Thaum hnov Vajtswv lub suab hu, puas muaj zaum twg koj lub hlwb hais rau koj tias “cia li mus” tiamsis koj lub siab ntxhee nyho vim ntshai lawm los tsis tau? Peb thov kom Vajtswv taw kev, tiamsis thaum Nws kom peb cia li mus rau ib kuaj ruam yuam peb yuav tsum ntseeg siab rau nws tiag tiag, peb ho ua zuj zoj xaiv txoj kev uas zoo rau peb tug kheej. Yog li kev ntshai puas yog qhov kev tav ua rau peb txais tsis tau tej koob hmoov zoo hauv Vajtswv txoj kev hlub?

Hnub no yog hnub 17/5/2026, kev thov Vajtswv txhua hnub thov caw peb txhua tus nrog tus sau Kim Nanney kawm txog zaj kawm: NTSEEG SIAB HAUV TEJ KEV NTSHAI

“Hnub no yog nej hnov Vajtswv lub suab hu, nej tsis txhob tawv ncauj ib yam li yav tas los nej cov yawgkoob ntxeev siab rau Vajtswv.” (Henplais 3:15)

Lub caij ntuj so xyoo ntawd, peb tsev neeg mus ua si nram hiav txwv. Kuv tug tub xeeb sawv nres twjywm saum roob zeb, qhov muag ntsia ntsoov rau hauv hiav txwv. Nyob saum nkoj kuv pom lub roob zeb ntawd kuj tsis siab pes tsawg. Ntau tus twb plhawv dhau, tiamsis me tub tseem tsis kav mus dhau.

“Plhawv maj metub!” Nws niam txhawb nws “Tsi ua li cas os!”
Metub co taubhau thiab teb “tiamsis kuv ntshai heev!”

Kuv xav txhawb kuv tug tub xeeb zog yog li kuv thiaj mus saum lub roob zeb thiab sawv keeb nrog nws. Tiamsis, thaum ntsia mus hauv dej tsuas pom dej dub thiab tob cuag li lub qhov tsua. Ua rau kuv hnov ntshai tag ib ce, zoo li kuv tug tub xeeb.

Cas koj tsis plhawv?” tug me tub nug kuv. “Tos kuv mentsis” kuv teb nws, thiab maj nroos thov vajtswv.

Tug me tub hais rau kuv tias kom wb nrhiav lwm txoj kev nqis mus hauv zoo dua. Txoj kev ntawd yuav tso siab dua. Tiamsis kiag sijhawm ntawd kuv txiv hu hauv lub nkoj tuaj “tsis txhob los, pob zeb nplua heev, mus los yuav ntog hos. Cia li plhawv xwb!”

Yog li tom qab thov Vajtswv luv luv, kuv plhawv kiag rau hauv tug dej tob tob. Lub suab “npoos” nrov ncha, dej txiag heev, tiamsis thaum kuv tawm saum dej kuv hnov zoo siab heev. Tseeb tiag, qhov uas hnov txaus ntshai ntawd ho ua rau kuv hnov zoo siab tsis paub piav. Tiamsis kuv tug tub xeeb tseem tsis tau txaus lub siab tawv los plhawv.

Thaum kawg, kuv tug tijlaug kwvtij thiaj nqis tes. Nws yog ib leejtxiv ntawm peb tug menyuam, nws nqa tus me tub siab siab thiab tso me tub poob rau hauv dej. Txawm txaus siab rau lub tswvyim no los me tub yeej hnov khuvxim. Tiamsis thaum tawm saum dej nws kuj luag ntxhi ib yam li kuv.

Thaum txiav txim siab ua li kuv txiv hais hnub ntawd, kuv txawm xav txog Vaj Leejtxiv saum ntuj lub suab hu. Qee zaug, Vajtswv li kev taw kev yuav ua rau peb ntshai, tej zaug tseem pom nws tsi thooj li peb neeg ntiajteb kev xav.

