He neh gơs tú lơi dờp bơta dong kờl tòm tú he tìp bơta kalke tòm rài kis he dê sơl ơ? hớ la mpàng tê yò đơ tú he gơ plớ, dồ jơnau đơs pơndòm tú he kờn sang lòi, hala dồ bơta dong tă crih crài mìng Yàng Tòm Trồ sùm rgơi lơh. Ală tú jơ hớ lơh nùs nhơm he dê bềng bơta rngoh rngac, sơn dồi bơr bềng jơnau chò hòp tòm jơnau ừn ngài bal mơ ală broă lơh ràng tơlik nùs ừn ngài.

Ngai do, 10/06/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume BƠTA NĐÀC MƠ BƠTA DUH BROĂ

“Mơya añ do la cau be lơi, hơ̆ la kơnòm di bơta nđàc Yàng Tom Trồ dê, mơ bơta nđàc Kơnràñ neh ai añ in ò di la ò kwơ. Pơrlơ̆ wơl, añ kong bòl glar lơh broă rlau jơh mơ bol hơ̆; mơya ò di la bơh añ, hơ̆ la bơh bơta nđàc Yàng Tom Trồ dê neh ơm mơ añ.” (‭‭I Kôrintô‬ ‭15‬:‭10‬)

“Gen Yàng Jesu mut tòm hìu Pier, gŏ po me khai bic kòp prơm. Chòp Kơnràñ ƀư dê tê mò, gen kòp prơm thit mo, mơ mò guh duh broă Kơnràñ.” (Mathiơ 8:14-15)

Tòm ơdú hìu sơnơm bềng bơta bô dà sơnơm, bau klau an dê bic tềng cơnờng hớ, muh mat bềng bơta bòl glar bơh neh lòt gan bơta reh, gùt dar bềng ală che bal mơ dà sơnơm. Dà sơnơm lơh roh bơta jê sùm geh tơmut tòm să jan bau klau an dê. ừn ngài Yàng neh pà ai bol hi in tus hìu sơnơm mơ geh cau gơnoar sơnơm dong kòl di di jơ. Mìng tòm dồ êt jơ bơh tú gơs cồng nha sền swì bơta kòp jê, bau klau an dê geh cèng mhar hìu sơnơm mơ geh reh tơn tòm măng hớ.

Ală ngai pơnjat tòm hìu sơnơm, ồng mọ cau gơnoar bơto hìu jum bol hi dê tus pơjum, hìu nhă, ală ồng mò oh mi, cau bơyô làm bă tiah sùm kah bol hi tòm jơnau hòi dăn mơ dong kòl. Gơs cau hòi dăn ala bau klau an in tềng ơdú hìu sơnơm, gơs cau hòi dăn bơh điện thoại, bềng ngan bơta kờn gơboh, kah kơlôi, dong kòl mơ pơndòm pơniang bol hi. Gơs dồ bơta dồ bă bal tòm ală jơnau hòi dăn, hớ la ală broă gơlik gơs ờ di dồ bă nísơna, mơya gơs kai gơ dê. Mơ Yàng neh dong tă bau klau an dê geh reh mhar nàng khai rgơi geh lơmpah kis tai mơ pơnjat duh broă Yàng. Bulah tòm să jan gam oă bơta jê, bulah tòm nùs gam gơs bơta nrơt nrơl, bulah nùs kờn Yàng dê bơh broă do ờ hềt git loh làng, mơya ală jơnau hòi dăn ala bol hi in sùm lòt bal tòm nùs nhơm ùr klau bol hi dê.

Tòm 3 sră Mathio, Mak, mơ Luka, jơnau yal wơl bơh poh me ồng Pier dê geh cih dồ êt jơnau lơyăh. Mò gam ơm hơđang cơnòng mơ kòp mprơm. Tòm rài yau kòp do rgơi lơh cau in rgơi chơt tài bơh gam siơu oă tòm ală gar sơnơm. Bơta krơi is hớ la Sră Goh đơs tus oă bơh bar broă lơh: Yàng Jesu sơm bòi mơ mò sơntờm ntào nàng duh broă Yàng (Mathio 8:14-15) mơ duh broă ală cau (Mak 1:29-31 mơ Luka 4:38-39)

Poh me ồng Pier dê ờ rgơi lòt tus mơ Yàng. Mơya să tờm Yàng neh mut tòm hìu ngai hớ, mơ ală cau ơm tềng hớ neh dan Yàng sơm bòi mò in (Luka 4:38). Kơn tus rềp, bư dê mò, lah pơrhơng bơta kòp jê mơ som bòi mò in. Tú jơ hớ, mò ờ hềt lơh bơta lơi Yàng Jesu in nàng geh dờp bơta nđàc tus bơh Yàng.

