Gơs ală ngài bềng càl-rbùt, bol he sền gŏ he kung be dô nơm ơhò dềt digùl càl-rbut dờng bơdih dà-lềng dờng. Ryà dà be tơm-bềng jơh nùs kơlôi, lơh he in ò rgơi tă nhơm. Gơs ală bơta jê-sồt ò rgơi hòi sơnđan, mơ gơs ală ơnòng kơnjơ̆ bulah pơnđơl pràn mbe lơi, bol he kung ò rgơi tơngguh ìs să he. Bol he òs pơndòm-pơniàng ìs he lah pal pràn kơldang tĕ nàng lòt gan ală bơta gơlòng bol glar. Mơ ya gơs ală tŭ tom rài kis, kòn mơnùs pal kong alah. Ală bơta hơ̆ gơlik tus nàng oh mi in dòp git lah: bol he pal cang dòn kơnòm di Yàng ò di kơnòm pràn ìs he di. Mơ bơta niam rlau jơh la bol he gơs dô Bơtau ò bơdơh sền gar mơ hòi-dan ala he in.

Ngai do, ngai 07/06/2026, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Maria Schleicher bơh tơnggume GƠS DÔ BƠTAU ÒS SÙM HÒI-DAN ALA OH MI IN

“Kơnràñ gam kis sùm nàng hòi-dan ala bol khai in.” (Hebrơ 7:25)

“Mơya tài bơh Yàng Jesu la Bơtau kis sùm sùm, gen tàng Kơnràñ dòp geh gơnoar broă ơn phan duh khoai ò gơs tòmgơl. Tài bơh hơ̆, tàng Kơnràñ rgơi dong klàs wil tơl ală cau kơnòm di Kơnràñ mơ lòt tus rềp hơ Yàng Tom Trồ, bơh Kơnràñ gam kis sùm sùm nàng hòi dan ala bol khai in.” (Hebrơ 7:24-25)

Oh mi neh tŭ lơi sền gọ̆ he jê-sồt tiàn gơs ò gam git pal kơnòm di tiah lơi tai? Bulah la să-jàn, nùs nhơm hala hwềng nùs- hơ̆ la bơta jê-sồt bơklơn nhơm tă, lơh bol he roh jơh gơn kơnòm, mìng kơp kòñ joi dô ềt ring-lơngai liah?

Añ neh gơkòl tom dô pah ngai behơ̆. Bơta jê-sồt bơh di ƀưt ntoàt tus hơđơm pòs jơng kung be ồs duh(dung nham) gơhòr tom gùng mham. Ò gơs dô bơta ñă, nggui lơi lơh añ in ƀuôn soh, ò dô bơta rùc hala tồ lơi cèng wơl bơta nggòc-nggơr. Bulah neh lòt gan bơta jê-sồt tŭ dèh kòn be òs ò ngui sơnơm nàng ò ji-sồt, añ kư pal đơs song lah: Òhềt tŭ lơi añ pal lòt gan bơta jê-sồt lơi jê-sồt ngan behơ̆. Tŭ hơ̆, añ òhềt git lah ntòl ntìng neh lơbơn di đah ƀlang ngkơi añ jê neh lơh jê-sồt behơ̆. Añ sền gŏ he ò gơs pràn tai mơ gơkòl săng loì. Jơl tus di tŭ gơs dô nă cau cơnoà tus, ala añ đơs dờng mơ tomlơh ala añ in-di tŭ hơ̆ añ ò gam pràn nàng rgơi kơlôi rcang ìs he in. Bơta dong kơl hơ̆ neh tơngkah añ kah bơh jơnau sŏng ò tŭ lơi tơm pơrgơl tom Hebrơ 7:25: “Kơnràñ gam kis sùm sùm nàng hòi-dan ala bol khai in.”

Cau gơnoar sơnơm bơt wơl nting añ jê sồr añ pơnđang rùp MRI, mơ ya cau gơnoar sơnơm hiu sơnơm gen ò bai ai sră nàng rgơi cèng añ tus hiu sơnơm ndai jơl tus di tŭ lơh sir 12 poh ‘vật lý trị liệu’. Ƀùt añ kŭn hơđơm, cơnoà ò tus, añ git bơta hơ̆ la ò rgơi lơh bơta lơi. Ồng hơ̆ đơs añ rơp ò tơl jền prĭa nàng dòp bơta pơnđàng rùp MRI tài bơh gơ kàs ngan.

Tŭ hơ̆, cau sền gar ơdŭ sền kòp jê nàng bơt wơl nting sơnđan la Tammy neh pal ƀư tê. Sền gŏ bơta jê-sồt añ pal kong, khai ò rgơi ñtào nàng sền lơm. Khai hòi ală hiu sơnơm in mơ tiah hiu sơnơm dờng đah bơdih tom kơnhwàl. Khai lòi wơl jơnau, kong ơt gan kờp bơta ho wơl, mơ ò bơdơh jơl tus di tŭ joi bàn gùng dong kơl.

