Zaug kawg koj qhia tawm lub siab tso hwjchim yog thaum twg? Peb kawm ua li neej loj hlob, kawm povhwm yus tug kheej los ntawm lub siab tawv, tiamsis qee zaug tej ntawd ho rau rau peb lub siab tuag nti rau ntawm lub hauv paug kev hlub tiag. Thaum peb koom ua ke qhia tawm lub siab ua niam tsaug rau tej hnub no, peb kuj qee me ntsis sijhawm los nrhiav lub siab mog muag li menyuam yau hauv peb lub neej.

Hnubno yog hnub 11/5/2026, Kev thov Vajtswv txhua hnub thov caw peb sawv daws nrog kawm Vajtswv txoj lus nrog tug sau Beth Patch txog lub ntsiab lus: ROV NRHIAV LUB SIAB ZOO LI MENYUAM YAU

“Kuv qhia tseeb rau nej hais tias, yog nej tsis hloov nej lub siab kom zoo li tug menyuam yaus no lub, ces nej yuav tsis tau mus saum ntuj Ceebtsheej.” (Mathais 18:3)

Kuv tseem cim nco ntsoov kuv tug me tub lub ntsej muagluag ntxhi thaum nws dhia tuaj, muab lub txiv ntoo ciab rau kuv. Ntawd yog lub txiv nws ua tom tsev kawm ntawv: lub txiv ntoo pleev roj taum huab xeeb thiab lo cov noob muab pub rau noog noj. Nws tuav txoj hlua khi thiab hais rau kuv: “Niam koj muab khi nraum qhov rai nawb, thiab wb ntsia saib cov me noog tuaj noj.”

Oh! Zoo heev os metub!” Kuv tsa suab hais, puag nws thiab ua nws tsaug. Cov miv nyob nraum tshav puam cuag li kuj zoo siab nrog wb.

Tej meyuam yeej ntshaw ib yam dabtsi zoo tshwjxeeb rau nws leej niam. Nws tsi tag tos kom txog hnub tshwjxeeb tiamsis muaj sijhawm ces yeej xav muab yam zoo rau nws niam. Lub siab ntawd yog menyuam lub siab xav ua rau niam thiab txiv zoo siab, thiab lawv ntseeg tias lawv yuav txais tau lub niam txiv lub nplhu luaug ntxhi, ib lo lus qhuas thiab puag nws. Menyuam qhia tawm nws lub siab tsis zais, tsis txaj muag thiab puv npo kev hlub kev cia siab.

Nyob hauv txoj kev xyaum ua neeg loj, peb yoojyim ua poob lub siab zoo li menyuam yau lawm. Peb hnov qab lawm hais tias, qhov uas tuav tau lub siab zoo li qub thaum tseem yau yog ib yam cheem tsum pab rau peb lub neej nyob thaj yeeb kaj siab. Txoj nkauj “Yexus hlub menyuam” tsis yog tsuas yog ib zaj nkauj rau cov menyuam xwb. Nyob hauv Mathais 18, Tswv Yexus tau qhia tawm txog lub Ntuj Ceebtsheej: Txog lub neej yav peg suab, txog lub neej ib txhis, txog peb kev cia siab. Thaum tseem tabtom nrog cov thwjtim tham, tus Tswv coj ib tug menyuam los ntawm Nws thiab hais:

“Kuv qhia tseeb rau nej hais tias, yog nej tsis hloov nej lub siab kom zoo li tug menyuam yaus no lub, ces nej yuav tsis tau mus saum ntuj Ceebtsheej. 4Tus uas txo hwjchim li tus menyuam yaus no, tus ntawd yuav yog tus uas loj dua ntais nyob saum ntuj Ceebtsheej” Mathais 18:3-4

Nyob rau lub sijhawm ntawd, cov thwjtim twb nrog Tswv Yexus mus tau ntau xyoo, lawv kuj pom tseeb tus Tswv ua txuj ci muab tsib lub ncuav thiab ob tug ntseg pub tsib txhiab leej neeg noj. Lawv yeej nyob ze pom tej txujci, lawv lub hlwb tau kawm tau ntau zaj kawm txawj ntse dhau tus Tswv tej txujci.

