Rai kis do ò siớu tú tơngai ro rãn. Ò di ming bơta ro rãn tòm srê brê lơm, mơ kung la bơta ro rãn tòm nùs nhơm, la tú mơ he roh bơta gơn kơnòm, bơta jê sồt jó jong, la ală mang ming git hor dà mat mơ ơm mó mó. Tòm ală tú hớ, bol he lùp is lah: “Gen bơta kỡn gơboh, bơta kong ơt mơ ơt ơl ẵn jê gam gơs gơtha lơi sơl?”

Ngai do, ngai 03/06/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume KƠ̆ NÙS DI GÙL BƠTA JÊ SỒT.

“Rispa, kòn ùr Aija, ai ồi ào sơnò kiat mơ lă khai in hơđang dô nơm pơnai lŭ. Bơh di ngai bồ kơnhai toès jơl tus di tŭ gơs mìu bơh đang trồ dùh hơđang ală ƀồc bol khai, khai ò ai sềm rơp hơđang ƀồc tòm trồ ngai, hala phan poan jơng tus rềp tòm trồ mang.” (‭‭II Samuel‬ ‭21‬:‭10‬)

Tòm nùs kơ-lôi tú gam dềt, me an la dồ nă cau ùr khin cha. Mẹ niam mơ kung pràn kơldang sơl. Mẹ lòi wơl dồ nơm krơh dồ nă cau khin kơ-lôi mơ khin lơh. An kah ală tú mẹ an hào rơndeh cèng an lòt còp ală kon sau Yàng tòm Hìu Jum Goh. gùng lòt bềng lú mơ ờ niam lơh an in rngot. Mơya me sồr an ơm mo mó mơ me kứ at rơn deh mơ đơs chò. An ờ rngot tai, tài bơh bơh an git mẹ ơm mơ an. An kung kah tú me cùn gơltang hòi dăn kòp mang. Gơs tú mẹ nhìm. Gơs tú mẹ ơm mo mó dê đap mat Yàng. tú hớ an ờ hềt git loh, mơya tú an neh dờng, an dờp git lah ală tú hơ mẹ an gam tom lơh tài bơh kon mẹ dê mơ jơnau hòi dan. An kung kah tus ală tú chò hòp ndai, tú mẹ tề an lòt còp cau tòm brê. Bol he lòt tus hìu kalke ngan, mơ tus dê đap hìu kon so Becgie dờng sơnđoh dê đap bol hi. Tú hớ, mẹ an dê kìng mơ sền gar an. Me ờ git lơh bơta lơi, ming đơs “kiki, kiki” gen bèhớ la kon so ờ khoal tai mơ gơ om mo mó.

Gơs oă ngan ală bơta an kah bal mơ mẹ an dê. Sră goh cih ​“Ñcau sền òsơp di ngai ală bơta dềt rhền taih?” (‭‭Sacari‬ ‭4‬:‭10‬) Yàng ờ sền ờ sơp ală broă dềt. Mơ kung bè hớ gơs dồ nă cau mẹ tòm Sră Goh, mìng lơh ală broă dềt mơya bềng bơta kờn gơboh, mơ lồi dut gơlik gơs dồ nă cau mơ Yàng ngui tus dê bơta toh glài mơ bơt bơtào wơl tus dê làng bol mò dê.

Jơnau yal yau mò dê geh cih tòm ală tap dut sră 2 Samuen, dê gùl bơta bòl glar jê sồt. Làng bol Israel lòt gan jê gloh rung tòm 3 nam. Tú ồng David hòi dăn mơ Yàng Tòm Trồ, ồng dờp git sèng hơ wơl hớ la tài bơh tồi glài ồng Sol dê tú ồng lơh roh bơta hơ bal mơ tơn chơt cau Gabaon. (2 Samuen 21:1-2) nàng jơh bơta jê gloh rung, David neh ai gơnoar cau Gabaon ai bơta kơp kờn. Bol khai kờn 7 nă cau, pal kong yồng ngko, tềng taih Ghibea, mơ ală cau do la kon sau ồng Sol dê, tòm hơs gơs ală kòn mò Ritpa. Tòm dồ ngai bar nă kon mò dê kòl cau yồng ngko. (2 Samuen 21:3-9)

Mìng dồ êt jơnau geh cih, mơya bol he rgơi sền goh bơta jê sồt dờng ngan gơ wèt mơ cau mè tú sền gó bơta chơt kon he dê kong cau yồng ngko. Mò ờ rgơi kup kơryan gơnoar sồr cau bơtau dê, mò kung ờ rgơi tòm dră mơ làng bol Gabaon gam gơjran.

