Gơs oă cau đơs lah alah bơta sôr lăm Yàng dê tòm Sră Goh ngăn la kăl kê, lơh roh bơta khat gơboh, mơ kùng gơlơh be lòt rlau mơ bơta pràn jơi kòn mơnus dê. Bol he òs sền ală bơta boh lăm đah hwềng be la dô bơta àñ kơñjơ̆, ala bơh dô bơta nđàc. Mơya, tơnơ̆ mơ kòp jơnau bơtô sồr Bè Hơđăng Trồ dê sùm la tơnggu rơndăp kờñ goboh lòt rlau mơ bơta wờng git bol he di. Ală bơta boh lăm hơ̆ ò hềt tŭ lơi la chè kơt căp bơ klơn, mơ la pơngàr nàng sền gàr bol he klas bơh bròng jrô ală bơta tis di.

Ngai do, ngai 14/6/2026, tonggu hoi dăn Kòp Ngai dăn ja oh mi kơlôi sơnưng bal jơnau Yang kơnòm bơta dong kòl Kellin Gibson dê bơh tơnggu me BƠTÊ KỜÑ GƠBOH BƠTA BOH LĂM YÀNG DÊ

“Kơñ gơboh di Yàng Tom Trồ hơ̆ la bol he prăp gàr ală bơta sồr lăm Kơnràñ dê; bơta sồr lăm Kơnràñ dê ò di là kơnjơ̆.” (1Jang 5:3)

Rềp do, añ gơs tŭ sền wơl phim “Bơta yal yau bơh Ron Clark” mơ dô ngăn la dô nơm phim lòi wơl añ in oă bơta kah kơlôi. Bộ phim cih wơl bơh rài kis cau pơgru Ron Clark- dô nă cau cèng tòm he dô nơm sơmpol ồs bơta kòp kơñ bơtô dê. Jat jơnau hòi ja bơta kòp kờñ dê, ông neh khin chà săng lòi rai kís lơngap lơngai, tơl bơta nàng ơn să tòm dô nơm klờng bơtê bềng bơta bol glăr mơ oă bơta iơh digùl ƀòn New York.

Mơya, bơta ngăn ò di la mpau. Ngai sơnròp dòp ơdŭ ông di wil tơl la dô bơta kong alah ngăn. Tòm tip mơ ală cau kơnòm kơldăng bồ mơ ò rgơi bơtô, ông Clark dòp git lah bơta mơ ală oh hơ̆ càng ò di ming la chữ gòi, mơ la dô bơta bơtê tiarbơh tòm dơlăm. Ông sơntòm dong ală oh wờng dô jơnau song ƀă lĭa: ơdŭ siău bơta boh lam mơ gùng dà gèn ming la dô mpôl solồng sơlăng.

Gùng dòp git ông di loh làng ngăn: dilah ală oh cơnđòa lòt tòm bơta sôr lăm di păl, kờp jơ bơtê ròp gơlik gơs bềng bơta chò hòp mơ gơs gơtha. Pơrlơ̆ wơl, bơta bơtao tòm dră nền cề ròp gơlăm tus ală cồng nhà iơh òs gơ di. Bơh sơnròp, mpôl kơnòm mìng git tơñọ̆ tơnhial, bol khai sền ông be dô nă cau pơgru kràñ cê, kalkê. Mơya tŭ tongai lòt găn, bol khai drĕ drĕ ƀàn wơl tơnơ̆ mơ bơta boh lăm lòs hơ̆ la nhòm tă dô nơm plai nùs kờn goboh dê, dô nă cau bơtô ngăn kờñ ală bơta niam rlau jơh ai rai tơnơ̆ ală kơnòm he in.

Sền wơl sèng yal yau hơ̆, añ nisơna dal git gùng lòt jat Yàng kòp nă he kùng gơs bơta ndrờm behơ̆ sơl.

Sră Goh tòm sră 1 Jang 5:3 geh cih:

“Kơñ gơboh di Yàng Tom Trồ hơ̆ la bol he prăp gàr ală bơta sồr lăm Kơnràñ dê; bơta sồr lăm Kơnràñ dê ò di là kơnjơ̆.”

