Rài kis hơđăng dunnia do bềng ală càl rbut gơlik tus mơpdơl. Gơs oă dơ̆, bŏl he păl cơnđòa lòt bơh hwing nùs njơ̆-njŭt tài bơh ală tềl sồt òhềt rọh. Ală tềl sồt bơh lài or băl mơ ală bơta iơh gơlik gơs buơn ngăn lơh bŏl he ĭn bŏl glăr mơ ơm is dô nă. Digul tiah klăm jơngọ cik , gen gơs dô nơm gùng nàng lik klàs ală ơnòng ji sồt hơ̆, hala bŏl he kư̆ lòi bơta srat bơtang sa siar rọh bơta dòn he di?

Ngai do, ngai 09/06/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Beth Patch dê bơh Tơnggume JI SỒT MƠ LỀ LAC

“Ơ jơh ală cau kong bòl glar lơh broă mơ àñ kơnjơ̆, tus tĕ hơ Añ; Añ rơp ai bol mê in rlô bòl.” “Mathiơ 11:28)

“Ơ jơh ală cau kong bòl glar lơh broă mơ àñ kơnjơ̆, tus tĕ hơ Añ; Añ rơp ai bol mê in rlô bòl. Bol mê tui tĕ yô Añ jê mơ bơtê jat Añ, bơh Añ gơs nùs niam lơnhơn mơ pơndêt să, gen hwềng soàn bol mê rơp geh rlô bòl. Bơh yô Añ la ƀuơn mơ phan àñ Añ jê la nggòc.” (Mathiơ 11:28-30)

Tòm dunnia tồi glài do, gơs oă cau păl git lăm ală bơta srat bơtang ngăn ir rài kis kọn mơnùs di. Gơs dơ̆, bơta ji sồt hơ̆ tus bơh ală bơta gơlik gơs Yang ai gơnoăr gơlik gơs. Mơya kŭng gơs tŭ, gơ rơp la ală bơta ji sồt ir bơh tồi glài mơ nùs iơh bơsak nùs kọn mơnùs di mơ gơs.

Mò Debbie òs geh dờng tòm hìu nhă Jơnau Niăm gơs rơndăp tap sèng niăm. Ò jŏ tơnơ̆ tŭ lik bơh klờng. Mò tìp Kyle, dô nă cau pơnu Pơjum băl tòm dô nơm Hiu Jum Gọh. Tơnơ̆ dô năm jòi git lọh băl, Kyle gơs jơnau koñ gơboh. Debbie hòn chò ngăn gen gơs jơnau “ời di”, nùs bềng bơta kơp gơn bơh dô nơm hiu nhă rĭng lơngai tus kọ sŏh.

Mơya, mìng nđợ kơnhai tơnơ̆ ngai tòm hòp bay, tŭ Debbie găm hòn chò tòm bơta rĭng lơngai bơkah lơngồt di gen gơs dô nơm broă gơlik tus. Dô tơngai nhô ri bơh lơh broă, mò nrơt nrơl tŭ dòp git bau klau he bơrnŭl ngăn. Tòm bơta gơjrañ ngăn, khai neh ngùi bơta pràn tê di gen neh lơh pù mò njơ̆-njŭt ngăn. Rngòt rngơt ngăn, khai họi điện thoại cau gơnoăr bơtọ at bồ sền gar Hiu Jum tơn. Cau gơnoăr bơtọ neh jơh nùs dŏng kòl, họi dăn sền gar đah hwing bar nă ur klau ĭn oă poh rlau. Tồn lah ală bơta rĭng niăm, tus di dô măng ne, Kely ai phào neh sơnap gar ơn tòm bồ bau ur khai. Tòm bơta nrơt nrơl ngăn, Debbie mìng jòi gùng dô ntoat lik. Bulah hiu đah me khai wic ngài ngă, mơya ò git bơta gơkrơi lơi gen Debbie neh ntoat dô tus tòm gùng ri hiu me ngài ngăn nàng dŏng klàs să khai. Khai neh kis bơh đah poăc să, mơya đah dơlăm jrô ndơp gen gơs dô bơta lơi bơcah lề lac rau. Bơta dòn khai di kŭng rơp rọh. Khai ơm tòm sèng cau kòl khủng hoảng tâm lý, ò dòn kơnòm dô nă cau lơi tai. Debbie lơh nền sră tòm lòi bau klau Kaly, mơ ji sồt rlau jơh, khai kung săng bơta dòn tòm Yang Dong Klàs Jesu.

Broă gơlik gơs mơ Debbie ràng tơlik dô bơta òs mòng srat bơtang ngăn lah: kòp nă bŏl he, ñcau lơi kŭng cèng añ tòm he ală bơta ji sồt lề lac. Đah bơdih, bŏl he rơp sọh bơta rĭng lơngai, rơndăp niăm mơya tòm dơlăm là ală dà măt gơhor njơ̆-njŭt òm. Nàng jòi wơl bơta sơmbòi đah hwing mơ dòp geh bơta gơs kwơ đah hwing bơh ală bơta iơh gơlik gơs hơ̆, bŏl he càng sền wơl gùng dà cơnđòa bơta dòn Hop di, Jakơ mơ să tom Yang Dong Jesu nàng bơtê git broă tìp băl mơ bơta ji sồt.