Tú lòt gan bơta bòl glar, gơs cau sac bơta ờ niam nàng sàl tê wơl. Mơya kung gơs cau sac bơta di bơh bơta kờn gơboh mơ gơlik gơs dờng. Tềng tiah jê sồt hớ, mò Ritpa neh kơ nùs ngan. Mò neh sơntờm bơh broă dềt mơ ală cau ùr Israel lơi kung rgơi lơh: “Rispa, kòn ùr Aija, ai ồi ào sơnò kiat mơ lă khai in hơđang dô nơm pơnai lŭ. Bơh di ngai bồ kơnhai toès jơl tus di tŭ gơs mìu bơh đang trồ dùh hơđang ală ƀồc bol khai, khai ò ai sềm rơp hơđang ƀồc tòm trồ ngai, hala phan poan jơng tus rềp tòm trồ mang.” (‭‭II Samuel‬ ‭21‬:‭10‬) gơlơh mò bè dồ nă cau gơs bơta pràn dờng ngan, mò ờ di ơm dề hớ tòm dùl bar ngai, mơya bơh kơnhai do tus dê kơnhai ne. Mơ kơ nùs bơh broă mơ oă cau sền la ờ kwơ, mơya gơwèt mơ mò do la broă dờng: ờ pà ai cau tup dê bồc kon mò dê. Bơta kờn gơboh mò dê neh gơlik gơs bơta pràn mò in. mò tomdră jai mơ bơta tomgơl trồ tiah dê, mìu, càl, noat mrềt, bơta bòl glar bal mơ bơta jê sồt dồ nă cau mè roh kon de.

Bơta lơi lơh mò in tơl pràn nàng lơh bè hớ? Hớ la bơta kờn gơboh cau mè dê. Dồ bơta kờn gơboh dờng rlau mơ bơta jê sồt. Dồ bơta kờn gơboh lơh mò in ờ sang lòi.
Broă mò Ritpa lơh neh tus dê tồr David, mơ hớ David neh cèng jơh ală bồc hìu nhă mò Ritpa: bơh Sol, Jonathan, tus dê ală kon mò dê, mơ ală kon klau Merap la cau kong yồng, cèng tơp dồ bă niam. Bơta do niam nùs Yàng. “Tơnơ̆ mơ hơ̆ Yàng Tom Trồ ho wơl jơnau hòi dan lơgar in.” (‭‭II Samuel‬ ‭21‬:‭14‬). Ritpa ờ di la cau ùr lơbơn lơnho, mò neh gơlik gơs dồ nă cau ùr pràn kơldang tus dê ală cau mò kờn gơboh, tus dê hìu nhă, mơ neh gơlik gơs dồ nă cau nàng Yàng Tòm Trồ rgơi toh glài, dờp jơnau hòi dan, lơh roh bơta jê gloh rung mơ bơt bơtào wơl làng bol mò dê.

Digolan ngai do he sền gó broă he lơh bè dềt rhền. Dồ êt fuk pơjum mơ hìu nhă. Dồ sèng Sră Goh tơngkah kon lài tú rê bic. Dồ jơnau hòi dăn kòn in kờp àng drim. Mơya ban sền ờ sơp ală gar sơtìl dềt hơ.

“Cau lơi dòn song tòm broă dềt rhền, gen kung dòn song tòm broă dờng” (‭‭Luka‬ ‭16‬:‭10‬)

Yàng Tòm Trồ ờ sền ờ sơp ală bơta dềt bơh neh lơh bơh bơta kờn gơboh mơ bơta dờn. Mơ digolan, să tờm ală bơta dềt hớ gơlik gơs mơnàng bơta dờn tus dê jơi bơtiàn tơ nớ.

Dan jà bol he dô nùs bal tòm bơta hòi dan: Khoai Yàng kỡn gơboh, gơs tú kon sên gó kon ò tơl pràn nàng lòt tai. Ală bơta jê sồt, roh lơm mơ kơp gơn tòm tú jơ jó jong lơh kon in bol glar ngan. Mơya bơh bơta yal yau Rispa dê, dan bơto kon git lah Kơnràn ò tú lơi húi dà mat hor ơm kon Kơnràn dê. Dan ai kon in bơta pràn pa nàng kon kừ don song tòm ală bơta dềt rhên, nàng gam kỡn gơboh bulah gơs bơta jê sồt, gam hòi dan digul ală ngai ro rãn, ò hềt gơs jơnau ho bơh ală bơta jê sồt kon dê. Dan Yàng dong kon git dòn kơnòm di bơta nđàc Kơnràn dê kòp ngai. Dan rai kis kon, bulah lơbơn lơnho, gam gơs Kơnràn ngui nàng ceng bơta sơm bòi mơ bơta lơngai tus cau ndai in. Kon jơh nùs hòi dan ai sơnđan Yàng Jesus Krist, Amen.

Ơ ală ồng mò oh mi kỡn gơboh, digơlan ngai do ồng mò gơs bơta bol glar kal ke oă ngan. Gơs ală jơnau hòi dan ồng mò oh mi neh hòi dan oă nam mơ ò hềt gó jơnau ho Yàng dê. Gơs ală bơta jê sồt lơh ồng mò in lơgah lơgãn mơ kỡn lòi ală bơta. Mơya dan bẵn lòi. Kừ pơnjat kơnòm bơta nđàc Yàng dê kớ cê rang tơlik bơta kỡn gơboh ồng mò oh mi dê. Dan kừ hòi dan ală oh kon he in, kừ kỡn gơboh cau tòm hiu nhă he dê, kừ don song tòm gơnoar broă Yàng jao, bulah cau ò gó hala ò kòp. Digơlan bơta kớ nùs ồng mò oh mi dê ngai do rơp gơlik gơs dô nơm ntung nàng Yàng in ceng bơta sơmbòi, bơta bơt bơtào wơl mơ bơta lơngai tus oh kon, hiu nhă, Hiu Jum Goh hala ală cau ơm gut dar. Dan Yàng dong bol he gơlik gơs ală cau kớ nùs digul bơta jê sồt mơ kừ don song jơl tus lôi dut.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.