Neh tŭ loi oh mi sên gŏ Sră Goh be la dô nơm danh sách cih ală bơta sồr lăm bơkơŭ rò ràñ, hăt hăl mơ gơloh be ò rgơi lơh jat sơl? Ngăn lah, bol he kùng ò pha is mơ ală cau kơnòm bơtê kơldăng bồ cau bơtô Clark năm hơ̆ dê. Să tòm bơta tôi glài neh lơh nus cau golik gơs kră kơldăng, lơh bol he in ƀuôn gơjràñ, tòm dră hala kờñ săng lòi kòp nơm nàm-jat. Bol he òs ming bơtô jat cồng nhà kwờ dô pah tŭ jat poac să mơ huĭ ală cồng nhà iơh jê nùs jŏ jòng. Moya ưn ngai Yàng, bơh Kơnràñ la Cau Bơtô Lơbờñ Niam, sùm kơ̆ dờn gòm gơrwàng bol he hơđơm mƀùr gơnăp gơnoăr Kơnràñ dê.

Cau Bơtô Clark wơng loh lang ală gơnoăr sôr mơ ông neh ơn wil tơl la bơh bơta kwơ ală kơnom bơtê in, bơh ông sền gọ dô nơm rùp mơ ală kơnòm ò hềt gŏ: hơ̆ la dô nơm ơdŭ bơtê bơta dô bă bal mơ bơta kờñ goboh. Kùng behơ̆, bulah poac să bol he lơbơñ lơñò hala kờñ pơndang săng mƀe lơi, Yàng găm git loh lah Jơnau Kơnràñ la mpan soñio ming dùl dong bol he gơlik gơs wil tơl tom toh mơ tơnggu đăp jòng mang mơ Kơnràñ neh crng gơs.

Tom tŭ bơtê pơndềt să,dòn dùh mơ cơnđòa lòt tòm jơnau song, hwềng soan bol he bềng liu bơta rìng lơngai mơ bơta chòp hòp hơđăng trồ.

“Bơto tĕ kòn dềt in dô nơm gùng dà khai pal jat; bulah tŭ khai neh kra, kùng ò tŭ lơi sang lòi gơ”. (Pơnđik 22:6)

Dan jà bol he dô nùs bal tòm bơta hòi dan: Khoai Yàng Jesu kờn gơboh, kòn ưn ngai Kơnràñ bơh neh sang lơgăr trồ gơ klŏ, mù dunnia nàng lơh wil tơl boh lam, hơ̆ la bơta mơ pràn is kòn di ò tŭ lơi rgơi lơh gơs. Dan Yàng toh glài ală dơ̆ kòn sền ò sơp Jơnau gơwèt mơ Jơnau Kơnràñ, gơ sùm la tòm ryas bơta jak chai tơngkah tơngkañ tề lăm cơnđòa kòn. Dan Yàng Hwềng Goh tơl pràn nàng kòn don song cơnđòa jat Kơnràn, tò ai kòn in git lam bơta kis tơngkah tongkañ mơ Kơnràñ neh ai pà. Kòn jơh nùs hoi dăn tòm sơnđăn Yàng Jesu Krist, Amen.

Ơ ală ông mò oh mi kờñ gơboh, di lah ông mò oh mi găm gŏ he neh tis gùng jŏ jòng, kơ̆ nùs tĕ bơh ò tŭ lơi la neh rlau nàng cơndòa ri wơl. Kòp kỡn ông mò oh mi sền tew bơta kỡn goboh Yang găn di dô nơm krơh pa, nàng gŏ lah Jơnau Kơnràñ la tòm ryas bơta lơngai hòr lik, ò di la bơta àñ kơñjơ̆ rài kis bol he di. Pò tĕ nùs, nàng Jơnau Yàng gơlik gơs dô yô đàr yò tongguh bơta dòn he, tề lăm bol he mut tòm dô nơm rài kis khat gơboh wil tơltòm bơta nđàc Kơnràñ dê.

Tòm ngai cau Kơnòm Jơnau Niam ngai do, dăn Yàng tơngkah bol he kah lah kơnòm ò di mìng la “pah rài tơnơ̆”, mơ la ală hwềng nus găm geh jao tòm tê bol he di sền gàr, bơtô sồr mơ tề lăm tòm gùng dà Kơnràñ dê. Sră Goh bơtô lah “Bơto tĕ kòn dềt in dô nơm gùng dà khai pal jat; bulah tŭ khai neh kra, kùng ò tŭ lơi sang lòi gơ”. (Pơnđik 22:6)

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.