Ală ngai sơn tơm tơm kơnhai rlô do, tú mattơngai sol hơ đăng nha băl mơ ală ntas kni lam gùng dạ, gơ lơh be kợp nă bol he cau lơi kung geh gơs bơta rơn dap is he di, ală bơta lot nhơl nàng “ai phan bàn is” gơwet mơ să tơm he, Mơya, digul bơta rngôr rngac hớ, nus nhờm oh mi gơ lơh wi wơ? Gơs tú lơi oh mi gơ lơh be ming ơm dô nă lơm tơm digul mpôl oă cau găm chơ hợp, tài bơh broă lơh kơnjớ kơnjit ngăn hala rài kis găm ơm tơm bơta siau siêr? Ngai do, dăn ja oh mi rlô dô êt mơ an, săng jơh ală bơta kơlôi rcăng, nàng joi bàn dô bột bơlào ring lơngai tơm digul hwêng nus he di.

Ngai do, ngai 05/06/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume AN CHƠ HỢP TU AN GIT “TƠL” 

“Mơya nùs duh rngòt bal mơ bơta hừh nùs, hơ̆ la bơta cồng nha dờng.” (I Timôthe 6:6 )

“Mơya nùs duh rngòt bal mơ bơta hừh nùs, hơ̆ la bơta cồng nha dờng. Bơh bol he ò cèng phan lơi tòm tŭ mut tòm dunnia, mơ bol he kung ò rgơi cèng phan lơi tòm tŭ lik sơl, mơya dilah bol he gơs phan sa phan soh, gen hừh nùs rau.” (I Timôthe 6:6-8)

Niam ngăn, kơnhai rlô rơp tus, mơ bơta kis kung lik gơs niam lơhơn, chơ hơp rlau tai. Kung tus di tú pal cơt ơyung hơ đơm chi găm lik pơkao hàng mơné, mơ sing ôs, rcăng bơta nô sa băl mơ ală ban bô pơkah jat bơta sa is kợp nă di!

Oh mi dop git loh bơta cho hợp tơm tú mut tơm kơnhai prau – tú jơ geh kơp la ntas kèng sơn tơm kơnhai rlô bìng bơta kơp gơn.

Kơnhai rlô kơp năm kung be hớ. Hơđăng gùng cao tốc, rơn deh pơn jat rơn deh hàng rbô kây ò rgơi lot tus, tai bơh oă ir, gơ lơh be ntum sàm găm rơlé dô bơh tiah dờng nàng lot tus di tiah rlô ing.

Trồ tiah neh yăl lài là lik gơs niam gơwet mơ bơta lot nhơl. Bơta kơn teh bơh dô nơm rơn deh par liah, cèng dô nơm srăng yal tơgit bơh bơta nô sa buffet niam ngăn bal mơ bơta ràng tơl lik pháo hoa àng gơcrà di gah dà lêng.

Đơs ngăn la, digul kơnhai rlô chơ hợp be hớ, nus ăn geh dơrcul. Digơlăn oh mi gơ lơh krơi is:”nchi bơtai dô nă cau gơs nus moat jrum bơh jơh ală pơnah mơ ơm bal mơ digaul cau ndai geh nus chơ hơp be hớ? Kơnhai rlô neh tus rau!”

Mơya gơ la bơta geh gơs! Jơh dunnia găm ơm tơm bơta chơ hợp, ming dô nă he ò geh gơs. Tú hớ, ăn kơp kờn geh gơs dô bơta ntas kơni moat jrung nàng pơn dờm pơn iang nus nhơm he di.

Bơta lơh an in moat jrum là tài bơh jen pria hìu nhă an di găm siau siêr. Bol he pal săng jơh ală bơta rơn dap lot nhơl. Ur clau an di neh “kơt but chap klung” jong ngăn tian gơs an gơ lơh be să tơm he la cau tơm găm ràng tơlik dô nơm phim đơs bơh bơta rơbah rơ ời mơ bol glar. Đơs ngăn la, an gơ lơh lơbơn siau bơh bơta “ mìng git lơh mơ ò git ngùi”, mơ ngăn, gơ lơh an in sơ ệt sơ êl.

Digul bơta kơlôi rcăng, an dơp git jơnau niam lơhơn Yang di – Gơp Bơyô Dêt Mêr an di “Mơya nùs duh rngòt bal mơ bơta hừh nùs, hơ̆ la bơta cồng nha dờng.”(I Timôthe 6:6 )

‘Ngăn, khoai Yang, kon git nền seng Sră Goh hớ, mơya dăn ai kon in gùi têng do mơ moat jrum dô êt tai gợi.”

