Lub neej nrog tus Tswv mus, muaj qee zaug peb yuav ntsib tej kev sim siab hauv lub neej. Kev sib ncaim, kev mob siab los raug, npog tag peb tej kev cia siab. Tiamsis thaum tsaus ntuj nti li ntawd, Vajtswv txojlus yeej tseem ci kaj lus tuaj, ntuas peb tias lub ntiajteb no tsuas nyob ib vuag xwb. Kev tuag tsis tau yog qhov caw xaus, rau qhov peb paub peb tabtom tuav Yexus Khetos tej lus cog tseg uas ruaj khov: Nws mus ua ntej tu chaw saum Leejtxiv tsev, yog qhov chaw kaj lug thiab kaj siab ib txhis.

Hnub no yog hnub 15/5/2026, kev thov Vajtswv txhua hnub thov caw sawv daws nrog tus sau Diane Pearson kawm txog lub ntsiab lus: LEEJTXIV TSEV MUAJ NTAU CHAV

“Hauv kuv Txiv lub tsev muaj ntau chav, thiab kuv tabtom yuav mus tu chaw rau nej. Yog tsis muaj li ntawd, kuv yeej yuav tsis qhia li no rau nej.” (Yauhas 14:2)

Kristine yog ib tug ntxhais 18 xyoo tabtom muaj ntau lub hophiaj rau nws lub neej. Tiamsis, ibpliag ntxhis xwb, nws ho ntsib tej teebmeem loj tshwm tuaj raug. Ib tug mob ua rau nws raug mus nyob tsev tshuaj, cov kws tshuaj kuaj tias tug mob ntawd kho tsis tau li.

Thaum ntsib kev txomnyem li ntawd, Kristine niam thiab txiv ua siab puag ntsoog thaum txais tau lo lus ntawm kws tshuaj: “Peb yeej pab tsis tau dabtsi li lawm, tsuas pab kom me ntxhais hnov nquag me ntsis rau tej hnub kawg xwb.” Nyob hauv tej kev mob siab ntawd, lawv tsuas vam khom cov kws tshuaj pab lawv tug ntxhais tawm tsam qhov kev mob no lawm xwb.

Donna, yog ib tug pab saib xyuas cov mob ntu kawg, rov qab cim nco txog: “Thaum hnov li ntawd, Kristine yeej mob siab heev thiab xav tsis thoob li, tiamsis thaum kuv mus saib nws rau hnub tom qab, nws lub ntsej muag txawv tag nrho.”
Hauv kristine txhais tes tsis yog daim ntawv kuaj mob txaus ntshai, tiamsis yog daim ntawv cov xim tshuaj pleev. Nws nthuav los thiab luag ntxhi hais rau Donna “koj xaiv ib xim os”

Txawm xav tsis thoob, Donna yeej xaiv xim ntxuab nqe noog. Thaum ntawd, Kristine mam qhia tawm meej meej:

“Kuv yuav tau mus nrog Vajtswv nyob lawm, yog li kuv xav npaj ib qhov zoo rau koj. Kom tom qab no yog wb rov qab sib ntsib saum ntuj ceebtsheej, koj yuav pom koj lub chav zoo nkauj yam xim uas koj nyiam”

Txij hnub ntawd mus, yog muaj leejtwg tuaj saib, Kristine yeej caw lawv xaiv ib xim rau lawv lub chav saum ntuj ceebtsheej.