Hauv phoo Yelemis, vajntxwv Xedekiyas ntsib ib qhov kev xaiv txog kev ciaj tuag: mloog Vajtswv lus lossis mus raws lub siab ntshai thaum ntsib ib txoj kev mus phomsij. Dhau ntawm tus cev lus Yelemis, Vajtswv twb hais meej meej: yog vajntxwv nws yeem swb ces tus tsaa yeej, tsev neeg thiab vajntxwv tug kheej yeej tau tso siab lug. Tiamis yog ua txawv, txhua yam yeej yuav raug puastsuaj (saib Yelemis 38:17).

Yog li Xedekiyas teb li cas? “Kuv ntshai…” (Yelemis 38:19).

Nyob rau ntau lub xyoo, Xedekiyas tsis kam hwm mloog tus Tswv lus. Txoj kev ntshai hauv yawg lub siab loj dua li yawg txoj kev ntseeg siab rau tus Tswv, yog li nuj nqis tom qab txais tau thiaj txaus ntshai heev. Xedekiyas thiaj poob tag nrho txhua yam lawv li Yelemis tau ceeb toom ua ntej, thiab tseem ntau dua li ntawd thiab (saib Yelemis 39:1-9).

Zoo ib yam li huabtais Xedekiyas, peb pheej ua zuj zoj ntev heev – kuj zoo li kuv thiab kuv tug tub xeeb saum lub roob zeb ntawd. Peb pheej ua zuj zoj mus txog thaum kev ntshai cia li yog peb txoj kev xaiv. Peb yoojyim raug dag ntxiag ua lawv tej yam uas yus pom tias yoojyim, tiamsis qhov tseeb tiag ntawd ho yog tej lub pob zeb nplua heev yooj yim ua rau peb sab ntsujplig raug mob.

Tiamsis ua Vajtswv tsaug, Nws tsis cia peb nyob ib leeg. Nws twb tso nws tib leeg Tub los puag txawv peb thaum tej kev ntshai ua rau peb caus yaum tag, kuj zoo li kuv tug tijlaug tau pab kuv tug tub xeeb mus rau hauv dej tso siab lug. Txawm peb cim civ mus los ntawm peb kev ntseeg lossis cia lwm tug txhais tes tuav peb, qhov tseem ceeb yog: Cia li mloog Vajtswv lus.

Thov caw nrog kuv peb thov Vajtswv ua ke: Tus Tswv, lub sijhawm no, kuv muab fij rau Koj tej lub roob zeb siab uas kuv tabtom ntsib, tej haujlwm uas kuv muab tso tseg tsi tau ua vim kuv ntshai. Thov Koj zam txim txhua lub sijhawm uas kuv cia kev ntshai tav kev kev ntseeg, cia tej kev tso siab ib vuag npog koj lub suab hu. Thov kom Vaj Ntsujplig pab kom kuv muaj lub siab tawv, kom kuv ntseeg siab rau koj thiab plhawv mus rau hauv tug dej kev hlub. Thov kom kuv muaj kev zoo siab thiab kev mloog lus puv npo hauv kuv, kom ntiajteb pom tias nrog tus Tswv mus yeej yog txoj kev uas zoo kawg nkaus. Kuv thov los ntawm tus Tswv Yexus Khetos lub npe, Amees.

Ib tsoom phoojywg, thov kom dhau lub sijhawm no, peb yuav qhib kiag peb lub siab los mloog Vajtswv lus, tsis txhob cia tej kev tawv siab lossis tej kev xav phem tav peb txhais ko taw. Tej thaum lub roob zeb ntawm koj yeej siab, thiabb tug dej hauv koj ko taw yeej tob heev, tiamsis tsis txhob cia tej kev ntshai coj koj lub neej. Nco ntsoov tias, plhawv mus rau hauv Vajtswv txoj kev hlub yeej zoo dua li sawv saum tej lub pob zeb nplua li nplua thiab tseem ua xyeem xyav. Cia siab tias koj tsis yog tsuas sawv ib sab saib lwm tus txais tau koob hmoov xwb tiamsis koj yuav ua siab khov kho mus kom txais tau kev zoo siab tiag tiag, thiab txais tau kev kaj siab uas tsuas tseg rau tug ua kam mus lawv li Vajtswv lub siab nyiam.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.