Koj yog hom neeg uas dabtsi twb npaj ua ntev kom tiav, lossis yog hom neeg tos txog sijhawm mam khiav mam ua? Mus lig ncav tsis cuag dav hlau ya, lossis ib rooj sib ntsib tseem rov kho tau. Tiamsis muaj ib lub sijhawm uas yog tias peb qeeb thiab lig lawm peb yuav khuvxim tag ib sim: ntawd yog thaum Tswv Yexus rov qab los. Thaum ntawd koj lub teeb cig ntawm sab ntsujplig puas tseem cig lossis tuag nti vim tag roj?

Hnub no yog hub 16/5/2026, Kev thov Vajtswv txhua hnub thov caw peb txhua tus nrog tus sau Marissa Nordlum kawm txog zaj kawm: KOJ PUAS TAU NPAJ SIAB KHOV KHO?

“Nej yuav tsum ceevfaj, rau qhov nej tsis paub hnub twg thiab lub sijhawm twg yuav muaj li ntawd.” (Mathais 25:13)

“Koj npaj siab khov kho lawm tau?” – kuv tus txiv lub suab mog muag hái stuajj, tshuav ob peb teev roob thiab txog lub sijhawm peb mus lawm. Peb twb npaj ua ntej rau txojkev peb yuav mus 20 hnub, tiamsis txog kiag tagkig no los kuv twb tseem npaj cuab yeej. Kuv twb hnov sab heev lawm txawm tias twb tsis tau pib mus.

Nej puas muaj leejtwg kuj pheej theem sijhawm zoo li kuv thiab? Tsuas sau cov ntawv no xwb kuv twb poob hws lawm. Hais tiag mas, lo lus “Puas tau npaj khov” cuag li caum kuv mus tag kuv lub neej. Kuv yog hom neeg pheej tos txog thaum “dej ntws txog taws mam plawv”. Txawm kuv lub hlwb yeej paub tias npaj ua ntej yuav zoo dua, tiamsis tsis paub vim li cas, kuv pheej cia txhua yam txog thaum kawg mam npaj.

Ib ntu los no, Vajtswv tau qhuab ntuas kuv txog kev npaj, thiab qhov ntawd thiaj hloov tagnrho kuv lub neej. Ob peb lub hli tag los, thaum kuv tabtom koom kev pehawm hauv tuamtsev (tseeb tiag kuv yeej tuaj lig), tug xibhwb pib qhia Vajtswv txojlus hauv Mathais 25: “Lub sijhawm ntawd Ntuj Ceebtsheej piv ib yam li kaum tus hluas nkauj uas taws teeb mus tos tus nraug vauv.” (Mathais 25:1)

Thaum tej lus sau hauv Mathais 25:1-13 nrov tuaj, ua rau kuv lub siab ntshai tag. Zaj xwm hais txog kaum tug ntxhais hluas nkauj mus tos tug nraug vauv.

Vajluskub muab tsib tus “muaj tswvyim” thiab tsib tug “tsis muaj tswvyim”, yog los ntawm qhov uas lawv npaj (Mathais 25:2-3). Thaum lub sijhawm tos, txhua tus puav leej pw tsaug zog. Thaum lub suab hu nrov rov tias tug nraug vauv tuaj lawm, tsib tug hluas nkauj tsis muaj tswvyim thiaj nco dheev txog tias lawv lub teeb yuav tuag vim tsis txaus roj. Lawv tsis npaj txaus roj rau txoj kev mus deb. Txawv lawv, tsib tug muaj tswvyim twb npaj roj txaus hauv lawv lub taub lawm, yog li lawv yeej tso siab mus rau hauv rooj tshoob nrog tug nraug vauv (Mathais 25:10).

Kiag lub sijhawm ntawd, kuv paub tias Vajtswv tabtom khob kuv lub siab. Koj puas tau muaj ib zuag kuj pom li ntawd thiab? Kuv hnov Tus Tswv lub suab ntuas kuv: Cia li ua tib zoo npaj ua ntej. Tsis yog tej haujlwm hauv lub neej xwb, tiamsis npaj rau koj sab ntsujplig tag nrho. Kuv puas tau npaj khov kho rau hnub tus Tswv rov qab los? Kuv tabtom ua neej tsimdheev, tos, lossis cia kuv lub neej ntws mus tiamsis tsis muaj kev npaj ua ntej li.

Tswv Yexus yeej yuav rov qab los tiag tiag, txawm tsis muaj leejtwg paub yog lub sijhawm twg, tiamsis ib hnub dhau ib hnub, lub sijhawm ntawd yim ze zuj zug. Koj puas tabtom ua neej rau hauv qhov kaj ib txhis? Koj puas taw koj lub teeb kom thaum twg twb cig kaj lug?

Hnub no, koj pom koj zoo li tsib tug hluas nkauj tsis muaj tswvyim – tsis txaus roj thiab kuj tsis kuj tsis npaj?Kev hwm thiab kev dawvhuv vij puag ncig kuv thaum kuv ntsib lo lus nug no. Kuv xav kom tau hu tias yog tug neej twb npaj txij thaum tus Tswv rov qab los. Kuv puas tau txais tau kev cawmdim. Tseeb tiag kuv yeej txais tau lawm. Tiamsis kuv puas txaus roj rau kuv txoj kev ntseeg, rau tej lub sijhawm uas tseem nyob tos tus Tswv? Ntawd yog lo lus nug uas txhua tug ntseeg yuav tsum cim civ nug yus tug kheej.

“Roj sab ntsujplig” yog lub sijhawm koj kawm nrhiav Vajtswv txojlus. Ntawd yog lub sijhawm koj muaj kev txuas lus nrog Vajtswv. Ntawd yog lub zog pab tuav koj lub teeb kev ntseeg tsis txawj tuag thaum ntsib tej nthwv cua hauv lub ntiajteb no. Thov kom peb lub neej tau Vaj Ntsujplig hliv roj cig tug hluav taws dawbhuv tsis txawj tuag kom coj tau lwm tug los cuag tus Tswv. Kom txog hnub tus Tswv rov qab los, tsis yog peb npaj txhij xwb tiamsis kuj pab tau ntau tug npaj txhij thiab.

Thov caw nrog kuv peb thov Vajtswv ua ke: Kuv tus Tswv Yexus uas muaj kev hlub, kuv ntshaw kom npaj txhij khov kho rau hnub Koj rov qab los. Kuv ntshaw kom kuv lub neej tau ua kom dawbhuv thiab hliv roj puv nkaus txhua hnub. Thov tuav kom kuv lub neej nyob ze Koj txojlus txhua hnub thiab rau siab rau kev thov Vajtswv Koj. Thov pab kom kuv sab ntsujplig cig kaj lug mus txog hnub kuv tau ntsib koj. Txhua yam kuv taij thov hauv Tswv Yexus Khetos lub npe, Amees!

Ib tsoom phoojywg, koj tabtom tuav ntawm tes lub teeb cig kaj lus, lossis tsuas yog lub taub tag roj lawm xwb. Cia li yog cov neeg muaj tswv yim npaj txhij khov kho tos hnub tus Tswv rov qab los. Txoj kev npaj ntawd tsis yog tej yam uas loj li loj, siab li siab, Tiamsis yog pib kiag hnub no mus los ntawm lub neej muaj kev sib txuas zoo nrog tus Tswv txhua hnub.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.