Lawv kawm paub ntau li ntawd, ua rau peb xav tias ntshe lawv yuav nkag siab txog txoj kev mus ntuj ceeb tsheej. Tiamsis, Tswv Yexus ho qhia pom tias: kev kawm paub qee zaug yuav yog qhov kev tav peb yog tias peb tsis muaj kev txo hwjchim.

Lawv thiab peb, yeej cheemtsum ib lub zeem muag tshiab: Ntawd yog kawm paub txo hwjchim, ua lub siab mog muag zoo li tej menyuam.

Tamsim no, thaum twb loj hlob tiav thiab saj tau ntau yam kev iab daw hauv lub neej, yuav ua li cas peb thiaj rov nrhiav tau lub siab mog muag li menyuam yau thaum ub?

Kuv rov xav txog lub txiv ntoo ciab ntawd. Ua ntej metub muab pub rau kuv, tsis yog kuv thiaj nws thaum twg twb hais lus zoo. Muaj tej zaug nws raug niam cem vim txhoj pob, muaj qee zaug nws khib rau nws tej kwvtij hauv tsev. Tiamsis tej ntawd yeej hloov tsis rau nws lub siab zoo xyiv fab ntawd, thaum metub muab lub txiv ntawd rau kuv nyob rau Niam hnub. Cuag li nws twb hnov qab tag txhua txoj kev tsis zoo lawm, thiab nws muab tagnrho txoj kev hlub pub rau kuv.

Nyob rau Niam hnub, peb cia li kawm rov qab mus ua lub siab zoo li menyuam yau dhia mus rau ntawm yus niam, mus rau ntawm tus Tswv. Tswv Yexus yeej saib peb tseemceeb puag thaum peb nyuav pib tau yug los. Cia li mus cuag Vajtswv nthuav dav peb txhais tes zoo li tus menyuam yau, tso tseg tej kev mob siab, tej kev ntxhov siab thiab lub siab tawv. Vaj Leejtxiv yuav puag txawv peb, Nws yeej zoo siab txais yuav tej menyuam uas muaj lub siab hlub Nws tiag tiag.

Thov caw nrog kuv peb thov Vajtswv ua ke: Kuv Leejtxiv saum ntuj, nyob rau hnub nco txog leej niam, thov Koj kuj los ntsib kuv rau sijhawm no. Thov pab kom kuv paub hlub niam los ntawm lub siab ntshai thiab hwm Koj. txawm tias hnub no kuv tabtom nyob nrog tej neeg kuv hlub lossis nyob ib leeg, thov tus Tswv pab kom kuv tso tseg tej kev xav tsis zoo, tej kev tav kuv los nyob ze Koj. Tus TSwv, Koj twb tsim kuv los hauv ntiajteb no los ntawm ib tug menyuam mos. Tamsim no thov pab kom kuv tsav los cuag koj ntawm lub siab zoo li menyuam mos. Kuv tus Tswv Yexus, koj tsimnyog txais tau yam khoomplig zoo kawg nkaus ntawm kuv, yog kuv lub siab mog muag thiab puag ntsoog, Kuv taij thov hauv Tswv Yexus lub npe, Amees.

Ib tsoom phoojywg, ua ntej uas yuav pib mus rau ntau yam haujlwm sab nrau, cia li siv ib mentsis sijhawm los rov qab nrhiav “tus menyuam” hauv nej lub neej. Muaj ib lub khawm tes puag twg koj tsis tau ua? Muaj tej lus zam txim twg koj tsis tau hais tawm? Txhob cia lub siab tawv tav koj kev ua tau zoo li tus menyuam lub siab. Cia li tsav mus cuag tus Tswv, mus rau ntawm koj niam los ntawm lub siab mog muag zoo li tug menyuam thaum ub. Thov kom peb lub siab tau Vajtswv kev hlub tshoov kom loj hlob tuaj zoo li ib tug menyuam nyob kaj siab lug hauv niam xub ntiag. Rau qhov thaum peb coj lub neej zoo li menyuam yau, thaum ntawd ntuj ceeb tsheej yuav tsav los ze peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.