cia siab tias peb lub siab hwm thiab hlub niam yuav tsis yog tsuas nyob rau hnub no xwb, niam sis yuav nyob mus tag koj lub neej, hauv koj tsev neeg. Thov kom Vajtswv foom koob hmoov rau txhua leej niam kom lawv nrhiav tau kev xyiv fab zoo siab hauv lawv lub neej. Thov foom kom koj tsev neej muaj ib hnub uas yog niam hnub puv npo Vajtswv kev hlub.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.