Bulah la dô nă cau wil tơl mơ sŏng ngăn, duh rngòt Yang Tom Trồ, Hop neh păl añ kŏng ală bơta pơnji pơnkôr njơ̆-njŭt: phăn mơna rọh jơh, să jan kŏng pơnji pơnkôr, mơ ji sồt rlau jơh là jơnau chok glài srat bơtang tus bơh ală cau bơyô dềt mềr. Tơ’ai lah bau ur ồng di, diđap hiu tum tơrlah tơrlơm, kŭng sac rwah săng lòi, rọh bơta gơn kơnòm mơ bơta dòn tŭ srat bơtang driau dờng lah: “Srat sơntơm tĕ Yàng Jehôwa mơ chơt tĕ!”. Mơya Hop ò lơh behơ̆. Digul bơta klăm jơngọ chơt hơ̆, Hop sac rwah wèt nùs he hơ Yang Jehôwa. Tòm bơta klăm jơngọ rlau jơh hơ̆, ồng dòp git bơta jrô ndơp rlau jơh bơta lơbơn lơño poăc să dê mơ bơta păl càng ngăn wil tơl la gơs Yang. Hơ̆ bơta bơtê đah hwing kwơ màng ngăn gen kọn mơnùs mìng git wă lọh tŭ lòt găn gơlòng bŏl glăr. Poăc să òs mòng bŏl he di la jọng să, kơnòm pràn is òhềt dòp git lah găm tơhir Yang git nđợ. Tòm ală tŭ klăm jơngọ rlau jơh rài kis di, Hop neh sac rwah rê hơ Yang, gen hơ̆ kŭng là dô nơm gùng dà rlau jơh bŏl he jòi bàn bơta yò đo mơ gơn kơnòm jŏ jọng.

Gơtha dơ̆ bar bơta ji sồt hơ̆ la tŭ lơmpah ròng siam plai đo đah hwing băl mơ ală bơta niăm her ngăn. Jơnau Yang tòm Jakơ 1: 2-4 tơngkah bŏl he tìp li bơta gơlòng bŏl glăr gen kòp tĕ jơh ală bơta hơ̆ be la bơta hon chò dờng, tài bơh bơta lòng bơta dòn gơlik gơs bơta kơ̆ nùs, dŏng bŏl he gơlik cồng nha wil tơl tồ ọh mi in geh wil tơl, ò siơ̆u siar dô êt lơi. Ngăn behơ̆, Yang Tom Trồ rơp ngùi ală bơta gơlòng bŏl glăr tòm rài kis nàng bơtọ tơngkah, yò đo mơ lơh bơtơl jrô ndơp bơta dòn bŏl he di. Bơta pha is ơm tòm tiah : bŏl he păl lơh mbe lơi diđap li bơta lòng hơ̆, gen rơp gơs rcang sir dòn bơr bơta tòmgơl Yang Hwing Gọh di hala ò?

Dan jà bol he dô nùs bal tòm bơta hòi dan: Khoai Yang la Yang Tom Trồ ală bơta pơndòm pơniang. Kơnrẵn git lọh ală ji sồt, ală dà măt gơhor òm mơ kon păl añ ơnòng is tòm dunnia tồi glài do. Dăn tă tơlik bơh kọn nùs srat bơtang, hiah hat hala kơldăng nùs diđap ală bơta iơh gơlik gơs. Dăn Yang Hwing Gọh koar, thoa rpa mơ sơmbòi ală bơta lề lac tòm nùs kon. Dăn ai kọn ĭn git lăm bơta rlô bŏl mơ lơngap lơngai rlau ală bơta git lọh tòm Bơtau Krist Jesu. Dăn Kơnrẵn at bồ mơ tòmgơl bơta ji sồt moat jrung kọn di gơlik gơs tŭ lơmpah nàng gơlik plai đah hwing geh sơlơ dờng, tồ kọn rơp ngùi bơta pơndòm pơniang he dòp geh gen tồ lơh ram ală rài kis gut dăr kọn. Kon jơh nùs họi dăn, ai sơnđăn Yang Jesu Krist, Amen.

Ơ ală ồng mọ ọh mi koñ gơboh, bulah he găm tìp ală bơta ji sồt lơi, băñ sac rwah wơlke plac săng bơh Yang. Khin cha tĕ wèt nùs he bơh Yang Jehowa digul klăm jơngọ chơt. Lòi tĕ Yang Hwing Gọh tòmgơl ală bơta lề lac tòm nùs he gơlik gơs plai niăm, gơlik gơs tomryas pơndòm pơniang tồ yò đo ală rài kis bŏl glăr kalke gut dăr. Tŭ do mo, dilah he găm cèng dô nơm bơta ji sồt dờng ir, pơndơh tĕ, jào phi ală bơta Yang ĭn mơ rlô bŏl tòm Kơnrẵn. Yang Dong Jesu găm kơp gơn he.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.