Bol he neh òs mòng mơ bơta kư̆ ño mơ đơs lah:“Ăñ ring lơngai” – bulah tòm nùs nhơm bềng tơl càl rbut. Ồng mò oh mi bòl glar sơl tŭ kư̆ pal pơnđơl nàng ràng tơlik he la dô nă cau pràn kơldang? Yang kah kơlôi tus đah bơ dìh kung be tòm dơ lam nus kòn mơ nus bol he dê. Yang kah kơlôi tus bơta song kòn mơ nus he dê, kòn mơ nus ò càng pồn di đap mat cau ndai mơ ya kư̆ tuh tơlik sa tòm he dê đap mat Yang. Gơs dơ̆, tòm tŭ jê sồt mơ gơ tup pừ rlau jơh, bol he đal git bol he pal cang gơs Yang ò git nđò…..

Ngai do, ngai 11/06/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Jessica Teed bơh tơnggume: TIAH KING CRŬ DIGÙL CÀL RBUT DỜNG

“‘Ơ ală làng bol, kơnòm tĕ di Kơnràñ sùm sùm, Tuh tơlik jơh ală bơta bơh nùs bol mê di đap Yàng; Yàng Tom Trồ la tiah kìng crŭ bol he dê.” (Đơs Crih 62:8)

“Hwềng soàn añ rlô lơngap lơngai mìng tòm Yàng Tom Trồ lơm; Bơta gơn kơp añ jê tus bơh Kơnràñ. Mìng Yàng la lŭ klềr añ jê, la bơta dong klàs añ, Mơ la theng kìng crŭ añ jê; añ rơp ò wañ lơnggơh. Bơta dong klàs mơ bơta ryŭ ryơm añ jê la bơh Yàng Tom Trồ; Kơnràñ la lŭ klềr pràn kơldang añ jê, tiah kìng crŭ añ jê tòm Yàng Tom Trồ. Ơ ală làng bol, kơnòm tĕ di Kơnràñ sùm sùm, Tuh tơlik jơh ală bơta bơh nùs bol mê di đap Yàng; Yàng Tom Trồ la tiah kìng crŭ bol he dê.” (Đơs crih 62: 5-8)

Muh mat añ gơ lơh duh ngan, gơ suh tài bơh dà mat gơ hòr oă ngan. Poan jơt phàm jơ neh lòt gan gơ wèt mơ añ gơ lơh be dô nơm phim. Mơya gơs dô bơta añ git nền cê: ò rgơi lòt găn bơta kalke do dilah ò gơs Yang. Bic hơđang cơ nơng, pơn đơl bic, mơya mpau iơh bơh bar ngai rngot rngơt neh lòt gan kư̆ ơm tơm bồ dơ ngoh añ jê. Bau klau añ neh loa rài dô bă nisơna – bi rê mơ Yang mhar ngan. Añ ò jai nhìm, plai nus gờ rềt, mơ bơta kơp kòñ do mìng la dô nơm bơta mpau gòi.

Tòm tŭ jơ roh bơta gơn kơnòm ò git nđò, di gùl dà mat duh hôl hơ̆, añ neh rac dan mơ Yang: “Khoai Yang, kòn ò git pal lơh bơta lơi, mơya kòn git kòn ò rgơi cơn đoà tai dilah ò gơs Yang. Dan Yang dong tă kòn.” Tŭ dà mat neh mor jơh rau, añ bic tơn, mơ tòm tŭ jơ hơ̆, dô bơta ring lơ ngai krơi is ngan neh gơ wàng hwềng soan añ.

Tòm tŭ geh tìp ală tŭ tơ ngai càl rbut kalke rlau joh tòm rài kis, bơta os mòng kòn mơ nus dê la kòn pôn ndơp să wơl, lik ngài ală cau gùt dar mơ pồn nus nhơn nền ngan he dê. Bol he os pơn đơl nàng ràng tơlik să tòm he ring lơ ngai, tài bơh ràng tơlik bơta lơ bơn siơ̆u gơ lòt bal mơ bơta roh ring lơ ngai. Mơya, tŭ bol he tus rềp mơ Yang, nus nhơm bơ cah lề sơn tòm geh sơm bòi. Pò nus he mơ Yang, tuh tơlik jơh ală bơta jê sôt dê đap mat Yang hơ̆ la bơta bol he pal cang lơh, nàng rgơi sơm bat kơ̆ bơta dòn di gùl càl rbut.

Jơ nau Yang tòm Na-hum 1:7 cih lah: ‘Yàng Jehôwa la niam, la theng kơ̆ cê tòm ngai bòl glar. Kơnràñ sền gàr ală cau in kìng crŭ di Kơnràñ. ‘

Tòm tê Bèp hơ đang trồ la bă tiah ring lơ ngai rlau jơh nàng rê wơl, lài ngan la tŭ plai nùs he bơ cah lề. Yang la tiah king crŭ kơ̆ cê di gùl bơta bol glar. Yang ò tă tơlik cal rbut tơn, mơya Yang ai pà bol he in bơta pơn dòm pơn iang mơ geh ring lơ ngai di gùl miu càl dờng.

Đơs crih 62:8 tơng kah: ‘Ơ ală làng bol, kơnòm tĕ di Kơnràñ sùm sùm, Tuh tơlik jơh ală bơta bơh nùs bol mê di đap Yàng; Yàng Tom Trồ la tiah kìng crŭ bol he dê.”