Broă gơlik gơs mơ mò kung la broă gơlik gơs mơ bol he. Rài kis bol he dê dilah ờ bơh bơta nđàc Yàng dê, dilah ờ bơh să tờm Yàng “neh jòi mơ dong cau glài” gen bol he sùm la cau glài, ờ gơs bơta gơn kơnòm lơi. Oă cau tòm bol he kung neh dờp git bơta don tă krơi is Yàng dê, neh geh Yàng sơm bòi, geh Yàng dong tă bơh dồ broă dờng, geh Yàng bơt wơl tòm bơta tombau, hìu nhă, …

Tơnớ mơ Yàng Jêsu sơm bòi, poh me ồng Pier neh ntào mơ duh broă tơn. Tòm tú dờp bơta nđàc, mò neh tơm wơl mơ bơta duh broă. Do la nùs nhơm ờs mờng bơh dồ nă cau dờp git he neh geh Yàng nđàc sơnghit. Bơta sơm bòi Yàng dê là sơntờm dồ rài kis pa, dồ rài kis cèng tus bơta duh broă Yàng, dồ rài kis bơh tiah geh cau ròng siam tú do gơlik gơs cau duh broă cau ndai in.

Oă dớ, bol he mhar gơdùh tòm bơta dờn mìng kờn dờp geh. Bol he dan Yàng som bòi, ai lơngai, dong tă, pờ gùng mơ dờp jơnau he kơp kờn. bol he chò nùs tài bơh neh geh dong klàs, mơ bè poh me ông Pier, Jơnau Yàng bơtê bol he pal gơlik gơs cau duh broă Yàng.

Ồng Pol neh cih wơl jơnau lơh cơng ồng dê: “Mơya añ do la cau be lơi, hơ̆ la kơnòm di bơta nđàc Yàng Tom Trồ dê, mơ bơta nđàc Kơnràñ neh ai añ in ò di la ò kwơ. Pơrlơ̆ wơl, añ kong bòl glar lơh broă rlau jơh mơ bol hơ̆; mơya ò di la bơh añ, hơ̆ la bơh bơta nđàc Yàng Tom Trồ dê neh ơm mơ añ.” (I Kôrintô 15:10)

Ồng Pol lài òr la cau kup kơr Hìu Jum Goh. Bơh tú tìp Yàng tòm gùng lòt Damas, do la tú rài kis ồng geh nđàc sơnghit, nàng kis dồ rài kis ràng tơlik nùs nhơm git ừn ngài Yàng bơh bơta duh broă. Poh me ồng Pier kung bè hớ sơl. Sră Goh ờ cih wơl dồ broă dờng lơi, mơya broă mò ntào duh broă Yàng mơ oă cau tơnớ mơ geh Yàng sơm bòi neh sơnio gó rài kis neh geh Yàng tom gơl dồ bă loh làng rlau jơh. Bơta duh broă digolan là rcang phan sa, pơs wàs hìu đam, hala wă rò ală cau nac crih, … Ală broă ờs mờng tòm rài kis kòp ngai do neh gơlik gơs ală broă bềng bơta chò nùs mơ git ừn ngài bơh dồ nă cau neh tìp Yàng, neh đal git Yàng mơ neh geh tomgơl.

Duh broă Yàng ờ di la gơnoar broă mìng cau gơnoar bơto, mpồl nha broă, ală cau tề lăm kòp mpồl di ờ. Mơya la kop ală cau neh dờp geh bơta nđàc bơh nùs nđàc sơnghit Yàng dê. Bè poh me ồng Pier neh sơnio he in dồ nơm krơh niam.

Bau klau an dê pơnjat tai tòm bơta sơm bòi kòp jê, gam ơm tòm rơndap sơm bòi, mơya bol he dờn nền tòm bơta sơm bòi Yàng dê, mơ bulah ngai pơnjat gơlik bơta lơi, bol hi sùm dờn kơnòm dê Yàng mơ dan nùs kờn Yàng gơlik di ngan hơđang rài kis bol hi dê.

Dan jà bol he dô nùs bal tòm bơta hòi dan: Khoai Bèp kờn gơboh, kon ừn ngài Yàng tài bơh oă dơ Kơnràn neh ràng tơlik bơta nđàc hơđang rài kis kon dê. Gơs tú kon lơbơn lơnio, roh nùs, kòp jê hala húi gùng, mơya Yàng ờ sang lòi kon. Yàng neh tus rềp, yò đơ, mơ bơt bơtào wơl rài kis kon bơh bơta kờn gơboh dờng ơ nàng Yàng dê. Ơ Yàng, dan bơta nđàc Yàng dê pà ai kon in gơlik kwơ màng. Dan tom gơl nùs nhơm kon dê nàng kon git kis ừn ngài Yàng bơh broă lơh, chò nùs duh broă Yàng mơ cau ndai. Kon jơh nùs hòi dăn, ai sơnđăn Yàng Jêsu Krist, Amen.

Ơ ală ồng mọ oh mi kờn gơboh, bơta duh broă sơn tờm bơh ală broă dềt rhền. hớ rgơi là dồ jơnau hòi dăn ala, còp cau kòp jê, lơh cơng bơh Yàng dồ nă cai in, dong kòl dồ nă cau gơkòl bòl glar. hớ rgơi la broă gơlik gơs cau bàp, cau mè kis lơh krơh tòm hìu nhă. Kung rgơi la dồ nă cau lơh broă tòm ală tiah lơh broă, … kis jat Jơnau Yàng kòp ngai tòm bơta kơlôi sơnơng mơ broă lơh. Dan bơta nđàc Yàng dê tom gơl rài kis kòp ngai bol he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.