Gen tàng, be dô na ưkon dệt geh gơs nus sơ êt sơ êl, an neh pừ tơm mpang tê cau gơp bơyô ndai di: ơyung kời hìu. An choal tê kơl gơl, tơnggơr sền hơ đăng jong ală nha, sền ală tê chi nhô gơ ryai ma kiau, kơl dơl ală mattơngai àng gơcra di.

Lồi dô êt, an kơlôi sơ nơng bơh jơh ală bơta he geh nus ưn ngai Yang, Nisơna, ală bơta gut dar sơn tơm tơm gơl tú nus nhườm an di geh tơm gơl bơh dơlam.
Bic hơđăng ơyung, ăn sền gó ală bơta; jơnau kơn teh lac tac bơh vòi dà hìu gah an, jơnau hoi ja ală kon ur dệt gah ne gùng găm tac dà ple srat lơngăm mơ jen dipal ngan.

An sền mơ bàn bau clau an di găm lơh wơl mài pẻ kláp tơrlung. Khai neh ơn kơn mu di kơi – têl sơđô ai he in git khai lơh nền pal lơh mài do in geh pa wơl.

An sền di kon so 12 nam an di, găm sền dô nơm kon kung kăng par ma kiau. Bar nơm kon so ndai găm nhơl kéo co mơ dô nơm preng nhựa, tơm tú hớ mò meo sràng kờn gơboh an di găm ơluh dô nơm sềm tơlir bơ ngơl.

Ngan be hớ, rài kis têng dô ring lơngai ngan, gen an ưn ngai Yang tài boh la kon Yang di!

Bulah dunnia bơhdih găm gi ga li bơta rơn dap rlô ing niam ngăn, ăn dơp git ơm wơl di hìu he di kung la tú jơ rlô ing chơ hợp ngăn.

Digơlăn lồi poh do oh mi kờn geh tip mat an, gen git an ơm têng pơ rau. Ăn rơp bic hơ đăng ơyung mơ kơ lôi sơ nơng bơh ală bơta niam lơnhơn!

Be Jơnau Yang tơm Philip 4:8 geh cih la :”“Lồi tơnơ̆, ơ oh mi, dilah bơta lơi song ngan, bơta lơi màng ryŭ; bơta lơi song ring, bơta lơi sàng goh, bơta lơi pal kòñ gơboh, bơta lơi gơs pơnro niam, dilah gơs bơta kơ̆ dơn lơi, dilah gơs bơta lơi pal jòng ro, gen oh mi pal kơlôi sơnơng tĕ di ală bơta hơ̆.”

Dan jà bol he dô nùs bal tòm bơta hòi dan: Khoai Yang Jesu kờn gơboh kon di, kon ưn ngai Yang tài bơh kơnhai rlô rơp tus, bal mơ ală bơta lơngai Yang neh tuh bìng lìu hơ đăng rài kis kon di. Dăn Yang toh tồi glai kon di tài bơh kon neh lời bơta boah gơjran, moat jrum mut tơm nus kon di tú kon sền gó ală bơta hàng mơné dunnia do di mơ húi bơta nđac Yang neh ai kon in. Dăn Yang Hwêng Goh ai kon in git hưh nus. Dăn bơtô kon in git joi bàn bơta cho hợp tơm bơta mòng os rlau jơh. Dăn nus kon di gơwet sền di bơta niam rlau jơh, nàng rài kis kon di lik gơs jơnau đơs chờ jong rơ bơta nđac Yang di kợp ngai. Kon jơh nus hoi dăn Tơn Sơn Đăn Yang Jesu Krist, A-men.

Ơ ală ồng mò oh mi kờn gơboh, dớ dớ rài kis ò ai bol he in bơta lot nhơl pas sơm hala bơta nô sa liu lac be dunnia neh hơ. Mơya Bơta Dong Klas Jesu-Bơtau sền gar hwêng nus he di – neh hơ ai bol he in bơta rlô bol pha rlau mơ bơta git wă he di. Bol he moat jrum ò di bơh siau siêr phan mơna, tài bơh he kứ sền di bơta he ò rgơi geh mơ ò git sền kwơ màng ală bơta he geh gơs tơm Yang. Tú bồ tơngoh he di bìng lìu bơta song ring, bơta sàng goh, bơta lơi pal kòñ gơboh, gen tàng dô nơm ơyung yau ơm kời hìu kung lik gơs lơgar đăng trồ hơ đơm ù tiah. Oh mi ò càng nàng lot ngai nàng joi bơta chơ hợp, bơh Jơnau Niam he neh dơp git la Jơnau Niam bơta hừh nus di. Ban lời bơta àn kơn jớ tơn roh bơta chơ hợp kợp ngai di. Sền te gut dar, mơ oh mi neh bàn bơta nđac Yang di găm ơm tơm kợp jơnau đơs chờ sềm di, tơm kợp bơta nhó cau dệt mêr he di, bal mơ bơta ring lơngai tơm hwêng nus git tơl.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.