Txawm twb ntau xyoo tau nrog cov neeg raug mob tawm tsam tej mob nyhav, Donna kuj xav tsis thoob txog ib tug neeg muaj kev ntseeg loj li ntawd. Donna yeej tsis tau pom dua ib tug ntxhais 18 xyoo twg muaj lub neej sab ntsujplig loj li ntawd. Kristine nkag siab tias lub neej hauv ntiajteb no tsuas nyob ib vuag xwb, yog ib qhov chaw sau peb so ib ntu rau txoj kev mus saum ceeb tsheej. Nws siv cov xim ntawd zoo li ib qho tim khawv rau lub neej ib txhis, pab kom cov uas tseem ua neej nyob hnov tso siab rau nws lub neej yuav ncaim ntiajteb no mus.
Kristine txoj kev ntseeg zoo li ib zaj nkauj nrov ncha, zoo li Tswv Yexus tej lus cog tseg hauv Yauhas 14. Lub sijhawm Nws yuav ncaim txhua tus, Nwskuj txhawb cov thwjtim tias:

Yexus hais rau nws cov thwjtim hais tias, “Nej tsis txhob txhawj thiab tsis txhob nyuaj siab, nej cia li ntseeg Vajtswv thiab ntseeg kuv. 2Hauv kuv Txiv lub tsev muaj ntau chav, thiab kuv tabtom yuav mus tu chaw rau nej. Yog tsis muaj li ntawd, kuv yeej yuav tsis qhia li no rau nej. 3Thaum uas kuv tu tau chaw rau nej lawm, kuv yuav rov qab los thiab tos nej mus nrog kuv nyob; kuv nyob qhov twg nej yeej yuav nrog kuv nyob qhov ntawd. Yauhas 14:1-3

Txawm Kristine twb mus nrog Vajtswv nyob lawm los, nws lub neej tim khawv tsis yog tag rau ntawd. Hnub ua nws lub nteeg, cov xim ntawd tau muab tso rau hauv nws lub hleb. Nws lub neej ntseeg tau muab tham rau txhua tug uas tuaj. Tsis tag siv tej lus siab lus tob, tiamsis nws lub neej tso siab nrho yog ib qho tim khawv tias: Kev tuag yeej kav tsis tau txhua tug uas twb tuav ruaj txoj kev cawmdim ntawm Yexus Khetos.

“Thaum txais yuav Tswv Yexus tiag tiag, yog peb tuav tau lo lus cog tseg txog lub neej ib txhis:” – Donna hais li ntawd.

Hnov tau koob hmoov heev thaum Kristine thiab nws tsev neeg saib txoj kev tuag dhau ntawm txoj kev ntseeg ruaj khov li ntawd.

Thov caw nrog kuv peb thov Vajtswv ua ke: Kuv tus Tswv siab zoo, kuv ua koj tsaug rau koj tej lus cog tseg. Thov pab kom kuv tuav ruaj koj tej lus kom ua tau tim khawv rau koj, txawm yog nyob rau lub sijhawm uas tsaus ntuj nti. Thov ntuas kom kuv nco ntsoov tias kuv lub tebchaws tiag yog nyob saum ntuj ceebtsheej, yog qhov chaw koj twb npaj ib chav zoo tseg rau kuv. Thov Pab kom kuv ua neej cia siab rau qhov no mus txog hnub tau ntsib koj. Txhua yam kuv taij thov los ntawm tus Tswv Yexus Khetos lub npe, Amees.

Ib tsoom phoojywg sawv daws, peb tabtom ua ntej rau lub ntiajteb ib vuag xwb, tiamsis muaj qee zaug peb ho rau siab mus caum tej uas tsis ruaj tsis khov hauv ntiajteb no, ua rau peb hnov qab peb lub tebchaws tiag tiag saum ntuj ceeb tsheej. Zaj uas hais txog kev cia siab txog lub ntuj ceeb tsheej tsis yog rau tseg rau cov neeg uas yuav ncaim lub ntiajteb no, tiamsis yog kev ntuas rau peb – cov uas tseem ua neej nyob tsim dheev: Cia li ua lub neej zoo li ib zaj tim khawv txog lub neej ib txhis. Thaum peb tuav ruaj Tswv Yexus tej lus cog tseg, ces kev tuag yeej tsis yog kev txomnyem lawm, tiamsis yuav yog ib qho kev sib ntsib tau koob hmoov – yog thaum peb tau ntsib Leejtxiv saum Nws lub tsev.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.