Dilah ồng mò oh mi lòt mơya gơ hŭi cèng ô nisơna dô nơm miu tuh, gen bol he rơp ntoat mhar nàng rê tus hiu gòñ . Tài bơh he git lah tềng hơ̆ gơs ồi ào ro, bơta ram mơ dô nơm mơ ngàn dà duh kơp gơn.

Di gùl cal rbut rài kis dê bol he gơs bar bơta sac rwah: ràn tus mơ Yang nàng jòi bă tiah king crŭ , hala ntào di gùl rài kis mơ kư̆ lòi bơta kalke gơ kram he. Càl rbut la bơta ò rgơi pleh klas;- hơ̆ la cồng tòm gơ dê. Tơnggu bol he dê ò dê la pleh ală càl rbut mơ la jòi bàn bă tiah king crŭ tòm tŭ càl rbut dờng.

Sền sơwì Đơs Crih 91:4: ‘Yàng rơp jơm gòm mê kung be iar me jơm gòm kòn tòm tiah đar gơ dê, Mơ tòm tiah đar Kơnràñ dê mê rơp kìng crŭ să he; Bơta dòn song Kơnràñ dê kung be khèl mơ phan đo mê dê. ‘

Bòl he jòi bàn bơta rlô bol tòm Yang. Mơ ya ò dê dơh wơl tềng hơ̆, hơ̆ la bơta dòn song mơ ală jơnau ho pơ gon Yang dê rơp rcang, gơr wàng mơ sơm bat kơ̆ jơng bol dê. Be Jơnau Yang cih:

‘Sơnđan Yàng Jehôwa ngan la dô nơm theng kơ̆ cê; Cau song ring ntoat tus tềng hơ̆, geh lơngap lơngai. ‘ (Jơnau Pơnđik 18:10)

‘Mơya cau lơi gơn kơnòm di Yàng Jehôwa gen rơp geh pràn pa, bol khai rơp pò pơnđar par jơnhoa hơđang kung be klàng bung; bol khai rơp ntoat mơ ò bòl glar, bol khai rơp lòt mơ ò lơgah lơgañ.’ (Esai 40:31)

Kah wơl tĕ ală cau bơtê hơđang ơ hò di gùl dà lềng lơng gah. Tŭ sền gŏ Yang Jesu lòt hơđang dà lềng tus rềp, bol khai gơ lơh rngot rngơt ngan. Añ kơ lôi sơ nơng tŭ hơ̆ bol khai rngot rngơt mơ ò git lòt gùng lơi tai. Digơlan bơta rngot rngơt sa loan jơh bol khai tơn.

Ồng mò oh mi gơ lơh be hơ̆ sơl? Añ git să tòm añ kung neh be hơ̆. Mơya nisơna Yàng Jesu đơs mơ bol khai lah: “Kơ̆ tĕ nùs; Añ do, bañ rngòt.” ‘ (Mathiơ 14:27)

Hơ̆ kung la jơ nau mơ añ kòñ đơs mơ ồng mò oh mi tòm ngai do. Bulah càl rbut dơng đah bơdih, hala bơta moat jrung sa loan nus nhơm he dờng ò git nđò, kư̆ dòn lah sum gơs dô bă tiah ring lơngai sum sum tòm tơ wòr tê Yang Dong Klas Jesu. Bañ lòi bơta rngơt lơh gơ kòl jơng he dê, kung bañ lòi bơta klam jơ ngo pìt bơta gơn kơ nòm. Khin cha tĕ, tài bơh Yang ơm tềng do, di gùl càl rbut, nàng sơm bat kơ̆ tê ồng mò oh mi dê.

Dan jà bol he dô nùs bal tòm bơta hòi dan: Khoai Bèp kòñ gơboh, kòn tus mơ Yang bal mơ jơh ală bơta bơcah lề mơ bòl glar kơn jơ kơn jut hơđang pơn nì. Ưn ngài Yang tài bơh Yang ò sồr kòn pal pràn kơldang, Yang sền dờng mang ală dà mat mơ git loh bơta bol glar kòn dê. Khoai Yang, tòm tŭ jơ do, kòn dan jào Yang in ală bơta dơrcul, bơta roh gơ coh mơ jơh ală bơta kòn ò rgơi đơs gơlik gơs jơnau. Dan tê gơ nap gơ noar Yang dê kwoar kòn, gơr woang kòn hơđơm tơ wor tê kòñ gơ boh Yang dê. Dan ho mơ hwềng soan kòn jơ nau đơs lơbơn niam Yang dê lah: “Kơ̆ tĕ nùs; Añ do, bañ rngòt., nàng kòn gơs tơl pràn kơldang nàng cơn đoà tai. Kòn kư̆ don nin lah bơta nđàc Yang dê gam bềng tơl kòn in tòm ala bơta gơlik gơs. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, bulah dà lơ gar gùt dar gơ tơrluh hala nùs nhơm kòn mơ nus gơ tòm gơl, gen bơta kòñ gơ boh Yang dê gam la lŭ klir gam sum sum nàng ồng mò oh mi king crŭ . Dan bơta lơ ngai jòng rlau mơ bơta git wa Yang Tom Trồ dê sền gar nus nhơm mơ bơta kơ lôi sơ nơng bol he dê tòm Bơtau Krist. Kư̆ dòn kơ̆ , tài bơh tơnơ̆ mơ dô măng klam jơ ngo jòng, mat tơngai ring àng drim gơ tòm gơl pa wơl rơp tus. Yang gam cih pơn jat rài kis he dê gan dê bơta nđàc mơ bơta kòñ gơ boh ò tŭ lơi tòm gơl.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.