Mho ngai hơ̆, Tammy joi bàn dô nơm hiu sơnơm tom ƀòn gơs ală bơta tơnrùc khà oă ai cau kòp rgơi dòp jên mat. Khai ơn ngai nàng tìp añ in di tŭ 7 jơ drim ngai hìng-nau. Cồng nha MRI ai gŏ tơm ryàs jơh ală bơta jê-sồt: dô ntòl kơting lơbơn 18mm gơtèp di sê sơnră (thần kinh tọa) kơnjơ̆ ngan.

Pơnđơl pràn ò tŭ lơi bol glar Tammy di hơ̆ la gùng dong tă bơta kis tom tŭ klam jơngo rlau jơh rài kis añ jê. Añ dòn lah broă lơh khai di ò di mìng la nùs nhơm niam kòn mơnùs di, mơ kung la dô tềl sơnio gơs ngan bơh bơta kòñ gơboh mơ bơta hòi-dan ala mơ Yàng Jesu ai añ in.

Tơm tŭ hơ̆, gùng hơ̆, mơ bơta rcang ai hơ̆ wĭl tơl ngan nàng rgơi sền la dô bơta gơlik gơs dô tŭ bal. Yàng Jesu gam lơh broă gan khai, rgơi ai bơta pal cang añ in tom tŭ añ ò gam gơs pràn lơi tai. Bơta hòi-dan ala Kơnràñ dê ò tŭ lơi la dô bơta kơlôi sơnơng ngài ngan. Kơnràñ gơs mat mo tom tŭ jơ gơlik gơs ngan, gan ală cau mơ nting mơ poăc, mơ jat gùng mơ mìng dô nă Kơnràñ song rgơi rơndap.
Dilah bơta kong ơt dô nă cau bềng nùs nđàc sơngit rgơi tơm gơl ală bơta crih-crài behơ̆, gen bơta hòi-dan ala bềng kòñ gơboh, ò bơdơh Yàng Dọ̆ng-Klàs Jesu di gam lơh broă hơđang rài kis bol he pràn kơldang ò git nđò? Kơnràñ ò tŭ lơi bòl glar, ò lòi roh dô pơnah dềt lơi, mơ ò tŭ lơi bơdơh tơngkah sơnđan oh mi di đap sơbàn gơklọ̆ Yàng Bèp dê.

Bulah tơm tŭ bol he ò gam gơs pràn tai nàng tơmlơh ìs he in-bulah la bơta jê-sồt tom să-jàn, jê-sồt tom nùs nhơm hala bơta rọ-ràñ hwềng soàn-gen Kơnràñ gam at-bồ mơ tề lăm jơh ală bơta jat gùng mơ mat poăc să ò rgơi sền gŏ, nàng ai bol he in bơta mơ hwềng-soàn bol he pal cang.

Dan jà bol he dô nùs bal tòm bơta hòi dan: Khoai Yàng Jesu kòñ gơboh, kòn jơh nùs ưnngai Kơnràñ tài bơh Kơnràñ la Bơtau gam kis sùm, gam gơs sùm nàng sùm sùm hòi-dan ala kòn in. ală tŭ kòn gơdùh tom tơrlung jrô ò gơs pràn, ơm ìs hala sền gọ̆ he gơkòl dunnia săng loì, dan tơngkah hwềng nùs kòn lah Kơnràñ ò tŭ lơi bơdơh tơnggơr sền mơ hòi-dan ala kòn in. dan hwềng soàn kòn geh rlô-bòl, tài bơh kòn git he ò tŭ lơi ơm ìs, bơh sùm gơs Kơnràñ ơm digah tề lăm mơ sền gar pơndòm-pơniàng. Kòn jơh nùs hòi-dan tom sơnđăn Yàng Jesu Krist, A-men.

Ơ jơh ală ồng mò, oh mi kòñ gơboh, kơlôi sền tĕ rùp să Yàng Dọ̆ng-Klàs Jesu gam nggui đah ma Yàng Tom Trồ, mơ Kơnràñ gam jơh nùs hòi-dan ala să tòm oh mi in tom tŭ jơ do. Ai tĕ nùs ngềt ngơt mơ ơn Kơnràñ jơnau ưnngai tài bơh dô bơta lơngai loh lang mơ Kơnràñ neh ai oh mi in-ñưk la tom ală tŭ tơngai bòl glar rlau jơh, tom tŭ bơta dòn lơbơn lơñọ lơh oh mi in ò rgơi đal git bơta gơs mat Kơnràñ di. Dòn nền tĕ lah oh mi ò tŭ lơi gơkòl loi hŭi, oh mi ò tŭ lơi gơkòl sang lòi, mơ ò tŭ lơi tom rài kis oh mi siău bơta sền gar Bơtau òs sùm hòi-dan ala oh mi in.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.